‘n “Leë” klimaatsooreenkoms by die VN-klimaatberaad in Kopehagen sal erger wees as geen ooreenkoms wat bereik word nie.
Só het ‘n woordvoerder by die Withuis in Washington Donderdag gesê.
“Om terug te kom met ‘n leë ooreenkoms sal veel erger wees as om met leë hande terug te kom,” het Robert Gibbs gesê terwyl president Barack Obama gereed maak om na Kopenhagen te vertrek.
Die getal joernaliste wat vanjaar dood is, het ‘n rekordgetal van 68 bereik.
Die skerp styging volg nadat 31 joernaliste in November tydens ‘n massamoord in die Filippyne dood is, het ‘n komitee vir die beskerming van joernaliste, CPJ, Donderdag gesê.
Twee-en-veertig joernaliste is in 2008 gedood.
Die vorige hartseer rekord is in 2007 opgestel toe die oorlog in Irak op sy ergste gewoed het. Sewe-en-sestig joernaliste het in dié jaar omgekom.
Irak was vir ses jaar lank die gevaarlikste land ter wêreld vir joernaliste gewees.
Somalië was die tweede dodelikste bestemming in 2009. Nege verslaggewers is dié jaar in dié Afrikaland doodgemaak.
Raymond Ackerman, voorsitter van Pick n Pay, is “woedend” oor die “onstellende beskuldiging” wat deur die SA Commercial, Catering and Allied Workers’ Union, Saccawu, gemaak is oor rassisme in die maatskappy.
Ackerman het in ’n verklaring Donderdag gesê dat Pick n Pay se geskiedenis oor die afgelope 43 jaar vanselfsprekend was.
“Beide die maatskappy en ek het beledigings aan die hand van voormalige politici moes trotseer weens ons standpunt oor menseregte vir swart Suid-Afrikaners,” het hy gesê.
Saccawu se lede by Pick n Pay het verlede week deelgeneem aan ’n eendag staking, waartydens die maatskappy se uitvoerende hoof van rassisme beskuldig is.
“Hulle het geen bewyse gehad vir hulle beskuldigings nie.
“Hulle het vae beskuldigings gemaak oor kommentaar wat na bewering ’n dekade terug deur ons uitvoerende hoof gelewer is,” het Ackerman gesê.
Hy het ook gesê dat Saccawu nie verduidelik het hoekom hulle ’n dekade gewag het voor hulle die klagtes geopper het nie.
“Ons uitvoerende hoof, Nick Badmington, het met sekerheid en sonder enige onbeslistheid gesê dat hy nooit so iets kwyt geraak het nie.
“Om dit op te som, dit is net snert.”
Die geskatte jaartal vir die wit meerderheid in die VSA om te verdwyn is met agt jaar teruggesit – na 2050 – omdat die resessie en ‘n strenger immigrasiebeleid die invloei van buitelanders na Amerika effens verstadig het.
Die Amerikaanse sensusburo het Woensdag ‘n hersiene skatting uitgebring van verlede jaar se beraming dat wit kinders teen 2023 ‘n minderheid sal wees en die wit bevolking in sy geheel teen 2042.
Daar is vandag 308 miljoen mense in die VSA, tweederdes van hulle nie-Latynse blankes.
Teen 2050 sal die totale bevolking na 399 styg en volgens nuwe projeksies sal blankes dan 49,9% van die bevolking wees. Swartes sal 12,2% wees, feitlik onveranderd van die huidige persentasie.
Latyns-Amerikaners, wat tans 15% van die land se mense uitmaak. sal teen 2050 na 28% styg.
Asiate sal van 4,4% na 6% toeneem.
Die geboortesyfer van minderhede sal ook verstadig en eers in 2031 sal wit geboortes deur anderskleuriges verbygesteek word.
Diegene ouer as 85 en ouer gaan teen 2050 verdriedubbel na 18,6 miljoen.
Die sensusburo waarsku egter dat ‘n hele aantal faktore die vooruitskattings nog kan beïnvloed. Omstandighede wat ekonomiese en kulturele faktore insluit asook natuurrampe en immigrasiebeleid, kan ‘n rol speel.
Indien die VSA ‘n beleid van “zero-immigrasie” volg, sal blankes tot in 2050 die meerderheid wees, naamlik 58% van die bevolking. In daardie geval sal die Latyns-Amerikaanse bevolking na 21% toeneem vanweë ‘n hoër geboortesyfer en jonger bevolking.
‘n Debat op ‘n BBC-webwerf oor die teregstelling van homoseksuele mans en vroue in Oeganda loop onder politici deur.
Die Britse uitsaaier het ‘n debat op sy webwerf, onder Africa have your say, begin om die voorgestelde wetgewing in Oeganda waarvolgens mense ter dood veroordeel kan word vir homoseksuele dade, te bespreek.
