Nuus Archives - Page 912 of 1583

China kla oor VSA Australië as militêre basis gebruik

China is ongelukkig met Amerika se plan om hulle militêre teenwoordigheid na Australië verder uit te brei.

China het dié skuif as “onvanpas” beskryf en sê dat dié stap noulettende ondersoek vra.

Liu Weimin, woordvoerder van buitelandse sake in China, sê dat die wêreldwye finansiële klimaat die noodsaaklikheid van internasionale samewerking beklemtoon.

In lig hiervan, sê Liu, is ‘n gesprek oor Amerika se plan om ‘n basis vir Amerikaanse vlootsoldate in die noorde van Australië te vestig, van internasionale belang.

President Barack Obama het dié skuif Woensdag tydens ‘n besoek aan Australië aangekondig.

Mbalula: Sportontwikkelingsplan sal lei na transformasie

Suid-Afrika moet so gou moontlik ‘n ontwikkelingsplan vir sport in plek kry, het Fikile Mbalula, minister van sport en ontspanning, Woensdag gesê.

“Ons benodig ‘n enkele ontwikkelingsteorie vir Suid-Afrika in ooreenstemming met wat ons wil bereik as ‘n land, en wat ons op die oomblik nie het nie,” het hy aan verslaggewers by die parlement gesê.

“Jy kan oor enigiets anders praat, en die fundamentele vraag bly of jy ‘n strategie het… en Suid-Afrika is een van daardie lande… wat nie ‘n plan het nie.”

Mbalula het gesê die witskrif-proses het uitgesak ná die era van Steve Tshwete.

Die nasionale sportindaba in Midrand volgende week het ten doel om hierdie probleem reg te stel, het hy gesê. Die doel is om die sportplan van papier na implementering te neem.

“Mense kla. Hulle kla oor baie dinge, oor transformasie… maar almal moet oor transformasie kan praat en weet wat die doelwit is.”

Australië was jare gelede in dieselfde posisie waar Suid-Afrika nou is, het hy gesê. Die land het toe ‘n nasionale sportplan uitgestippel en die sukses is vandag duidelik. Dieselfde geld, onder meer, vir Amerika en die Verenigde Koninkryk.

Mbalula het gesê beskikbare talent moet “opgeneem word in ‘n nasionale sport- en ontspanningsentrum”, waar jongmense deur ‘n “ontwikkelingstelsel” sal werk.

“Jy kan van die stowwerige strate van Botshabelo af kom. As ons jou kan identifiseer, kry ons jou deur die stelsel.

“Ons sal jou na die sentrum neem, jy sal skoolgaan, jy sal behoorlik eet, jy sal behoorlik oefen en daar sal na jou omgesien word met behulp van beide privaat- en openbaresektorbefondsing.

“Dan sal jy die atleet word wat jy wil wees. Dit is wat ons wil bereik.”

Daar is geen krisis in sport nie, het hy gesê. Die feit is dat mense “uitsak in die ontwikkelingstelsel”.

“As jy nie gelukkig en taai is en ouers het wat jou ondersteun nie, is jy uit [die stelsel uit].”

Oor kwotas het Mbalula gesê dit is uitgedien en teenproduktief.

‘n Enkele behoorlike en doeltreffende ontwikkelingplan is dus nodig, het hy gesê.

Malema sê tugbesluit was voor verhore geneem

Die besluit om die ANC-Jeugligaleiers te skors, is geneem voordat die dissiplinêre verhore begin het, het sy president, Julius Malema, verklaar.

“Daar was deurentyd tekens dat die besluit was om die leierskap te skors,” het Malema aan verslaggewers in Johannesburg gesê.

“‘n Besluit om die ANC Jeugliga-leierskap te skors en te sanksioneer is deur die [ANC] sekretaris-generaal Gwede Mantashe geneem, wat sy bedoelinge duidelik in al sy stellings laat blyk het.”

