‘n Swartman van 24 is in hegtenis geneem weens die verkragting van twee meisies van nege jaar oud, het die polisie in Katlehong vanoggend laat weet.
Kaptein Mega Ndobe het gesê die man het na bewering die meisies op straat in die Moleleki-buurt van Katlehong genader
“Hy het hulle na ‘n snoepwinkel gestuur en toe hulle terugkeer, het hy een van die meisies in sy huis in gedwing en haar verkrag,” het hy gesê.
Die eerste meisie is op 5 November verkrag, terwyl die tweede Saterdag verkrag is.
“Die tweede slagoffer het haar ouers vertel dat sy verkrag is en hulle ook oor haar vriendinnetjie vertel,” het Ndobe voortgegaan.
Die man is Sondag in hegtenis geneem.
Die polisie in Katlehong het ook 175 mense vir allerlei misdade in die gebied in hegtenis geneem, waaronder poging tot moorde, aanranding, diefstal, die rig van ‘n vuurwapen, kwaadwillige saakbeskadiging en openbare dronkenskap, asook onwettige immigrasie.
Die verdagtes sal na verwagting vandag in howe verskyn in Natalspruit, Alberton en Germiston, afhangend van waar hulle gearresteer is.