Kundigheidsverlies ‘n kopseer

Swak bestuur is besig om Suid-Afrika duur te kos in terme van wetenskaplike- en tegnologiese vooruitgang, en veral die verlies aan top-kundiges op die gebied, wat deur ander lande opgeraap word, is ‘uiters kommerwekkend’.

Adv. Anton Alberts, die Vryheidsfront Plus se woordvoerder oor wetenskap en tegnologie, het vandag met die begrotingposdebat van die department van wetenskap en tegnologie ook gepraat oor die Sunspace-program wat weens kortsigtigheid en swak besluitneming aan regeringskant deels ten gronde gegaan het.

“Sunspace, ‘n satellietvervaardigingsmaatskappy wat reeds groot sukses met die bou van ‘n satelliet behaal het, se geldelike steun van die regering is ingekort. Die ‘enigste private ruimtevaartmaatskappy’ sal nou met Denel moet saamsmelt in ‘n poging om hom van ondergang te red,” sê adv. Alberts.

“Dit is kommerwekkend om te sien dat die intellektuele kapitaal of menslike hulpbronne rondom die gestaakte korrelbedkernreaktor-program nou ook privaat voortgaan met die projek in die VSA. Dit laat die vraag ontstaan of daar ooit probeer is om die talent vir Suid-Afrika te behou.

“Hierdie departement speel ‘n groot rol om te sorg dat Suid-Afrika deel bly van hierdie breë beweging van wetenskap en tegnologie wat aan ons kennis bring oor die aard van ons bestaan asook hoe ons die toekoms kan bestuur tot voordeel van almal op aarde.

“Hy moet ook die volle potensiaal van wetenskap en tegnologie realiseer in sosiale en ekonomiese ontwikkeling deur menslike hulpbronne, navorsing en innovasie.

“Wat met Sunspace gebeur het, en die feit dat die land van sy voorste wetenskaplikes en tegnoloë weens die regering se stiksienigheid verloor, is ‘n terugslag vir die land.

“Die minister kan ingryp om oplossings te vind. Een van die belangrikste dinge is om Sunspace van ondergang te red,” het adv. Alberts gesê.

Entstofveldtog by skole van volgende jaar

Die regering sal in Februarie aanstaande jaar begin om entstowwe teen servikale kanker by skole toe te dien.

Die minister van gesondheid, Aaron Motsoaledi sê die regering hoop om te onderhandel oor laer pryse vir die entstof teen die menslike papilloomvirus, wat servikale kanker veroorsaak.

Die entstof sal toegedien word aan nege- en tienjarige meisies, aangesien die entstof slegs doeltreffend is voordat meisies seksueel aktief begin raak.

Motsoaledi het ‘n beroep op mediese fondse gedoen om vir die entstowwe te betaal. Hy sê servikale kanker raak sesduisend Suid-Afrikaanse vroue per jaar, en bykans die helfte van hulle sterf jaarliks daaraan.

Werk by Lonmin hervat na rand val

Werk by al 13 skagte van Lonminmyn in Marikana in die Noordwes is hervat.

Die stakende werkers het laat Woensdag ‘n onwettige staking van twee dae beëindig en bedrywighede is dieselfde aand hervat.

Die staking het tot ‘n einde gekom nadat Joseph Mathunjwa, president van die Association of Mineworkers and Construction Union (Amcu), Woensdag meer as 5 000 werkers by die Wonderkop-stadion toegespreek het.

“Daar is kanale wat gevolg moet word… gaan terug werk toe sodat jul vyande nie voordeel uit hierdie situasie trek nie,” het Mathunjwa aan die werkers gesê.

Amcu, die mynbestuur en die Kommissie vir Versoening, Bemiddeling en Arbitrasie (KVBA) sal Donderdag vergader om Amcu se erkenning as meerderheidsvakbond te bespreek, berig RSG.

Mathunjwa het vroeër aangedui dat ‘n staking kan volg indien die vakbond nie tevrede is met die uitslag van dié samesprekings nie.

Die mynwerkers het Dinsdag begin staak en eis dat die National Union of Mineworkers se kantore by Lonmin onmiddellik gesluit word.

Die rand het tot sy swakste vlak sedert middel-April gedaal en verhandel tans teen R9,22 teenoor die dollar, berig RSG.

