Hoewel poligamie in die Nederland verbode is, word poligame Moslems met verskeie vroue nou deur die Nederlandse owerheid erken.
Maar die Sentrale Buro vir Statistiek het bigame huwelike van sy lêers verwyder met die aanname dat administratiewe foute plaasgevind het.
Gevolglik is dit onbekend hoe algemeen die verskynsel in Nederland is.
Op dieselfde manier is huwelike wat veertienjariges insluit van die databasis verwyder.
Vrystaatlandbou se boere het aan die parlementêre verhoor oor die Skerpioene onttrek.
Volgens Henk Vermeulen, die uitvoerende beampte, is die vergadering in 'n ANC-politieke byeenkoms verander.
Honderde mense het by die Mangaung-buitemuursesportsentrum in Bloemfontein byeengekom vir die verhoor oor die Skerpioene se ontbinding.
Die skare het eerwaarde SB Dire van die Mount Zion AME-kerk in Bloemfontein toegejuig wat gesê het dat wit partye Koevoet, spesiale magte en alle rassiste geherberg het en daarom moes die Skerpioene verdwyn.
Hy het gesê die DA en wit partye moet om verskoning kom vra omdat hulle nie wil hê dat swartes moet regeer of moet slaag nie.
Die bui was tot dusver dieselfde by al die openbare verhore in die Ooskaap, Kwazulu-Natal en die Noordkaap.
Nog 'n sinkgat in Centurion het blykbaar twyfel laat onstaan oor die Gautrein se beplande roete.
Die Tshwane-metro in Pretoria het ontruimingsbevele op twee inwoners bedien.
'n Lid van die burgemeesterskomitee, Subesh Pillay, weet nie wat die oorsaak is nie, maar plaaslike inwoners sê die dolomitiese grondtoestand is daarvoor verantwoordelik.
'n Paar honderd meter oos van die jongste sinkgat is 'n aantal geboue reeds afgebreek en ander ontruim omdat die grond gesak het.
Indien sinkgate die viadukpilare beïnvloed, sal die hele projek tot stilstand kom terwyl 'n grootskaalse en duur ompad gebou word, het die DA se vervoerwoordvoerder, James Stewart, gesê.
Anglo American het geheime samesprekings met Zimbabwe se MDC gehou, volgens die Financial Times in Londen.
Anglo stel belang in winsgewende platinamynkonsessies indien Tsvangirai se party aan bewind kom.
Impala Platinum se Zimplats is tans die grootste platinamyn in Zimbabwe
Nóg Anglo American nóg MDC-amptenare wou onmiddellik op die artikel kommentaar lewer.
Honderde ontwortelde buitelanders het gister briewe ontvang waarin hul asielaansoeke geweier word.
Die atmosfeer was gisteraand gespanne aangesien buitelanders nou gedeporteer gaan word.
Die maatreël is geneem om immigrante wat hul dokumente tydens hul vlug weg van die onlangse etniese geweld verloor het, te beskerm.
Volgens die Gautengse provinsiale regering kan diegene wat weieringsbriewe ontvang het, 'n appèlproses volg.
Dis meesal Zimbabwiërs, Mosambiers en Kongolese wat weieringsbriewe ontvang het.
Dat die veertigjarige Georgiese president sy hand oorspeel het, is seker. Die Russiese ambassadeur in Berlyn, Wladimir Kotenef, het die arme Mikeil Saakashwili met hoon belaai en noem die aktivis van die Roserewolusie 'n "akteur" wat aan "grootheidswaan" ly. Die Russiese poniekoerant Pravda het onlangs 'n artikel die lig laat sien onder die titel "'n Ander Georgië wat aanstons op die VSA se kaart sal verskyn" met verwysing na die deelstaat in die Vereenigde State met dieselfde naam.
Saakashwili het trouens aan die Washington Post gesê dat hy heeltemal alleengelaat voel. "Toe Georgië aangeval is, moes ons onsself afvra: Aan wie se kant is die Weste, as hulle nie aan ons kant is nie?" het hy beskuldigend gesê. In antwoord daarop het Duitsland se minister van buitelandse sake, Frank-Walter Steinmeier, dit duidelik gemaak dat net 'n besonne politieke koers 'n krisis in die Kaukasus kan verhoed en die gebied kan stabiliseer.
In 'n meningspeiling in die Duitse koerant Die Welt stem die meerderheid teen Georgië wat hulle vir die inval verantwoordelik hou en nie teen Rusland nie. Saakashwili se Amerikaanse sikofansie tel kennelik teen hom by sy nadere bure, ten spyte daarvan dat hy Georgië graag as 'n oer-Europese land beskryf.
'n Franse onderhandelaar in Sarkozy se span sê Saakashwili het poker gespeel "en verloor". Indien 'n mens in gedagte hou dat Frankryk tot die einde van die jaar in die EU-presidentstoel sit, maak dit dié mededeling nog meer betekenisvol. Nick Grono van die International Crisis Group in Brussel toon selfs minder simpatie. Omdat die Georgiese president homself so "misreken" het, het hy die "toestand drasties laat versleg", sê hy.
