Die olieprys het weer gestyg in weerwil van pogings deur olieproduserende lande om 'n manier te vind om dit hok te slaan.
Die wêreld se grootste produsent, Saoedi-Arabië het vroeër planne aangekondig om produksie te verhoog. Dit sal 'n algehele verhoging van vyfhonderdduisend vate per dag sedert Mei tot gevolg hê.
Die nuus het egter geen demper op stygende oliepryse geplaas nie.
Londense Brent-ruolie se prys het gister tot $136,24 per vat gestyg.
Die prys van olie het sedert die begin van die jaar met veertig persent toegeneem.
Die ANC se president, Jacob Zuma, het gister sy pogings voortgesit om bedrogklagtes teen hom teruggetrek te kry.
Sy regsadviseur, Michael Halley, het gister 'n aansoek ingedien by die Hooggeregshof in Pietermaritzburg.
Daarvolgens word 'n hofbevel aangevra wat die nasionale vervolgingsgesag se besluit om Zuma te vervolg, ongeldig verklaar word.
Zimbabwe se regerende party het die opposisie se onttrekking van die presidentsverkiesing as 'n onbenulligheid afgemaak.
Zanu-PF het gesê dit was die elfde keer dat Tsvangirai gedreig het om hom van die presidensiële opvolgverkiesing te onttrek.
Die Zimbabwiese verkiesingskommissie het gesê dat voorbereidings vir die presidentsverkiesing Vrydag voortgaan omdat die MDC-opposisie nie sy onttrekking op skrif gestel het nie.
Die heersende party glo dat Tsvangirai 'n neerlaag wil vermy.
Zanu-PF het Tsvangirai daarvan beskuldig dat hy politieke geweld as 'n verskoning gebruik terwyl die waarheid is dat die meerderheid gevalle van geweld deur die MDC veroorsaak is.
'n Polsiebeampte is deur vier mans in die mond geskiet aan wie hy 'n geleentheid langs die pad gebied het, het die Ooskaapse polisie verklaar.
Twee polisiebeamptes was aan diens toe hulle gister vier mans en 'n vrou in Motherwell, Port Elizabeth, opgelaai het. Die vier mans het konstabel Zaleni oorval, hom in die mond met sy dienspistool geskiet en weggehardloop.
Zaleni is hospitaal toe geneem en verkeer in 'n stabiele toestand. Geen inhegtenisnames het nog plaasgevind nie. Die polisie ondersoek sake van poging tot moord en roof.
Negentig persent van Suid-Afrikaners voel dat korrupsie 'n lewenswyse in Suid-Afrika geword het, en 85 persent glo dat daar korrupsie op senior vlakke van die regering is.
Dié bevindings is vandag gepubliseer deur TNS-navorsingsopnames. Terwyl die meeste Suid-Afrikaners teen korrupsie gekant is, sal hulle self korrup optree indien hulle die geleentheid kry. Vier uit tien Suid-Afrikaners sê hulle sal nie 'n ekstra R50 teruggee indien 'n kassier of teller hulle te veel kleingeld gee nie. 'n Derde van bestuurders het oor die afgelope ses maande 'n voertuig onder die invloed van alkohol bestuur.
Die Vryheidsfront Plus sal vandag ‘n klag teen Zwelinzima Vavi by die Menseregtekommissie lê.
Die sekretaris-generaal van Cosatu het by ‘n begrafnis gesê dat hulle bereid was om te skiet en dood te maak vir Zuma.
Die woordvoerder vir die Vryheidsfront Plus, Willie Spies, sê dat Vavi duidelik die grondwet, die regstelsel en die demokratiese orde van Suid-Afrika uitdaag.
Vavi het gepraat by die begrafnis van ‘n ANC-veteraan en selfs verder gegaan as die ANC-jeugligapresident Julius Malema se omstrede verklaring dat hy die wapen sal opneem en vir Zuma sal moor.
Cosatu ontken dat hulle enige oproep tot onmiddellike optrede gemaak het.
Suidelike Afrika-state het hulle by die opposisieleier in Zimbabwe geskaar.
Dít nadat die MDC se Morgan Tsvangirai gister sy onttrekking uit dié week se presidensiële uitklopverkiesing aangekondig het.
Die president van Zambië, Levy Mwanawasa, sê hy ondersteun Tsvangirai se onttrekking.
Hy sê die verkiesing kan nie in 'n omgewing van geweld en intimidasie gehou word nie.
Ander Suidelike Afrika-leiers het die Zimbabwiese president openlik vir sy taktieke gekritiseer.
ʼn Petroljoggie in Soweto is vandag deur klante vermoor wat verseg het om vir die petrol te betaal, het die polisie laat weet.
Inspekteur Kay Mkahubela het gesê dat die werknemer van die Engen-garage in Zola-noord vanoggend vier keer geskiet en met ʼn mes gesteek is.
Klante in ʼn rooi motor het die vulstasie vroeër besoek en petrol gekoop maar het vertrek sonder om te betaal, ná ʼn woordewisseling met die joggie.
Toe die joggie na werk huis toe gaan, het die insittendes van die rooi motor vir hom gewag. Hulle het op hom geskiet en hom met ʼn mes gesteek.
Makhubela het ook gesê dat die polisie Saterdag 137 mense by padblokkades in verskeie dele van Soweto in hegtenis geneem het.
