Kategorie: Suider-Afrika

‘n Wes-Kaapse pastoor is vasgetrek omdat hy na bewering dwelms probeer smokkel het by die Buffeljags-gevangenis in Swellendam.

‘n Woordvoerder vir die department van korrektiewe dienste, Simphiwe Xako, het Sondag gesê wagte het Saterdagaand dagga, Mandrax-tablette en ses pakkies tik op die pastor gekry tydens ‘n roetine-ondersoek voor hy die tronk sou binnegaan.

Die predikante was deel van ‘n geestelike rehabilitasieprogram in die tronk.

Die groep waarvan hy deel was, besoek sowat agt korrektiewe fasiliteite in die Swellendam-omgewing.

Tronkbewaarders het die man aangehou totdat die polisie hom kon wegneem.

Hy sal na verwagting Maandag in die Swellendamse landdroshof verskyn.

Die onwettige besetting van privaatgrond in Kaapstad het skerp toegeneem, het ‘n burgemeesterskomiteelid Donderdag gesê.

Tandeka Gqada, burgemeesterskomiteelid vir menslike nedersettings, het gesê dit lyk of die besetting van die Marikana-grondgebied in die stad vroeër die week, sowel as die besetting van ander gebiede, deel is van ‘n poging om “die stad onregeerbaar te maak”.

“Die Stad is deur ons wetstoepassers en ander agentskappe daarvan bewus dat inligting aan groepe mense verskaf word in verband met die ligging van oop stukke grond, wat hulle dan probeer om onwettig te beset,” het sy gesê.

“Veral grond wat privaat besit word, word op ‘n stelselmatige wyse geteiken.”

Die stad het gesê die behuisingsprobleem moet binne die wet opgelos word om ‘n regverdige en billike proses te verseker.

“Ons is baie simpatiek met dié inwoners wat tans sonder toegang tot formele behuising is, maar ons het ‘n plig om die regte te beskerm van die honderde duisende mense wat deur die regte kanale gegaan het om van ‘n behoorlike behuisingsgeleentheid deur die stad voorsien te word.”

Die stad het verlede week hutte vernietig wat by die Marikana-perseel in Philippi-Oos opgerig was, waar grond vir ander doelwitte uitgesit is.

Boere in De Doorns in die Wes-Kaap sal met die Food and Allied Workers Union (Fawu) vergader nadat die vakbond gekla het dat boere probeer om werkers te vervang met personeellede deur van arbeidsmakelaars gebruik te maak.

Fawu het met ‘n volskaalse staking gedreig indien die saak nie opgelos word nie, het Eyewitness News berig

De Doorns was einde verlede jaar en aan die begin van 2013 die brandpunt van oproer oor loondispute.

Plaaswerkers het aangedring op ‘n loonverhoging tot R150 per dag. Werknemers is later aangesê om die daaglikse loon na R105 aan te pas.

Dié verhogings het op 1 Maart in werking getree.

Honderde plaaseienaars het sedertdien aansoek gedoen om vrystelling van die nuwe minimumloon en aangevoer dat hulle dit eenvoudig nie kan bekostig nie.

‘n Bejaarde man wat met sy gesondheid sukkel, is in ‘n plaasaanval naby Makwassie in Noordwes erg aangerand en aan sy ore rondgesleep, berig Beeld.

“Hulle het gekom om my pa te vermoor,” het Martin Coetsee (66) se dogter, Mariska, Dinsdag gesê.

Sy het volgens die dagblad verduidelik dat haar pa vermoedelik intussen ook ‘n beroerte gekry het. Die familie vrees tans vir sy lewe. Hy word in die Tshepong-hospitaal in Klerksdorp behandel.

Coetsee se vrou, Connie, het gesê haar man het ‘n gat in een long, bloeding op die brein, en beserings oor sy hele lyf.

Die volgehoue aanhitsing teen grondeienaars word gedryf deur ‘n organisasie bybname PLAAS in die Weskaap wat deur die Britse regering befonds word.

Lees hier.

Altesaam 10 werknemers van Rainbow Chicken is ernstig beseer toe ‘n petrolbom in die Zinniaville-nywerheidsgebied in Rustenburg na die bus geslinger is waarin hulle gery het, het die polisie Woensdag gesê.

