Afrikaners en ander Suid-Afrikaners in die buiteland gesels oor Suid-Afrika.
Kyk die onderhoud hier.
Skrywer: Dan Roodt
Galery weier om skildery af te haal
Johannesburg se Goodman Gallery sal nie ‘n skildery van pres. Jacob Zuma met sy penis wat blootgestel word, verwyder nie, want dit sou sensuur wees.
“Ons voel dit is sensuur om die uitbeelding af te haal,” het die gallery se woordvoerder Lara Koseff, Vrydag gesê.
Die ANC het vroeër ‘n brief van hul prokureurs oorhandig wat die verwydering daarvan eis. Die regerende party wil ook ‘n beeld van die Brett Murray-skildery van City Press se webwerf verwyder sien.
Die koerant het geweier en gesê ‘n hof moet besluit.
Koseff sê die skildery bly. Die galery staan vas by sy kunstenaars soos tydens en na apartheid, en ondersteun hulle nog steeds. Sy het gesê Suid-Afrika raak soos China wat geen vryheid van menings toelaat nie.
Alhoewel die menings van die kunstenaar nie die galery s’n verteenwoordig nie, verwelkom hulle die gesprekke wat met werke soos Murray s’n na vore kom.
Besoekergetalle het aansienlik toegeneem sedert die ANC die verwydering van die skildery eis. ‘n Wag met ‘n koeëlvaste baadjie is by die deur gepos as ‘n voorsorgmaatreël.
Skildery sal Zuma se aansien verhoog
Oliver Tambo se dogter, die spotprenttekenaar Zapiro en die Joodse kunsgemeenskap in Johannesburg, skree “Vryheid van uitdrukking!”, maar vir die gesin van die president is die skildery nie snaaks nie.
Die Afrikaanse gemeenskap is ook geskok deur die skildery. In onderhoude wat praag.co.za gedoen het, het mense gesê dit is ‘n kinderagtige manier om kritiek te lewer en onvanpas.
By ‘n leeskring in Johannesburg het lede gesê die skildery sal baie simpatie vir Zuma bring en sy aansien by konserwatiewe kiesers verhoog.
Zuma se dogter, Gugu Zuma, het Sondag in ‘n verklaring aan City Press gesê die portret is “vulgêr en toon geen teken van menslikheid nie”.
“Ons verstaan wel dat hy [Zuma] ‘n openbare figuur is, maar hierdie is nie meer polities nie en maak eerder inbreuk op sy regte as mens,” het sy gesê.
“Sover dit ons aangaan, in ons samelewing is dit slegs diere wat kaal staan, nie mense nie.”
Zuma se broer, Michael, het aan die Sunday Times gesê die portret is walglik en het niks anders as skande oor die familie gebring nie.
“Dit is die mees walglike ding wat nog ooit gepubliseer of gesê is oor die president,” het hy gesê.
“As ‘n familie is ons steeds geskok, want in ons kultuur is die blootstelling van privaatdele iets wat ‘n skande is. Dit word beskou as disrespekvol teenoor daardie persoon en andere.”
Sapa berig die ANC het Vrydagaand hofdokumente ingedien vir ‘n dringende aansoek om die galery te verbied om die omstrede kunswerk ten toon te stel.
Jackson Mthembu, ‘n woordvoerder, het vroeër gesê die saak sal Dinsdag in die Johannesburgse hooggeregshof aangehoor word.
ET-verhooruitspraak more
Die twee mense wat daarvan beskuldig word dat hulle Eugene Terre’Blanche vermoor het, sal Dinsdag verneem wat met hulle gaan gebeur.
Regter John Horne het by die laaste hofverrigtinge op Ventersdorp aan die staat en die verdediging gesê dit gaan waarskynlik ‘n lang uitspraak wees.
Chris Mahlangu en ‘n tiener word daarvan aangekla dat hulle die AWB-leier op 3 April 2010 in sy plaashuis doodgeslaan het.
Albei het onskuldig gepleit op moord, huisbraak en roof met verswarende omstandighede.
Mahlangu beweer hy het uit selfverdediging opgetree. Die minderjarige ontken enige betrokkenheid in die misdaad.
Norman Arendse, die tiener se regsverteenwoordiger, het in sy slotbetoë gesê werkers op Terre’Blanche se plaas is uitgebuit.
“Plaaswerkers soos die beskuldigdes word oor die algemeen uitgebuit.”
