Vyf nuwe tolstelsels gaan publiek melk

Sanral se strategiese plan vir bykomende tolpaaie vir 2012-2013 is Woensdag aan die parlement se portefeulje­komitee oor vervoer voorgelê.

Beeld het Maandag berig dat die sterk openbare teenkanting teen die e-tolstelsel in Gauteng nie die besluit om nog vyf tolstelsels op Suid-Afrikaanse hoofroetes aan te bring, gedemp het nie.

Die Wysigingswetsontwerp op Vervoerwette sal die departement van vervoer in staat stel om tolpaaie sonder openbare deelname te bou.

Sanral en die departement van vervoer sal ná aanvaarding van die wetsontwerp nuwe tolstelsels oprig sonder om die publiek, munisipaliteite, metrorade en provinsies te raadpleeg.

Die volgende tolpaaie wat in die vooruitsig gestel word, sal besige roetes insluit:

* Tussen Durban en Pietermaritzburg (N3);

* Tussen Johannesburg en Kimberley (N12);

* Tussen Kroonstad en Winburg (N1);

* By Musina (N1); en

* By die Botlokwa-wisselaar op die N1 naby Polokwane.

Pa van Boston-verdagtes sê seuns is in lokval gelei

Die pa van die twee verdagtes in die ontploffings by die Boston-marathon het Saterdag gesê sy seuns in ‘n lokval gelei.

Anzor Tsarnaev het aan Rusland se Interfax-nuusgagentskap gesê die geheimediens het sy seuns geteiken omdat hulle Moslems is.

Anzor is woedend oor die aantygings wat teen sy seuns, Dzhokhar en Tamerlan gemaak is.

“Iemand het hulle in ‘n lokval gelei. Ek weet nie presies wie nie, maar iemand het en deur lafaarde te wees het hulle die kind doodgeskiet. Daar is polisiebeamptes soos die.”

Meer as 100 mense wat gewond is in die aanvalle is intussen uit hospitale in Boston ontslaan en minder as 10 is in ‘n kritieke toestand.

Die polisie het Vrydagaand ná ‘n grootskaalse soektog die tweede verdagte vasgetrek in verband met Maandag se ontploffings.

Die polisie het op ‘n wenk van ‘n plaaslike inwoner reageer en die 19-jarige Dzhokhar op ‘n boot in ‘n agterplaas in Watertown gevind, waar hy weggekruip het. Tsarnaev is gewond in ‘n skietgeveg waarin sy broer en medepligte, Tamerlan, dood is.

Dzhokhar is in ‘n ernstige toestand in die hospitaal.

Intussen het pres. Barack Obama die polisie en wetstoepassingsagentskappe geloof.

Drie mense is dood en meer as 170 ander mense is gewond in die ontploffings wat naby die eindstreep van die Boston-marathon plaasgevind het.

Duitser keelaf gesny in PE

Die lyk van ‘n Duitse sakeman is in ‘n hotelkamer in Port Elizabeth gevind, is Vrydag berig.

Die 25-jarige man is Woensdag in ‘n plas bloed by die Garden Court-hotel gevind. Hy is keelaf gesny, berig Herald Online.

Die polisie op die toneel het gesê die man is vermoedelik naby die badkamer vermoor en het probeer om na die deur te stap vir hulp.

Kapt. Johan Rheeder het gesê die man is Dinsdag vir die laaste keer gesien.

“Iemand het hom kom aflaai en hy is alleen na sy kamer. Die volgende oggend het ‘n kollega die sekuriteit by die hotel gevra om te gaan kyk waar hy is, omdat niemand hom in die hande kan kry nie,” het Rheeder gesê.

Die hotelbestuurders het ‘n loper gebruik om die deur van die man se kamer oop te sluit.

Volgens die hotel se rekords en beeldmateriaal het niemand Dinsdagaand by die kamer ingegaan of uitgekom nie.

Die vrou wat die man afgelaai het, het gesê hy was nie homself nie.

Rheeder het aan Herald Online gesê indien bewyse gemene spel uitwys, sal die saak van ‘n geregtelike doodsondersoek na moord verander sal word.

Boston-verdagtes ‘kon nie aanpas’

Die Boston-bomverdagtes Dzhokhar en Tamerlan Tsarnaev is Moslems van Tsjetsjeense herkoms wat ‘n dekade gelede na die Verenigde State geimmigreer het, maar steeds noue bande met hul oorloggeteisterde geboorteland gehad het.

