Kategorie: Suider-Afrika

Die Parlement se Portefeuljekomitee oor die Polisie het gevra vir die onmiddellike skorsing van polisielede wat betrek word by die dood van ‘n taxibestuurder.

Die voorval het wêreldwyd opslae gemaak en is internasionaal veroordeel. Die taxibestuurder is as die 27-jarige Mosambieker, Mido Macia geïdentifiseer.

Hy is deur polisielede van Daveyton aan die Oos-Rand gekonfronteer nadat hy oënskynlik die verkeer met sy voertuig ontwrig het. Videomateriaal toon hoe die polisie hom agter die vangwa aansleep.

Hy is later in polisie-aanhouding dood. Die komitee sê hy is geskok en ontsteld dat die polisie wat veronderstel is om die publiek te beskerm, in staat kan wees tot sulke dade.

Hy het die Onafhanklike Polisie- Ondersoekdirektoraat gevra om geen steen onaangeroerd te laat in sy ondersoek nie. Amnestie Internasionaal het ook gevra dat diegene wat daarvoor verantwoordelik is, vervolg word.

Geen klas is die afgelope week by die Wongalethu-hoërskool in Mdantsane in die Oos-Kaap gegee nie, volgens ‘n berig Donderdag.

Dispatch Online het berig dat onderwysers verlede week tydens ‘n protesoptog uit die skool gevlug het uit vrees vir intimidasie deur leerders.

Gr. 12-leerders het met ‘n protesaksie begin omdat hulle enigste wiskunde-onderwyser na ‘n nabygeleë skool gestuur is, en hulle dring daarop aan dat hy heraangestel word.

“Ons is bekommerd dat ons oor net ‘n paar maande met eksamens moet begin en ons kan dalk druip want ons het nie ‘n wiskunde-onderwyser nie,” het Lukhanyo Booi, hoof van die leerders se raad van verteenwoordigers, gesê.

“Ons is genoodsaak om ons onderwyser ná skool te ontmoet vir lesse in groepe van 10 tot 15. Dit put ons en ook hom uit.”

Leerders het die Mdantsane-polisiestasie en die Mdantsane-landdroshof genader vir ‘n permit om Maandag te betoog, omdat hulle hul griewe by die hoofkantoor van die provinsiale onderwysdepartement wou afgee. Hulle kon egter nie vervoer na die departement se kantoor kry nie.

‘n Vergadering is intussen met onderwysers, die skool se beheerliggaam, die leerders en hul ouers belê deur Sihle Mnguni, distriksdirekteur van die onderwysdepartement se kantoor in Mdantsane.

“Dit was meer ‘n luistersessie as ‘n vergadering, daarom kan ek nog nie besonderhede bekend maak nie, maar ons sal weer met hulle vergader,” het Mnguni volgens die publikasie gesê.

Lulu Xingwana, die omstrede minister van vroue, kinders en gestremdes, en haar hele afvaardiging is Woensdag die deur gewys in die parlement in Kaapstad, het Beeld berig.

Xingwana se departement is in Desember uitstel gegun om terug te rapporteer oor ‘n omkeerstrategie, maar die dokumente wat LP’s veronderstel was om te ontvang ter voorbereiding vir die sessie, is eers Dinsdagaand afgelewer.

Boonop was die verslag ‘n deurmekaarspul, het baie LP’s gesê.

Liezel van der Merwe, IVP-LP, het gesê: “Die dokumente is so deurmekaar ek weet nie of ek kom of gaan nie.”

LP’s is volgens parlementêre reëls veronderstel om sulke dokumente minstens 48 uur voor ‘n sessie te ontvang sodat hulle die nodige vrae kan voorberei en ingeligte besluite kan neem.

Ontstoke LP’s, baie van hulle ANC-lede, het Xingwana en haar afvaardiging teruggestuur om hul brouwerk reg te stel en gevra dat haar departement opgeskort moet word en sy afgedank noet word.

Xingwana het namens haar departement om verskoning gevra, en gevra of sy ‘n voorlopige verslag kan indien.