Die debat nooi gesprek uit oor die vraag of die wetgewing te ver gaan en of daar hoegenaamd wetgewing teen gays behoort te wees.
Britse politici het egter Woensdag gesê die BBC behoort nie die teregstelling van gays as ‘n gesprekpunt te benader nie.
‘n Wetgewer vir die land se opposisie, Lynne Featherstone, het aan die uitsaaier geskryf dat die kommentaar op die debat bewys hoe die gesprek “bloot olie op die vuur gooi”.
Die sukkelende klimaatberaad in Denemarke het ‘n reuse-inspuiting van nagenoeg R162 miljard gekry.
‘n Groep van die wêreld se rykste lande het dié bedrag belowe as befondsing vir die stryd teen aardverwarming te midde van konflik tussen ryk en arm lande en grootskaalse protesoptrede by die beraad.
Japan, tesame met Australië, Brittanje, Frankryk, Noorweë en die VSA, het ooreengekom om ‘n fonds te stig om die verlies van die Aarde se woude te bekamp.
Die regerings van die ses lande het Woensdag in ‘n verklaring gesê hulle sal ‘n gesamentlike bedrag van R26 miljard tussen 2010 en 2012 bewillig. Die groep hoop om sodoende ‘n fonds te begin waardeur ryk lande sal help om die vernietiging van woude reg rondom die wêreld teen te werk.
Japan het die voortou geneem met ‘n belofte dat die land R145 miljard aan ontwikkelende lande sal skenk indien ‘n omvattende ooreenkoms tydens die beraad bereik word.
“Japan neem sy verantwoordelikheid teenoor die internasionale gemeenskap baie ernstig op,” het die land se omgewingsminister, Sakihito Ozawa, Woensdag gesê.
Dié land se aanbod is die grootste finansiële belofte wat tot nog toe by die beraad gemaak is.
Europa het verlede week R79 miljard bewillig vir ‘n fonds om ontwikkelende lande te help om klimaatsverandering teen te werk.
Die VSA het nog nie ‘n finansiële belofte gemaak nie. Dié land het egter gesê hy sal ‘n “regverdige bydrae” maak.
Alan van Heerden, Suid-Afrika se eertydse fietsrykampioen, is Woensdag in ‘n motorongeluk oorlede.
Van Heerden, 57, is in die Sunninghill-hospitaal dood aan erge kopbeserings. Beeld berig dat die fiertsryer ‘n operasie aan sy hand ondergaan het kort voor die ongeluk.
Van Heerden het twee keer ’n wêreldtitel as veteraan ingepalm.
Hy het met meer as 1 000 oorwinnings op die pad en 21 tweede plekke as professionele fietsryer in België, gespog.
Fietsryentoesiaste het van Heerden as een van die beste fietsryers van alle tye beskryf.
Robbie Hunter, bekende Suid-Afrikaanse fietsryer, het Van Heerden se dood as hartseer nuus vir Suid-Afrika en ’n verlies vir Suid-Afrikaanse fietsry op Twitter beskryf. Hy sal altyd onthou word, het Hunter gesê.
Die voormalige minister van gesondheid, Manto Tshabalala-Msimang, het foute gemaak soos enigiemand anders en moet vergewe word, het Cosatu Woensdag met die tyding van haar dood gesê.
Tshabalala-Msimang is Woensdagmiddag vanweë komplikasies wat spruit uit ‘n leweroorplanting wat sy in 2007 ondergaan het, dood.
Sidumo Dlamini, president van Cosatu, het die nuus van haar dood as skokkend beskryf.
“Sy het sekere foute gemaak maar sy was ‘n mens. Suid-Afrikaners het ‘n groot leier in die ANC verloor,” het Dlamini gesê.
Volgens hom moet mense haar vergewe vir haar foute.
Die ANC het Tshabalala-Msimang beskryf as iemand wat geveg het vir geregtigheid en demokrasie.
“Manto het haar lewe aan die stryd vir demokrasie in Suid-Afrika gewy,” het woordvoerder Jackson Mthembu gesê.
Volgens Mthembu het haar dood die ANC van ‘n toegewyde lid geroof.
Die Jong Kommuniste-liga het ook hul meegevoel met die dood van Tshabalala-Msimang uitgespreek.
Gugu Ndima, woordvoerder van die liga, het gesê dat alhoewel die Jong Kommuniste van Tshabalala-Msimang se opinies oor MIV en Vigs verskil het, hulle haar vir die rol wat sy tydens die stryd teen apartheid gespeel het, respekteer.
Die IVP het ook skok en meegevoel met Tshabalala-Msimang se dood uitgepreek.
“Ons het die nuus van haar dood met skok ontvang,” het Musa Zondi, woordvoerder vir die IVP gesê.
Die IVP het hul meegevoel met haar familie en veral haar man, Mendi Msimang, en kinders uitgepreek.
