David Frost, ‘n adjunkdirekteur van die Wes-Kaapse departement van vervoer, sê motorongelukke het die provinsie die afgelope tien jaar meer as R12 miljard gekos agv veral besope bestuurders.
Die Wes-Kaap is die land se kampioenprovinsie as dit kom by dronkbestuur.
Frost het Donderdag in die hooggeregshof tydens die toetssaak oor die betroubaarheid van die Dräger-asemtoetser, dié skokkende feit openbaar gemaak.
Lees verder.
.
In Zimbabwe sit ‘n polisieman al twee weke lank agter slot en grendel omdat hy ‘n toilet gebruik het wat eksklusief gereserveer is vir president Robert Mugabe. Die plaaslike media het dié aardskuddende nuus Donderdag gebreek.
Die kwaaddoener in die diens is ene sersant Alois Mabhunu, speurder by die moordbrigade van die stad Bulawayo. Hy was veertien dae gelede van op wag by die jaarlikse Zimbabwe International Trade Fair toe hy ‘n dringende oproep van moeder natuur ontvang.
Die man het hom gehaas na die naaste toilet, en dit was ongelukkig een spesiaal gereserveer vir presidensiële nood. Die polisie het probeer om Mabhunu se daad te verydel, maar die desperate speurder het sy pad met bokshoue tot binne in die kleinhuisie oopgeveg, waarna hy die deur gegrendel het.
Nadat hy homself op die president se troon verlig het, het Mabhunu die kleinhuisie verlaat om sy waakdiens te hervat.
Die toiletpolisie het egter die voorval dadelik aangemeld, en die geheime polisie het sodoende ook van die oortreding te hore gekom. Die oortreder is dieselfde dag in hegtenis geneem ten spyte daarvan dat die harde bewyse van sy misdryf intussen verdwyn het.
Mabhunu sal Vrydag vir ‘n dissiplinêre verhoor in Bulawayo verskyn. Waarvan hy presies beskuldig word, is nie duidelik nie.
PRAAG het ‘n klag teen mnr. Julius Sello Malema vir direkte en openbare aanhitsing tot volksmoord gelê by die internasionale strafhof in Den Haag. Dit volg nadat ‘n skrywe aan dr. Dan Roodt van PRAAG gerig is waarin die nasionale vervolgingsgesag bekendmaak dat hy nie vir Malema in terme van die volkereg gaan vervolg nie. Die klag word deur die bekende sanger, mnr. Steve Hofmeyr, ondersteun.
Julius Malema het sowel die Konvensie oor die bestraffing en voorkoming van volksmoord as die Roomse statuut oortree deur sy liedere “Skiet die Boer” en “Maak die Boer dood” te sing. Albei verdrae, wat deur die Suid-Afrikaanse regering onderteken en bekragtig is, maak “openbare en direkte aanhitsing” tot volksmoord ‘n internasionaal strafbare misdryf.
Indien die internasionale strafhof met die saak voortgaan, kan dit beteken dat Malema uitgelewer kan word om in die Nederlandse hoofstad tereg te staan. Roodt het in ‘n onderhoud met Radio sonder grense gesê dat die Rwandese popsanger Simon Bikindi enkele maande gelede tot vyftien jaar tronkstraf gevonnis is weens die sing van liedjies waarin hy in 1994 Hutu’s aangemoedig het om Tutsi’s dood te maak.
Roodt meen dat die huidige hofsake teen Malema waarin hy van “haatspraak” aangekla word nie genoegsaam ernstig is nie. “Haatspraak” is ‘n begrip wat ná die tweede wêreldoorlog in Europa onstaan het,” het Roodt gesê. “Dit plaas beperkings op spraakvryheid omdat die uitdrukking van gevoelens tussen etniese groepe daardeur belemmer word. Ook is dit in die Suid-Afrikaanse gelykheidswet opgeneem, hoofsaaklik om as basis vir aanklagte van rassisme jeens blankes te dien. In die Amerikaanse wetgewing bestaan die begrip glad nie. In die geval van Malema het hy egter nie net haatspraak nie, maar ook aanhitsing tot volksmoord, ‘n veel ernstiger oortreding begaan. Dit is waarvoor ons wil hê hy moet aangekla word. Regter Halgryn se uitspraak dat Malema aanhitsing tot moord pleeg, ondersteun dié siening en die getuienis wat in die haatspraakverhore gelewer is, kan ook in die internasionale strafhof gebruik word.”