Die nuwe vrese oor arbeidsonrus in Marikana in die Noordwes het opgevlam na die onwettige staking begin het.

Die stakers was kwaad oor die dood van ‘n vakbondleier die afgelope naweek in Nkaneng. Hulle eis dat die vakbond, die NUM se kantore by Lonmin gesluit word.

Lonmin se aandeleprys het Dinsdag byna 7% laer gesluit.

Mediakonferensie kom binnekort oor Gupta-verslag

Die ministers van justisie, misdaadvoorkoming- en veiligheid sal binnekort ‘n nuuskonferensie hou om die uitslag van die ondersoek na die ongemagtigde landing van ‘n private straler op die Waterkloof-lugmagbasis bekend te maak.

Phumla Williams, woordvoerder van die regering, het gesê die groepering is daartoe verbind om te verseker dat streng maatreëls getref word om ‘n herhaling daarvan te voorkom, het RSG berig.

‘n Straler, wat deur die skatryk Gupta-familie gehuur is, het op 29 April met 270 bruilofgaste aan boord by die lugmagbasis geland.

Gaste het die troue van Vega Gupta by Sun City bygewoon. Die landing by ‘n nasionale sleutelpunt het groot kritiek uitgelok.

Intussen is daar nog nie ‘n besluit geneem oor of ‘n klag by Indië gelê gaan word oor die landing nie.

Die adjunkminister van internasionale betrekkinge en samewerking, Ebrahim Ebrahim, het Dinsdag gesê besluite sal eers geneem word nadat ‘n ondersoek in die saak afgehandel is.

“In hierdie stadium was daar geen klagtes aan die Indiese regering gemaak oor die Indiese hoë-kommissaris (Virendra Gupta) nie. Ons wag vir die bevindinge van daardie kommissie,” het hy aan verslaggewers in Pretoria gesê.

“Afhangende van die kommissie se bevindinge sal ons sien watter besluite geneem word,” het hy gesê.

Virendra Gupta is nie familie van die ryk Gupta-familie nie.

Die Guptas besit die New Age-koerant, sowel as Sahara Computers.

Twee wat Mpofu aanval, vasgetrek

Twee mans is in hegtenis geneem in verband met die aanranding van adv. Dali Mpofu in Oos-Londen, het die polisie in die Oos-Kaap Woensdag gesê.

Die twee, wat beide 23 jaar oud is, is Dinsdag in Cambridge in hegtenis geneem, het brig. Phuti Setati gesê.

Die polisie het daarin geslaag om beslag op die [beweerde] wapen te lê… sowel as die selfoon wat gesteel is,” het hy gesê.

Mpofu, wat die mynwerkers verteenwoordig wat in verlede jaar se skietery met die polisie in Marikana betrokke was, is op 11 April beroof en met ‘n mes gesteek terwyl hy op ‘n strand in Oos-Londen gestap het.

Die voormalige uitvoerende hoof van die SABC is drie dae later uit die hospitaal ontslaan en was aangeraai om nie per vliegtuig te reis nie weens die skade aan sy longe.

Setati het gesê die polisie het vasgestel dat beide die verdagtes uit was op R500 se borgtog vir ‘n beweerde rooftog in Oktober.

In daardie voorval is ‘n toeris en polisiereservis van hul selfone beroof. Die twee beskuldigdes sal op 24 Mei weer in die landdroshof in Oos-Londen verskyn in verband met die roofsaak.

Hulle sal Vrydag in dieselfde hof verskyn in verband met die aanval op Mpofu. Hulle staan tereg op aanklagte van aanranding met die doel om ernstig te beseer en roof.

Gupta-uitnodiging deur bomeenheid opgeblaas

Noordwes-polisiebeamptes het ‘n uitnodiging na Vega Gupta se uitspattige troue opgeblaas omdat hulle gedink het dis ‘n plofbaar.

The Star berig die uitnodiging was aan die provinsiale polisiekommissaris, lt.kol. Merriam Mbombo, gerig.

Brig. Thulani Ngubane het aan die koerant verduidelik dat die pakkie verdag gelyk het.

“Ons het die uitnodiging gekry, maar Mev. Mbombo het nie ‘n uitnodiging verwag nie.

