Nuus Archives - Page 723 of 1583

Oorlog is ‘n videospeletjie vir Harry se vlytige duime

Brittanje se prins Harry het moontlik ‘n “geestesversteuring opgedoen”, het die Taliban Dinsdag gesê.

Dit volg nadat hy ‘n vergelyking getref het tussen die doodskiet van rebelle in Afganistan en videospeletjies.

“Daar is 49 lande wie se magtige weermagte onsuksesvol is in die geveg teen die mujahidien en nou kom hierdie prins en vergelyk hierdie oorlog met sy speletjies, PlayStation, of wat ook al hy dit noem,” het Zabiullah Mujahid, ‘n woordvoerder van die Taliban, aan AFP gesê.

Harry sê hy het Taliban-rebelle doodgemaak tydens sy 20 weke in die land.

As mede-vlieënier van ‘n Apache-aanvalshelikopter was Harry in beheer van die wapenstelsel in ‘n twee-man-kajuit , van waar hy Hellfire-missiele en vuurpyle afgevuur en ‘n 30 mm vuurwapen hanteer het.

“Dis ‘n vreugde vir my, want ek is een van daardie mense wat mal is daaroor om PlayStation en Xbox te speel, so ek hou daarvan om te dink dat ek nogal goed is met my duime,” het hy in onderhoude gesê wat Maandag vrygestel is.

“Hierdie is ‘n ernstige oorlog, ‘n geskiedkundige oorlog vir ons en ons mense,” het Mujahid gesê.

“Maar ons neem nie sy opmerkings baie ernstig op nie, want ons het almal al gesien en gehoor dat baie buitelandse soldate wat na Afganistan kom geestesversteurings op pad uit opdoen.”

Op ‘n vraag deur Brittanje se Press Association oor of hy iemand uit die kajuit doodgemaak het, het Harry gesê: “Ja, so baie mense het.

“Neem ‘n lewe om ‘n lewe te red,” het hy gesê en sy skouers opgehaal. “As daar mense is wat probeer om slegte dinge aan ons ouens te doen, sal ons hulle uit die spel haal.”

Israel stem, waarskynlik regs

Miljoene mense het gister in Israel se algemene verkiesing gestem met Benjamin Netanyahu wat hoop om vir ‘n derde termyn as Eerste Minister herkies te word.

Verkiesingsbeamptes sê die kiesersopkoms was bykans 50 persent, wat heelwat hoër is as tydens die vorige verkiesing drie jaar gelede.

Meningspeilings dui daarop dat Netanyahu se regse-alliansie sal wen, maar met ‘n kleiner meerderheid in die parlement.

Die peilings toon ook dat Israel se regerende-koalisie steun afgestaan het aan “Habayit Hayehudi”, oftewel die “Joodse Tuiste”, ‘n party wat nog verder regs is.

Die leier van dié party, Naftali Bennet, is gekant teen die totstandkoming van ‘n Palestynse staat aan die Wesoewer.

Bennet het aan verslaggewers gesê hy verwag goeie uitslae vir sy party.

VF+ hou ANC vir geweld in Vrystaat verantwoordelik

Die Vryheidsfront Plus hou die ANC in die Vrystaat verantwoordelik vir die gewelddadige onrus in die Vrystaat. Die ANC-regering in die Vrystaat het nie die vermoë om die onrus in die Vrystaat te hanteer en te beheer nie.

Die Vrystaate regering beplan om die twee munisipaliteite Metsimaholo (Sasolburg, Oranjeville, Deneysville) en Ngwathe (Parys, Heilbron, Koppies, Vredefort en Edenville) saam te voeg as een munisipaliteit. Die VF Plus het by twee geleenthede hierteen by die Afbakeningsraad besware ingedien. Dit maak nie sin om twee probleme in een groot probleem saam te voeg nie. Met die opstande in daardie omgewing blyk dit duidelik dat die gemeenskappe ook nie ten gunste van die samevoeging is nie. Die gemeenskappe besef dat bloot net die samevoeging nie dienslewering gaan verbeter nie, maar net ‘n groter probleem gaan veroorsaak.

Die VF Plus veroordeel ten sterkste die vandalisme en plundery wat met die opstand aan die orde van die dag is. Die ANC moet egter verantwoordelik gehou word vir hierdie onaanvaarbare toestande want hulle skep die frustrasie by die mense op grondvlak.

Die verdeeldheid binne ‘n regerende politieke party mag nooit die oorsaak wees van die verval van wet en orde binne ‘n land of provinsie nie en dit is wat nou in die Vrystaat gebeur.

Die verantwoordelikheid rus nou op die Vrystaatse premier en sy uitvoerende komitee om die griewe van die mense aan te hoor, aandag daaraan te gee, oplossings te vind en wet en orde te handhaaf.