“Hierdie is onaanvaarbaar, maar die departement het so hard gewerk.”

Die departement het in sy kort bestaan meer as ‘n half miljard rand ontvang en “daar is niks om daarvoor te wys nie, buiten uitspattige partytjies, buitelandse reise en ontwerpersmeubels”, het LP’s gekla.

“Geld wat die departement ontvang het, is vermors en nou gaan dit selfs meer geld kos om dit weer op die been te bring,” het ‘n opposisielid gesê.

Intussen het die minister ook om verskoning gevra vir haar uitlatings oor Afrikaner-mans, wat dié week ‘n hewige reaksie ontlok het.

“Dit het vir my duidelik geword dat my kommentaar sommige lede van ons gemeenskap ontstel het.

“Ek wil, gevolglik, daardie kommentaar terugtrek en onvoorwaardelik om verskoning vra aan hulle,” het sy gesê.

Dié verskoning volg ná Xingwana aan die Australiese Uitsaaikorporasie (ABC) gesê het jong Afrikanermans word grootgemaak om te glo dat hulle vroue en kinders “besit”.

“Jong Afrikanermans word grootgemaak in die Calvinistiese geloof en glo hulle besit ‘n vrou, hulle besit ‘n kind, hulle besit alles, en daarom kan hulle daardie lewe neem, want hulle besit dit,” het sy gesê.

“Ons het ook kulturele verskille in ons eie gemeenskappe waar ons vroue het wat gedwing word om te trou en ons hanteer al daardie sake.”

ABC het ‘n onderhoud met Xingwana gevoer oor die dood van die Paralimpiese kampioen Oscar Pistorius se meisie, Reeva Steenkamp.

Die insetsel, wat Maandag uitgesaai is, fokus op vuurwapengeweld in Suid-Afrika.

“Ek sal hom vra om die waarheid te praat. Ek sal hom vra om vroue te respekteer,” het Xingwana gesê.

“Ek sal hom vra om ontslae te raak van sy vuurwapens. Want ek glo as hy nie vuurwapens in sy huis gehad het nie, sou Reeva Steenkamp vandag gelewe het.”

Xingwana se uitlatings is skerp gekritiseer.

“Hierdie minister het bo enige twyfel bewys dat sy nie geskik is om ‘n amp te hê in ‘n konstitusionele demokrasie nie,” het Jan Bosman, sekretaris van die Afrikanerbond, in ‘n verklaring aangevoer.

Ook AfriForum het Dinsdag gesê hy oorweeg dit om ‘n klagte teen Xingwana by die gelykheidshof te lê oor haar uitlatings.

Isaac Mangena, MRK-woordvoerder, het gesê die kommissie het drie klagtes van mense ontvang wat meen Xingwana se woorde is rassisties en diskriminerend. Die MRK ondersoek die klagtes.

Onderwysers wat stokkiesdraai was sowat 7,5 miljoen dae verlede jaar afwesig, het Angie Motshekga, minister van basiese onderwys, gesê.

“Ons het die hoogste afwesigheidsyfer in die Suider-Afrikaanse Ontwikkelingsgemeenskap (SAOG). Ons staan op 19 dae per onderwyser per jaar. ‘n Gemiddeld van 10% nasionaal,” het sy Dinsdag aan joernaliste in die parlement gesê.

Afwesigheid in ander SAOG-lande is gemiddeld nege dae per onderwyser per jaar.

Volgens die departement was daar 392 000 onderwysers in 2012 regoor die land by openbare skole.

Met elke onderwyser wat 19 dae verlede jaar afwesig was, staan dae aantal dae wat hulle afwesig was, op 7 448 000.

Motshekga het gesê daar is “groot kommer” in haar departement oor onderwysers se verantwoordelikhede – dit sluit in om betyds by die skool aan te kom en die dagtaak te voltooi.

Haar departement oorweeg om ‘n elektroniese inklokstelsel in plek te stel om die huidige registers te vervang.

Motshekga het in reaksie op ‘n vraag gesê die afdae wat onderwysers neem, is “pure afwesigheid,” maar het gesê ernstige siektes het ook ‘n rol gespeel in die hoë syfer.

