SAID-bedrogspul: Werknemer gevonnis

‘n Kaapse vrou is Dinsdag tot 12 jaar tronkstraf gevonnis nadat sy die Suid-Afrikaanse Inkomstediens (SAID) uit meer as R6 miljoen bedrieg het.

Neil (39) en Bronwyn Goldman (35), ‘n voormalige werknemer van die SAID, het verlede week in die Bellville-streekhof op byna 400 aanklagte van bedrog verskyn. Hulle het ‘n pleit­ooreenkoms met die staat gesluit waarin hulle skuld op die misdrywe beken.

Bronwyn is tot 15 jaar tronkstraf gevonnis, waarvan drie jaar voorwaardelik vir ‘n tydperk van vyf jaar opgeskort is.

Haar man is tot effektief agt jaar tronkstraf gevonnis, wat opgeskort is vir vyf jaar. Neil sal ook 36 maande onder korrektiewe toesig wees.

Die hof het hul bereidwilligheid om te pleit en hul vier klein kinders in ag geneem.

Bronwyn Goldman het as ‘n groepleier in die oudit-afdeling van die SAID gewerk.

Sy het die stelsel gemanipuleer en ‘n totaal van sowat R6,08 miljoen in haar man se bankrekening betaal as BTW-terugbetalings vir sy duikklop-onderneming.

Die SAID kon slegs R1,947 miljoen van die gesteelde geld terugkry, het Eric Ntabazalila, woordvoerder van die nasionale vervolgingsgesag gesê.

Die hof het gehoor dat die paartjie hul huis verkoop het om die SAID terugbetaal en dat die balju van die hof die duikklop-onderneming verkoop het.

DA vry na daggakop Xhosa-koning

Die Oos-Kaapse DA sal die abaThembu-koning Buyelekhaya Zwelibanzi Vrydag ontmoet.

Die Demokratiese Alliansie se provinsiale leier Athol Trollip het aan die koerant The Star gesê hy is baie opgewonde oor die komende ontmoeting en is nie gepla deur die negatiewe publisiteit wat verband hou met die koning se daggagebruik nie.

“Ek wil nie die kar voor die perd span nie, maar ek is geskeduleer om hom te ontmoet op 12 Julie,” het Trollip gesê.

Volgens die koerant sal Trollip en die koning grondwetlikheid, die DA se grondwet en sy waardes bespreek.

“Ons sal praat oor sy lidmaatskap en die rol wat hy kan speel in die toekoms van die DA.”

Verlede maand het koning Dalindyebo die ANC en president Jacob Zuma as “korrupte lieplappers” in Qunu in die Oos-Kaap beskryf, tydens ‘n gebeddiens vir voormalige president Nelson Mandela.

Dalindyebo het glo gesê die ANC het die anti-apartheid-ikoon se nalatenskap verdraai en hulle is arrogant.

Dalinyebo het gesê hy wil ophou dagga rook die dag as Zuma ophou om korrup te wees.

Hy het ook gesê hy sal by die DA aansluit as ‘n verjaarsdaggeskenk aan Mandela.

Nuwe ministers sal vandag beëdig word

Vyf nuwe ministers en vier nuwe adjunkministers word vandag in hulle ampte be-ëdig.

President Jacob Zuma het gistermiddag op ‘n nuuskonferensie by die Uniegebou in Pretoria bekend gemaak dat Connie September die nuwe Minister van Huisvesting sal wees in die plek van Tokyo Sexwale, terwyl Yunis Carrim, Dinah Pule as Minister van Kommunikasie sal vervang.

Die nuwe Minister van Samewerkende Regering en Tradisionele Sake is Lechesa Tsenoli, wat in die plek van Richard Baloyi kom.

Die nuwe minister van Energie is Ben Martins en van Vervoer Dipuo Peters- wie se portefeuljes omgeruil is.

Die nuwe adjunkministers is John Jeffery – Justisie, Michael Masutha – Wetenskap en Tegnologie, Andries Nel – Samewerkende Regering en Tradisionele Sake, en Pamela Tshwete – Landelike Ontwikkeling en Grondhervorming.

