Orlando – praag.co.za

Winnie Mandela se nefie steel R83 000, handsakke by haar

Winnie Madikizela-Mandela, soos sy deesdae bekendstaan, het ‘n klomp misdade op haar kerfstok waarvoor sy om politieke redes nooit vervolg is nie, maar was nou self die slagoffer van diefstal toe haar nefie na bewering R83 000 van haar “verjaardaggeld” by haar gesteel het.

Die 30-jarige Zolile Madikizela sal na verwagting vandag in die Orlando-landdroshof in Soweto verskyn op ‘n klag van diefstal betreffende die R83 000. Hy is verlede week in hegtenis geneem nadat ‘n bediende van Winnie, Colin Mtileni, ‘n klag van diefstal teen hom aanhangig gemaak het.

Hy het toe vlugtig in die hof verskyn en geen borg is toegestaan nie. Zolile Madikizela word ook deur die Valke ondersoek vir inbrake by Winnie se huis toe hy na bewering ander items soos ‘n televisiestel van R20 000 en “ontwerpershandsakke” ter waarde van R80 000 gesteel is. Winnie het blykbaar haar nefie as ‘n “tuinier” ingespan.

Die twee diefstalsake word egter apart hanteer.

Na wat berig word het Winnie ontdek dat haar kontant weg is toe sy haar handsak uit haar kas haal om bietjie brood te gaan koop. Waarom Winnie soveel kontant in haar handsak ronddra, is nie bekend nie.

Obama wil Moslems se gevoelens spaar

Hoe President Obama reageer op geweld wat met Islam te make het, word duidelik bepaal deur ‘n spesifieke stel reëls.

In sy jongste aanval op Donald Trump na die massaslagting deur ‘n ISIS-terroris in Orlando, Florida, het die Amerikaanse president weer erg kleigetrap.

Trump het Obama se versuim om radikale Islamiste te kritiseer, ten sterkste afgekeur en gesê die president behoort te bedank.

Obama het op sy beurt die debat rondom radikale Islam “politieke afleiding” genoem.

Die president was eerder bekommerd dat Moslems se gevoelens gespaar moet bly.

Hy het gesê oproepe vir strenger beheer en ‘n verbod op Moslemimmigrasie sal Moslem-Amerikaners “verraai deur hul regering laat voel”.

Obama het aan verslaggewers gesê ná ‘n ontmoeting met die Amerikaanse Nasionale Veiligheidsraad ‘n aanval deur groepe soos “Isil” (beter bekend as ISIS) “sal nie verhoed word deur die gebruik van ‘n etiket nie” en bygevoeg dat Islam “niks te doen het met die aanval nie”.

“Oproepe om ‘n bedreiging ‘n ander naam te gee, sal nie maak dat dit nie weggaan nie. Dit is ‘n politieke afleiding.”

Net daarna het hy homself liederlik weerspreek en gesê die idee dat die administrasie verward is oor die vyand, is vals want hulle voer ‘n oorlog teen “Isil” in Sirië, Irak en Libië “wat stadig gewen word”.

Die oorlog teen ISIS word tans eerder deur sy administrasie se aartsvyand, president Assad van Sirië mbv Rusland gewen.

Berigte van Amerikaanse betrokkenheid om ISIS se hand te sterk dmv hul NAVO-bondgenoot Turkye het vroeër die nuus gehaal, terwyl Obama herhaaldelik oproepe gedoen het dat “Assad moet gaan”.

Obama het Islam weer verdedig soos hy nog nooit enige ander godsdiens verdedig het nie. Soos gewoonlik het hy die swartsmeerdery, aanvalle, moorde en massamoorde op Christene geïgnoreer.

Die swart president het ook voorheen geen woord van simpatie gehad vir Colleen Hufford wat die slagoffer van ‘n wrede jihadistiese aanval was nadat ‘n toegewyde swart Moslem haar kop afgesny het nie.

In die linkse media is Hufford voorgehou as iemand wat dalk “rassisties” kon gewees het, maar sonder enige getuienis van sulke optrede. Haar beweerde “rassisme” is gebruik om die Moslem se moord te regverdig.

Obama blameer gereeld alle wit mense vir slegte dinge wat gebeur het, tans gebeur, en kan gebeur met swart mense.

Hy het trouens sy aanval op Trump afgesluit deur te sê mense wat Moslems “terroriste” noem, bevorder eintlik terreur.

Obama het in sy reaksie gesê Omar Mateen se massamoord in Orlando was ook ‘n “haatmisdaad” en “uit eie bodem, uitgevoer deur ’n moordenaar wat wapens wettig gekoop het”.

