Nuus Archives - Page 944 of 1583

Verkeershoof gebruik vals nommerplate

Die adjunk verkeershoof van die Tshwane Metroraad, Ndumisa Jaca, word nou deur drie organisasies ondersoek oor bewerings dat hy vals nommerplate gebruik.

Hulle is die Padverkeersbestuurskorporasie, die Onafhanklike Klagtedirektoraat en die munisipaliteit. ‘n Woordvoerder van die Korporasie, Ashref Ismail, sê hulle sal later meer besonderhede verskaf.

‘n Woordvoerder van die Klagtedirektoraat, Tiyani Sambo, sê hulle het ‘n klagte ontvang en stel ondersoek in. ‘n Woordvoerder van die Metroraad, Pieter de Necker, het vroeër gesê die munisipaliteit is bewus van die klagtes en is ook met ‘n ondersoek besig.

Koerante het foto’s van ‘n geel motorfiets en ‘n BMW gepubliseer, waarvan altwee die nommerplaat BALTY GP gehad het. Die motor en die motorfiets behoort na bewering aan Jaca wat ook die waarnemende Metropolisiehoof is.

Voorbehoedmiddels in Oos-Kaap ingespuit

Meisies tussen die ouderdomme van 10 en 13 is met voorbehoedmiddels ingespuit by hul laerskool in Zwide, Port Elizabeth, het The Herald Online berig.

Nandipha Ngalo se 11-jarige dogter was een van die meisies wat deur die Dora Nginza-hospitaal se gesinsbeplanningseenheid ingespuit is.

Sy is ‘n leerling aan die Emzomncane Laerskool.

“My bekommernis is watter effek dit op my dogter gaan hê omdat sy nog nie eers begin menstrueer het nie.”

‘n Gr.6-leerder het gesê verpleegsters van die gesinsbeplanningseenheid het gepraat oor “menstruasie en alles wat gebeur” en daarna is elke meisie ingespuit.

Die eenheid het aan die meisies gesê die inspuiting sal swangerskap verhoed indien hulle verkrag word.

Die ouers is later ingeroep en van die inspuitings in kennis gestel.

Thuleka January, skoolhoof, het ontken dat die meisies gedwing is om die inspuitings te neem en het vra na die departement van onderwys verwys.

Marcus van Heerden, ginekoloog van Nelson Mandelabaai, het gesê dit is “heeltemal oneties” en dat die inspuiting puberteit in jong meisies kan vertraag.

Merkel se afskuwelike keuse

Die wêreld wag vir Duitsland se kanselier, Angela Merkel, om ‘n fundamentele keuse te maak. Sy, meer as enige ander Europese politikus, sal moet besluit om die euro te red of toe te gee dat die politieke wil nie daar is nie.

Die euro was veronderstel om Europa te verenig, maar kan Atlantiese verhoudinge na breekpunt dryf. Merkel, 57, sit met ‘n skuldkrisis in Europa en Amerikaanse amptenare vrees dat as sy nie meer beslissend optree nie, ‘n skerp afswaai aan beide kante van die Atlantiese Oseaan kan volg.

Vrese van ‘n verslegtende skuldkrisis het Europese aandele Maandag gestriem, veral aandele van Franse banke wat aan Griekeland lenings toegestaan het. Die Franse regering is gedwing om sy steun vir sy drie grootste finansiële instellings te verklaar.

Die projek vir Europese integrasie, wat in die moeilike jare na die Tweede Wêreldoorlog begin het, is ook op die spel. As Griekeland die euro laat vaar, soos meer en meer stemme in Duitsland eis, sal dit ‘n skielike terugslag vir solidariteit op die vasteland te wees.

Kritici sê Mev Merkel het te veel gefokus op die beskerming van haar politieke loopbaan in Duitsland. Haar regerende koalisie is reeds oor die Griekse kwessie versplinter en haar party, die Christen-Demokratiese Unie, het terugslae in verkiesings, met inbegrip van hierdie maand in die staat van Mecklenburg-Vorpommern, beleef. Haar pa se dood is boonop die toevoeging van persoonlike wroeging te midde van ‘n polities belaaide oomblik.