Mantashe het gesê die Jeugliga het “‘n grens oorgesteek” vóór die dissiplinêre verhoor begin het.

“As iemand sê ‘n grens oorsteek is dit ‘n veroordeling,” het Malema gesê.

Hy het gesê die nasionale dissiplinêre komitee (NDC) is byeengeroep “net” om die veroordeling legitimiteit te gee.

Die ANC Jeugliga kan “totaal” nie saamstem daarmee nie en verwerp die uitslag van die dissiplinêre verhore en sal appelleer teen die bevindinge.

Malema is as die ANC-jeugliga se president geskors verlede week nadat hy skuldig bevind is daarvan dat hy ernstige verdeeldheid binne die ANC saai en die party in oneer bring.

Malema het gesê dit was duidelik dat die NDC se voorsitter Derek Hanekom, ‘n politieke agenda het.

Hanekom het versuim om sy humeur te beteuel en woede-uitbarstings gehad tydens die verhore. Om hierdie rede, moes hy homself onttrek het, het Malema gesê.

Die ANC-Jeugliga het ook gevra dat Susan Shabangu en Colins Chabane hulself van die verhore verskoon, maar sy versoek is geweier.

Die dissiplinêre verhore is gebruik om ‘n politieke geskil op te los, het Malema gesê.

Daar heers agterdog en kommer oor die legitimiteit van die verhore.

Malema het gesê dit is die mees kritieke tyd om die ANCJL te verdedig.

“Ons stryd sal nie ondermyn word nie, die oorwinning is seker,” het hy gesê.

Iran bied Turkye kernhulp aan

Teheran is bereid om sy omstrede kerntegnologie te deel met naburige lande, wat daarop dui dat Turkye Iranese hulp kan ontvang vir die bou van ‘n atoomkragstasie.

“Iran beskik oor baie gesofistikeerde kernwetenskap en ‘n tegnologiese vermoë, wat ons heeltemal gereed is om te deel met … die naburige lande en vriendelike lande in die streek,” het ‘n adviseur, Mohammad Javad Larijani, gesê.

“Turkye probeer al jare lank om ‘n kernkragsentrale op te rig, maar geen land in die Weste is bereid om dit te bou vir hulle nie,” het Larijani aan verslaggewers gesê. “Dit is waar vir ons Arabiese (bure) in die streek.”

“Ons is gereed om saam met hulle te werk in hierdie verband, binne die bepalinge van die NPV (Nie-proliferasieverdrag).” Hy het verwys na die 1968-Nie-proliferasieverdrag, wat daarop gemik is om die verspreiding van die atoomwapentegnologie te voorkom.

“Ons kan saam (kernkragaanlegte) produseer, van die elektrisiteit deel,” het hy aan Reuters gesê in ‘n onderhoud. “Dit is ook ‘n bron van inkomste vir ons. Dit is nie (net) Westinghouse, wat ‘n kernfasiliteit kan bou nie, of Kanada nie. Die Islamitiese Republiek van Iran is ook gereed om (‘n) kernfasiliteit te bou.”

“Ook ons kan brandstof produseer,” het hy gesê. “Ons dink oor hierdie kommersiële waarde in die toekoms.”

Larijani het gesê Iran het nie ‘n “konkrete voorstel” vir kernsamewerking met Turkye of ‘n ander staat op die oomblik nie, al het hy gesê Teheran het sy bereidwilligheid om te help, verklaar.

Daar was geen onmiddellike reaksie op ‘n versoek vir ‘n reaksie op Larijani se kommentaar van die Turkse VN-sending nie.

Larijani het gesê Iran is ook bereid om saam te werk in die kernveld met lande buite die streek, soos in Brasilië.

Beide Turkye en Brasilië het teen ‘n vierde ronde van Veiligheidsraadsanksies teen Iran in Junie 2010 gestem.