Arendse het bygevoeg dat die voormalige leier van die AWB voorheen tronkstraf opgelê is nadat hy ‘n petroljoggie in 1993 aangerand het.
Arendse het ook gesê die polisie het geweet ‘n minderjarige werk vir Terre’Blanche, maar het niks daaraan gedoen nie.
Mahlangu se prokureur, Kgomotso Tlouane, het gesê indien die beskuldigdes skuldig was, sou hulle nie die polisie van die voorval in kennis gestel het nie.
Israel se premier waarsku teen swart immigrante
Eerste Minister Benjamin Netanyahu waarsku dat Israel oorval kan word deur onwettige immigrante uit Afrika.
Die toenemende aantal migrante is hoog op die nasionale agenda na aanleiding van ‘n reeks misdade, insluitend verkragtings, wat op die nuwelinge geblameer word.
Netanyahu, sê die instroming “bedreig die binding van die Israeliese samelewing, sy nasionale veiligheid en sy nasionale identiteit.”
Hy sê as Israel dit nie stop nie, sal die “60 000 infiltreerders aangroei tot 600 000, en lei tot die uitwissing van Israel as ‘n Joodse en demokratiese staat”.
Meer as 50 000 swartes het Israel sedert 2005 binnegedring, om vervolging en armoede te ontsnap.
Sommige Israeli glo hul land, geskep na die Holocaust, moet die onderdruktes help.
Vryheidsoorloggraf geplunder
‘n Graf by ‘n Anglo-Boereoorlog-begrafplaas in Ladysmith is deur rowers geplunder, het Amafa Heritage KwaZulu-Natal Sondag gesê.
James van Vuuren van Amafa het gesê kontrakteurs was verlede week besig met instandhoudingswerk by die Intombi Camp Military Cemetery, toe hulle afgekom het op ‘n gebreekte grafsteen en ‘n gat van twee meter diep in een van die grafte.
“Ons weet nie wie die oortreders is nie, maar ons vermoed hulle het gesoek na oudhede soos knope en ordetekens,” het hy gesê.
“Dit is ‘n vermorste poging deur die oortreders. Hierdie is ‘n formele begraafplaas en die persoonlike besittings van die dooies sou dus voor die begrafnis verwyder word.”
‘n Klag is by die polisie ingedien.
Van Vuuren het gesê Amafa bied ‘n beloning aan vir enigiemand wat inligting het wat tot ‘n inhegtenisneming kan lei.
SA sal Israeli-produkte boikot
Suid-Afrika is van voorneme om produkte van Wesoewernedersettings waarop staan “Made in Israel” te verbied, het die Minister van Handel en Nywerheid Rob Davies aangekondig.
Die stap kom nadat twee Suid-Afrikaanse NRO’s saamgewerk het met die gewilde Palestynse Struggle-Koördineringskomitee.
Davies, van Joodse afkoms, het in sy amptelike aankondiging gesê dat verbruikers in Suid-Afrika nie mislei moet word om te glo dat die produkte uit Israel kom nie. Hy het bygevoeg “die regering van Suid-Afrika erken die staat van Israel, slegs binne die 1948-grense afgebaken deur die VN.”
Davies was vir baie jare in ballingskap vanweë sy werk in die African National Congress en die Suid-Afrikaanse Kommunistiese Party tydens apartheid. Volgens sy verklaring “lê die bewyslas van waar die produkte afkomstig is, op handelaars. “
Produkte wat vervaardig word in die Wesoewer, soos skoonheidsmiddels, koeldrank, en elektronika, maar gemerk is as “Made in Israel” sal geraak word, het Davies in sy aankondiging gesê.
Mohammed Khatib, wat aan die hoof staan van die Koördineringsomitee, het gereageer op die minister se verklaring, en gesê dit is “die erkenning van die onreg wat die besettings en nedersettings veroorsaak aan ons, die Palestyne.” Khatib het gesê dat hy dink dit is net ‘n eerste stap, wat sal lei tot die uiteindelike verbanning van alle produkte wat vervaardig word in die nedersettings.
Denemarke is van plan om dieselfde te doen as Suid-Afrika, het die minister van buitelandse sake Saterdag gesê aan die Deense media. Die stap volg na berigte van die ANC se plan om sulke produkte te boikot.