Cornelius Adebahr, ‘n Europa-kenner by die Duitse Raad op Buitelandse Betrekkinge in Berlyn het gesê. “Sy moet sterker leierskap wys, maar tot dusver het sy nog nie geopenbaar in watter rigting sy regtig wil beweeg nie.”

Gebeure in Frankryk gaan waarskynlik vir Merkel dwing tot ‘n keuse. Met die nuutste markskommelinge hierdie week vanweë die posisie van die Franse finansiële instellings, het die skuldkrisis nou die Duitse grens bereik.

President Nicolas Sarkozy van Frankryk hoop dat Merkel ‘n dieper verbintenis tot ‘n ekonomiese hegte Frankryk en Duitsland, die motor van die Europese integrasie, sal toon.

Toegewyde ondersteuners van die Europese projek agiteer vir ‘n gesentraliseerde fiskale unie, meer soos die Verenigde State van Amerika, Europa se huidige hibriede struktuur, lei tot probleme, sê hulle.

AU, SAOG verdeel oor Libië

Die regering van Botswana het die Libiese Nasionale Oorgangsraad uitgenooi om ‘n ambassade in die hoofstad, Gaberone te open, het RSG berig.

Die regering het onlangs aangekondig dat hy die Oorgangsraad as Libiese regering erken. Dit is in teenstelling met die sienings van sowel die Afrika-unie as die Suider Afrikaanse Ontwikkelingsgemeenskap.

Jeff Ramsay, ‘n woordvoerder van die Botswana-regering, het gesê die stap volg ná verwikkelinge in Libië waarin Moeammar Gaddafi se regering ontsetel is.

Andre Duvenhage, ‘n politieke ontleder, het gesê Botswana se optrede kan lei tot spanning tussen dié land en Suid-Afrika.

Zimbabwe het vroeër die Libiese ambassadeur uit die land gesit nadat hy die Libiese Oorgangsraad gesteun het.

Zuma meen Malema verdien nog ‘n kans

Pres. Jacob Zuma het gesê Malema kan steeds aan die ANC behoort indien hy die party toelaat om ‘n goeie leier van hom te maak, het The Star berig.

Zuma het gesê die ANC wil nie die leier van die ANC-jeugliga uit die openbare oog verwyder nie.

“Nee, ek dink nie dit moet die doelwit wees nie. Ek dink die doelwit is: hoe help jy Malema? Malema beskik oor baie goeie eienskappe,” het Zuma gesê.

“Wat jy moet doen, is om die dinge in Malema wat nie reg is nie, aan te spreek.”

Zuma het egter gesê indien Malema ‘n toekoms in die regerende party wil hê, sal hy reg moet optree.

“Jy kan hom nie toelaat om die verkeerde dinge te doen nie. Met ander woorde, die werk van die ANC is om Malema te help om ‘n goeie, dinamiese leier te word. Dit is wat ons moet doen. Slegs wanneer jy dit nie kan doen nie, word die vraag wat gaan ons met hom doen,” het Zuma gesê.

“Ons moet Malema help om die regte dinge te doen, want as jy Malema help om die regte dinge te doen, het jy ‘n baie goeie jong man wat dinge goed kan oordra.”

Die dissiplinêre verhoor van Malema en vyf ander beamptes van die jeugliga duur Dinsdag voort. Die verhoor is vroeër na Kliprivier in die Vaaldriehoek verskuif, nadat sake-ondernemings in die Johannesburgse middestad die ANC met die hof gedreig het oor die gewelddadige betogings tydens die eerste sessie van die dissiplinêre komitee twee weke gelede.

Malema het gister ‘n blaaskans gekry om die uitspraak in sy haatspraaksaak te bestudeer. Die Gelykheidshof het beslis dat die sing van die liedjie met die woorde “skiet die boer” neerkom op haatspraak. Die ANC het reeds aangedui dat hy teen die uitspraak gaan appelleer, wat hy as skokkend bestempel het.