Larijani is ‘n adviseur vir die hoogste leier Ali Khamenei, ‘n adviseur aan Iran se Hoofregter, en die hoof van ‘n wiskunde en fisika-instituut. Hy is ook die broer van die Speaker Ali Larijani.

Larijani het die Internasionale Atoomenergie-Agentskap se onlangse verslag oor Iran beskryf as “‘n skande vir die professionaliteit van hierdie instelling.”

Die geheim is uit: Dis ras!

President Barack Obama se algehele goedkeuring bly maar beroerd, en hy ontvang steeds veel hoër punte vir sy buitelandse beleid as vir huishoudelike sake, volgens ‘n nuwe nasionale opname een jaar voordat hy vir herverkiesing wil staan.

Vroue is verdeeld oor hoe Obama presteer, maar mans toon ‘n duidelike afkeur met ‘n 55% – 43% marge. Wit Amerikaners voel negatief oor Obama met ‘n marge van 61% – 36%, en nie-wit Amerikaners ondersteun die president met ‘n 67% – 32% marge, dws met meer as 2 – 1.

Dit is die beste aanduiding tot nog toe dat die Amerikaanse kieser ‘n rassevooroordeel by die beoordeling van hul staatshoof voel.

‘n CNN / ORC-opname wat Dinsdag vrygestel is, dui aan dat 52% van alle Amerikaners die president se optrede in die situasie in Irak goedkeur,’ n aanduiding dat Amerikaners Obama se besluit om alle Amerikaanse troepe te onttrek uit die land teen die einde van die jaar ondersteun.

Agt-en-veertig persent van die respondente keur sy hantering van die oorlog in Afghanistan goed. In teenstelling hiermee, het slegs 35% ‘n positiewe siening van sy ekonomiese beleid, en net 38% van sy gesondheidsorgbeleid.

Van alle Amerikaners sê 52% hulle hou nie van hoe Obama sy werk in die Withuis hanteer nie.

In vergelyking met ander herverkiesingskandidate, is Obama se 46% net bó die goedkeuring van Jimmy Carter en Gerald Ford, wat albei hul herverkiesingsbod verloor het, in November van die jaar voor ‘n verkiesing.

Die CNN-peiling is gedoen deur ORC International van 11-13 November en het 1036 volwasse Amerikaners ondervra per telefoon.

NY maak skoon

New York het ‘n skoonmaakaksie van stapel gestuur om betogers van Occupy Wall Street se kampeerplek in Zuccotti Park af te breek en die besetters uit te jaag.

Occupy Wall Street is in September gestig om teen ekonomiese ongelykheid te betoog. Die beweging is daarna deur tientalle protesoptredes van oor die hele wêreld heen gevolg.

Luidens The New York Times het die sending in Zuccotti Park Dinsdagoggend omstreeks 01:00 begin.

“Die stad glo vas dat die voortdurende besetting van Zuccotti Park ‘n toenemende gesondheid- en brandveiligheidsrisiko inhou,” het die polisie in ‘n verklaring gesê.

Kennisgewings is uitgedeel waarin betogers gevra word om die park te verlaat. Hulle mag op ‘n later stadium weer terugkeer as die park eers ontruim is, maar hulle sonder kampgeriewe.

Die opruimaksie was by tye gewelddadig. Plaaslike verslaggewers het op hul Twitter geskryf dat die polisie pepersproei gebruik het en betogers hardhandig weggesleep het.

Meer as 70 betogers is in hegtenis geneem omdat hulle hulself verset het daarteen om Zuccotti Park te verlaat.

Die park wat as kampeergrond gebruik is, moes met water afgespuit word.

Inwoners en besighede langs die park het gekla van ontwrigting van hul daaglikse aktiwiteite, want die protesskares het die media en toeriste gelok.

Geakkrediteerde plaaslike nuusjoernaliste het gesê die polisie het verhoed dat hulle video of foto’s neem van die betogers wat beseer is deur die polisie.