Sy het gesê vervoerprobleme is ook ‘n rede hoekom baie onderwysers laat of afwesig is.

‘n Man wat daarvan aangekla word dat hy ‘n Moslem verlede jaar doodgeslaan het, is in die Krugersdorp-streekhof borgtog geweier.

“Die applikant kon nie aan die hof bewys dat dit in belang van geregtigheid sal wees om hom op borgtog vry te laat nie. Borgtog is dus geweier,” het landdros Reginald Dama tydens Roedolf Viviers se borgtogaansoek gesê.

Viviers (28) en Zayne van Tonder (33) is daarvan aangekla dat hy Muhammad Fayaaz Kazi op 6 Augustus buite ‘n Chicken Licken-kitskosrestaurant in Magaliesburg doodgeslaan het.

Kazi het die mans glo gekonfronteer nadat hulle hom na bewering oor sy baard gespot en hom beledig het.

‘n Geveg het toe uitgebreek, en Kazi het later aan sy beserings in die hospitaal beswyk.

Die aanklagte teen Van Tonder is later teruggetrek en hy is vrygelaat.

Kazi se broers, Mohammed Nuaman (22) en Mohammed Farhan (18) het gesê “prys Allah” toe Dama sy beslissing gemaak het.

Sy weduwee, Sajidah, het in trane uitgebars en vriende en familie in die openbare galery omhels.

Viviers se verhoor sal op 4 Maart in die Johannesburgse hooggeregshof begin.

Die landdros wat borgtog aan die gestremde atleet Oscar Pistorius toegestaan het, is familie van die vrou wat haar twee kinders vergiftig het en daarna selfmoord gepleeg het.

Hooflanddros Desmond Nair het Dinsdag bevestig dat die vrou, wie se lyk Sondagaand saam met dié van haar seuns in hul huis gevind is, sy niggie is.

Die vrou se broer, Vishal Maharaj, het haar as Anusha Maharaj geïdentifiseer. Die polisie vermoed sy het haar twee kinders vergiftig en daarna het sy op dieselfde manier selfmoord gepleeg.

Volgens die polisie is selfmoordbriewe op die toneel gevind.

Nair het verlede week Pistorius se saak, wat regoor die wêreld opspraak gemaak het, hanteer.

Pistorius word daarvan beskuldig dat hy sy vriendin, Reeva Steenkamp, op Valentynsdag in sy huis doodgeskiet het.

Voedselprodukte wat valslik as “beesvleis” gemerk is, word ook in Suid-Afrika verkoop.  ‘n Ondersoek deur wetenskaplikes van die Universiteit van Stellenbosch het aangetoon dat donkie-, bok- en buffelvleis gebruik word ipv bees.

“Die studie het getoon dat enigiets van soja, donkie-, bok- en waterbuffelvleis in 95 (68%) van die 139  maalvleise, hamburgers, deli-vleise, wors en gedroogde vleise wat getoets was, gevind is,” het die universiteit se studie bevind

Die studie, wat gedoen is deur dr. Donna-Maree Cawthorn en prof. Louw Hoffman van die universiteit se departement van veekundige wetenskappe, is in die internasionale Food Control-joernaal gepubliseer.

“Ons studie bevestig dat die verwerkte vleis wat verkeerdelik gemerk is, algemeen in Suid-Afrika is en nie net regulasies oor die etikettering van voedsel oortree nie, maar ook ekonomiese, godsdienstige, etiese en gesondheidsvraagstukke verontagsaam,” het Hoffman gesê.

Hoender en vark word algemeen aangetref in produkte wat nie veronderstel is om dit te bevat nie.

“Donkie, bok en waterbuffel is ook in ‘n aantal van die produkte gevind.”

Verskeie voorvalle is die afgelope ruk in Europa aangemeld waar perdevleis in voedselprodukte wat as beesvleis gemerk is, gevind is.

Perdevleis is in verskeie voedselprodukte soos in hamburgers, lasagne, pastasous, skooletes en selfs hospitaaletes in Europa opgespoor.

