Smelters afgeskakel om krag te spaar

Twee van BHP Billiton se kragintensiewe aluminiumsmelters is Donderdagaand afgeskakel omdat die vraag na elektrisiteit Eskom se beskikbare hoeveelheid krag oorskry het, het Beeld berig.

Hilary Joffe, Eskom se woordvoerder, het Donderdagaand ná die spitsverbruikstyd gesê die vraag na elektrisiteit was meer as 35 000 MW tussen 17:00 en 21:00. Eskom kan 34 970 MW krag opwek.

Eskom het ‘n ooreenkoms met BHP en ander maatskappye om hul kragtoevoer tydelik af te sny wanneer die vraag in spitstye gevaarlik hoog is.

Die huidige koue en die langnaweek het Donderdagaand meegebring dat die vraag na elektrisiteit Eskom se beskikbare hoeveelheid krag oorskry het, het Joffe gesê.

Joffe het gesê Donderdagaand was ‘n goeie voorbeeld van ‘n vroeë waarskuwing dat Suid-Afrikaners dié winter ernstig krag sal moet spaar.

‘Elke kind moet by die skool wees’

Pres. Jacob Zuma het Vrydag gesê Suid-Afrikaners behoort onderwys ernstig op te neeem.

“As ek daaroor kon besluit sou opvoeding nie net gratis wees nie, maar ook verpligtend,” het Zuma aan studente by die Universiteit van Johannesburg se Soweto-kampus gesê.

“Elke kind sou by die skool wees… Ons moet alle Suid-Afrikaners bemagtig. Dit moenie ‘n misdaad wees om ‘n kind skool toe te stuur nie.”

In verwysing na Julius Malema se uitlatings dat hy ‘n diktator is, het Zuma gesê: “As ek ‘n diktator was, sou ek baie van die tronke in skole omskep het en al die jong mense wat misdade pleeg, daarheen neem.

“Maar ek is nie ‘n diktator nie,” het Zuma geskerts.

Zuma het aan die studente gesê hy stel belang om hul opinies en voorstelle te hoor.

Hy het gevra wat gedoen moet word om die land se toekoms te vorm.

“Vandag hoor jy hoe mense die regering kritiseer… Hulle het vergeet dat die regering probeer om probleme die hoof te bied wat al eeue lank daar is… Hulle maak asof ons in 1994 begin het om opvoeding op te mors,” het die president gesê.

“Opvoeding speel ‘n baie groot rol in die land.”

Zuma het gesê mense kan krities wees, maar hy weet die regering “doen goed”. Hy het gesê opvoeding het uiteindelik die grondslag wat dit nie in die verlede gehad het nie.

De Klerk-stigting kla oor rasgedrewe SAA-kadette

Vaardigheid, en nie net ras nie, moet deur die Suid-Afrikaanse Lugdiens (SAA) oorweeg word wanneer hy kandidate kies vir sy kadetprogram vir voornemende vlieëniers, het die FW de Klerk-stigting Donderdag gesê.

Dis begryplik dat SAA wil hê sy vlugpersoneel moet verteenwoordigend wees van die land se demografie, het Jacques du Preez, woordvoerder vir die stigting, gesê.

Hy het egter gesê die lugdiens moet ook ander faktore in ag neem wanneer hy kandidate kies.

“Hy moet verseker dat vermoë… genoeg gewig dra in sy indiensnemingsbesluite. Die relatiewe vaardigheid, vermoë en kwalifikasies van aansoekers moet ‘n sentrale rol speel in die SAA se indiensnemingsbesluite, ongeag ras of geslag,” het hy gesê.

SAA het Maandag aangekondig dat 40 kandidate vir sy kadetprogram gekwalifiseer het: 10 is swart mans, vier swart vroue, nege bruin mans, een bruin vrou, sewe Indiërmans, twee Indiërvroue, en sewe wit vroue.

Du Preez het gesê die eerste vereiste behoort te wees dat die kandidate uitstekende vlieëniers moet wees, ongeag hulle ras.

SAA het in Augustus verlede jaar sy aanvanklike besluit om geen aansoeke van wit mans te aanvaar nie, opgehef.