‘n Plaaslike verkeersnuushelikopter is bo die park verbied om die polisie-optrede te verfilm, wat gelei het tot beskuldigings van sensuur.

Zuccotti Park is in besit van Brookfield Properties, en is vernoem na die maatskappy se uitvoerende hoof, John E. Zuccotti.

Die 3100-vierkante-meter eiendom, geleë oos van die Esplanade in die voorkant van die HSBC-gebou op Broadway, is gelys as ‘n “privaatbesit openbare ruimte” op ‘n regeringswebwerf.

Александр Фильчаков

‘Koelie-klag’ waarskynlik laat vaar

Die geskorste leier van die ANC-Jeugliga, Julius Malema, sal tot Woensdag moet wag om te hoor of klagte wat teen hom aanhangig gemaak is deur die SA Minority Rights Equality Movement (Samrem) laat vaar is.

Dít het aan die lig gekom ná ‘n vergadering in Pietermaritzburg tussen Malema en Samrem-beamptes Dinsdagaand.

Ashwin Singh, woordvoerder van Samrem, het gesê daar was Dinsdagaand eenstemmigheid tussen Malema en die Samrem-beamptes.

“Daar is ‘n algemene eenstemmigheid dat die klagte teen Malema teruggetrek sal word. Ons benodig egter ‘n mandaat van die uitvoerende komitee om dit te finaliseer,” het Singh ná die vergadering aan die media gesê.

Hy het bygevoeg dat ‘n vergadering Woensdag sal plaasvind, waar die besluit geneem sal word.

Malema, wat deur die geskorste ANCYL-woordvoerder Floyd Shivambu en die woordvoerder Magdalene Moonsamy vergesel is, het die vergadering as belangrik beskryf.

“As Afrikane toon ons respek deur persoon tot persoon te praat. Telefoniese gesprekke sou nie genoegsaam wees om die kwessie te takel nie,” het Malema gesê.

Die vergadering is voorafgegaan deur Malema se verwysing na Indiërs as “koelies” of “makula”, wat Samrem ontstel het en daartoe gelei het dat die klagte teen hom ingedien is.

Samrem het gesê klagte van crimen injuria teen Malema is op 4 November by die Mountain Rise-polisiekantoor in Pietermaritzburg ingedien nadat hy na Indiërs as “makula” (“koelies”) verwys het tydens ‘n toespraak in Gauteng.

Singh het die geskorste ANCYL-president as beleefd, hoflik en waardig beskryf.

Malema het gesê hy het geen aanstoot bedoel nie en sal ook nie weer die woord gebruik om na Suid-Afrikaners van Indiese afkoms te verwys nie.

Opkoms van nuwe terreurnetwerk in Afrika

Die Nigeriese owerhede het bevestig dat drie bomaanvalle in die noordelike stad Maiduguri voorgekom het.

Een van die aanvalle het ‘n voertuig geteiken wat aan die gesamentlike polisiemag behoort wat veiligheid in die stad moet handhaaf. Niemand is in die voorval dood nie.

Luidens vroeëre berigte is die radikale Islamitiese groep – Boko Haram – aanspreeklik vir die aanval. Volgens ‘n ooggetuie het lede van die groep met wapens op die toneel aangekom. ‘n Bom het ook tussen die stad en die lughawe naby die konvooi van ‘n goewerneur ontplof.

Owerhede in Nigerië is waaksaam ná die VSA gewaarsku het dat nuwe aanvalle deur ekstremiste in dié land ‘n sterk moontlikheid is.

Dié waarskuwing volg ná ‘n vlaag terreuraanvalle deur ‘n Islamitiese sekte wat al 150 lewens in die noord-ooste van die land geëis het.

Verlede week se aanvalle in die stad Damaturu tel onder die dodelikste wat al uitgevoer is deur die Boko Haram-sekte, ‘n Islamitiese groep wat in die noorde van die land gevestig is.