Jeugligaleiers word daarvan aangekla dat hulle die ANC in oneer gebring het en verdeeldheid in die ANC saai.

Malema het vroeër vandeesmaand gesê het hy het planne om ‘n “bevelspan” saam te stel om weerstand te organiseer teen die president van Botswana, Ian Khama, se bewind.

Afrikanerhaat is die probleem, nie Malema

Terwyl PRAAG die bevinding van regter Lamont verwelkom dat Julius Malema se liedere wel haatspraak verteenwoordig, het die Pro-Afrikaanse Aksiegroep teen enige voortydige vreugde oor die uitspraak gewaarsku. “Suid-Afrika beskik oor ‘n lang tradisie van Afrikanerhaat wat op verskillende maniere manifesteer. Mnr. Malema se uitdagende oproepe tot Afrikanervolksmoord verteenwoordig bloot die simptoom van ‘n dieperliggende siekte binne die Afro-Saksiese identiteit wat daarmee saamval om ‘n sogenaamde ‘Suid-Afrikaner’ te wees,” het die leier van die Afrikanergroep, dr. Dan Roodt, gesê.

PRAAG beskou die sing van anti-Afrikaner- en anti-Boereliedere deur radikale ANC-jeugligalede “as bloot die jongste uitdrukking van ‘n lang tradisie van Afrikanerhaat wat na die vervloë dae van Britse kolonialisme terug te voer is. Die gedagte dat Afrikaners die letsels dra van uitgeworpe te wees vanuit sowel Europa as Afrika, is algemeen en word dikwels in Suid-Afrikaanse Engels uitgedruk. Trouens, mnr. Malema se vertoning van Afrikanerhaat word heimelik geniet deur diegene wat steeds die feit betreur dat Brittanje nie ‘die taak voltooi het’ in 1902 nie en Boerekinders en -vroue toegelaat het om te oorleef, in weerwil van ‘n gruwelike volksmoord wat destyds teen hulle gepleeg is. In ‘n sekere sin is mnr. Malema die produk van die toenemende verengelsing en ver-Afro-Saksering van Suid-Afrika, ‘n proses wat so ywerig deur die vorige ministe van opvoeding, Kader Asmal, voortgestu is. Asmal het insgelyks Afrikaners en Afrikaans verafsku.”

In weerwil van die positiewe uitkoms van die hofsaak, is PRAAG pessimisties oor die toekomstige moontlikhede van etniese saambestaan in Suid-Afrika. Volgens dr. Dan Roodt, “moet hierdie gebeurtenis as ‘n klein oorwinninkie op die pad van Afrikaner-emansipasie van die geweld, onrede, korrupsie en diskriminasie van die sogenaamde ‘nuwe Suid-Afrika’, wat slegs in naam demokraties is, gesien word. Suid-Afrika is ‘n land vol haat wat in die gruweldade van plaasmoorde manifesteer, maar ook in die onderdrukking van Afrikaans en die Afrikaneridentiteit deur die Afro-Saksiese staat.”

PRAAG het ‘n beroep op alle Afrikaners gedoen om deel van die stryd vir ‘n durende vryheid, veiligheid en vrede te word. “Mnr. Malema, soos vele ander, het ons waardigheid en menslikheid vertrap. In die woorde van regter Lamont, het hy ons verontmenslik, wat ‘n stap onderweg na volksmoord verteenwoordig,” het dr. Roodt gesê. “Soos die mense van Kosovo en vele ander wat aan etniese haat en onophoudelike propaganda onderwerp is, sal Afrikaners slegs veilig wees in ‘n land en ‘n republiek van hul eie.”

Roodt het ook teen “die masochistiese neigings van sommige Afrikaners”, soos die skrywer André P. Brink, te velde getrek. Brink het gister op SABC1 verklaar dat “hy aan ‘n volk behoort wat uitsterwing verdien” en dat hy “oor ‘n vreemde lus om gewelddadig te sterf” beskik. Vele Afrikaners ly reeds aan die Stockholm-sindroom, waardeur hulle met hul verdrukkers, hul folteraars en laksmanne identifiseer.

