Absolute ongeoorloofde, rampspoedige en barbaarse aktiwiteite vind in Alexandra plaas en leiers behoort nie op die koop toe nog 'n soort ekonomiese vreemdelinghaat aan te wakker nie, het Erwin gesê.
Hy het gesê dit is nonsens en moet ophou.
'n Skare wat deur die polisie as baie aggressief beskryf is, het gister laatmiddag tussen 6de en 8ste Strate langs Londonweg in Alexandra gemaal.
Volgens berigte is heelwat buitelanders gister na 'n onbekende bestemming geneem.
Zimbabwe het 'n beroep gedoen op sy burgers om die onrusgeteisterde lokasie te verlaat en die konsul-generaal se kantoor te skakel om gerepatrieer te word.
Tente is gister opgeslaan deur die Johannesburgse stadsraad by die Alexandra polisiestasie nadat buitelanders daarheen gestroom het vir veiligheid.
Die DA het gevra dat die weermag ingeroep word om die golf van aanvalle teen buitelanders in Alexandra te stuit.
Griep en verwante siektes kos maatskappye R2,7 miljard per jaar in afwesigheid sê die statistiekmaatskappy CAM Solutions.
Die direkte koste is aansienlik en dit sluit nie eens addisionele kostes in soos om vir vir ekstra hulp wat in die geval van afwesigheid ingeroep moet word, te betaal nie.
Die syfers is nietemin effens laer. Uit 10 000 Suid-Afrikaners wat in 2005 gemonster is, was 14,2% siek as gevolg van griep, terwyl 12,8% in 2006 was. Vir 2007 is die syfer 14,1%.
Die maatskappy sê lugweg- en griepkwale het laerugpyn vervang as die nommer een rede vir wegbly verlede jaar.
Mense in die ouderdomsgroep tussen 31 en 40 neem die meeste siekverlof.
Kaapstad se munisipaliteit het aangekondig dat hulle meer as 20 000 watermeters sal installeer binne die volgende jaar. Watermeters is egter pas deur die Johannesburgse Hooggeregshof as ongrondwetlik en onwettig verklaar.
Die regter het die Stad van Johannesburg beveel om op te hou om watermeters te installeer.
Hierdie week het die Suid-Afrikaanse Munisipalewerkersunie, Samwu, aangekondig dat hulle die Mazibuko-beslissing as die grondslag vir 'n regsaksie teen die Stad van Kaapstad sal gebruik.
Kaapstad se beoogde stelsel is gelyksoortig aan die van Phiri, Soweto, waar munisipale watermeters tans uitgeruk word, het die unie gesê. Hulle het herbevestig dat die fundamentele probleem die beperking van mense se reg tot water is.
Die vyf het na wat beweer word sakeman Ali Javadi se maatskappy, Financial Intelligence Centre, in 2006 gekontak. Hulle het Javadi in Hongkong ontmoet nadat die vals Mboweni geëis het dat hy BTW van R500 000 betaal.
Javadi is daarna gedwing om verskeie ander betalings te doen van ongeveer R2 miljoen.
Die beskuldigde het die sakeman egter te ver gedruk toe hy versoek het dat Javadi $20 miljoen aan die Reserwebank oorbetaal.
Die Skerpioene het die vyf by die Montecasino Hotel in Johannesburg in hegtenis geneem.
Tanzanië se regering het Pemba-leiers se versoek vir afskeiding van dié regering as hoogverraad bestempel en dit vergelyk met wat onlangs in die Comore gebeur het.
Pemba se eis kom net twee weke na die ineenstorting van die Zanzibar-vredesverdrag. Die Tanzaniese regering sê dat dié verdrag – wat aanvoer dat magsdeling die oplossing vir Zanzibar se politieke krisis is – ongrondwetlik is.
Tanzanië se minister in die adjunk-president se kantoor, wat verantwoordelik is vir vakverbondsake, mnr. Mohamed Seif Khatib, het die Pemba-leiers vergelyk met “gevaarlike individue” soos kol. Mohamed Bacar. Bacar is onlangs van die Comore verdryf deur Afrika-uniesoldate.
Pemba het verlede week hul versoek om afskeiding van Zanzibar aan die direkteur van die Verenigde Nasies-ontwikkelingsprogram (VNOP), mnr. Oscar Fernandez-Taranco, oorhandig. Dit volg ‘n maand nadat hulle die eerste keer dié idee getoets en bespreek het.
Die leiers het hul petisie aan Fernandez-Taranco voorgelê en hom gevra om dit aan die Verenigde Nasies (VN) se sekretaris generaal, Ban Ki-moon, te oorhandig.
Die groep het verlede maand Amerika se ambassadeur in Tanzanië, mnr. Mark Green, genader om hul boodskap aan president George W. Bush oor te dra dat hulle graag van Tanzanië en Zanzibar wil skei.
Mnr. Khatib het die staat se versoek dat die Pemba-leiers in hegtenis geneem moet word, afgewys en net gesê: “Hulle versoek is teen ons land se wetgewing en kan beskou word as hoogverraad. Ek dink nie hulle kan as ‘n onafhanklike land funksioneer nie.” Khatib het Sondag Pemba toe gevlieg om die situasie te monitor.
Khatib het verder Tanzanië se opposisie daarvan beskuldig dat hulle Pemba se onafhanklikheidsplanne ondersteun.