“… Dit het gelyk asof dit drade [aangeheg] gehad het en ons moes ons normale veiligheidstoetse doen.”

Ses versierde silinders was aangeheg, wat na bewering geskenke soos sjokolade bevat het.

Luidens die berig het ‘n snuffelhond ook op iets verdag afgekom.

“So ons het geen keuse gehad nie… en moes die bomeenheid inroep,” het die polisiewoordvoerder gesê.

Die Guptas het ‘n opskudding veroorsaak toe trougaste drie weke gelede vir die troue by Sun City, by die Waterkloof-lugmagbasis geland het.

Vyf hooggeplaaste amptenare en militêre personeellede is sedertdien geskors.

Verskeie regeringsdepartemente is besig om die saak te ondersoek.

Bruin woonbuurt beleef dwelmkrisis

Die dwelmprobleem in Eldoradopark, ‘n bruin woonbuurt suid van Johannesburg, het “abnormaliteit” bereik, het pres. Jacob Zuma Dinsdag gesê.

“Ek het die brief gelees en ek was geskok. Die graad van die probleem en die beskrywing is ongehoord… hierdie is ‘n krisis, ‘n abnormaliteit,” het Zuma aan inwoners gesê tydens ‘n besoek aan die gebied.

Bekommerde ouers het in April aan Zuma geskryf en gevra dat hy moet help. Verskeie kabinetsministers het hom vergesel tydens sy besoek.

Zuma het aan inwoners gesê dat hy persoonlik beheer sal neem oor die geveg teen dwelms in die gebied.

“Ek gaan ‘n punt daarvan maak om hierdie program self te dryf… die regering moet vinniger beweeg om dit te hanteer.”

Wetgewing rondom wetstoepassing kan moontlik aangepas word sodat kriminele nie agter tegniese aspekte van die wet kan wegkruip nie, het hy gesê.

“Ons kan nie toelaat dat hierdie dwelmbase beheer oor ons gemeenskappe neem en agter tegniese aspekte van die wet wegkruip nie.”

Twee mans is intussen in hegtenis geneem nadat die polisie Dinsdagaand toegeslaan het op ‘n dwelmlaboratorium in Boksburg aan die Oos-Rand, het die Valke gesê.

Kapt. Paul Ramaloko, woordvoerder van die Valke, het gesê beamptes het beslag gelê op toerusting waarmee dwelms vervaardig word en 150 000 Mandrax-tablette met ‘n geraamde straatwaarde van R10,5 miljoen.

Een van die mans in die laboratorium het gevlug.

Die twee mans wat in hegtenis geneem is sal Donderdag in die Boksburg-landdroshof verskyn.

Aanranding op fietsryer ondersoek

Aanklagte van aanranding en roekelose en nalatige bestuur wat deur die Pretoriase fietsryer Hein van der Merwe aanhangig gemaak is, word ondersoek, het die polisie Dinsdagaand gesê.

Die fietsryer het die aanklagte aanhangig gemaak teen ‘n onbekende buitelandse diplomaat se motorbestuurder ná ‘n struweling op 8 Mei.

Brig. Phuti Setati het Dinsdag gesê die diplomaat se motorbestuurder het aanklagte van crimen injuria en intimidasie by die Brooklyn-polisiekantoor in Pretoria aanhangig gemaak.

Setati het gesê die polisie ondersoek al die aanklagte.

‘n Video van die aanranding is op YouTube gelaai.

Van der Merwe het aan die eNCA-nuuskanaal gesê die diplomaat se voertuig het ‘n stopteken op die hoek van Brooks- en Roperstraat verontagsaam en voor hom ingesny.

“In my poging om die bestuurder se aandag te kry deur langs sy venster te skree, het ek herhaaldelik geskree en in ‘n laaste poging het ek twee keer op sy kantspieël geslaan. Die voertuig het probeer om my raak te ry deur in my rigting te swenk.”

‘n Struweling het ontstaan nadat die bestuurder die diplomaat se swart Mercedes Benz langs die pad stilgehou het. In die video kan gesien word hoe die diplomaat se motorbestuurder en lyfwag die fietsryer rondpluk en op die grond vasdruk.

Setati het gesê bewerings dat polisiebeamptes wat op die toneel opgedaag het, nie vir Van der Merwe gehelp het nie, word ook ondersoek.