DA gaan glo EFF teen ANC befonds

Die DA gaan help om die EFF te befonds. Raadslede van die regerende party wat die burgemeester in Tlokwe ontsetel het, het City Press berig, is ook ondersteuners van Julius Malema se nuwe politieke groepering.

Annette Combrink van die DA is intussen herkies as burgemeester na die afsetting van die ANC se Maphetle Maphetle.

Haar terugkeer is grootliks te danke aan die ANC se eie raadslede wat onder mekaar baklei.

‘n Groep van 16 ANC-raadslede is aanvanklik geskors nadat ‘n mosie van wantroue met opposisiepartye teen Maphetle in November geslaag het. Die ANC se NUK het tussenbeide getree en Maphetle is drie maande later weer herstel.

Maar toe die raadslede ontdek dat die ANC van plan is om hulle te dissiplineer, ten spyte van beloftes om dit nie te doen nie, het hulle weer teen Maphetle gestem. Nou is 14 van die raadslede afgedank deur die ANC.

Nege van hulle wil ​​as onafhanklike kandidate in die tussenverkiesings staan en die DA is glo bereid om hulle te befonds.

Die raadslede is ook ondersteuners van die voormalige ANC Jeugliga-leier, Julius Malema se ekonomiese vryheidsvegters (EFF). Ten spyte daarvan sal die DA hul verkiesingsplakkate befonds.

Julius Malema gaan aanstons glo landwyd toer om ook ander ontnugterde ANC-ondersteuners vir sy Economic Freedom Fighters (EFF) te werf.

Sy eerste byeenkoms is Saterdag in Sasolburg, waar oproer reeds verskeie kere ferm polisie-optrede genoop het.

Die EFF sal in die Vrystaat, Mpumalanga, KwaZulu-Natal en Noordwes ondersteuners mobiliseer in aanloop tot hul nasionale vergadering wat einde Julie in Soweto gehou word.

Die EFF sal die onstabiliteit in die mynsektor en die opstand in die ANC in Noordwes waar die DA weer die Tlok­we-munisipaliteit oorgeneem het weens binnegevegte onder ANC-raadslede, uitbuit en sal op die DA se ondersteuning in Potchefstroom kan staatmaak.

 

Mandela by sy volle bewussyn, verjaarsdagboodskappe stroom in

Mense wat oudpres. Nelson Mandela in die Harthospitaal besoek het, sê hy is aan ‘n asemhalingstoestel gekoppel met ‘n pyp in sy keel, berig Eyewitness News.

Volgens van sy besoekers is Mandela by sy volle bewussyn en reageer wanneer daar met hom gepraat word.

Makaziwe Mandela het by die hospitaal in Pretoria opgedaag, waar haar pa steeds in ‘n kritieke toestand is.

Sy het Maandag alleen by die hospitaal opgedaag en geen ander familie is gedurende dag die by die hospitaal gesien nie.

Bantu Holomisa, UDM-leier, het ‘n rukkie later by die hospitaal opgedaag.

Die Nelson Mandela-­sentrum van Herinnering het vroeër briewe en boodskappe van beterskap wat die afgelope paar weke buite ‘n muur by die hospitaal neergesit is, gaan haal.

“Ons neem die briewe en boodskappe van ondersteuning na die [Mandela]-familie en indien daar kontakbesonderhede is, sal die familie reageer,” het David Sithole, ‘n beampte van die sentrum, gesê.

Hy het gesê die familie is dankbaar vir diegene wat boodskappe vir Mandela gestuur het.

Die 94-jarige voormalige staatshoof, wat Maandag sy 31ste dag in die hospitaal deurgebring het, word vir ‘n herhalende longinfeksie behandel.

Intussen het die voormalige Amerikaanse president, Bil Clinton, die Dalai Lama, Aartsbiskop Desmond Tutu en die sakeman, Richard Branson ‘n spesiale boodskap aan Mandela gestuur vir sy verjaarsdag op 18 Julie.

Die leiers loof Madiba in die videoboodskap vir sy lewenslange toewyding aan ander.