Alhoewel daar nog vasgestel moet word wie agter dié planne sit, sê kenners dat die verwikkelinge ‘n toets sal wees vir president Jakaya Kikwete se regering wat al jare sukkel met die politieke dooiepunt in Zanzibar.
Pemba versterk hul onafhanklikheidsdoelwit met die bewering dat die eiland ekonomies al sedert die 164-revolusie deur die rewolusionêre Zanzibar-regering gemarginaliseer is.
Hulle gebruik die 192 topposisies in die Zanzibar-regering as ‘n voorbeeld. Volgens Pemba-eiland word slegs 26 setels van die 192 beset deur mense van Pemba, terwyl die ander van Unguja afkomstig is.
Verdere bewerings lui dat alle ontwikkeling in Unguja geskied en dat Pemba tevrede moet wees met die “krummels”.
Khatib het die bewerings as sinloos bestempel sonder enige “konkrete bewyse”. “Unguja is waar die regering gesetel is, natuurlik sal hulle ‘n hoër vlak van ontwikkeling hê as Pemba,” sê Khatib. Hy voer verder aan dat, “niemand kan sê dat Pemba ‘n vergete eiland is nie. Daar word dan nuwe lughawens en stadions gebou!”
Die Vryheidsfront Plus het gesê dat alle inwoners van Pretoria wat gedwing word om private vullisverwydering te doen vanweë die huidige vullisverwyderingskrisis, hul kostes van die stadsraad moet terugeis.
Die VF Plus het verder gesê dat die metroraad 'n meganisme in plek moet stel waarvolgens inwoners wat verkies om op 'n permanente basis private vullisverwyderingsdienste te gebruik, vrygestel sal word van daardie kostes op hul munisipale rekeninge.
Pretoria se woonbuurte is in 'n vulliskrisis gedompel vanweë die voortslepende staking deur Samwu, en die ANC se onvermoë om die probleem op te los.
Verskeie inwoners en besighede het die VF Plus se raadslede gekontak en gesê dat hulle hul ekstra koste aan private vullisverwydering van die stadsraad gaan terugeis, en indien die raad dit nie betaal nie, sal sommiges regsaksie oorweeg.
Volgens mnr. Conrad Beyers, VF Plus-raadslid, is dit die stadsraad se verantwoordelikheid om alternatiewe reëlings vir vullisverwydering te tref tydens die staking, maar hulle versuim om dit te doen. Volgens Beyers is dit verstommend dat die ANC geen gebeurlikheidsplanne gereed het om die krisis te hanteer nie – veral in die lig daarvan dat presies dieselfde krisis verlede jaar plaasgevind het.
"Tans betaal inwoners en besighede dubbeld vir vullisverwydering – privaat asook op munisipale rekeninge – en daar is geen uitkoms vir hulle nie omdat die ANC die inwoners laat betaal, ongeag of die dienste gelewer word of nie. Dit moet end kry en alle inwoners behoort hulle private vullisverwyderingsrekeninge amptelik van die raad terug te eis", het Beyers gesê.
Die VF Plus het gesê dat die party inwoners sal bystaan wat hieroor aksie, wat moontlike regsaksie kan insluit, teen die raad wil neem.
President Yar'Adua van Nigerië het gister vir die eerste maal die Nigerdelta-gebied besoek en het die geleentheid gebruik om te waarsku dat tensy die onrus ophou, Nigerië haar posisie as Afrika se grootste olieprodusent mag afstaan aan Angola.
Die Nigerdelta het die potensiaal om die petrochemiese reus van Afrika te word. Die president voel dat die gebrek aan vrede Afrika se ontwikkeling oor die afgelope 50 jaar aan bande gelê het.
Hy het geweld in die Nigerdelta blameer vir die styging in ru-oliepryse wêreldwyd, sowel as die situasie in Iran en Irak.
Die onluste in Alexandra na wedersydse moorde tussen plaaslike inwoners en buitelanders het gisternag voortgeduur met inwoners wat die polisie met klippe bestook het.
Die polisie het in ruil rubberkoeëls afgevuur.
Die woordvoerder van die Gautengse polisie, Lungelo Dlamini, kon nie die voorval bevestig nie.
Ek is nie oor so 'n voorval ingelig nie, ek sal u kontak sodra iemand van Alexandra my gebel het om my oor die jongste verwikkelinge in te lig, het hy gesê.
Die geweld in die lokasie noord van Johannesburg het begin toe plaaslike inwoners buitelanders aangeval het omdat hulle daarvan verdink word dat hulle vir die misdaadgolf in Alexandra verantwoordelik is.
Die moeder van die vermoorde Danielle Esterhuizen het gister in die Randfonteinse streekhof getuig en vertel hoe haar 5-jarige dogtertjie op haar skoot doodgeskiet is. Danielle en haar pa, Diederick, was op 20 Desember 2006 langs 'n dam besig om vis te vang toe beskuldigdes David Nqomane, Tsakane Sithole en Thabang Jane goedsmoeds op die kind losgebrand het.
Die moord het die aandag van die media getrek toe openbare figure soos Steve Hofmeyr, Joost van der Westhuizen en Dan Roodt saam buite die Randfonteinse hof betoog het tydens die borgaansoek van die moordenaars.
Die vader van Danielle het gesê dat hy nooit weer aan 'n visstok sal vat nie omdat hy homself blameer dat sy dogtertjie dié dag net vir 'n halfuur lank by die dam kom kuier het.
