Twee van Brasilië se grootste stede is Dinsdagaand deur ‘n reuse-kragonderbreking getref.
Volgens mediaberigte is groot dele van Rio de Janeiro en Sao Paulo in die duister gedompel weens probleme by een van die land se hidro-elektriese damme.
Na bewering het Brasilië sowat 17 000 megawatt elektrisiteit verloor nadat ‘n probleem by die Itaipu-dam onstaan het. Hierdie dam is op die grens tussen Brasilië en Paraguay.
Owerhede kon nie dadelik kommentaar lewer oor die voorval nie.
Die Russiese skepper van die AK-47-aanvalsgeweer het homself op sy 90ste verjaarsdag as ‘n gelukkige man wat oor net ‘n paar dinge spyt is, beskryf.
“Ouderdom is nie belangrik nie, ek het nog baie lewe in my,” het die gryskop-uitvinder in ‘n onderhoud wat op televisie in Rusland gebeeldsend is gesê.
Mikhail Kalashnikov, wat sy das versier het met ‘n metaalspeld in die vorm van ‘n AK-47, het op sy verjaarsdag patriotiese gedigte aan joernaliste voorgelees in sy tuisdorp, Izhevsk wat sowat 1 300km van Moskou geleë is.
Hy word as ‘n held in Rusland beskou vir die ontwerp van die AK-47, wat ook die “Kalashnikov” genoem word en wat die topkeuse van weermag- en guerrilla-groepe regoor die wêreld is.
Meer as eenhonderd miljoen Kalashnikovs is reeds wêreldwyd verkoop, maar die Rus, ‘n veteraan van die Tweede Wêreldoorlog, het skaars ‘n wins van sy uitvindsel gemaak.
“In al my 90 jare voel ek soos ‘n gelukkige man,” het Kalashnikov in ‘n onderhoud met die regeringskoerant, Rossiiskaya Gazeta gesê.
“Natuurlik soos met enige mens, is ek spyt oor ‘n paar dinge, maar een ding kan ek sê, ek sou dit nie anders wou hê as die keuse vir my gegee is nie,” het Kalashnikov gesê.
Toe hy tydens ‘n skermutseling in die oorlog gewond is, het Kalashnikov, gedryf deur Rusland se nederlae teen ‘n Duitse weermag wat veel beter gewapen was, aan sy geweer begin werk.
Die Kalashnikov het vinnig opgang gemaak en is hoog op prys gestel vir sy betroubaarheid in moeilike omgewingsituasies.
Die ANC-jeugliga het Dinsdag die DA gevra om “stil te bly” en het die party daarvan beskuldig dat hulle klagtes oor die kostes van Julius Malema se sekuriteit rassisties is.
“Die verklarings wat deur die regse politieke partye uitgereik, veral van die DA, in verband met dié vertroulike kwessie, kom duidelik van die rassistiese tradisies van hierdie minderheidspartye,” het die liga in ‘n verklaring gesê.
Dit was in reaksie op ‘n berig uit Rapport wat op News24 gepubliseer is wat getoon het dat Malema spesiale beskerming ontvang wat die belastingbetaler R300 000 uit die sak jaag.
Die ANCYL het berigte oor die kwessie afgepraat en ‘n beroep gedoen op alle verantwoordelike media om op te hou om oor die persoonlike sekuriteit van die ANCYL president te berig, aangesien hulle dit as privaat ag.
“Ons doen ook ‘n beroep op die DA om hul monde te hou en om die demokratiese beginsels, instellings en prosesse van die ANC-regering te respekteer.”
“Ons kan nie help om te glo dat die DA se teenkanting van die ANCYL president se sekuriteitreëlings deur alternatiewe motiewe aangevuur word nie.”
In die berig het polisiewoordvoerder Zweli Mnisi Saterdag bevestig dat Malema spesiale beskerming ontvang.
Patricia de Lille van die Onafhanklike Demokrate het aan die koerant gesê: “Vir iemand wat daarvan hou om kontroversiële uitlatings in die media te maak, is dit lafhartig om nou skielik bang te wees.”
Volgens Dianne Kohler, die DA se woordvoerder vir veiligheid en sekuriteit, is sekuriteit slegs ‘n “modegier” vir die president van die jeugliga.
Helen Zille, Wes-Kaapse premier het ‘n lys van nasionale wette wat dienslewering in die provinsiale regering vertraag, aan die presidensie, regering asook die ministerie vir tradisionele aangeleenthede oorhandig.
Dít kom na ‘n versoek wat pres. Jacob Zuma aan die Wes-Kaapse provinsiale regering op 13 Augustus, tydens ‘n vergadering in Pretoria, gerig het.
Die lys van wette wat die provinsiale regering beïnvloed, is gebaseer op insae gelewer deur elk van die Wes-Kaapse departemente.