Dzhokhar, wat Vrydagaand in hegtenis geneem is, was ‘n stoeier op hoërskool en ‘n student aan die Universiteit van Massachusetts. Sy Twitter-profiel is tipies dié van die gemiddelde Amerikaanse tiener.

Bure en vriende het hom beskryf as hardwerkend en goedhartig en het hul skok uitgespreek oor sy beweerde betrokkenheid by Maandag se bomontploffings wat die lewe van drie mense geëis en meer as 180 ander gewond het.

“Hy was ‘n lieflike, lieflike kind,” het Larry Aaronson, ‘n buurman aan CNN gesê oor Dzhokhar.

“Jy kry mense wat sê ‘O, ek ken hom. Hy is nie instaat tot so iets nie.’ Dit is wat ek vir jou sê. Ek is net een van daardie mense.”

Terwyl Dzhokhar aktief was op Twitter en honderde boodskappe oor sy lewe en gedagtes met die wêreld gedeel het, is baie min bekend oor sy ouer broer, Tamerlan, wat dood is in ‘n skietgeveg met die polisie.

Tamerlan, ‘n 26-jarige ingenieurstudent wat ‘n boksliefhebber was, het by ‘n vorige geleentheid Amerikaanse owerhede se aandag getrek.

Die FBI het gesê agente het hom in 2011 ondervra op versoek van ‘n buitelandse regering, maar kon geen inligting bekom nie.

‘n Blad op die sosiale netwerk VKontakte, Rusland se weergawe van Facebook, sê Dzhokhar het vanaf 1999 tot 2001 ‘n laerskool in die stad van Makhachkala in Dagestan, suidelike Rusland bygewoon.

Dagestan grens aan die streek Noord-Kaukasus van Tsjetsjenië, wat sedert 1994 geteister word deur twee oorloë tussen Rusland se weermag en rebelle.

Die Tsarnaev-gesin het intussen die plofbare Kaukasus-streek verlaat.

“Ons is Moslems. Ons is Tsjetsjene, ons is etniese Tsjetsjene,” het Ruslan Tsarni, ‘n oom van die broers, aan die Amerikaanse media gesê.

“Iemand het hulle geradikaliseer. Dit is nie my broer nie.”

Tsarni het gesê sy broerskinders het in 2003 vanaf Kirgisië in Amerika aangekom en het asiel gekry. Hy het gesê hulle is “lafaards” wat nie by die Amerikaanse lewenswyse kon aanpas nie.

Op die vraag oor hoekom hulle terreur oorweeg het, het hy gesê die enigste rede waaraan hy kan dink is dat hulle nie aangepas het nie.

Vakansieklubs moet ondersoek word

Die Verbruikerskommissie het gister tydens ‘n vergadering van die parlementêre portefeuljekomitee oor handel en nywerheid, na aanleiding van ‘n versoek van die Vryheidsfront Plus, bevestig dat hulle ‘n volskaalse ondersoek gaan loods na die vakansieklub-industrie. Daar gaan veral op die ses grootste maatskappye gefokus word.

Daar is kennis geneem van die klagte dat die industrie gebruik maak van misleidende bemarkingsmetodes en dat hy fokus op groepe wat maklik beïnvloedbaar is.

Volgens adv. Anton Alberts , die VF Plus se parlementêre woordvoerder oor handel en nywerheid, het die party meer as 450 klagtes oor vakansieklubs van lede ontvang en het daarom die portefeuljekomitee genader om die saak onder die aandag te bring van die Verbruikerskommissie.

“Ons glo dat al die vakansieklublede wat vasgevang is in kontrakte wat hulle nooit kan beëindig nie en wat nie waarde vir hulle geld ontvang nie, wel geregtigheid sal sien,” sê adv. Alberts.

Die VF Plus nooi die publiek wat probleme met vakansieklubs het, om inligting te stuur aan adv. Alberts by help@vf.co.za. Die klagtes sal by die Verbruikerskommissie ingedien word vir verdere handeling.

Mandelas wil van wit beheer oor trust ontslae raak

Die familie van Nelson Mandela het ‘n verenigde front gevorm in ‘n dispuut met jarelange wit medewerkers van die voormalige president.

Die dispuut handel oor die beheer van twee maatskappye.

In ‘n verklaring, sê Mandela se kleinkinders, probeer George Bizos en andere die Mandela-familie uitbeeld as “onsensitief en geldgierig” met geen respek vir die erfenis van die anti-apartheidsleier en Nobel-vredespryswenner nie.