Die leiers sê in die boodskap hulle is almal geraak deur Mandela se diensbaarheid.

Daar was volgens hulle nog nooit in die geskiedenis iemand wat so universeel erken word vir versoening as Nelson Mandela nie.

Aardbewing by Badplaas rig nie veel skade aan nie

Die aardbewing van vier komma sewe op die Richterskaal wat gisteraand naby Badplaas in Mpumalanga voorgekom het, het angstigheid veroorsaak, maar geen beduidende skade aangerig nie.

Die dagblad Beeld berig die aardbewing is tot so ver as Komatipoort en dele van Swaziland gevoel.

Volgens die eienaar van die bekende Sudwala-grotte, Phillip Owen is die grotte nie beskadig nie.

Die episentrum van die aardbewing was reg langs die Vygeboomdam by Badplaas.

Volgens die Europees-Meditereense Seismologiese Sentrum in Frankryk het die aardbewing sowat vyf kilometer onder die aardoppervlak voorgekom.

Mandela is nie bewusteloos nie, medici weier om masjiene af te skakel

Oudpres. Nelson Mandela se medici het die gedagte om die lewensondersteuningsmasjiene af te skakel, verwerp. Hulle sou dit net oorweeg in die geval van massiewe orgaanversaking.

Denis Goldberg, ‘n anti-apartheidsaktivis wat Mandela al langer as 50 jaar ken, het gesê die kwessie om die lewensondersteuningsmasjiene af te skakel is bespreek, maar uiteindelik verwerp.

“Die dokters het aangedui dat hulle eers dié opsie sal oorweeg indien sy organe begin ingee,” het Goldberg Vrydag aan AFP gesê. “Aangesien dit nog nie gebeur het nie, gaan hulle hom stabiel hou totdat hy herstel.”

Die 80-jarige Goldberg is in 1964 saam met Mandela gevonnis vir hul stryd teen apartheid. Hy het Mandela Maandag in die hospitaal besoek.

‘n Hofdokument wat nege dae gelede namens Mandela se familie ingedien is, het aangedui dat die 94-jarige voormalige staatshoof “in sy asemhaling bygestaan word deur lewensondersteuningsmasjiene”.

“Mediese praktisyns het die Mandela-familie aangeraai om die lewensondersteuningsmasjiene af te skakel,” het die hofdokument gelui. “Die familie oorweeg hierdie opsie baie sterk om seker te maak dat sy lyding nie uitgerek word nie.”

Die dokument, wat opgestel is om ‘n hof te noodsaak om ‘n dringende uitspraak in ‘n familietwis oor die oorskot van Mandela se kinders te lewer, het ook aangedui dat Mandela “in ‘n permanente vegetatiewe toestand” is.

Die presidensie het intussen aangedui dat dit nie die geval is nie, maar weier om verdere besonderhede oor sy toestand te verskaf, omdat dit Mandela se privaatheid sal skaad.

President Jacob Zuma en familielede van Mandela het intussen aangedui dat sy toestand verbeter het.

“Hy is duidelik baie siek, maar hy is by sy volle positiewe en hy het probeer om sy mond en oë te beweeg toe ek met hom gepraat het,” het Goldberg vroeër verduidelik. “Hy is definitief nie bewusteloos nie, hy het geweet wie ek is.”

Mandela is op 8 Junie in die hospitaal opgeneem met ‘n herhalende longinfeksie.

Makaziwe Mandela lieg glo in hof

Die Sunday Times berig dat David Smith – ‘n advokaat wat die oudpresident se Amerikaanse dogter, Makaziwe, en 15 ander verdedig – valslik aan waarnemende regter Lusindiso Pakade gesê dat die familie aangeraai is om die siek staatsman se lewensondersteuningsmasjiene af te skakel, aangesien hy in ‘n “permanente vegetatiewe toestand” was.

Die koerant het sedertdien vasgestel dat daar nooit so ‘n mediese beëdigde verklaring opgestel is nie.

Die gejaagde hofbeslissing om drie van oudpres. Nelson Mandela se kinders op Qunu in die Oos-Kaap te herbegrawe, is glo op ‘n leuen gebaseer.