Daar was in totaal 70 voorgestelde veranderinge. Dit sluit in oproepe vir die nasionale wetgewing om vereenvoudig te word, om sodoende vertragings van infrastruktuur-projekte soos behuising, basiese dienste en paaie te vermy.
In sommige gevalle is daar tot vier verskillende wette wat vier verskillende openbare deelname prosesse vir een projek vereis. Dit veroorsaak groot vertragings, het Zille gesê.
“Ons doen ook ‘n beroep om ‘n meer duidelike wetgewing oor die verskillende rolle en verantwoordelikhede van nasionale, provinsiale regering te kry, soos uitgesit in skedule 4 en 5 van die grondwet.”
Die huidige situasie het onsekerheid gelaat, en dit het befondsing en implementering affekteer, en het baie keer provinsiale regerings met onbefondse mandate gelaat.
“Ons het gevra dat die grondwethof gevra moet word om die proses te beheer.”
“Die vraag rondom die regte en verantwoordelikhede van hawens is ook geopper, wat deur Transnet beheer word, maar nie altyd op so ‘n manier, dat streeksekonomie asook gemeenskappe hieruit voordeel trek nie.”
“Ons het ook ‘n reeks ander voorstelle ingesluit om nie in slaggate te trap wat tot korrupsie en wanbestuur kan lei nie.”
“Verlede maand is ‘n lys van nasionale wette ingehandig wat munisipaliteite negatief affekteer. Dit was gebasseer op insae van ‘n hele paar munisipaliteite in die Wes-Kaap, ná ‘n versoek vanaf die minister aan al 30 munisipaliteite in die provinsie.”
Volgens die Verenigde Nasies se Konsortium vir Vlugtelinge het sowat 20 000 mense uit die noorde van Kongo gevlug weens etniese geweld.
Sestig mense is reeds dood.
Andrej Mahecic , woordvoerder vir die Konsortium, sê die Munzayas het klaarblyklik uit die Kongo se Equateurprovinsie gevlug toe Enyele stamlede hulle aangeval het.
Volgens ooggetuies het ‘n burgermag van Enyele stamlede ”van huis tot huis gegaan, eplunder, verkrag en gemoor”.
Die geweld spruit blykbaar uit visvang- en landbouregte.
‘n Ooreenkoms vir ‘n gesamentlike R500 miljoen waterprojek tussen Nederland en Suid-Afrika is Maandag geteken, het die departement van waterwese gesê.
Die projek gaan deur die Zululand-distriksmunisipaliteit geïmplementeer word en beoog om sowat 165 000 mense in plattelandse gebiede te help, het die departement in ‘n verklaring gesê.
Die ‘Dutch Orio grant’ is beoog vir die verbetering van infrastruktuur in gemeenskappe wat dit broodnodig het.
Die ooreenkoms kom aan die begin van die Afrika Waterweek.
Buyelwa Sonjica, minister van waterwese het gesê Afrika lande sal nie hul doelwitte vir water en sanitasie bereik soos in die Millennium-ontwikkelingsdoelwitte (MOD) uitgestippel, indien hulle teen die trant voortgaan nie.
Die MOD het doelwitte vir water en sanitasie gestel wat teen 2015 bereik moet word.
Teen die huidige onkoste vir ontwikkelling, sal die doelwitte vir water eers teen 2036, en vir sanitasie teen 2109 bereik word, het die departemenet gesê.
“Afrika se sanitasie en water maak stadige vordering en is besig om die ekonomiese groei te onderdruk,” het Sonjica gesê.
“Die handhawing van finansies om infrastruktuur en dienslewering in Afrika op te skaal sal ‘n hooffokus bly.”
Volgens haar lê die sleutelprobleem in die finansiering van water- en sanitasie-infrastruktuur.
Afrika se ministers van buitelandse sake het China se belofte om amper R80 miljard aan Afrika te leen, verwelkom.
Hulle het egter bygevoeg dat die samewerking van elke individuele streek van groot belang is.
“Afrika is gereed vir ontwikkeling.”
“Afrika is al vir te lank agtergelaat en is nog altyd gemeet aan ongebalanseerde standaarde,” het minister Moses Wetangula van Kenia gesê.
“Byvoorbeeld, Europa het ‘n ander stel standaarde vir Oos-Europa as vir Afrika,” het hy gesê.
“Nou bied China vir ons die finansiering en die vaardighede om, byvoorbeeld, ‘n nuwe spoorlyn aan te lê.
“Wie sal dan nou nie so ‘n kans aangryp nie?”
Minister Wen Jiabao van China het tydens die Forum on China-Afrka samewerking in Egipte, lenings van amper R80 miljard aan Afrika beloof.
Die fokus sal wees op die verligting van armoede, sowel as bystand in landbou en infrastruktuur.
Hulle beoog ook om tariewe op goedere van die minder-ontwikkelde Afrika-lande, te lig.