“Dit is ‘n stap wat dit duidelik maak aan verbruikers dat die produkte onder toestande wat nie net vir die Deense regering nie, maar ook die Europese regerings, onaanvaarbaar is,” het die minister van buitelandse sake Villy Søvndal Søvndal aan Politiken-koerant gesê. “Dit sal dan aan die verbuiker oorgelaat word om te besluit of hy die produk wil koop of nie.”
‘n Bron in Brussel vertroud met die kwessie het aan Haaretz gesê dit is nog onduidelik of die stap ‘n aanbeveling of ‘n nuwe riglyn is.
Laat in 2009, het die Britse regering aanbeveel dat Wesoewerprodukte afsonderlik gemerk word.
Obama weer voor
Enkele dae nadat die Rasmussenopnames met ‘n peiling gekom het wat aangedui het dat Romney in hierdie stadium van die komende resies voorloop met iets soos 50% teen 43%, toon ‘n nuwe peiling dat dit dalk nie die geval is nie.
In ‘n peiling wat Sondag vrygestel is, het Rasmussen bevind dat 46% van die respondente, wat almal stemgeregtigde kiesers is, aangedui het dat hulle vir Obama gaan stem, terwyl 44% vir Romney sal stem as die verkiesing nou gehou sou word. Sowat 5% het aangedui dat hulle ‘n derde kandidaat verkies terwyl 5% nog onseker is.
In die vorige peiling wat sowat tien dae gelede gehou is, het sowat 4% aangedui dat hulle ‘n derde kandidaat verkies terwyl 3% onseker was.
Rasmussen gee nie enige verduideliking vir die ommeswaai in verwagte steun binne enkele dae nie, maar dit kan toegeskryf word aan die persentasie moontlike fout wat in alle peilings van die aard opgesluit is.
Dit wys egter net weer dat daar nie te veel op peilings staatgemaak kan word nie – veral nie ses maande voor ‘n verkiesing nie. Wat egter wel uit die peilings afgelei kan word, is dat sake dalk baie gelykop gaan verloop.
Ons donker planeet, deel 1
Proloog
Ek is gebore in millennium 1132, jaar 17, maand 2, dag 11; ons kalender gaan nie verder terug as ongeveer 11 miljoen jaar gelede nie. Ek veronderstel elke beskawing beskik oor sy jaar nul, sy ontstaansoomblik. Ons planeet is baie oud, amper so oud soos die sterrestelsel en ons son, die naaste ster waaromheen ons wentel. Hoe die wêreld gelyk het in die voortyd, voordat ons begin tel het, weet ek nie. Al wat ons het, is die fossiele, asook die voorstellings, die hipoteses en teorieë van wetenskaplikes.
Ek voel dat ek my verhaal móét vertel, vir diegene wat ná ons kom, vir my kinders en hulle kinders en hoe ver my nageslag ook al in die toekoms mag strek, wat seker nie te ver gaan wees nie. Want presies twee jaar voor my geboorte, het ‘n ongekende ramp Nemia getref. In die verafgeleë noordelike oerwoud het ‘n ruimteskip neergestort. Daar was ‘n groot ontploffing wat deur die seismograwe en die holograwe opgeteken is. Latere weergawes van die ruimteskip se noodlanding het dit aangetoon as ‘n min of meer ovaalvormige voorwerp wat die oppervlak van Nemia aanvanklik egalig genader het, maar toenemend onstabiel geraak en toe neergestort het. Enkele ure ná die neerstorting het ‘n groot ontploffing gevolg wat die wrakstukke oor ‘n wye oppervlak versprei het.
My vader Sarius, wat toe nog betreklik jonk was, was lid van die ondersoekspan wat na die ongeluksgebied uitgestuur is. Hy het dit onlangs aan my in groot besonderhede vertel en my jeugdige verbeelding het die res ingevul. Dit was amper asof ek self daar was. Of die hele ongeluk via intydse holografiese beelde, sekond vir sekond, gevolg het. In daardie oomblikke is die lot van ons beskawing en ons planeet verseël. Maar dit sou ons eers enkele jare later agterkom.
Die tuig was groot, groter as enigiets wat nog ooit op Nemia gebou is. Volgens my vader kon daar tot soveel as 7 000 Oertoeke aan boord gewees het. Agterna was daar bloot min of meer verkoolde lyke – karkasse is miskien ‘n meer gepaste woord, want ek beskou nie die Oertoeke as mense of hoër wesens nie – wat oor die ongeluksgebied verstrooi gelê het.