Verskeie wit kandidate het in 2012 aansoek gedoen vir die program, maar hul aansoeke is summier verwerp wanneer hulle hul ras op die aanlyn-aansoekvorm ingetik het.

Kabelo Ledwaba, woordvoerder van die SAA, het destyds gesê die kadetprogram is geadverteer om die demografie van sy vlieëniers te verander. Volgens hom was 91% van die lugdiens se vlieëniers in daardie stadium wit mans.

Dr. Dirk Hermann, adjunkhoof van Solidariteit, het gesê verlede jaar se opheffing van die verbod was net ‘n rookskerm. Hy het gesê die vakverbond gaan ‘n veldtog teen die lugdiens begin.

Tlali Tlali, woordvoerder van die SAA, het gesê dit is belangrik om te verseker dat daar transformasie in alle dissiplines van die maatskappy is.

“Tans is die SAA se vlugbemanning nie ‘n weerspieëling van Suid-Afrika se rasse- en geslagsdemografie nie.”

Die inname vir die 2013-’14-kadetprogram word in Augustus vanjaar geadverteer.

DA wil Mandela-standbeeld in Kaapstad oprig

‘n Standbeeld van oudpres. Nelson Mandela kan dalk opgerig word voor die stadsaal in Kaapstad, waar hy ná sy vrylating sy eerste toespraak gelewer het, berig die Cape Times.

Leonore van der Walt, DA-raadslid, het Woensdag op ‘n raadsvergadering voorgestel dat ‘n komitee aangestel word om die om die proses en befondsing te bespreek.

Andre Fourie, ‘n VF-raadslid, het gewaarsku dat behoorlike konsultasie moet plaasvind om ‘n debakel soos dié van die vryheid van die stad-toekenning wat aan die Obamas toegeken word, te verhoed. Die aankondiging van dié toekenning het kritiek uit alle oorde ontlok.

“Dit moenie gebeur met ‘n persoon met die statuur van Mandela nie.”

Tony Ehrenreich, ANC-leier in die stadsraad, het gevra vir ‘n “koherente nasionale beleid” om Mandela te vereer, anders sal die standbeeld in Kaapstad ‘n “DA-foefie” wees.

Die proses sal volgens die berig sowat R1 miljoen kos.

Motlanthe vergader met myn-rolspelers

Adjunkpresident Kgalema Motlanthe vergader vandag in Pretoria met belangrike rolspelers in die mynbedryf.

Die Presidensie sê die vergadering is deel van die pogings om die bedryf te stabiliseer en ‘n volhoubare oplossing vir die probleme te kry.

Die National Union of Mineworkers, die vakbond AMCU, Solidariteit, NACTU, Cosatu, die Kamer van Mynwese en die Suid-Afrikaanse Mynontwikkelingsvereniging sal dit na verwagting bywoon.

Die spanning tussen die NUM en AMCU in die platinumsektor het vererger, wat gelei het tot geweld en stakings. AMCU het intussen ‘n beplande staking by Lonmin se platinummyne in Noordwes uitgestel.

Die vakbond sê die besluit hang af van ‘n positiewe uitslag van die vergadering met Motlanthe.

AMCU wil as die meerderheidsvakbond by die maatskappy se myne erken word. AMCU sê in ‘n verklaring hulle wil die adjunk-president die geleentheid gee om ‘n deurbraak te bewerkstellig.

Zuma vra dat land vir Mandela bid

President Jacob Zuma het weer ‘n beroep op mense gedoen om vir oudpresident Nelson Mandela, te bid en hom in hul gedagtes te hou. Zuma het Mandela in die hospitaal in Pretoria besoek, waar hy die afgelope ses dae vir ‘n longinfeksie behandel word.

Die hospitaal waar Mandela behandel word, sê hoewel hy die pligte van polisielede by die hospitaal respekteer, is die hospitaal se pasënte sy eerste prioriteit.

Dit volg na berigte dat die polisie ‘n hartpasiënt geteister het. ‘n Woordvoerder van Mediclinic, Lee-Ann Bell, sê egter die hospitaal het die nodige stelsels by die Pretoriase Harthospitaal om te verseker dat geen pasiënte of hulle besoekers verontrief word nie.