Die ander bestanddele van die Obama-resep is om alle rykes te demoniseer tensy die rykes Demokratiese Party ondersteuners is.

Trump het Obama se reaksie op die Orlando-skietery as te bangbroekig beskryf en Hillary Clinton betig omdat sy haar nie sterker teen terreur kan uitspreek nie, en bygevoeg dat sy nie aan die presidentsverkiesing behoort deel te neem nie.

“Pres. Obama het skandelik geweier om selfs die woorde ‘radikale Islam’ te gebruik.

“Om daardie rede alleen behoort hy sy amp neer te lê. As Hillary Clinton ná hierdie aanval nie die twee woorde ‘radikale Islam’ kan sê nie, moet sy uit die presidentsverkiesing tree,” het Trump in ’n verklaring gesê.

Trump het kort ná die skietery getwiet hy wil nie “gelukgewens word” omdat hy reg was oor radikale Islamitiese terreur nie; hy wil “taaiheid en waaksaamheid hê”.

Orlando-skieter het veiligheidsklaring van G4S gehad

Die gewapende Moslem wat 50 gays in `n nagklub in Orlando in Florida doodgeskiet het, het so onlangs as 2013 sekerheidsklaring van sy werkgewer, die internasionale veiligheidsmaatskappy G4S ontvang.

Die 29-jarige Omar Mateen het twee keer veiligheidsklarings ontvang.

Die Amerikaanse speurdiens, die FBI sê Mateen is in 2013 en weer in 2014 ondervra nadat hy aan sy mede-werkers aangedui het dat hy militante groepe steun.

Hy het Sondag met ‘n handwapen en geweer in die gay nagklub losgebrand.

Die aanvaller, wat deur die polisie doodgeskiet is, het ook ‘n onbekende toestel aan sy lyf gebind gehad. Die voorval word as ‘n binnelandse terreurdaad ondersoek.

Talle gays is ook gewond in die aanval.

Dit is die mees moorddadige aanval sedert 9/11 op Amerikaanse grondgebied. ‘n Noodtoestand is in Florida verklaar in wat beskou word as die ergste massa-skietery in onlangse geskiedenis.

Mateen is ‘n Amerikaanse burger en kind van ‘n immigrante-egpaar uit Afghanistan.

Hy het by ‘n aftree-oord in die suide van Florida gewerk.

Die Islamitiese Staat (ISIS) het vroeër deur sy nuusagentskap aanspreeklikheid vir die aanval aanvaar.

Amerikaanse owerhede probeer die militantegroep se betrokkenheid by die aanval onderspeel, maar NBC het berig dat die skieter trou aan ISIS gesweer het voor die aanval.

Pres. Barack Obama het nie een keer na Moslems of Islam in sy verklaring oor die skietery verwys nie, maar “wapens” verantwoordelik gehou.

Bernie Sanders het ook die term “radikale Moslems” heeltemal vermy en wapens die skuld gegee. “Ek glo dat in hierdie land, moet ons nie outomatiese wapens verkoop wat ontwerp is om mense dood te maak nie,” het Sanders na die skietery gesê.

Hillary Clinton wil die VSA se inname van sogenaamde vlugtelinge uit die Midde-Ooste dramaties verhoog gedurende ‘n eerste termyn as sy verkies word, maar die Amerikaanse Republikeinse presidensiële kandidaat, Donald Trump het ongebreidelde immigrasie skerp geskritiseer.

In reaksie op die nagklubskietery het hy gesê dit was die werk van Islamitiese militante.

Hy het ook later op sosiale media sy ondersteuners daaraan herinner dat hy reg was met sy waarskuwings teen radikale Islamitiese terreur.

Trump het in Desember, nadat 14 mense in Kalifornië doodgeskiet is, voorgestel dat Moslems verbied word om Amerika binne te kom. Hy het dit na die jongste skietery herhaal.

Trump skryf op Twitter dat die Amerikaanse leierskap swak is in ‘n tyd wat hulle onversetlik behoort te wees.

Hy het sy verkiesingsveldtog vanaand in New Hampshire weens die skietery gekanselleer, maar sal steeds vanmiddag by die Anselm-kollege praat.

Owerhede in Santa Monica, Kalifornië het intussen plofstof sowel as wapens en ammunisie Sondag in die motor van ‘n Moslem gekry wat hulle vertel het hy beplan om ‘n vriend by die gayfees in Wes-Hollywood op te soek, het ‘n Amerikaanse wetstoepassingsbron gesê.

Federale en plaaslike wetstoepassers het besluit teen die kansellasie van die jaarlikse gay-optog wat Sondagoggend onder strenger sekuriteit plaasgevind het.