“Ons moet haatspraak en propaganda verwerp, maar ook hierdie tipe veragtelike en skuldbelaaide angs oor ‘n mens se eie identiteit. Brink en ander het die logika van Afrikanerhaat verinnerlik. Julius Malema is makliker om te hanteer en minder skadelik as André P. Brink se uitdrukkings van selfhaat,” het Roodt afgesluit.

Лобановский

Aanval op Israeli-ambassade in Kaïro beklemtoon isolasie

Die aanval op die Israeliese ambassade in Kaïro dié naweek het Israel se toenemende isolasie beklemtoon.

Israel is die pas afgelope naweek gedwing om die ambassadeur en die meeste van sy diplomatieke personeel van Kaïro te ontruim nadat honderde Egiptiese betogers ‘n veiligheidsmuur ter beskerming van die Nyl-oewerambassade afgebreek het, lêers geplunder het en ‘n Israeliese vlag verbrand het.

Dit kom minder as ‘n week nadat Turkye, Israel se ander groot bondgenoot in die Moslemwêreld, aangekondig het dat hulle die Israeliese ambassadeur sal uitsit en die twee lande se verhouding tot die laagste moontlike vlak sal afgradeer ná die dodelike skermutseling met ‘n Turkse vaartuig wat hulp aan die beleerde Gasagebied wou bring.

‘n Ander potensiële penarie broei later hierdie maand wanneer die Palestyne na verwagting om lidmaatskap by die VN sal aandring as selfstandige staat.

Die skade aan verhoudings met Egipte en Turkye het baie Israeli’s getref. Turkye was die eerste Moslemland wat Israel as ‘n Joodse staat in 1949 erken het en Egipte was die eerste Arabiese land wat ‘n vredesverdrag met Israel in 1979 gesluit het.

Israeliese eerste minister Benjamin Netanyahu was vinnig om die aanval op die Israeliese ambassade in Kaïro te veroordeel, maar het ewe vinnig bygevoeg dat die historiese vredesooreenkoms tussen Israel en Egipte nog ongeskonde bly.

Die beeld van die brandende vlag is prominent op Israeliese televisie vertoon, met verskeie kommentators wat gevra het of dit die laaste Israeliese vlag ooit in Egipte sal wees.

Op Israel se Kanaal Twee-nuus, het die nuusleser die Saterdagaanduitsending afgesluit deur te vra of Israel nou oplaas “alleen, sonder ‘n vriend in die streek” is.

Netanyahu en die minister van buitelandse sake, Avigdor Lieberman is verdeeld oor hoe om die groeiende isolasie die hoof te bied.

Onder Lieberman se aanvoering, het die ministerie van buitelandse sake begin met die opstel van ‘n lys van “strawwe” vir Turkye. Intussen, het Netanyahu se kantoor oproepe vir selfbeheersing gedoen en ‘n afskaling van die vyandelikhede tussen die twee lande bepleit.

Turkse amptenare het gesê dat die verhouding met Israel nie sal verbeter totdat Israel om verskoning vra vir die moorde verlede jaar van nege Turkse onderdane aanboord van die Turkse Mavi Marmara-skip wat deur die Israeli-vlootkommando’s bestorm is nie.

Amerikaanse amptenare het onsuksesvol probeer om ‘n verskoning van Israel aan Turkye te onderhandel oor die voorval.

Verskeie Europese lande het te kenne gegee dat hulle bereid is om te stem ten gunste van die Palestynse staat, om Israel in ‘n moeilike posisie te plaas.

Palestynse wetgever Hanan Ashrawi, wat sal help met die bekendstelling van die bod by die VN, het gesê: “Ons sal vorentoe gaan ten spyte van die dreigemente van Israel en sy bondgenote. Wanneer die stemming gebeur, sal Israel sien hoe geïsoleerd hy werklik is.” Sy het bygevoeg dat die Verenigde State, Israel se belangrikste bondgenoot, “skaam” gaan kry.