Volgens berigte is ‘n kardiologiepasiënt, Maxwell Mkhonto, verkeerdelik vir ‘n joernalis by die hospitaal aangesien waarna hy na bewering aangerand, deursoek en beslag op sy selfoon gelê is.

‘n Gebeddiens word vanoggend vir die oud-president in die St George’s katedraal in Kaapstad gehou. Verskeie godsdienstige groepe sal die diens bywoon. Die ANC se sekretaris in die Wes-Kaap sê die diens is om vir Mandela se spoedige herstel te bid.

Vyfde Turkse betoger sterf

‘n Betoger wat beseer is tydens botsings met die Turkse onluste-polisie, is dood, het ‘n prokureur gesê.

Die sterftesyfer ná twee weke se betogings in die land het nou na vyf gestyg.

Protesaksies naby Istanboel se Taksim-plein het oënskynlik begin toe inwoners ongelukkig was oor ‘n plan om ‘n plaaslike park te herontwikkel. Dit het egter intussen na ander dele van die land oorgespoel.

Ongeveer 70% van Turke voel ongelukkig oor hul regering se vyandigheid teenoor Sirië.

Die familie van die oorledene se prokureur, Sema Aksoy, het gesê die 26-jarige Ether Sarisuluk – wat vir dae lank aan lewensondersteuningsmasjiene gekoppel was – is Donderdag dood verklaar. Hy is glo op 1 Junie tydens betogings in Ankara met ‘n traangaskannetjie teen die kop getref.

‘n Menseregtegroep het gesê duisende mense is vir beserings behandel in die betogings wat op 31 Mei begin het.

Vandale skend Christengrafte in Jerusalem

Vandale het grafte by ‘n Christelike begraafplaas in Tel Aviv beskadig, het die polisie gesê.

Micky Rosenfeld, ‘n polisiewoordvoerder, het gesê die woord “prysetiket” is Donderdag op verskeie grafte in die voorstad Jaffa gevind.

Die frase word gewoonlik deur ‘n groep Joodse ekstremiste gebruik.

Die groep is gekant teen wat hulle sien as die Israelse regering se pro-Palestynse beleid.

Rosenfeld het bygevoeg dat die polisie tans na die oortreders soek.

Donderdag se voorval volg ná ‘n soortgelyke voorval by ‘n kerk in Jerusalem twee weke gelede.

EFF wil Lamola ontbloot na kritiek teen Malema

Die sogenaamde Economic Freedom Fighters het Ronald Lamola as ‘n “kortsigtige beroepsondersteuner” uitgekryt nadat Lamola Malema gekritiseer het.

“Lamola sal enigiets doen, insluitend diktators smeek vir sy persoonlike vryheid, en dus die saak vir ekonomiese vryheid in ons leeftyd opoffer,” het Floyd Shivambu, voormalige woordvoerder van die ANC-jeugliga, in ‘n verklaring namens die EFF gesê.

“Mnr. Lamola moet basies sy mond hou, omdat nie weet waarvan hy praat nie en niemand neem hom in elk geval ernstig op nie.”

Shivambu het reageer op Lamola se uitlatings dat die jeug nie Julius Malema se voorgestelde nuwe politieke party moet ondersteun nie.

In ‘n onderhoud met The Star het Lamola gesê Malema se forum van “radikale militante” is niks minder as militante wat mislei word nie.

Lamola het Malema daarvan beskuldig dat hy die jeugliga se resolusies oor ekonomiese vryheid, wat in 2011 op die nasionale konferensie in Midrand aanvaar is, “gekaap” het.

Shivambu het op sy beurt gesê Lamola het weggedryf van dié resolusies en aangesluit by die koor van “neo-liberale hervormers”.

Hy het ook gewaarsku indien Lamola aanhoudend dié soort uitlatings gaan maak, sal die EFF hom “ontbloot” vir die verskeie “individuele onderhandelings en manewales” in die aanloop tot die ANC se nasionale konferensie in Mangaung verlede jaar.

Die jeugliga se nasionale uitvoerende komitee is vroeër vanjaar deur die ANC ontbind en vervang met ‘n nasionale taakspan.