Toe die opperraad van hoëpriesters van die voorval te hore kom, het hulle onmiddellik die span wetenskaplikes en kundiges laat saamstel, wat per sweeftuig na die oerwoud versend is. Die werk was gevaarlik, want in die ongerepte oerwoud het allerlei gevaarlike reptiele en roofdiere geskuil wat die lede van die ondersoekspan kon bedreig. Ons Nemiane glo dat alle lewensvorme heilig is en daarom mag ons nie eens die diere wat ons aanval, doodmaak nie. Elke lid van die ondersoekspan is met ‘n laserskokpistool toegerus om die lastige attensies van roofdiere of reptiele die hoof te bied.
Volgens die scenario wat my vader-hulle agterna saamgestel het, het die ruimtetuig vol Oertoeke die bome se sambreeltakke eers begin breek soos ‘n groot bal wat daarop land en toe die grond teen ongeveer 30 meter per sekonde getref. Onmiddellik ná die slag was die meeste Oertoeke binne-in die tuig dalk beseer, maar nie dood nie. Daar was sitplekke met gordels aan wat hulle beskerm het, ook die kinders. Hul breë, plat, growwe gesigte moes tegelyk ontsteld en verdwaas na mekaar gekyk het. ‘n Geroesemoes van stemme in hul vreemde, frikatiewe taal, onderbreek deur daardie dierlike gromgeluide wat hulle ook maak, moes losgebars het.
Of die tuig se deure nog geredelik gewerk het vir die uitklimslag, weet ons nie. Mettertyd sou sekere Oertoeke egter hul weg na buite gevind het, al hoe verder van die gestrande ruimtetuig deur die ruie oerwoud begin dwaal het. Moontlik sou hulle van die meer intelligente en ondernemende tipe gewees het. Enkeles sou dalk deur ‘n skalmoen of ‘n basslang aangeval gewees het. Maar gegewe die Oertoek se inherente aggressie, sou hulle hulself met welslae teen sulke aanvalle verdedig het, moontlik selfs die doodgemaakte kat of reptiel op die plek verorber het, want ná die lang reis moes hulle honger gewees het.
Agterna het ons fisici en ander wetenskaplikes intens oor die aard van die ruimteskip se aandrywing gespekuleer. Die mees waarskynlike verklaring daarvoor, asook vir die ontploffing binne enkele ure ná die landing, was dat ‘n vorm van kernfusie die energie vir die tuig verskaf het. Hoewel my vader van beroep ‘n genetikus is, stel hy ook geweldig in chemie en fisika belang. Hy en sy kollegas meen dat ‘n vreemde, glasagtige element die ontwerpers van die skip in staat gestel het om groot hoeveelhede gas in ‘n enkele bal saam te pers, wat eers ‘n plasma sou vorm en daarna permanent sou begin brand. Presies hoe die energie van hierdie fusiereaktor gebruik is om die tuig aan te dryf, weet ons nie. Dit moes ‘n pragtige voorwerp gewees het, ‘n kristalbal wat vir alle praktiese doeleindes ‘n draagbare of vervoerbare klein sonnetjie was wat hulle op die lang reis vergesel het. Die moontlikhede wat so iets ingehou het, was legio, want met hul eie son aan boord kon hulle ook vars voedsel kweek. Met die hope energie kon hulle waterstof- en suurstofatome uit die ruimte onttrek en tot water sintetiseer.
Vanweë die botsing of ‘n fout van die bemanning – met hul klein breingrootte is die Oertoeke nie baie intelligent nie – het die reaktor egter binne enkele ure ontplof. Die oorblywende Oertoeke binne die skip is geheel en al vernietig. Op die landingsplek was slegs ‘n groot krater oor, maar kleiner wrakstukke van die skip is oor ‘n groot gebied in die oerwoud gevind. Oertoeke verder van die skip af is verkool en diegene wat reeds ver in hul verkenning van die oerwoud gevorder het, is bloot deur die lugdruk van die ontploffing gedood sodat hul bebloede karkasse of liggaamsdele in min of meer ongeskonde toestand op die grond of in die blou en groen mikke van boomstamme gevind is. Dit het die span van ongeveer honderd Nemiaanse wetenskaplikes en ondersoekbeamptes etlike dae geneem om die gebied vir getuienis te fynkam en vir enige oorlewendes te soek, maar geen is gevind nie.
Google stoot tariewe sesvoudig op
Google, wie se gewilde gmail-diens allerweë deur individue gebruik word, het so pas met ‘n slenterslag hul aanlynbergingsdiens se prys sesvoudig verhoog.
