President Kgalema Motlanthe het Sondag toegegee dat die huidige praktyk waar die hoof van die nasionale vervolgingsgesag deur die president aangewys word, foutief is.
Hy het met die media gepraat by Tuinhuis in Kaapstad en gesê die aanstellingsproses kan meer gewig dra indien 'n onafhanklike liggaam soos die Geregtelike Dienstekommissie (GDK) dit sou doen.
"Ek dink dit sal beter wees indien die aanstelling van die nasionale direkteur van openbare vervolgings gedoen word deur 'n liggaam soos die GDK," het hy gesê.
Die publiek sal die proses as meer geloofwaardig beskou indien 'n organisasie soos die GDK 'n kortlys sal opstel van kandidate en die lys aan die president vir oorweging voorlê.
Onder die huidige nasionalevervolgingsgesagwet, kan Motlanthe 'n persoon van sy keuse aanstel om die geskorste voormalige hoof, Vusi Pikoli, te vervang.
"Dit is sommige van die swakplekke in die wet wat werklik reggestel moet word," het Motlanthe gesê.