“Ek dink die Verenigde State is keer op keer weer gewaarsku – deur sy eie mense – dat sy vennootskap met Israel nie nou in sy beste belang sal wees nie,” het sy gesê. “Maar hulle gaan voort om by Israel te staan, en ignoreer die veranderinge in die streek wat die Arabiese lente gebring het.”

Libiese grondgebied steeds in Gaddafi se hande

‘n Nuwe oorgangsregering sal binne die volgende 10 dae in Libië opgestel word, het die adjunkhoof van die Nasionale Oorgangsraad (NOR) Sondag aan verslaggewers gesê.

“‘n Nuwe regering sal binne ‘n week tot 10 dae gevorm word,” het Mahmud Jibril, wat as die ‘eerste minister’ van die NOR dien. Die NOR is die politieke vleuel van die rebellie wat Moeammar Gaddafi ontsetel het.

“Hierdie nuwe regering sal verteenwoordigers van verskeie streke in Libië insluit,” het Jibril gesê.

Rebellemagte is steeds “in die proses om Libië te bevry en revolusionêre stryders is steeds aan die fronte,” het Jibril bygevoeg, met verwysing na veral Bani Walid en Sirte, waar magte lojaal aan Gaddafi steeds weerstand bied.

Hy het gesê die nuwe regering sal gevorm word “sodra Libië bevry is”.

Jibril het ook die “bevryding van Tripoli sonder bloedvergieting” verlede maand geprys.

“Ons het ‘n bloedbad verwag, maar dit is verhoed deur die volwassenheid van die vegters wat die hoofstad kon oorneem,” het hy gesê.

Die noord-westelike voorstede van Tripoli verkeer egter volgens Russiese bronne onder swaar artillerievuur. In Salah Edden is drie tenks van rebelle vernietig en ses vegters het gesneuwel. Daar is inligting vrygestel oor ‘n opmars van ‘n swaar gewapende militêre eenheid onder leiding van Khamis Gaddafi in Tripoli, in die suidelike voorstede van Az Zawiya.

In Bani Walid het stamleiers besluit om nie oor te gee nie, en selfversekerd van hul vermoë, die stad te verdedig teen die NAVO-aanval.

Daar is teenstrydige inligting oor die sterkte van die rebelleleër rondom die stad. Woensdag het ‘n aanval op NAVO glo honderde rebellelewens geëis.

‘N NAVO-konvooi is aangeval by Tarragon waarby 14 rebelle gedood is. Die bombardement op Sirte hou steeds aan. ITAR-TASS het berig dat oorlogsmisdade deur die rebelle in Az Zawiya gepleeg word.

In Benghazi neem die onenigheid glo tussen stamme, moslems en huurlinge uit die Midde-Ooste toe. Daar is berigte oor gevegte tussen verskillende rebellegroepe en selfs oor NAVO-lugaanvalle teen rebelle uit Benghazi.

Moontlik sluit die stam van Cyrenaica hom aan by die res van die stamme wat die Jamahiriya (Sosialistiese Stelsel van Gaddafi) ondersteun.

Algerië stuur ook steeds humanitêre hulp na Libië. Siriese en Algerynse kuberkrakers het intussen ‘n Ddos-aanval op die webwerf van Al Jazeera geloods. Owerhede van Sentraal-Afrika, waaronder Mali en Niger, het hul kommer uitgespreek oor die verwikkelinge.

In die pas afgelope 72 uur is ten minste 128 rebelle deur lojaliste van Gaddafi doodgemaak, en 25 voertuie waaronder twee tenks, is vernietig. Uit verskillende ramings blyk dit dat ongeveer 70 tot 80 persent van Libiese grondgebied in die

besit van die stamme is wat lojaal aan Gaddafi is.

Malema kry nog ‘n hou

Die ANC se nasionale dissiplinêre komitee het Sondag ‘n betoog van Julius Malema, leier van die ANC-Jeugliga, dat dié liggaam die heersende party se grondwet oortree, verwerp.