De Doorns: Vakbond sê geen afdankings

Ongeveer 1 500 stakende loonarbeiders sal die week na verwagting na hul werk in De Doorns terugkeer, het die Food and Allied Workers’ Union (Fawu) gesê.

Katishi Masemola, sekretaris-generaal, sê die vakbond het ‘n beroep op werkers gedoen om terug werk toe te gaan, in die gees van voortdurende onderhandelinge vir ‘n hoër daaglikse loon.

“Ons vra dat alle gewillige werkers toegelaat sal word om na hul werke terug te keer, en dat diegene wat op plase woon, toegelaat sal word om na hul wonings terug te keer. Kortliks, geen werkers moet afgedank word nie en alle afdankings moet nietig verklaar word.”

Plaaswerkers in die Wes-Kaap het verlede jaar begin staak en geëis dat hul minimum dagloon van R69 na R150 aangepas word. Die staking is verlede maand opgeskort, maar is amper twee weke gelede in talle dorpe in die provinsie hervat.

Sedertdien het verskeie vakbonde en gemeenskapsleiers teenstrydige oproepe gemaak. Hulle het óf gesê die staking moet opgeskort word óf daarop aangedring dat die protesoptogte moet voortduur totdat boere die eise nakom.

Данильченко Харьков

Onderneming om vervalste dokumente te verskaf

Die polisie in die Oos-Kaap het op ‘n onderneming in Mthatha toegeslaan wat regeringsalarisstrokies, identiteitsdokumente en matrieksertifikate vervals, het ‘n woordvoerder Dinsdag gesê.

Kol. Mzukisi Fatyela het gesê die Bears-meubelwinkel het die polisie genader nadat personeel agterdogtig geraak het toe ‘n 39-jarige vrou ‘n rekening wou open.

Ná ‘n ondersoek is vasgestel dat sy werkloos is, maar ‘n regeringsalarisstrokie en -identiteitsdokument, albei vervals, verskaf het.

Die vrou is Maandag in hegtenis geneem en het die polisie na die onderneming in Mthatha geneem waar sy die vervalste dokumente gekoop het.

“Daar was baie salarisstrokies van nasionale en provinsiale regeringsdepartemente, sowel as Umalusi-sertifikate,” het Fatyela gesê.

Volgens Fatyela het die matrieksertifikate goeie simbole gehad.

Nóg ‘n vrou is op die perseel in hegtenis geneem, maar die eienaar was nie ten tye van die klopjag daar nie.

“Nóg mense gaan binnekort in hegtenis geneem word,” het Fatyela gesê.

ANC veroordeel Sasolburg-geweld

Die ANC het Dinsdag die plundery en geweld tydens ‘n betoging in die Zamdela-woonbuurt in Sasolburg veroordeel.

“Ons grootste bekommernis is die vlak van kriminele bedrywighede wat plaasvind, insluitend die plundery van winkels,” het Jackson Mthembu, woordvoerder, in ‘n verklaring gesê.

“Dit sal nie net sakebedrywighede in die gebied raak nie, maar ook onskuldige inwoners.”

Die geweld, wat Sondag begin het, is veroorsaak deur planne om die Sasolburg- en Parys-munisipaliteit saam te smelt.

Betogers het Dinsdag probeer om ‘n plaaslike polisiekantoor af te brand en ‘n motor en winkel aan die brand gesteek.

Die polisie moes vir ‘n tweede agtereenvolgende dag rubberkoeëls gebruik om die betogers in bedwang te bring.

Die ANC het die regering en wetstoepassingsagentskappe geprys vir die “spoedige ingryping” en inhegtenisnemings.

“Dit kan nie toegelaat word in ‘n moderne samelewing soos dié waarin ons leef nie. Individue met bymotiewe neem… wat ‘n vreedsame betoging moet wees en maak dit ‘n teelaarde vir kriminaliteit,” het Mthembu gesê.

Richard Baloyi, minister van samewerkende regering, het besluit om die samesmelting van die Sasolburg- en Parys-munisipaliteit in die Vrystaat te laat vaar, berig die SABC.

Inwoners het aangedui dat hulle gelukkig is met Baloyi se besluit dat ‘n taakspan aangestel moet word om die ingewikkelde kwessie van munisipale afbakening aan te spreek.

Dié besluit volg ná dae van gewelddadige betogings in die gebied, veral in die Zamdela-woonbuurt.

Dinsdag het die situasie in die omstrede township-gebied handuit geruk toe die plaaslike polisiekantoor aangeval is. Betogers het ook probeer om ‘n polisievoertuig aan die brand te steek en regeringsamptenare is met Njalas na die toneel gebring.