PRAAG voer sedert verlede jaar ‘n veldtog om die internasionale gemeenskap oor die gevare van ‘n etniese konflik in Suid-Afrika in te lig, asook die diskriminasie wat blankes en Afrikaners onder Suid-Afrikaanse wetgewing moet verduur. In ‘n onderhoud met Radio Jacaranda gister het Roodt gesê dat die aanhitsing waaraan Malema hom skuldig maak, meer universeel erken word as dat apartheid ‘n sogenaamde “misdaad teen die mensdom” was. “Die konvensie teen apartheid van die sewentigerjare is nie deur die Westerse lande onderteken nie. Maar buiten Amerika, Israel en enkele ander lande, het die meeste state die konvensie teen volksmoord, asook die Roomse statuut, onderteken. Die afkeer van aanhitsing tot volksmoord is dus veel wyer as dié van apartheid in die sewentigerjare,” het hy gesê.
Roodt het die publiek aangemoedig om by PRAAG aan te sluit. “PRAAG is die enigste organisasie wat die Afrikaner se vryheidstryd werklik internasionaliseer. As ons sien watter sukses die ANC met dié strategie gehad het, is dit van wesentlike belang.”
Enigeen wat by PRAAG wil aansluit kan op hierdie skakel klik.
Die Afrika-unie het Woensdag ‘n oproep om ‘n politieke oplossing vir Libië se uitgerekte konflik gedoen. Voorstelle deur dié liggaam is tot dusver egter grootliks geïgnoreer.
Die pan-Afrikaanse blok het ‘n skietstilstand gevra en dat ‘n hoë-vlak bemiddelingspan die geskil probeer bylê, maar sy pogings het min effek op die grond met Westerse magte wat voortgaan met lugaanvalle teen Gaddafi se regime.
“Ek is daarvan oortuig dat slegs ‘n politieke oplossing tot blywende vrede kan lei asook voldoen aan die legitieme aspirasies van die Libiese mense,” sê Jean Ping, die hoof van die AU-Kommissie, die pan-Afrikaanse blok se uitvoerende liggaam.
“Die situasie in Libië bly ‘n ernstige kommer vir ons, vir die toekoms van Libië sowel as vir plaaslike lande,” het Ping op ‘n spesiale beraad Woensdag in Addis Abeba verklaar.
“Ongelukkig is die huidige situasie op die grond en die gebrek aan koördinering van internasionale pogings nie gunstig in die soektog na ‘n oplossing nie.”
Die AU is gekant teen die internasionale militêre optrede teen die Libiese regime en het verlede maand ‘n wapenstilstand voorgestel, wat deur die Libiese rebelle verwerp is. Gaddafi self het egter die plan aanvaar.
Die VN se sekretaris-generaal, Ban Ki-moon, het ook sy oproep vir ‘n wapenstilstand hernu.
Die 40-jarige voormalige leier van die ANC-Jeugliga het egter die “skielike griepagtige simptome” oorkom en behoort Donderdag weer by die werk te wees, het Jimmy Manyi, regeringswoordvoerder, in ‘n verklaring gesê.
The New Age het ‘n ongenoemde regeringsbeampte, wat by die vergadering was, aangehaal.
“Hulle het mond-tot-mond-asemhaling toegepas en ‘n defibrillator ingespan om sy asemhaling te reguleer voordat hulle hom aan ‘n draagbaar vasgemaak en na die hospitaal geneem het,” het dié bron glo gesê.
‘n Defibrillator word gewoonlik ingespan deur dokters en paramedici om die hart dmv elektriese skok weer te laat begin klop.
Die VF+ het reeds in April 2009 ‘n perskonferensie gehou om die beweerde korrupsie in die Midvaal-munisipaliteit onder DA-bestuur aan die kaak te stel. Jaco Mulder, Gautengse leier van die party, het daarna in November 2009, gevra dat die Gauteng regering ingryp.
Die VF Plus het ‘n versoek gerig aan die LUR vir plaaslike owerhede in Gauteng om ‘n dringende ondersoek te gelas na beweerde onreëlmatighede en wanadministrasie. Dié versoek is gerig ingevolge artikel 106 van die munisipale stelselwet om ‘n skriftelike kennisgewing op die Midvaal munisipaliteit te beteken en ‘n ondersoek te loods oor sake wat in ‘n VF Plus dokument hanteer is. In die dokument word bewerings van wanadministrasie, bedrog, korrupsie en ander ernstige wanpraktyke gemaak wat plaasgevind het sedert Oktober 2005 en nog steeds voortduur.