Suid-Afrikaners word gewaarsku dat ‘n twiet van net 140 karakters jou agter tralies kan laat beland. Verkeerde boodskappe kan ‘n moontlike tronkstraf van tussen drie en ses maande tot gevolg hê.

Emma Sadleir, ‘n sosiale media prokureur by Webber Wentzel, het gesê dat Twitter en Facebook-gebruikers wat rassistiese of aanstootlike boodskappe pos aangekla kan word van crimen injuria of ‘n klagte kragtens die Wet op Gelykheid in die gesig kan staar.

“Dit is nie ongewoon vir ‘n persoon wat skuldig bevind word van crimen injuria in Suid-Afrika om gevange geneem te word nie,” het Sadleir gesê.

“Ek weet van twee afsonderlike gevalle waarin polisiemanne geroep die ‘k’ woord gebruik het en in beide gevalle, is die persoon gevonnis is tot tronkstraf vir ‘n tydperk van drie tot ses maande.”

Soos enige ander vorm van publikasie, word aanlyn-gebruikers aanspreeklik gehou vir alle kommentaar wat hulle maak op sosiale netwerke, selfs wanneer hulle hertwiet en boodskappe deel.

Sadleir het gesê dat mense wat geraak word deur boodskappe wat na hulle verwys in naam ‘n klag van crimen injuria by ‘n polisiestasie kan lê.

Anonieme gebruikers word nie vrygestel van strafregtelike klagte of klagtes gelê by die Gelykheidshof teen onbillike diskriminasie, teistering en haatspraak nie, het sy gesê.

Dit is omdat dit moontlik is om ‘n hofbevel te kry om ‘n webwerf te dwing om enige inligting soos e-pos of ‘n IP-adres van die anonieme persoon te oorhandig.

Die Suid-Afrikaanse Menseregtekommissie het gesê dat ‘n toenemende aantal klagtes oor aanstootlike gedrag aanlyn ontvang word.

Die meeste klagtes is oor ras, sê SAMRK se Gauteng-bestuurder Chantal Kisoon. Godsdienstig-klagtes het tweede gekom.

“Ons wette is baie duidelik dat ons heeltemal toegelaat word om onsself uit te druk, maar sekere vorme van uitdrukking is verbode en mense het bewus geword van daardie wette,” het sy gesê.

Die boekverkope van Oscar Pistorius se biografie doen beroerd nadat hy in hegtenis geneem en aangekla is vir die moord op sy vriendin, Reeva Steenkamp.

Navrae deur The Star by boekwinkels in Gauteng het aangedui dat terwyl koerante met artikels oor Pistorius van die rakke vlieg, die media-aandag geen uitwerking het op die verkoop van sy boek, wat in Augustus vrygestel is nie.

Die koerant het berig dat een reaksie was dat dit “in die asblik langs Lance Armstrong gesmyt moet word”.

Kalahari.net adverteer die boek teen ‘n afslagprys op webwerwe wat artikels oor die Pistorius hofsaak plaas. Webwerwe wat daaroor berig word ook fluks gelees.

Exclusive Books by die OR Tambo Internasionale Lughawe het gesê die boek was ‘n treffer verlede jaar ná die Paralimpiese Spele, maar dat dit nie goed verkoop het die afgelope tyd nie.

‘n Bestuurder by ‘n Books Galore-tak, het gesê mense toon geen belangstelling in die aankoop van die boek nie.

By Exclusive Books in Brooklyn Mall, Pretoria, was die reaksie soortgelyk. Christo Kellermann gesê: “Miskien gaan mense wag totdat dit verby is voordat hulle dit koop.”

Nog ‘n boekwinkelbestuurder het gesê daar is “geen ontploffing in die verkope van die boek of ‘n stormloop van kliënte in die plasing van bestellings nie.”

Die koerant het ook berig dat die uitgewers van Sarie en GQ-tydskrifte – op wie se omslae Pistorius verskyn het – gevra het dat hulle tydskrifte van die rakke afgehaal word die dag na Steenkamp se moord.