“Die meeste van ons het ‘n inkomste, werk vir ons eie maatskappye en bestuur ons eie projekte,” lui die verklaring, wat nie enige van die kleinkinders by name noem nie.

Mandela het 17 kleinkinders en 14 agterkleinkinders, volgens die Nelson Mandela Centre of Memory, ‘n organisasie in Johannesburg.

Twee dogters van 94-jarige Mandela het ‘n hofsaak teen Bizos en sy medewerkers aanhangig gemaak, en eis dat hulle nie moet aanbly as direkteure van die twee maatskappye nie. Die opbrengs is veronderstel om die Mandela-familie te bevoordeel.

Bizos, ‘n menseregte-advokaat, sê hy is ‘n jarelange ondersteuner van die Mandela-familie en hy het betrokke geraak in die maatskappye op Mandela se instruksies.

Die hoofdoel van die maatskappye, Harmonieux Investment Holdings en Magnifique Investment Holdings, is om fondse in te kanaliseer uit die verkoop van handafdruk “kunswerke” deur Mandela tot die voordeel van sy familie.

The Star koerant het Bizos aangehaal waar hy sê Makaziwe Mandela wou R11.9 miljoen onttrek sonder om besonderhede te verskaf van hoe dit gebruik sal word.

“Dit is strydig met die bepalings van die trust. Daarom het ons geweier om haar die geld te gee.”

Wit Afrikaners ware mag agter DA, sê ANC

Die ANC het gister die DA uitgekryt as ‘n party wat swartes vir vertoon gebruik, maar die ware mag in die hande van wit Afrikaners hou.

Die opposisieparty het begin met sy verkiesingsveldtog deur te probeer om as ‘n voorbok in die stryd teen apartheid te poseer. Maar die ANC koop dit nie.

Die party versprei pamflette met foto van ‘n omhelsing tussen Nelson Mandela en Helen Suzman as deel van sy veldtog om glo die idee dat die party weer apartheid sal terugbring, te besweer.

Maar die ANC bevraagteken Suzman se struggle-verlede. ANC-woordvoerder, Keith Khoza, het vandeesweek gesê die DA het niks gedoen om apartheid te beëindig nie en Suzman het “die gerief van apartheid in die Parlement geniet” en “het nie enige stappe” teen apartheid geneem nie.

Die DA se uitvoerende direkteur van kommunikasie, Gavin Davis, het gesê die party verwag kritiek van sy teenstanders. Hy is ook nie bekommerd oor die moontlike kritiek dat die DA goedkoop publisiteit soek en Mandela se beeld uitbuit nie.

Davis het gesê die DA is ook ingelig deur sy aktiviste op die grond, sowel as navorsing, dat ‘n persepsie bestaan dat die party weer apartheid sal terugbring.

“Apartheid is ingeburger in die DNA en hulle kan nie verander nie. Kyk na hul strukture en hoe hulle regeer. Hulle het ‘n paar swartes as vertoon, maar die ware mag is steeds in die hande van wit Afrikaners,” het Khoza gesê.

Maar Davis het gesê sy leiers het ‘n geskiedenis van stryd teen apartheid.

“Ons huidige leier, Helen Zille, het gehelp om die wêreld te wys wat die waarheid van apartheid is. In 1977 by die Rand Daily Mail waar sy gewerk het, het Zille die waarheid agter Steve Biko se dood ontbloot. As ‘n prominente lid van die Black Sash, het Zille ANC-aktiviste by haar huis gedurende die 1986 noodtoestand weggesteek,” het Davis gesê.

“Joe Seremane was die party se federale voorsitter tot in 2010. Hy was ‘n politieke gevangene op Robbeneiland tussen 1963-1969. Hy is sonder verhoor aangehou tussen 1976-1978, en verskeie kere tussen 1982 en 1984.

“Wilmot James is tans die DA se federale voorsitter, en sy betrokkenheid in die stryd bereik terug na sy dae in die Suid-Afrikaanse Studente-organisasie, wat deur die Swartbewussynsbeweging geïnspireer is. James se teenkanting teen die Groepsgebiedewet het hom in die tronk laat beland.

“Patricia de Lille, wat tans die uitvoerende burgemeester van Kaapstad is, is reeds aktief in die politiek vir meer as 25 jaar. In 1988 is sy verkies tot vise-president van die Nasionale Raad van Vakbonde. Sy was ‘n LP in 1994 van die PAC [Pan Africanist Congress] afvaardiging in die grondwetlike onderhandelings in Kempton Park.”