Ondersoekbeamptes is nou besig om uit te pluis wat gebeur het, maar probeer ontken dat daar enige verband tussen dié voorval en die slagting in Orlando, Florida is.

Die polisie het op ‘n wenk gereageer dat ‘n verdagte man in Santa Monica opgemerk is. Sy naam is nie bekend gemaak nie.

Beamptes het die motor geïnspekteer en ‘n hele paar wapens gekry, waaronder drie gewere, een van hulle ‘n aanvalsgeweer en ‘n bestanddeel wat gebruik kan word om ‘n pypbom te maak, het ‘n bron gesê.

Libmedia slaan vure dood ná groteske Moslemmassamoord in Orlando

Die wêreld se liberale media is besig om angstig vure dood te slaan ná die groteske massamoord deur Omar Mateen op meer as 50 mans in ‘n homoseksuele kroeg in Orlando, Florida in die VSA. Mateen, wat self in die skietery deur polisie omgebring is, was ‘n uitgesproke Moslem wat reeds jare lank dreig om homoseksuele te gaan skiet. Blykbaar het hy onlangs saam met sy vrou en kind twee mans gesien wat mekaar in die openbaar soen, wat sy woede verhoog het.

Hoewel van Afghaanse oosprong, was Mateen ‘n Amerikaanse burger.

Die massamoord het wêreldwye afgryse, asook ‘n anti-Islamsentiment veroorsaak en gaan waarskynlik die kandidatuur van mnr. Donald Trump vir die Amerikaanse presidentskap bevoordeel. Die groot liberale media soos die New York Times en die Londense Guardian is daarom besig om vure dood te slaan deur die skietery op “die beskikbaarheid van wapens in Amerika” te blameer. In sy reaksie het die Amerikaanse president, Barack Obama, ook nie na die Moslemgeloof van die aanvaller verwys nie en bloot gesê dat “die owerheid nog nie tot ‘n definitiewe oordeel geraak het sover dit die skieter se motivering betref nie”, maar dat die FBI dit as ‘n terreurdaad sou ondersoek.

Obama het ook gesê dat die VSA “nie aan vrees moet toegee nie” en bygevoeg: “Dis helder dat hy iemand was wat met haat gevul was. Oor die komende dae sal ons uitpluis hoe en waarom dit gebeur het. Dit kon in enige van ons gemeenskappe gebeur het. As ‘n land, sal ons daar wees vir Orlando, vandag, môre en vir al die dae wat nog moet kom.”

Die Londense Guardian weier om die skietery op homo’s as ‘n daad te sien wat deur Islam gemotiveer is en blameer daarom die “maklike toegang tot wapens”. Die koerant sê in ‘n hoofartikel:

“Die aaklige waarheid is dat die Amerikaanse samelewing kwesbaar vir sulke aanvalle is op ‘n manier waarop ander (samelewings) nie is nie, vanweë sy geloof dat vryheid maklike, wye toegang tot dodelike wapens vereis. Terwyl dit waar is dat wapens nie mense doodmaak nie, soos die slagspreuk lui, maak mense met wapens wel mense dood, en hulle doen dit baie vinniger en meer doeltreffend as wat mense sonder wapens kan uitrig.”

Intussen het dit ook aan die lig gekom dat, selfs al sou daar geen toegang tot wapens in die VSA wees nie, Mateen wel wapens sou gehad het omdat hy vir die Britse veiligheidsmaatskappy G4S gewerk het. As gevolg van sy werk, het hy in elk geval toegang tot opleiding en wapens gehad.

Die voorval word as die ergste massaskietery in die Amerikaanse geskiedenis beskou, aangesien 50 dood en 53 gewond is toe Mateen op klante by die homoseksuele nagklub Pulse in die middestad van Orlando losgebrand het. Volgens die owerheid het hy Sondagoggend rondom 2-uur Amerikaanse tyd op die klub afgestorm en begin vuur. Hy is later deur ‘n polisietaakmagspan op die toneel doodgeskiet.

Volgens die TV-netwerk NBC News, het Mateen oomblikke voor hy begin skiet het, die noodnommer 911 geskakel en sy trou aan die leier van die Islamitiese Staat bely. Volgens mnr. Adam Schiff (D-Kalif.) in die Amerikaanse Huis van Verteenwoordigers en lid van die Huis-inligtingskomitee, is hy ook in ‘n verslag vertel dat die skieter “sy verbintenis met ISIS verklaar het”.

Dit blyk ook dat Mateen reeds verskeie kere op die radarskerm van die Amerikaanse veiligheidsdienste beland het weens sy radikale Islamitiese uitsprake op sosiale media, maar dat dit nie belangrik genoeg geag is nie.