‘n Groep mense, na bewering stakende werkers van Rainbow Chicken, het ‘n petrolbom na die bus geslinger.

Die bus het glo Dinsdagaand 63 Rainbow-werkers na Kroondal vervoer, het kapt. Philani Mvuna gesê.

“In hierdie stadium glo die polisie die aanval kan verbind word met die voortslepende stakings by Rainbow Chicken.”

‘n Saak van poging tot moord en kwaadwillige saakbeskadiging is geopen. Teen Woensdagmiddag was niemand al in verband met die voorval in hegtenis geneem nie.

Verlede maand het 1 857 werkers van Rainbow Chicken wat met die Food and Allied Workers’ Union geaffilieer is, by die Rustenburg-aanleg gestaak.

Hulle wou ‘n maandelikse loonverhoging van R700 hê, sowel as beter werkomstandighede, het die vakbond gesê.

‘n Anti-Afrikaanse front gaan na verwagting vandag ‘n plakaatbetoging hou by die Grondwethof in Johannesburg, waar ‘n belangrike saak oor skooltoelating aangehoor gaan word. Dit is nie bekend wie die hoofaanstigter befonds nie.

Die regsgroep “Section 27”, ouers van Fochville in Noordwes en Cosatu sal aan die betoging deelneem.

Die hof sal die saak aanhoor tussen die Gautengse departement van Onderwys en die Rivonia laerskool in Sandton. In 2011 het die skool geweier om ‘n graad een leerling toe te laat en gesê hulle het nie genoeg plek vir die kind nie.

Die departement het toe die skool se beheerliggaam aangesê om die leerling toe te laat. Die saak sal bepaal of ‘n onderwysbeampte óf ‘n skool se beheerliggaam die finale sê oor toelating het.

Skole in Fochville en Heidelberg wat geweier het om Engelssprekende leerlinge te aanvaar, hou die saak met gespanne aandag dop. Gerugte doen die rondte dat die geld vir “Section 27” uit die buiteland kom.

Die ANC verwelkom die uitspraak deur die Wes-Kaapse hooggeregshof wat bevind het dat die inmenging in die Swellendam-munisipaliteit ongeldig was en het ‘n beroep op die DA gedoen om die groter belang van die mense van hierdie gebied te dien en die DA-raadslede se dwarsboming van samewerking in die dorp dadelik stop te sit.

Die hoofsweep van die ANC in die Wes-Kaapse provinsiale wetgewer en woordvoerder oor plaaslike regering Pierre Uys sê: “Weereens het die DA swaarverdiende belastingbetalers se geld gaan uitmors om die party se politieke agenda ten koste van dienslewering te beskerm en te bevorder. Dit is die tweede keer dat die voormalige burgemeester Julian Matthysen suksesvol is in sy aansoek om herstel te word.”

Matthysen is die enigste verteenwoordiger van die ACDP en hou die balans van mag, met die ANC en die DA wat elk ‘n gelyke getal setels het. Matthysen is ook geskors vroeg in 2012 nadat hy die DA se verdoeseling van korrupte bedrywighede en twyfelagtige transaksies ontbloot het. Hy is herstel nadat ‘n interdik toegestaan ​​is deur die Wes-Kaapse hooggeregshof. In die jongste geval moet die ACDP en munisipaliteit betaal om die kostes van honderde duisende rande te dek. Hierdie geld kon beter bestee gewees het op dienste vir die mense.

“Die stabiliteit en waardigheid van die raad moet so gou as moontlik herstel word. Die DA moet sy verbintenis om saam te werk om dinge te laat werk vir al die mense en diverse gemeenskappe van Swellendam, wys. Trouens, die DA verloor sy greep in verskeie munisipaliteite as gevolg van sy hardkoppige kleinlike politiek,” het Uys bygevoeg.

Mynwerkers wat by Lonmin se Marikana-myn in hegtenis geneem en beseer is, sal aanvoer dat die wit hoof van die polisie se taktiese span met hul kollegas se dood verbind word, het die Farlam-kommissie van ondersoek Dinsdag gehoor.

