Blanke boere gaan nie hul grond in Zimbabwe terugkry nie en die Britse regering moet hulle vir verliese vergoed. Dit was een van die eerste verklarings van Zimbabwe se splinternuwe regering van nasionale eenheid.Volgens die drie leiers, Robert Mugabe, Morgan Tsvangirai en Arthur Mutambara, is die grondonteienings "onherroeplik".
Die ooreenkoms wat tussen die strydende partye in Zimbabwe bereik is, lui: "Die partye doen hiermee 'n beroep op die Britse regering om die primêre verantwoordelikheid te aanvaar om vergoeding te betaal vir grond wat van vorige grondeienaars vir hervestiging verkry is."
Die ekonomiese krisis in Zimbabwe het begin toe plase van blanke boere deur sogenaamde oorlogsveterane beset en geroof is. Omdat landbou die lande se primêre nywerheid is, het sy ekonomie so te sê in duie gestort.
Volgens persberigte gaan Brittanje ten minste een miljard pond, oftewel R15 miljard aan hulpgeld aan Zimbabwe oorbetaal in 'n poging om die land se ekonomie weer op dreef te kry.
In sy reaksie het die Europese Unie gister 'n wag-en-sien-houding ingeneem en nie onmiddellik hulpgeld belowe nie.