“Die NDK het sy beslissing gemaak oor die aansoek van kameraad Julius Malema dat die NDK die ANC-grondwet oortree deur die bevindinge oor die aansoek om die klagtes te skrap aan die media bekend te maak,” het die hoof van die komitee, Derek Hanekom, gesê.

“Die NDK het die aansoek verwerp. ‘n Volledige afskrif van dié beslissing is in sy geheel aan die media gestuur.”

In ‘n aparte verklaring het die komitee verduidelik dat reël 25 van die grondwet nié oortree is nie, aangesien die bevindinge wat op 2 September bekend gemaak is nie die finale uitkoms van die verhoor was nie, maar bloot verband gehou het met ‘n kwessie van prosedure.

“Die publikasie van die beslissing oor die aansoek om die klagte te skrap, het slegs verband gehou met kwessies van prosedure en het nie gepraat oor die inhoud, substansie of bewyse wat met die klagte verband hou nie.”

Die verklaring het bygevoeg dat die publikasie van die bevindinge geregverdig was, aangesien inligting wat aan die media gelek is verwarring kon saai en dat Malema nie ‘n slagoffer van vooroordeel was nie.

Hanekom het gesê die paneel het ‘n versoek van Malema toegestaan dat hy nie op Maandag 12 September voor die komitee verskyn nie, aangesien uitspraak in sy haatspraak-verhoor op dieselfde dag sal plaasvind.

Volgens Hanekom sal die dissiplinêre sake teen Floyd Shivambu, woordvoerder van die ANCJL, en Sindiso Magaqa, sekretaris-generaal, egter voortgaan.

Volgens hom word slotbetoë in die gekonsolideerde saak teen Malema, Magaqa, Ronald Lamola (adjunkpresident), Ronald Lamola (adjunk-sekretaris-generaal) en Pule Mabe (tesourier-generaal) Dinsdag aangehoor word.

Die vyf word aangekla van die ontwrigting van ‘n vergadering van ANC-leiers.

“Sodra die bogenoemde sake afgehandel is, sal die verhoor van kameraad Malema hervat word.

Malema word ook deur aanklagte dat hy die ANC in oneer gebring en onmin in die party gesaai het, in die gesig gestaar.

Spioenherrie kan ongemak vir Zuma veroorsaak

Die botsing tussen die minister van intelligensie, dr. Siyabonga Cwele en die land se spioene, kom op die vooraand van die ANC se leierskapsverkiesing en kan ‘n uitdaging aan die Zuma-bewind beteken.

Gibson Njenje, hoof van die Staatsveiligheidsagentskap (SSA) se binnelandse afdeling het aangedui dat hy voor ‘n parlementêre staande komitee sal getuig oor sy beweerde “bedanking”. Njenje voer aan hy het nie bedank nie.

Die ANC se leierskapverkiesing sal volgende jaar in Bloemfontein plaasvind en daar word in die binnekringe gevrees dat Zuma uit die saal gelig kan word as sy intelligensie-vertrouelinge teen hom draai.

Volgens Cwele het Njenje Vrydag bedank, en die minister se woordvoerder, Brian Dube, het die bedanking bevestig.

Daar heers ontevredenheid met Cwele, nadat sy eggenote Sheryl, in die KwaZulu-Natalse hooggeregshof skuldig bevind is op dwelmverwante aanklagte.

Njenje wou glo nie wil instem daartoe om die koste verbonde aan die beveiliging van die ministersvrou goed te keur nie.

Mo Shaik en ‘n ander top-amptenaar van die Nasionale Intelligensie-agentskap (NIA) is ook beveel om te bedank ná onenigheid met Cwele oor staatsbeskerming vir sy vrou.

Shaik is hoof van die Suid-Afrikaanse Geheimediens. Die ander een is Jeff Maqetuka, direkteur-generaal.

Die drie se bedankings is Vrydag binne die NIA, wat verantwoordelik is vir binnelandse en internasionale intelligensie, aangekondig.

Фільчаков прокурор