Die Openbare beskermer se verslag sal volgens Mulder binnekort vrygestel word. Die proklamasie is uitgevaardig vir die SIU nadat ‘n voorlopige ondersoek getoon het dat daar wel substansie in die klagtes is.
Die Openbare beskermer se verslag hanteer die klagtes oor wanadministrasie en die SIU van die polisie ondersoek die kriminele klagtes teen die DA-bestuur. Dit is ‘n skande dat die DA sulke wanpraktyke toelaat. Só sê mnr. Jaco Mulder, LPW en VF Plus-leier van Gauteng.
Volgens Mulder is dit ironies dat die DA-leier in elke toespraak, radiodebat en pamflet verwys het na hul “suksesse” in Midvaal en ‘n groot aantal kiesers onder dieselfde indruk gebring het, terwyl die Midvaal-munisipaliteit onder DA-beheer waarskynlik die mees korrupte stadsraad in Suid Afrika is. Die DA-aanspraak op skoon regering het egter die hele land se kiesers beïnvloed.
Die ergste van alles is dat die leier van die DA, me Helen Zille, telkens ‘n beroep om skoon administrasie van verhoë af doen en daarop roem dat DA beheerde stadsrade korrupsievry is. Me Helen Zille en ander top leiers in die DA is vir ‘n geruime tyd reeds bewus van die wanpraktyke in die Midvaal munisipaliteit maar het versuim om op te tree. Die DA het blykbaar eerder verkies om die fluitjieblasers te skors en die sake toe te smeer.
Beweerde korrupsie in Midvaal is reeds op 31 Januarie 2009 onder die aandag van Helen Zille gebring.
Die kragreus Eskom het gesê bouwerk by sy Medupi-kragstasie in Limpopo sal voortgaan wanneer arbeidsdispute opgelos is.
Die terrein is voor die verkiesing gesluit ná motors en kantore tydens gewelddadige betogings aan die brand gesteek is. ‘n Woordvoerder van Eskom, Hillary Joffe het egter aangedui dat die onlangse chaos by die konstruksieterrein nie die 2012-sperdatum van die projek sal affekteer nie.
Wit base beskuldig glo werkers van vreemdelinghaat. Werkers beskuldig hul base weer daarvan dat hulle buitelanders in plaas van Suid-Afrikaners aanstel. Vier mense is reeds in hegtenis geneem op aanklagte van brandstiging en saakbeskadiging.
Ontstoke werkers het eers gesorg dat die brandblussers leeg is voordat hulle geboue aan die brand steek waar wit bestuurders werk..
Kan Suid-Afrika dit doen?
Ja. Suid-Afrika is ekonomies meer as twee keer so sterk soos Nigerië en amper drie-keer so sterk soos Egipte. Suid-Afrika is ekonomies 80 keer sterker as die gemiddelde Afrikastaat. Daarbenewens het ons die beste paaie-, krag- en telefoonnetwerke in Afrika en is ons aandelebeurs een van die tien grootste aandelebeurse in die wêreld. Amper die helfte van alle teerpaaie in Afrika, is in Suid-Afrika.
Maar as ons oor Afrika praat, moet ons ook realisties wees oor Afrika se probleme. Ek is kwaad vir Afrika se korrupsie en magsmisbruik. Ek is moeg vir Afrika-konflikte en TV-beelde van jong soldate in kamoefleeruniforms wat vol bravade agter op ‘n bakkie staan met ‘n swaar masjiengeweer in die hand en bande vol koeëls om die nek. Ek is moedeloos as ek nog een keer moet kyk na Afrika-babas wat met dowwe oë en uitgeteerde lyfies lê en hoop op kos.
Kommunikasie-infrastruktuur is ‘n belangrike voorwaarde vir ontwikkeling in Afrika.
Vodacom en MTN het die “pay-as-you-go”-konsep ontwikkel en groot sukses in Afrika behaal. Hulle is tans die hoof-selfoonverskaffers in verskeie Afrika lande.
Daar is talle soortgelyke voorbeelde van Suid-Afrikaanse maatskappye se suksesse in Afrika. Shoprite Checkers het tans die grootse voedselwinkel-netwerk in Afrika met amper 200 winkels in vyftien lande. Suid-Afrikaners bedryf Kameroen se spoorweë en ons bou paaie en brûe in Malawi en Mosambiek. Deur MultiChoice en die SABC bereik Suid-Afrikaanse televisieprogramme en nuus reeds 48 Afrikalande terwyl Media24 tydskrifte verkoop in Nigerië en Kenia.