In Moroka is 42 mense gearresteer en in Protea Glen 34. In Naledi en Jabulani is 61 mense in hegtenis geneem vir misdade wat wissel vanaf moord tot kwaadwillige saakbeskadiging, aanranding en die besit van ongelisensieerde wapens.
ʼn Man wat te Moroka vir moord aangekeer is, was ook ʼn gesoekte verdagte in ʼn Krugersdorpse moordsaak, het Makhubela gesê.
Die voorsitter van die ANC-jeugliga, Julius Malema, het gister weer sy omstrede uitlating verdedig dat die liga ter ondersteuning van ANC-president Jacob Zuma sou moor.
“Ons het niks verkeerds gesê nie. Moontlik het ons sterk taal gebruik… Ons is bereid om die hoogste pryse te betaal ter verdediging van Zuma en die revolusie,” het hy voor honderde mense, sommige so jonk soos 11, by ‘n vergadering van die Jong Kommunisteliga in die Claremont Sugar Ray Xulu-stadion in Durban gesê.
“As die tyd kom, sal ons die revolusie verdedig en ons sal nie huiwer nie,” het hy gesê.
Gedurende ‘n Jeugdagbyeenkoms in die Vrystaat Maandag, het Malema gesweer dat die jeug van Suid-Afrika sou sterf in hul steun vir Zuma en gesê die ANC-jeugliga het die potensiaal om diegene te verslaan wat hul oorwinning sou kompromitteer.
Malema het weereens beklemtoon dat die liga Zuma sal verdedig en het nie om verskoning gevra nie.
“Alles wat ons nou sê, het hulle (die vorige geslagte) reeds voorheen gesê. As enigiemand te blameer is, is die geslag voor ons te blameer want ons sit net ‘n tradisie voort,” het hy gesê. “Ons word vandag vertel dat jy irrelevant is as jy revolusionêre taal gebruik. Ons s’n is die oorwinning en die oorwinning is vir altyd.”
Hy het ook gesê: “Ons is vandag hier om die erfenis van die 1944-, 1956- en 1976-revolusie te gedenk… Ons word deur die Nelson Mandela-geslag, die Peter Mokaba-geslag en die Oliver Tambo-geslag geïnspireer.”
Malema het gesê die enigste regering wat aan die verwagtinge van die jeug van Suid-Afrika kon voldoen, ‘n Zuma-regering is. “Ons raak ongeduldig. Ons wil vir ons ‘n groot toekoms bou… Die Suid-Afrikaanse jeug het gehaltewerksgeleenthede nodig. Ons wil nie kassieres en petroljoggies wees nie, en net die Zuma-regering kan hierin voorsien.”
Malema se verklaring, wat Maandag in die Vrystaat gemaak is, het ‘n groot mate van kritiek ontlok en het die Suid-Afrikaanse Menseregtekommissie genoop om ‘n ultimatum uit te reik waarin hy gevra word om sy stellings terug te trek.
Malema sê diegene in die ANC wat Zuma teenstaan moet die party verlaat. “Hulle moet nou padgee as hulle nie Zuma aanvaar nie… Die ANC het geen tekort aan leierskap nie. As jy wil padgee, beskik ons oor ander om jou te vervang.”
Hy het ‘n beroep op die SAMRK gedoen om Zuma se regte te verdedig. “Ek doen ‘n beroep op die MRK om die regte van Zuma te verdedig. Hulle moet aan die Skerpioene skryf en hulle aansê om Zuma se verhoor te bespoedig, want indien enigeen te na gekom is, is dit Zuma.”
Die sekretaris-generaal van die Jong Kommunistiese Liga, Buti Manamela, het gesê dat indien Zuma nie in 2009 president word nie, “alle hel sal losbars”.
He het gevra vir gehaltewerksgeleenthede vir die jeug en die Suid-Afrikaanse Reserwebank se inflasieteikenbeleid as onsin afgemaak.
“Tito Mboweni, as jy brood kan bekostig, beteken dit nie almal kan dit bekostig nie. Ons wil hê jy moet dié beleid hersien.”
Oor die SAMRK se ultimatum aan Malema, het Manamela gesê: “Ons wil nie van julle hoor nie.”
Ook teenwoordig by die byeenkoms was Blade Mzimande van die Suid-Afrikaanse Kommunisteparty (SAKP), die provinsiale SAKP-sekretaris Themba Mtembu en die president van Cosatu S’dumo Dlamini. Die minister van vervoer, Jeff Radebe, het na ‘n uur die vergadering verlaat.
Zuma was veronderstel om die vergadering by te woon, maar het nie opgedaag nie.
Duitse ondersoekers het hulle ondersoek na Thyssenkrupp se betrokkenheid in die wapentransaksie laat vaar.
Sy sê die Duitse ondersoek is in die wiele gery deur 'n gebrek aan samewerking van Suid-Afrika se kant af en het 'n beroep op die Nasionale Vervolgingsgesag gedoen om die ondersoek voort te sit.
Die DA-lid Eddie Trent en eertydse ANC-lid Andrew Feinstein het met de Lille saamgestem.
Hulle glo dat die regering se weiering om noodsaaklike inligting deur te gee daartoe gelei het dat die ondersoek na Thyssenkrupp laat vaar is.