Hy het gesê diplomate in Suid-Afrika word beskerm deur privaat sekuriteitswagte, nie deur polisiebeamptes nie.

Setati het gesê verklarings is afgeneem en die dossiere is na die direkteur van openbare vervolging gestuur vir verdere instruksies.

Rassespanning tussen swart en Indiër weens Guptas

Die Gupta-debakel het rassespanning tussen swartes en Indiërs verhoog.

‘n Klag van crimen injuria deur Newcastle se burgemeester Afzul Rehman, omdat hy ‘n “Gupta” genoem is, is nou opgevolg deur ‘n hete konfrontasie in Durban met die ANC oor sy “noue bande met Indiërs”.

Phumlani Mfeka, die woordvoerder van die Mazibuye Africa Forum – met meer as 1500 lede – het ‘n reeks rassebeledigings op provinsiale ANC-sekretaris Sihle Zikalala se  Facebookbladsy gelaat, en hom gewaarsku om nie “te probeer om betrokke te raak met [‘n ] samoesa in jou mond nie”.

Mfeka beweer dat die Guptas onder die talle Indiese sakemanne is, soos Schabir Shaik en Vivian Reddy, wat rykdom geniet ver bokant dié van die swart meerderheid, te danke aan hul bande met President Jacob Zuma.

“Die verhouding tussen sommige Indiese sake-individue en ons president is een wat veel te wense oorlaat.

“Hierdie sake-individue mishandel en misbruik die president se naam om hul eie selfsugtige belange te bevorder.

“[Dit] het ‘n ernstige en slegte beeld van ons president en die land as ‘n geheel geskep, in ag genome dat die ANC ingestem word deur swartes.”

ANC-woordvoerder Keith Khoza het gesê dit is verkeerd om te bepaal wie Zuma moet bevriend.

Die SA Minority Rights Equality Movement het gister gesê die Guptas is ‘n familie, nie ‘n ras nie.

“Ons sal nie om verskoning vra vir die feit dat ons Indiërs is nie,” het die beweging gesê.

Die SA Instituut vir Rasseverhoudinge se navorsingsbestuurder Lucy Holborn het gesê kompetisie vir hulpbronne het al dikwels gelei tot rassespanning, insluitend die xenofobiese geweld van 2008.

“Dit is die rede waarom die instituut teen enige beleid is wat nadeel of meriete suiwer gebaseer op ras meet.”

Cosatu kap DA oor befondsing deur Israel-lobby

Die Demokratiese Alliansie het bewerings ontken dat die party befondsing van die Israeliese “lobby” ontvang.

“Die DA het nog nooit verklaar dat ons enige geld ontvang het [van die lobby] nie,” het woordvoerder Mmusi Maimane gesê.

Hy het gereageer op Cosatu se sekretaris Tony Ehrenreich, wat gesê het die DA sal nie teen die Israeliese regering optree nie, want hulle ontvang geld uit dié land.

“As die DA gekant is teen rassisme en apartheid en diskriminerende praktyke in beginsel, hoekom is hulle nie teen die apartheidpraktyke van Israel in Palestina nie?” het Ehrenreich in ‘n verklaring gesê.

“Die realiteit is dat die DA ‘n klomp geld van die Israeliese lobby kry, en daarom sal hulle nie teen die praktyke in Palestina protesteer nie.”

Ehrenreich het reageer op die party se “Ken Jou DA”-veldtog wat die rol beklemtoon wat DA-lede, of mense wat geaffilieer is by die party, gespeel het in die stryd teen apartheid.

Maimane het gesê Cosatu se opmerkings is “jammer en in swak smaak” en het gesê die vakverbond probeer om politieke punte aan te teken.

“Ons dink dat daar ‘n twee-staat-oplossing [tussen Palestina en Israel], en ‘n vreedsame oorgang moet wees soos hier in Suid-Afrika om demokrasie te bevorder.”

Ehrenreich het gesê die DA en sy leier Helen Zille moet verklaar wanneer hulle gaan “ophou om die rassisme van Israel se regering te steun en die mense van Palestina te ondersteun”.

Die twee-staat-oplossing behels die vestiging van ‘n onafhanklike Palestynse staat naas die staat van Israel in die betwiste gebied van die voormalige Britse mandaat van Palestina.