Die president is nie iemand wat sy woorde graag tel nie. Sy inhuldigingstoespraak in 2004 is deur Amnesty Internationaal gekritiseer omdat hy die justisieminister aangespoor het om met alle geweld teen teenstanders op te tree en "hulle voor die voet te skiet en te vernietig" Hy het bygelas "dat geen koeëls gespaar sal word vir hierdie mense nie".
'n Nuwe mediawet wat in 2004 aangekondig is het 'n aantal prominente Georgiese skrywers genoop om 'n ope brief aan Saakashwili te rig waarin hulle die "intoleransie teenoor mense met ander opinies betreur wat in Georgiese politiek en ander sosiale sfere ingedring het" sedert hy aan die stuur van sake is.
Maar die president het sy volgelinge ook. Sy Nederlandse vrou, Sandra Roelofs, en Angela Merkel wat eersdaags samesprekinge met hom sal voer. En natuurlik die VSA omdat hy Georgiese troepegetalle na Irak verdubbel het. Dieselfde geld vir Georgiese soldate in Kosowo en Afghanistan wat steeds bly om "globale veiligheid" te verseker.
In 2004 het Sakaashwili Israel genooi na die opening van die moderne Energienavorsingsentrum en dr Brenda Schaffer, direkteur, het na die president in gloeiende terme as "die Nelson Mandela van die 21ste eeu" verwys.
Die Olimpiese Spele sorg hierdie jaar ook vir 'n goeie dosis drama. En in die halfeindrondte van die stoei vir die gewigklas onder 84kg was dit ook nie anders nie.
Uit pure frustrasie het die Sweedse stoeier Ara Abrahamian sy bronsmedalje op die stoeimat neergegooi Donderdag en die kryt verlaat. Abrahamian het tweede gekom in dieselfde nommer in Athene by die vorige Spele.
Hy sê hy dink sy nederlaag was totaal onregverdig. Die reëls was nie behoorlik toegepas volgens hom nie.
Abrahamian het gesê hy is nie geïnteresseerd in die derde plek nie, hy wil 'n goue medalje hê en daarna van die podium afgeklim.
Lagos, behalwe vir die onderskeidings in verkeersknope en meteoriese groei, is deesdae ook die duurste stad in Afrika.
Waar slawe eens die kontinent vaarwel geroep het, het die stygende olieprys kontant gebring wat daagliks meer opmerklik raak.
Selfs die duur Europese stede soos Stockholm en Barcelona is meer bekostigbaar. Die astronomiese pryse van goedere is des te meer skokkend omdat die gemiddelde inwoner van Nigerië op ongeveer R15 per dag oorleef.
'n Ete by 'n gewone restaurant kos R1 600 en 'n drankie kos R120. 'n Pak ontbytkos by die supermark sal jou R96 uit die sak jaag en 'n hotelkamer teen R3 200 is 'n winskopie.
'n Nuwe BMW, Mercedes of Bentley wat voortsukkel oor die klippe en gate in die paaie is geen snaaksigheid nie en horlosies teen R80 000 of selfone teen R40 000 by die blinknuwe inkopiesentrums wat oral floreer is alledaags. 'n Woonstel om te huur sal R48 000 per maand kos.
Maar hoë pryse beteken nie noodwendig goeie kwaliteit nie. Die stad was opgerig om 100 000 inwoners te kan huisves en vandag woon daar 'n geraamde 14 miljoen mense. Dit veroorsaak dat water- en elektrisiteitstoevoer onbetroubaar is, selfs vir die rykste inwoner.
Meer as 70% van Lagos se inwoners leef steeds in krotte en danksy die hoë vlak van korrupsie is nie eens 'n onderwyser seker van 'n salaris aan die einde van die maand nie.
George W. Bush het gelas dat die VSA se weermag 'n "energieke" humanitêre missie na Georgië lei. 'n Amerikaanse vragvliegtuig het gister op Tsibilisi geland en nog lug- en seemagte word eersdaags verwag.
Maar die Pentagon het beweringe van Mikheil Saakashwili, die Georgiese president, ontken dat die VSA beheer oor Georgië se lughawens en hawens gaan oorneem.
Condoleezza Rice sal vandag in Parys aandoen om met president Nicolas Sarkozy samesprekinge te hou. Die Franse president het homself tot dusver met die probleem bemoei.
Sarkozy, volgens sy eie beskrywing 'n baie gemiddelde leerling op skool, kon volgens Georgiese afgevaardigdes by die vredesamesprekinge nie eens vir Rusland oortuig om tot 'n tydskaal in te stem nie.
By 'n noodvergadering in Brussel het die Europese Unie se buitelandse ministers die vredesooreenkoms tussen Rusland en Georgië ondersteun en gesê dat vredesmagte welkom sal wees indien die VN daartoe instem.
Sergei Lawrof, Rusland se minister van buitelandse sake, sê Rusland is nie gekant teen addisionele vredesmagte nie, maar sal nie uit Suid-Ossetië onttrek nie.
Groot Brittanje het gister probeer om die morele hoëgrond te beklee deur uit militêre seeoefeninge met Rusland te onttrek omdat hulle dit as "hoogs ontoepaslik" beskryf "onder huidige omstandighede".
Mnr Saakashwili het die Weste gekritiseer omdat hulle nie fel genoeg teen Rusland gereageer het nie en gesê dat Georgië tans in 'n gevolmagtigde oorlog tussen die Weste en Rusland gebruik word.