Waarnemende regter Pakade het geweier om sy beslissing met die Sunday Times te bespreek. Smith het nie die koerant se oproepe en boodskappe geantwoord nie. Makaziwe het aan die koerant gesê om haar nie weer te bel nie.

Die bewering dat die oudpresident se dokters in ‘n beëdigde verklaring sou getuig dat hy in ‘n permanente vegetatiewe toestand was, het die waarnemende regter genoop om Makaziwe se eis teen haar neef Mandla te bespoedig.

Prokureur Wesley Hayes, aangehaal deur Smith as die bron van die verslag oor Mandela se “haglike toestand”, het geweier om te sê wie die verslag dat die dokters die gesin aangeraai het om Mandela te laat sterf, verskaf het.

Dit blyk uit verskeie bronne, insluitend Mandla Mandela, sowel as mediese personeel verbonde aan die span wat die voormalige president in die MediClinic Hart-hospitaal in Pretoria behandel.

Die valse bewering dat Mandela se dokters sal getuig in ‘n beëdigde verklaring dat hy in ‘n permanente vegetatiewe toestand is, het Pakade genoop om Makaziwe se eis teen haar neef, Mandla, vir beheer oor die liggame van haar drie broers en susters te versnel.

Die Amerikaanse Makaziwe het reeds ingestem dat die Amerikaanse uitsaaier CNN die begrafnis eksklusief dek, glo in ruil vir ‘n groot som geld.

Die voorsitter van die Oos-Kaapse Balieraad, Gerald Bloem, het gesê Smith se gedrag sal ondersoek word as ‘n formele klag gelê word.

Hy het gesê dit is “ontstellend” en “vreemd” dat dringendheid ‘n kwessie was, op die basis van ‘n mediese verslag wat nie verstrek is nie.

Mandla Mandela se prokureurs sal blykbaar ‘n klag by die raad indien.

Die Sunday Times het probeer om oor ‘n paar dae kommentaar te kry van Makaziwe. Al wat sy wil sê is: “Ek wil nie kommentaar aan die Sunday Times gee nie en ek het gesê julle ouens moet ophou om my te bel.”

‘n Militêre bron, wat toesig oor Mandela se sorg hou, het gesê dit is “hoogs onwaarskynlik” dat die betrokke medici die beëdigde verklaring sou verskaf.

Hoewel haar naam op die aansoek vir dringendheid verskyn het, het Winnie Madikizela-Mandela glo nie die dringendheidsaansoek ondersteun nie.

“As dit is bewys word dat Madiba se gesondheidstoestand misbruik is om die regstelsel te mislei, dan is dit ‘n hartseer dag vir ons almal,” het Mandla gesê.

Mandla se prokureur, Hymie Zilwa, bevraagteken hoe die regter ‘n finale bevel kon uitgereik het sonder hulle teenwoordigheid.

“Daar was ook geen bevestigende beëdigde verklarings van die res van die aansoekers nie, wat basies sê dat Makaziwe gemagtig was om die res van die aansoekers te verteenwoordig,” sê Mandla se regsverteenwoordiger.

Mandela-familie gee eksklusiewe begrafnisregte aan CNN

Die Mandela-familie twis nou nog verder, dié keer oor die uitsaairegte vir Nelson se begrafnis wat aan CNN verkoop is. Die SAUK is droëbek en gebelg daaroor.

Mandla Mandela beskuldig die res van die familie daarvan dat hulle ook gelieg het oor Nelson Mandela se gesondheid terwyl hulle besig was om met die Amerikaanse uitsaaier CNN te onderhandel.

Volgens ‘n berig in vandag se Sunday Independent is ‘n “sensitiewe vergadering” aan die einde van verlede maand met die SAUK gehou. Tydens daardie vergadering het die Mandelas geëis dat CCN “voorkeurbehandeling” moet kry tydens ‘n eventuale begrafnis vir Nelson Mandela.