Zainab Bangura, Sierra Leone se minister van buitelandse sake, het gesê dat hulle al baie gebaat het uit samewerking met China.
Hy en Jiabao het egter klem gelê op die feit dat daar na interne samewerking op die kontinent gestreef moet word.
Daar sal tydens die forum vergaderings tussen Chinese verteenwoordigers en verteenwoordigers van omtrent 50 Afrika lande gehou word om ‘n aksieplan vir die volgende drie jaar te bewerkstellig.
‘n Swart vrou van Oos-Londen is in hegtenis geneem nadat sy glo ‘n vierjarige seun aan die brand gesteek het en sy dood veroorsaak het.
Volgens polisie in die Oos-Kaap het die vrou glo Sondagmiddag brandspiritus oor die seun uitgegooi en hom aan die brand gesteek. Die voorval het in die Mdantsaneplakkerskamp plaasgevind.
“Die vrou was onder die indruk dat die seun in haar huis wou inbreek. Die bure het gesien hoe die seun, bedek in vlamme, uit die huis gestorm kom terwyl hy skreeu en roep om hulp,” het kapt. Mluleki Mbi gesê.
Die bure het die vlamme geblus en die kind na ‘n nabygeleë hospitaal geneem. Hy is later as gevolg van sy brandwonde dood.
Mbi sê die seun het rondom 15:00 na die vrou se huis gegaan opsoek na ‘n maat om mee te speel.
Die vrou sal Dinsdag op ‘n klag van moord in die Mdantsane landdroshof verskyn.
Die hooggeregshof in Zimbabwe het Maandag die terrorisme-saak teen Roy Bennett, ‘n top assistent van Zimbabwe se eerste minister Morgan Tsvangirai, uitgestel.
“Die saak is voorwaardelik na Woensdag uitgestel,” het regter Chinembiri Bhunu gesê na die saak wat in die oggend afgeskop het.
Bhunu moet ‘n uitspraak lewer oor ‘n aansoek van die staat dat die verdediging se argumente geskrap word omdat dit nie behoorlik voorgelê is nie. Bhunu moet ook sê of ‘n sleutelgetuie van die staat mag getuig.
Bennet, ‘n voormalige wit boer en die tesourier van Tsvangirai se party, die Beweging vir Demokratiese Verandering (MDC), word daarvan aangekla dat hy president Robert Mugabe drie jaar gelede probeer omverwerp het.
Bhunu sal glo ook beslis oor ‘n aansoek deur die verdediging dat Peter Hitchmann, wat volgens die staat vir Bennett in die terrorisme- en wapenklagtes ingesleep het, nie moet getuig nie.
Soortgelyke klagtes teen ander amptenare van die MDC is reeds uit die hof gegooi en Bennett se inhegtenisname verlede maand het Tsvangirai aangemoedig om die eenheidsregering van Zimbabwe vir drie weke te boikot. Dit is in ‘n poging om die spanning in die magsdeling uit te wys.
Bennett is tans uit op borgtog en kan moontlik die doodstraf in die gesig staar indien hy skuldig bevind word.
Jacob Maroga het Barbara Hogan, minister van openbare ondernemings, in ’n brief in kennis gestel dat hy homself steeds as die uitvoerende hoof van Eskom beskou, volgens Vytjie Mentor, voorsitter van die parlement se portefeulje-komitee rakende openbare ondernemings.
Nadat nuus Maandag bekend geraak het dat Godsell bedank het, het Mentor die brief bevestig. “Hy het gesê hy aanvaar volle beheer oor al sy verantwoordelikhede, insluitend om op die direksie te wees, hy sal die onderneming bestuur,” het Mentor gesê.
Intussen het die Black Management Forum Maandagmiddag reeds Godsell se bedanking en Maroga se terugkeer verwelkom.
“Ons spreek ons waardering uit dat hy bedank het. Dit was die regte ding,” het die organisasie se besturende direkteur, Gaba Tabane, gesê.
“Ons verwelkom dit ook dat Maroga terug is by die werk.”
Intussen het ekonome gesê Godsell se bedanking is ’n “groot terugslag” wat buitelandse beleggers wat vrese het oor politieke inmenging, kan afskrik.
“Dit wil voorkom asof die gesag van die direksie ondermyn word. Dit wil ook voorkom asof die korporatiewe bestuur by Eskom erg geskud is,” het Chris Hart, ekonoom van Investment Solutions, gesê.
“Die implikasie is dat daar politieke inmenging was, dit sal betreurenswaardig wees as dit die geval is,” het Ulrich Joubert, ekonoom van Kruger International, gesê.
“Dit sal ’n paar wenkbroue in die beleggingswêreld laat lig. Finansiële markte hou nie normaalweg van politieke inmenging nie,” het Joubert gesê.
Ayanda Shezi, woordvoerder van die departement van openbare ondernemings, kon nie teen 15:00 bevestig of die res van Eskom se direksie ook bedank het nie.
