Die Israelse lugmag het Dinsdag straalvegters ontplooi nadat ‘n ligte vliegtuig dit in die verbode lugruim bokant die kernreaktor in die Negevwoestyn gewaag het, het die weermag bekend gemaak.
Die vegvliegtuie het die ligte vliegtuig onderskep en gedwing om by ‘n nabygeleë landingstrook te land. Die twee loodse is aan burgerlike owerhede oorhandig wat ‘n ondersoek sal doen, het ‘n vroulike woordvoerder van die weermag gesê.
Die polisie was nie dadelik beskikbaar vir kommentaar nie, maar daar is in die Israelse media berig dat die twee mans, van Israel, gesê het dat hulle verdwaal het.
Vliegtuie word verbied om oor die reaktor naby die woestynstad van Dimona te vlieg.
Israel sê die reaktor is vir navorsingsdoeleindes, maar kenners meen dit is die sentrum van Israel se onverklaarde kernwapenprogram.
Hulle beweer dat Dimona gebruik is om ten minste 200 kernwapenkoppe te vervaardig.

Pres. Jacob Zuma het die ANC se beleid van nie-rassigheid verdedig in ’n onderhoud met ’n Engelse dagblad. Hy het gesê ’n debat oor ras is onnodig. “Ons moet nie-rassigheid bevorder. As ons begin sê ‘kom ons praat oor ras’ dink ek ons is besig om agteruit te boer”.
Die VSA het sy “diep teleurstelling” met Guinee se militêre leier, Dadis Camara, en sy minister van buitelandse sake uitgespreek ná massamoorde deur die Afrikaland se weermag.
Die naamborde wat die Tshwane-metroraad wil oprig by sy hoofingang sal nie die bestaande aanwysingsborde vervang nie, het die hooggeregshof in Pretoria Dinsdag gehoor.
Eskom wil volgende jaar die basiese gratis-elektrisiteitstoelaag aan arm huishoudings van 50 kW tot tussen 70 en 100 kW verhoog, het mnr. Jacob Maroga, uitvoerende beampte van Eskom, vandag gesê.