Voorheen kon persoonlike gebruikers wie se gmail vol geraak het, vir slegs $5 per jaar ‘n ekstra 20 Gigagrepe se bergingskapasiteit per jaar bygekoop het.
Nou vra Google skielik $30 vir dieselfde diens. Weliswaar het die hoeveelheid gratis bergingsruimte van Gmail insgelyks gestyg vanaf omtrent 7 Gig na 10 Gig, wat vir die meeste mense seker genoeg is. Maar vir aktiewe gebruikers van e-pos wat graag hul ou e-pos bewaar sonder die moeite om rugsteune te maak, kan selfs 10 Gig ná ‘n paar jaar onvoldoende raak.
In April het Google ook sy bergingsdiens wat “Dokumente” heet, na Google “Drive” herdoop. Hiermee wil die maatskappy mededingers soos Dropbox en Apple die stryd aansê wat reeds suksesvolle aanlynberging aan gebruikers verskaf. Omdat mense deesdae inligting op soveel toestelle, vanaf persoonlike rekenaars tot selfone en tablette, beskikbaar wil hê, maar dit sin om alle belangrike lêers aanlyn te berg. Aanlynberging kan ook as rusteun vir plaaslike lêers gebruik word.
Volgense Google kan huidige gebruikers van die aanlynbergingsdiens wat op die ou, goedkoper skaal verkeer, steeds daarmee aanhou, solank hulle geensins daaraan verander deur byvoorbeeld die kapasiteit te verhoog nie.
Persoonlik maak ek reeds ‘n jaar lank van die $5-per-jaar-diens gebruik, nadat my gewone e-pos vol geraak het, maar om $30 per jaar betaal, lyk vir my ‘n bietjie dik vir ‘n daalder as ‘n mens in ag neem dat Yahoo se e-posdiens gratis is met onbeperkte ruimte. Dit sal my seker nog ‘n paar jaar neem om 30 Gig met e-pos vol te maak. Intussen maak ek egter ook gebruik van die aanlynberging en om dokumente aanlyn met kollegas of vriende te deel, sodat my bergingsruimte vinniger as net deur e-pos opgeneem word.
Dat Google egter hier ‘n manier raakgesien het, om ‘n slag te slaan, is gewis. As ‘n mens eers aan hierdie tipe diens verslaaf is, is dit moeilik om te verander, sonder dat jy jou aanlynlewe verder kompliseer. Daarom sal vele mense seker verplig wees om die sesvoudige prysverhoging te absorbeer.
Skielik is die internet nie meer gratis nie!
Google voer reeds ‘n verbete stryd om gebruikers van Google Apps te dwing om ten duurste vir e-pos te betaal, tot $50 per jaar. Google Apps is ‘n weergawe van Gmail waardeur ‘n mens jou eie domeinnaam vir e-pos kan gebruik. Aanvanklik toe die diens enkele jare gelede bekendgestel is, kon ‘n mens tot 100 of selfs meer gratis “posbusse” vir jou maatskappy of organisasie verkry. Nie-winsgewende organisasies en skole het selfs 500 of meer sulke posbusse gratis ontvang, teenoor die korporatiewe “Google Apps Premium” waarvoor ‘n mens $50 per jaar moet betaal.
Meer onlangs het Google egter die aantal gratis Google Apps-posbusse tot tien per domein beperk. Iemand wat elf posbusse wil hê, sou dus onmiddellik $550 per jaar moet betaal.
Dit laat ‘n mens weer met ander oë na Yahoo se e-posdiens kyk. Yahoo beskik nie oor al die funksionaliteit van Gmail nie, maar vir swaar gebruikers van e-pos kan dit ‘n opsie raak. Diegene wat bereid is om insgelyks $20 per jaar vir Yahoo se betalende diens te betaal, ontvang ‘n onbeperkte e-posdiens met min of meer die funksionaliteit van Gmail, behalwe vir die aanlynberging.
Terloops, PRAAG is ‘n gelisensieerde verskaffer van Google Apps, asook ‘n verskaffer van ADSL-verbindings teen baie billike tariewe. Ons basiese ADSL-diens beloop slegs R200 per maand (Telkom-verbinding ingesluit). Ons verkoop ook rekenaars, rekenaarkomponente, skootrekenaars, tablette en e-lesers teen uiters mededingende pryse. Kontak ons by inlig[by]praag.org vir meer inligting.