Suid-Afrika het binne tien jaar na 1994 een van die top lande met beleggings in Afrika geword. Suid-Afrikaanse maatskappye het reeds geslaag om die lewenstandaard van baie Afrikane te verbeter.
Maar ek wil ook met Afrikaners praat. Baie Afrikaners onttrek hulle en hoop die probleme gaan weg. As Afrikaners eerlik oor hulle posisie nadink, het hulle op die oomblik nie baie keuses nie. Of jy emigreer, of jy raak betrokke en help om vir die Afrikaner ‘n plek in die son in Afrika te skep. Dit kan nie in isolasie gedoen word nie. Die feite is dat as Afrika tot niet gaan, dan is Suid-Afrika in die moeilikheid. As Suid-Afrika tot niet gaan, is die Afrikaner in die moeilikheid.
‘n Britse joernalis het onlangs aan my gesê: “Julle Afrikaners kan nooit brugbouers in Afrika wees nie vanweë julle geskiedenis.”
Is hy reg? Wat is die houding teenoor Afrikaners in die res van Afrika? Behalwe vir in Suid-Afrika, waar Malema sê ons is almal misdadigers, is ek orals in Afrika nog net positief ontvang.
Tans het 24 Afrikastate reeds versoeke gerig vir Suid-Afrikaanse kommersiële boere om by hulle te kom boer en met voedselproduksie te help.
Maar daar is ‘n voorwaarde. Dan moet Afrikaners nie permanent voel hulle word deur die regering geteiken nie. Dit maak dat alle energie vir oorlewing in Suid-Afrika aangewend word en is daar nie energie vir uitreik na Afrika nie.
President Jacob Zuma het die Spesiale Ondersoekeenheid versoek om Gauteng se Midvaal-munisipaliteit te ondersoek. Zuma het dié ondersoek na bewerings van korrupsie, wanbestuur en die verduistering van fondse aangevra, het die SABC berig.
Die DA het dié munisipaliteit verower in die plaaslike verkiesings. Bewerings van korrupsie, wanbestuur en geldverduistering het reeds voor die verkiesing gesirkuleer. Die Midvaalmunisipaliteit was vóór die verkiesing ook in die hande van die DA.
Die burgemeester van Midvaal, Tim Nast, sê egter die munisipaliteit het al agt jaar in ‘n ry ‘n skoon oudit gekry.
“Dit kom nie as ‘n verrassing nie dat die aankondiging kom twee dae nadat die DA ‘n klinkende oorwinning in Midvaal behaal het,” het Nast aan die openbare uitsaaier gesê.
“‘n Mens kan nie help om te dink daar sit ‘n vorm van politiek daaragter nie.”
Nast het gesê verskeie politieke partye, insluitende die ANC en die Vryheidsfront Plus, maak al jare lank dié soort bewerings.
“Ons het alreeds met die Openbare Beskermer, die polisie en verskeie liggame saamgewerk oor die afgelope twee jaar. Ons sal ons volle samewerking aan die Spesiale Ondersoekeenheid ook bied.”
Die SABC het gesê die proklamasie wat Zuma onderteken het, bevat min besonderhede. Dit sê die eenheid moet onder meer die onbehoorlike wegdoening met munisipale bestuurbates, die versuiming om gelde wat aan die raad geskuld word in te win en die ontplooiing van personeel op verkeerde posvlakke ondersoek.
Hy meen die huidige bevolking van 158 miljoen kan teen die jaar 2100 groei tot 730 miljoen.
“Ek is regtig bekommerd oor ‘n bevolkingsontploffing in Nigerië. Dit is nie gesond nie. Nigerië moet mik om ‘n maksimum van drie kinders per gesin te hê,” het Jeffrey Sachs gesê.
Hy het gesê dat ‘n verhoogde jaarlikse ekonomiese groeikoers bo die huidige 7% en geïntegreerde ontwikkeling die land een van die belangrikste ekonomieë in die 21ste eeu kan maak.
President Goodluck Jonathan, wat Sondag met ‘n vierjaar-termyn afskop, het gesê hy gaan Nigerië se ekonomiese span lei.
“Na my inhuldiging Sondag sal ek die voorsitter van die ekonomiese bestuurspan wees wat saamgestel is uit belangrike regering- en sakesektorlede.”