Die Amerikaanse ambassade in Nigerië het gewaarsku dat die sekte volgende op hotelle of ander teikens in die hoofstad Abuja kan toeslaan, veral tydens die Eid al-Adha-fees.

“Ná die onlangse aanvalle deur Boko Haram, ook bekend as die Nigeriese Taliban, in die Borno- en Yobe-staat, het die Amerikaanse ambassade inligting ontvang dat Boko Haram dalk van plan is om verskeie teikens en hotelle in Abuja aan te val,” het die ambassade gesê.

Personeel van die ambassade is aangesê om dié plekke te vermy en Amerikaanse burgers is gevra om “ekstra versigtig” te wees.

Algerië het intussen ook gewaarsku dat ‘n terroriste-alliansie op die kontinent bestaan. “Ons het geen twyfel dat daar koördinasie bestaan tussen die Boko-Haram en al-Kaida nie,” het die Algerynse adjunk-minister van buitelandse sake Abdel Messahel aan verslaggewers gesê. “Die wyse waarop beide groepe werk en intelligensieverslae toon daar is samewerking.”

Die Algerynse intelligensiediens het ‘n reputasie van wreedheid, maar doeltreffendheid, en Noordwes-Afrika is hulle turf. Hulle is veral bekommerd oor al-Kaida-splintergroepe in die Islamitiese Magreb.

Die AQIM in Algerië het nie begin as internasionale terroriste nie en het nie oorspronklik iets te doen met al-Kaida nie. Dit was ‘n Algerynse versetbeweging, teen die sekulêre staat.

Die Algerynse weerstandsgroep het kon egter meer waarde toevoeg aan hulle dreigemente teen die staat met hulle nuwe alliansie, en dit is waarskynlik die rede vir die samewerking. Vir al-Kaida weer, kan Algerië as deel van die Afrikanetwerk funksioneer.

Nog ‘n dienste-opstand

Woedende inwoners van wyk 27 by die Rooigrond-gevangenis buite Mahikeng in Noordwes het in ‘n optog na die provinsiale regeringsgeboue beter dienslewering en onmiddellike optrede geëis.

Die inwoners het steeds nie water, elektrisiteit, of die huise wat twee jaar gelede aan hulle beloof is nie. Hulle eis dat die provinsiale regering ingryp omdat hulle nie meer vertroue het in die plaaslike munisipaliteit nie.

Die LUR vir Onderwys het hulle klagtes aangehoor en onderneem om hulle griewe aan die kantoor van die LUR vir plaaslike regering oor te dra. Die inwoners eis optrede binne sewe dae.

Ontevredenheid oor swak dienste slaan oral uit

Meer as 50 inwoners van informele nedersettings op Vryburg in Noordwes het hulle intrek, sonder magtiging, in HOP-huise geneem omdat hulle sê hul geduld opgeraak het.

Hulle sê hulle wag te lank vir die voltooiing van die huise. Die projek van 86 miljoen rand sluit die bou van 500 huise in en het vier jaar gelede begin.

Die huise loop erg onder vandale deur, met toilette, wasbakke en vensterrame wat reeds gesteel is. Inwoners sê die halfklaar huise is beter om in te woon as die pondokke waaraan hulle gewoond is.

Die Oudtshoorn Burgerlike beweging het Dinsdag ook ‘n optog na die dorp se munisipale kantoor hou oor gebrekkige dienslewering. Die beweging het inwoners uitgenooi om by hulle aan te sluit.

Hulle eis dat daar aandag geskenk word aan sekere kwessies. Volgens die organiseerders van die optog, is daar voortslepende spanning tussen die munisipaliteit en inwoners, wat die amptenare onder meer beskuldig van korrupsie, nepotisme, wanbestuur en swak dienslewering.

Na verwagting sal ‘n griefskrif aan die burgemeester, Gordon April oorhandig word.