Brandbestryders in die Wes-Kaap is besig met ‘n verbete stryd teen ‘n brand wat in die vroeë oggendure opgevlam het, het RSG berig.
‘n Vlootbasis in die omgewing is ook na wat berig word in gevaar. ‘n Brandweer-woordvoerder, Theo Layne sê sterk wind is besig om pogings te bemoeilik om die brand onder beheer te bring.
‘n Groot deel van die gebied was gister nog weens die brand onbegaanbaar.
Lewens en eiendom word bedreig. Minstens drie huise in Muizenberg het reeds aan die brand geslaan en ‘n aftree-oord is ontruim.
Die vlamme word deur ‘n sterk suidewind in die rigting van Noordhoek aangeblaas. Layne sê 30 brandweerwaens is op die toneel.
Geen beserings is tot dusver aangemeld nie. Layne sê eiendomme wat in gevaar is, word ontruim. Hy sê dit kan ‘n uitgerekte proses wees aangesien die brand oor ‘n uitgebreide gebied, wat die berghange insluit, strek.
Dele van die Ou Kaapse-weg en Chapman’s Piek-rylaan is intussen gesluit.
Berigte is ook ontvang van ‘n brand wat in Bettiesbaai woed.