Vertroulike dokumente wat deur die The Times In Londen verkry is, toon dat Iran weliswaar die finale komponent van ‘n atoombom wil toets. Die nota’s van Iran se mees sensitiewe militêre projek, beskryf die land se vierjaarplan om ‘n neutroninisieerder, die snellerkomponent vir ‘n kernontploffing, te toets.
Die intelligensieverslag is glo deur ‘n Asiese bron bevestig wat meen dat Iran kernwapenbedrywighede in 2007, spesifiek aan ‘n neutroninisieerder, onderneem het.
Die dokumente in die dagblad se besit is tegnies van aard en beskryf die gebruik van ‘n neutronbron, uraandeuteried, wat volgens kenners geen ander burgerlike of militêre aanwending het as slegs vir ‘n kernwapen nie.
Dit is dieselfde materiaal wat die Pakistanse bommakers gebruik het wat die bloudruk vir Iran se bom verskaf het.
David Albright, fisikus en voorsitter van die Instituut vir Wetenskap en Internasionale Veiligheid in Washington, wat al honderde bladsye van die Iranse kernprogram onder oë gehad het, sê dit is ‘n baie sterk aanduiding van wapenbedrywighede.
Verskeie intelligensieagentskappe van Westerse moondhede, asook die IAEA, die Internasionale Atoomenergieagentskap het die bestaan van die dokument bevestig.
Israel het ook hulle kommer oor die dokument uitgespreek.
Mark Fitzpatrick, senior navorser vir die Internationale Instituut vir Strategiese Studies in Londen, sê die mees verdoemende gevolgtrekking is dat indien die program in 2007 begin het, dit as ‘n casus belli gereken kan word. “As Iran aan wapens werk, kan daar nie ‘n diplomatieke oplossing wees nie.”
Die Times het die dokumente wat in Farsi was, laat vertaal en daarna deur twee verskillende onafhanklike vertalers laat verifieer.
Die inhoud van die dokumente is plofbaar aangesien Washington tans uitreik na Teheran. Vrae oor president Obama se doelwitte met sy grondverskuiwende aankondiging dat hy in gesprek gaan tree met Iran, gaan beslis geopper word.
Die dokumente bevat die bewys dat Iran reeds sedert 2003 aan wapens werk en waarskynlik is hulle steeds besig met die vierjaarplan wat in die stukke vervat is.
Die VSA het in 2007 beweer dat Iran waarskynlik hulle wapenprogram opgeskort het, ten spyte van Brittanje, Duitsland en Frankryk se aandrang tot die teendeel.
In die dokumente is ook planne oor hoe om die spore van uraan wat tydens ‘n ontploffing vrygestel word, te verbloem sodat die buitewêreld nie bewus word daarvan nie. Sulke spore kan omuitwisbare bewys wees van Iran se voorneme om ‘n kernmoondheid te word.
Fitzpatrick het die dokumente as die finale bewysstuk vir Iran se kernwapenideaal beskryf.
‘n Versameling stadjies, dorpies en gehuggies in die Spaanse streek Katalonië het met ‘n oorweldigende meerderheid gestem vir afskeiding van die res van Spanje. In ‘n opspraakwekkende, maar nie-bindende, referendum het ongeveer ‘n kwart van stemgeregtigdes hulle stemme Sondag uitgebring.
Van dié kiesers stem 94% vir die onafhankliheid van Katalonië. Dat daar oorweldigend “ja” gestem sou word, was te verwagte omdat die referendum gehou is in plekke waar die onafhanklikheidsgees hoog is.
Slegs 10% van alle Katalane het gestem, ongeveer 700 000 mense. Die organiseerders het gehoop vir ‘n opkoms van sowat 40% en ‘n mate van teleurstelling heers dat daar uiteindelik net 25% opgedaag het om hulle stemme uit te bring.
Die oproep om onafhanklikheid in Katalonië kom uit die tydperk van die Spaanse diktator Francisco Franco. Soos die ander Spaanse gebied wat ten tye van Franco onderdruk is, Baskië, was dit ‘n oortreding om ‘n eie taal te besig.
Sedert die dood van Franco in 1975 en die herstel van demokrasie, het Spanje aan dié streke ‘n groot mate van onafhanklikheid toegestaan. In 2006 word ie outonomie van Katalonië verder uitgebrei deur ‘n nuwe handves waarin daar deur indirekte bewoording na Kataloniërs as ‘n volk verwys word.
Die konserwatiewe Spanjaarde het die stap met toorn begroet en opgeruk na die grondwethof in Madrid om die handves te toets. Die vrees vir die uitspraak in dié betrokke saak , was grotendeels verantwoordelik vir Sondag se referendum wat gehou is.
Die organisasie wil volgende jaar ‘n soortgelyke referendum hou in die Katalaanse hoofstan Barcelona asook in ander groot stede in Katalonië.