Die situasie is tans ‘n bietjie rustiger, maar daar is steeds ‘n sterk polisieteenwoordigheid in die gebied, het Mail & Guardian berig.

Die polisie het vroeër versterkings ingeroep om te help om sowat 100 polisiebeamptes, inwoners en joernaliste uit die Sasolburg-polisiekantoor te bevry, berig Times Live.

Beeld berig ‘n man is Dinsdag in die oproer in die Zamdela-Sasolburg-omgewing doodgeskiet, vermoedelik toe ‘n groep oproeriges ‘n winkel in Sasolburg wou plunder. Verskeie mense, waaronder twee joernaliste, is ook in die geweld beseer.

Die polisie het ook aan aan Mail & Guardian bevestig dat die Zamdela-polisiekantoor aan die brand gesteek is. Die plaaslike Telkom-kantoor smeul ook.

Die polisie het ‘n pad, wat lei na die sentrale sakedistrik, versper in ‘n poging om te verhoed dat betogers die dorp betree. Die betogers het probeer om deur die versperring te breek, waarna die polisie rubberkoeëls afgevuur het.

Lede van die openbare orde-polisie het vroeër rubberkoeëls op die betogers gevuur en waterkanonne gebruik in ‘n poging om verdere geweld te verhoed. Polisiehelikopters sirkel oor die gebied en ‘n helikopter is ook gebruik om die minister te vervoer.

Inwoners betoog sedert Sondag oor die samesmelting van die Sasolburg- en Parys-munisipaliteit.

Geweld tydens stakings eis 181 sedert bevryding

Geweld gedurende stakings het in totaal die lewens van 181 mense die afgelope 13 jaar dood geëis, het die Suid-Afrikaanse Instituut vir Rasseverhoudinge (SAIRR) gesê.

“Die grootste aantal sterftes het in 1999, 2006 en 2012 plaasgevind – met 30, 69 en 60 sterftes onderskeidelik,” het die SAIRR Maandag in ‘n verklaring gesê.

Die sterftes in 1999 was hoog weens ‘n geskil tussen die National Union of Mineworkers, die United Workers’ Union of SA en die United Democratic Movement.

‘n Staking deur sekuriteitswagte tussen Maart en Mei 2006 was ook verantwoordelik vir ‘n groot aantal sterftes. Nie-stakende sekuriteitswagte en dié wat aan diens was, is aangeval en sommige is van bewegende treine gegooi, het die instituut gesê.

Die sterftes in 2012 was weens die stakings in die mynbedryf. Die ergste was die skietery op 16 Augustus by Lonmin se Marikana-myn in die Noordwes, waar 34 mynwerkers dood is.

Die SAIRR het gesê koerantberigte is gebruik om die getalle saam te stel.

Sowat 313 mense is vanaf Januarie 1999 tot Oktober 2012 beseer in stakings en meer as 3 058 in hegtenis geneem.

“Hoewel die syfers nie volledig is nie, dui dit aan hoe stakings in Suid-Afrika dikwels gepaardgaan met geweld.

“Die sterftes is dikwels veroorsaak deur gevegte tussen die polisie en stakers, tussen stakende en nie-stakende werkers en mededingende vakbonde.”

Onrus brei verder uit in Vrystaat

Dit wil voorkom asof diensleweringsbetogings in die noord-Vrystaat besig is om te versprei nadat daar gister in twee dorpe voorvalle was.

Op Hennenman moes die burgemeester van Matjhabeng, Sebenzile Ngangelizwe uit die Phomolong stadion onder polisie-begeleiding geneem word toe betogers die burgemeester en sy gevolg met klippe gegooi het.

‘n SAUK-voertuig is ook onder die klippe gesteek. Inwoners het ‘n optog gehou en geëis dat ‘n kliniek gebou word en dat daar afstand van die emmerstelselgrond gedoen word.

In Zamdela by Sasolburg loop die spanning hoog te midde van inwoners wat gisteraand weer paaie versper en bande aan die brand gesteek het.

Die minister van Samewerkende Regering, Richard Baloyi het die gebied gister besoek nadat inwoners tot geweld oorgegaan en die dorp begin plunder het. Minstens 150 mense is in hegtenis geneem.

‘n Aflweringsvoertuig is gekaap en gebruik om ‘n kitsbank oop te breek. Die inwoners betoog teen ‘n voorgestelde samesmelting van munisipaliteite.

Vakbonde het gevra vir die vrylating van stakende werkers wat tydens die gewelddadige staking in verskeie dele van die Wes-Kaap aangekeer is. Hulle sê sommige van die werkers is nou reeds drie weke lank in aanhouding sonder dat hulle om borgtog aansoek gedoen het.