Hy het gesê die foto van Mandela en Suzman is gekies vir die veldtog omdat “Nelson Mandela die rol wat Helen Suzman gespeel het in die teenkanting teen apartheid erken en ons wou die boodskap oordra.”

Die pro-ANC Indiese dagblad, The New Age, se hoofopskrif gister was egter: “Zille fails the race test”.

‘Grondwethofuitspraak oor grond selfvernietigend’

“Die uitspraak in die konstitusionele hof vandag in die saak tussen Agri-SA en die minister van mineralebronne sal Suid-Afrika op ‘n glybaan van selfvernietiging plaas,” sê mnr. Werner Weber, die VFPlus se nasionale woordvoerder oor landbou en grondhervorming.

Die hof het beslis dat geen onteiening plaasgevind het nie en dat die voormalige houers van minerale regte geen eis om vergoeding teen die regering kan indien nie. Mnr Weber, wat tydens die uitspraak in die hof teenwoordig was, het daarop gewys dat die beginsel van “gebruik dit of verloor dit” ( use it or loose it) wat nou deur die konstitusionele hof as ‘n beginsel gevestig is, ook nou op ander eiendom van toepassing gemaak kan word.

“Dít hou enorme implikasies in. Verwysings in die uitspraak na die verkryging van dié regte deur die houers van minerale-regte in die apartheidstyd en die opweeg van eiendomsreg teenoor openbare belang, het sterk politieke ondertone openbaar, wat niks goeds vir die toekoms van SA voorspel nie,” het mnr. Weber gesê.

UJ-prof jongste slagoffer in gay moorde

‘n Professor aan die Universiteit van Johannesburg is het glo sy moordenaar ingenooi, berig Eyewitness News.

Dr. Carl Mischke se bebloede lyk is Maandagoggend met verskeie steekwonde in Norwood gevind.

Die polisie ondersoek die moord as deel van ‘n reeks moorde op gay mans in Kaapstad en Gauteng.

Mischke is die negende gay slagoffer in dié reks moorde.

Die 47-jarige Mischke gee klas in Arbeidsreg.

Die polisie het moorde in Kaapstad met dieselfde bende verbind. Brig. Neville Malila, polisiewoordvoerder, het gesê Mischke se dood word ondersoek.

VF+ eis bedanking van Midvaal-burgemeester

Die VF Plus het vandag in ‘n sterk bewoorde verklaring geëis dat die burgemeester van Midvaal, mnr Timothy Nast, moet bedank.

Mnr Corrie Pypers, VF Plus raadslid vir Midvaal het gesê dat klagtes oor wanadministrasie sedert 2005 gedurende 2009 aan die Openbare Beskermer gerapporteer is en vandat Nast in 2009 as burgemeester verkies is, is onwettige afdankings van fluitjieblasers, amptenare en raadslede aan die orde van die dag.

Verder het viktimisasie teen die bestuur van die internasionaal befaamde Meyerton Golfklub byna die klub se ondergang tot gevolg gehad.

Bevoordeling van sommige ontwikkelaars deur voortydige goedkeurings, proseduriële magsmisbruik, die aanvang van ondersoeke deur die Openbare Beskermer (OB) en die Spesiale Ondersoekeenheid (SOE) het gelei tot ‘n OB-verslag wat sewe gevalle van wanadministrasie bevind het en gelei het tot die afdanking van die DA streeksvoorsitter en raadsprokureur.

‘n Kriminele ondersoek teen die DA administrasie deur die SOE duur steeds voort. Hierdie toedrag van sake is geensins in belang van die inwoners van Midvaal en daarom behoort Nast Midvaal eerste te stel en sy amp te ontruim saam met ander skuldige raadslede en amptenare.

Tydens ‘n Afbakeningsraadvergadering gehou op 11 April 2013 in die Vereeniging stadsaal, het ‘n senior ANC ampsdraer op die verhoog dit aan Nast gestel dat leningsvoorsiening aan Midvaal in die weegskaal is weens die SOE ondersoek teen hom.

Skielik het die DA en Nast ‘n struikelblok geword in die weg van ontwikkeling in Midvaal ten koste van die kiesers.

Nast behoort onder die omstandighede sy amp te ontruim deur onmiddellik saam met sy meelopers, waaronder amptenare en raadslede, te bedank.

By gebreke hierin sou die DA in die hand van die ANC speel omdat die kieserspubliek hul vertroue in die DA in Midvaal verloor en die verdere openbaring van wanadministrasie en dalk selfs korrupsie, kan die inwoners van Midvaal erg benadeel sê Pypers.