Die SA Nasionale redakteursforum (Sanef) het president Kgalema Motlanthe se besluit om die omstrede film- en publikasieswysigingswet terug te verwys na die parlement verwelkom.
Motlanthe het Donderdag die wet, tesame met die mededingingswysigingswet terugverwys na die nasionale vergadering vir heroorweging in terme van artikel 79(1) van die grondwet, het die presidensie gesê.
"Die president was ná versigtige oorweging onseker oor die grondwetlikheid van sekere dele van die wet," het die presidensie gesê.
In 'n verklaring later Donderdag het Sanef gesê dat sekere aspekte van die wet 'n negatiewe invloed gaan hê op die vrye beweging van inligting en ook dalk negatief gaan inwerk op die grondwetlik gewaarborgde reg op vryheid van uitdrukking.