Die vakbond, CSAAWU het ‘n nuuskonferensie buite Kaapstad gehou om sy kommer uit te spreek. ‘n Woordvoerder,Trevor Christians, beweer dat sommige werkers terwyl hulle in aanhouding is mediese sorg ontsê word. ‘n

Polisiewoordvoerder, Andre Traut, sê intussen die wet bepaal dat niemand vir langer as 48 uur aangehou mag word sonder dat hulle in die hof verskyn het nie.

Hy sê klagtes kan gerig word aan die Onafhanklike Polisie-Ondersoekeenheid. Tweehonderd-en drie mense is in hegtenis geneem nadat die staking bykans twee weke gelede hervat is.

Лобановский

Brits het ‘n slagveld geword

Die SAP se Landelike beveiligings initiatief in Brits het totaal gefaal. Dit was Raadslid Elsa Lourens van die Vryheidsfront Plus, Brits, se kommentaar op n plaaslike koerant berig waarin Thandi Modise, Premier van die Noordwes, haar kommer uitgespreek het oor die vlaag van gewapende rooftogte wat Brits teister.

Volgens die berig is Suid Afrikaanse boere se kanse om vermoor te word 2 keer meer as die van n polisielid. Volgens Lourens is dit onakuraat en is die syfer wat tans beskikbaar is vir plaasmoorde 313 tot 100 000 teenoor die 51 Moorde per 100 000 polisielede wat volgens die berig in 2011/2012 geraporteer is. Dit is 6 keer meer as die moorde op polisielede, se Lourens.

Die syfer was vir die Min van Polisie so kommerwekkend dat hy n Nasionale beraad gehad het waar daar toe n Tien punt plan aangekondig is om die moorde op Polisie lede aan te spreek. Aan die anderkant word plaasmoorde glad nie as prioriteit gesien nie.

Net in die laaste 6 maande was daar 8 plaasmoorde in Brits, en 22 boere is barbaars aangeval in n radius van ongeveer 20km. Die syfers vir aanvalle en rowe in ander areas soos Beestekraal en Kameeldrift is nie bygereken nie en aangesien akurate polisie statistieke nie beskikbaar is nie, is dit dus onmoontlik om die plaasaanvalle en plaasmoorde waarvan ons bewus is af te trek en dan te vergelyk met die oorblewende statistiek van ander geweldsmisdaad vir die tydperk in Brits.

Die skielike toename in grusame moorde en geweldadige aanvalle op plase in die Brits omgewing dui daarop dat die SAP nie gerat of bevoeg is om voorkomend teen misdaad in Brits op te tree nie, en daar word ook nie n daadwerklike poging van hulle kant af gemaak om die saak reg te stel nie. Die SAP het dus ons plase en kleinhoewes in Brits en omgewing in n slagveld verander deur die perfekte omstandighede vir die tipe misdaad te skep, se Lourens.

Situasie in Sasolburg versleg

Twee vragmotors is Maandag deur inwoners van die Zamdela-lokasie in Sasolburg aan die brand gesteek, het die polisie in die Vrystaat, gesê.

“‘n Vragmotor wat ‘n paar meter ver van die polisiekantoor gestaan het, is deur die skare verwoes. Dit brand tans,” het konst. Peter Kareli gesê.

“Nóg ‘n vragmotor word op die R82 verwoes. Die situasie is besig om te vererger.”

Kareli het gesê die provinsiale polisiebestuur het in die gebied aangekom om te kyk wat hulle kan doen en intussen is nóg polisiebeamptes na die lokasie gestuur.

Die betogings het Sondag begin nadat die munisipaliteit inwoners ingelig het oor nuwe planne vir die samesmelting van die Metsimaholo- en Ngwathe-munisipaliteit, het Beeld berig.

‘n Polisievoertuig was vroeër vasgekeer in die modder en betogers het die beamptes in die voertuig aangeval.

“Waterkanonne en rubberkoeëls is gebruik om die betogers in bedwang te bring. Die helikopter skiet ook rubberkoeëls,” het Kareli gesê.

Richard Baloyi, minister van samewerkende regering, sal na verwagting Maandagmiddag met beamptes van die Fezile Dabi-munisipaliteit vergader om die betogers se griewe te bespreek.

Sowat 90 mense is Sondag in hegtenis geneem en staan tereg op aanklag van openbare geweld nadat hulle winkels in die woonbuurt geplunder het.

“Nóg mense is omstreeks 03:00 vanoggend [Maandag] in hegtenis geneem nadat hulle winkels geplunder het,” het Kareli gesê.

Die getal mense wat sedert Sondag in hegtenis geneem is, is nog nie bekend nie, maar sowat 150 mense is na raming agter tralies.

Diegene wat Sondag in hegtenis geneem is sal na verwagting Maandag in die Sasolburg-landdroshof verskyn.