Adv. Dali Mpofu, namens beseer­de mynwerkers en dié wat in hegtenis geneem is, het maj. genl. Charl Annandale, hoof van die taktiese span, kruisondervra.

“Een van die goed wat ons sal aanvoer is dat jy, Annandale, ‘n groot rol gespeel het in die gebeure wat tot die Marikana-slagting gelei het,” het hy gesê.

Altesaam 34 stakende mynwerkers is doodgeskiet en 78 beseer toe die polisie naby Lonmin se Marikana-myn begin skiet het.

Tien mense, insluitend twee polisiebeamptes en twee sekuriteitswagte, is die vorige week naby die myn dood.

Nege polisiebeamptes en sewe ander mense is Dinsdag vir bedrog en korrupsie by die Caledonspoort-grenspos in hegtenis geneem, het die Valke gesê.

Volgens kapt. Paul Ramaloko, woordvoerder van die Valke, was ses uit die sewe immigrasie-beamptes en een ‘n beampte van die departement van gesondheid.

Die beamptes het mense van Lesotho sonder die nodige dokumente oor die grens tot in Suid-Afrika laat kom deur hulle R150 elk te vra.

“In sommige gevalle het taxibestuurders ook teen ‘n fooi van R150 paspoorte by die grenspos afgelaai om stempels te kry sodat die paspoorthouers langer in Suid-Afrika kon bly,” het hy gesê.

“Dit word al vir ‘n lang tyd georkestreer. Die beamptes het meer as R100 000 ‘n dag gemaak. In een geval het die beamptes R200 000 gedeel.”

Hy het gesê mense sonder paspoorte het in ‘n bus by die grens opgedaag, waarna ‘n polisiebeampte op die bus sou klim en hulle tel.

“Elke persoon is R150 of R200 gevra en daarna was die bus toegelaat om Suid-Afrika binne te gaan.”

Besonderhede oor wanneer hulle in die hof sal verskyn was nog onbekend.

Die ANC sê die mislukte aanval op Marius Fransman, voorsitter van die party in die Wes-Kaap, sal ondersoek word.

Phillip Dexter, provinsiale woordvoerder, het in ‘n verklaring gesê die party sal stappe neem teen die skuldiges.

Die Cape Times het verlede week berig dat sowat 50 inwoners van Oudtshoorn in die Wes-Kaap, die openbare politieke figuur probeer aanval het.

Fransman is verlede week ná ‘n vergadering op die dorp oorrompell.

Hy het aan die Cape Times gesê die vergadering – by die munisipaliteitsgebou op Oudtshoorn – was deur sy mandaat vereis. Hy moes korrektiewe maatreëls in plek te stel om stabiliteit op die dorp te bewerkstellig.

Terwyl hy sekere probleme met aanstellings by die plaaslike raad aangespreek het, het hy na bewering sommige besluite geneem wat inwoners omgekrap het.

“Teen omtrent 21:00 het ‘n bende – kom ek noem hulle booswigte – van sowat 50 mense buite [die gebou] saamgedrom. Hulle was besig om die vensters en glas te breek om binne te probeer kom…” het hy aan die koerant gesê.

“Toe ek buite gaan, het een ou en drie ander op my toegesak, maar my sekuriteit het gekeer dat hulle my slaan.”

Fransman is toe na sy motor geneem en uit die dorp vergesel.

Minstens vier mense is in hegtenis geneem, onder andere Hein Coetzee, ‘n joernalis vir Die Son.

Volgens die verslaggewer het polisiebeamptes en betogers hom aangerand.

Coetzee het aan die Cape Times gesê hy het ‘n foto geneem van ‘n polisiebeampte wat iemand aangerand het. Die beampte het hom na bewering gesien en pepersproei in sy gesig gespuit.

Die joernalis het later die beampte gekonfronteer en hom gevra hoekom hy hom gespuit het.

Daarna het die polisiebeampte na bewering sy kamera gevat, die geheuekaart verwyder en hom in hegtenis geneem op aanklag van crimen injuria.

Coetzee is kort daarna vrygelaat en het klagte van aanranding en diefstal teen die polisie aanhangig gemaak.