Die SAUK het gevoel dié eise was “onvanpas”. ‘n Amptenaar van die SAUK het gesê:

“Ons voel in die gesig gevat. Maar dit lyk asof daar min is wat ons hieraan kan doen aangesien die familie blykbaar hul eie planne het.”

‘n Tweede amptenaar van die SAUK het hom soos volg uitgelaat: “Dit was geen versoek nie. Hulle het dit geëis. Die CNN-ooreenkoms is klaar aangegaan.”

Dis egter nie duidelik wie van die Mandela-familie voordeel uit die CNN-ooreenkoms gaan trek en of enige betalings gemaak is nie.

Van hulle kant af wou CNN ook geen besonderhede bekendmaak nie en hul Johannesburgse verteenwoordiger, Kim Noorgaard, beweer dat sy nie op hoogte is nie. Bestuurders van CNN in Atlanta,VSA, kon nie deur die Sunday-Independent-verslaggewer bereik word nie.

Makaziwe Mandela was ontsteld om te verneem dat die nuus uitgelek het. Sy wou nie verder praat as die naam van die SAUK-amptenaar nie bekendgemaak word nie.

“Sê my dadelik wie dit was,” het sy geëis. “Dit was ‘n vetroulike vergadering en daar behoort nie daaroor gepraat te word nie.”

Indien Mandela te sterwe sou kom, sou die SAUK in elk geval die enigste uitsaaier wees wat ‘n intydse uitsaaidiens gaan aanbied. Daardie toevoer sal dan kosteloos aan die res van die wêreld beskikbaar gestel word, waaronder CNN.

Te veel kiesers en te min mense in Zim

“Die Zimbabwiese kiesersrol wat verlede maand uitgereik is, laat ernstige vrae ontstaan oor die moontlikheid of dié land se algemene verkiesing einde vandeesmaand enigsins vry en regverdig kan wees,” sê dr. Corné Mulder, die Vryheidsfront Plus se woordvoerder oor internasionale betrekkinge.

Volgens die kiesersrol is die aantal geregistreerde kiesers in Zimbabwe veel meer as die bevolking in 78 van sy 210 kiesafdelings, asook in alle bevolkingsgroepe van dertig jaar en ouer gemeet aan die laaste nasionale sensus wat in 2012 in dié land gedoen is.

Dit selfs nadat 300 000 afgestorwe persone van die kiesersrol verwyder is.

Volgens dr. Mulder het ‘n onafhanklike navorsingsverslag van die Research and Advocacy Unit (RAU) wat in die media gepubliseer is, hierdie skoksyfers aan die lig gebring. Die RAU is ‘n nie-regeringsorganisasie wat in Zimbabwe gesetel is.

Daarvolgens het Zimbabwe, met sy totale bevolking van 12,754 miljoen (2012-sensus) meer as 116 000 kiesers van honderd jaar en ouer op die kiesersrol in vergelyking met Suid-Afrika (met meer as 50 miljoen inwoners) se getal van 255 000 inwoners bo die ouderdom van 85.

Die grootste onreëlmatighede kom voor in die ouderdomsgroepe 80+ waar daar 219% meer mense op die kiesersrol is as wat sensus-statistiek aandui, en in die 40 – 44-groep waar daar 162% meer mense op die kiesersrol is.

Waarnemers meen dat die kiesersrol met tot soveel as 1,2 miljoen name gelaai is. Volgens dr. Mulder maak dit die deur oop vir grootskeepse bedrog en stemknoeiery wat bedenkinge laat ontstaan of die verkiesing vry en regverdig kan wees.

“Die VF Plus wil hom om hierdie redes opnuut uitspreek teen die lening van meer as R900 miljoen van die Suid-Afrikaanse regering aan Zimbabwe vir die verkiesing.

“Daar is steeds geen voorwaardes aan die lening gekoppel nie en ons eis dat die regering sê wat die motivering, terugbetalingsvoorwaardes en waarborge is wat aan die lening gekoppel is,” sê dr. Mulder.

Mulder het egter nie aangedui hoeveel Zimbawiërs hulself tans in Suid-Afrika bevind en of dit ingereken is in die opname nie.