Kategorie: Suider-Afrika

Twee Xhosamans wat skuldig bevind is aan sameswering om provinsiale ANC-leiers te vermoor, word vandag in die Oos-Kaapse hooggeregshof in Mthatha gevonnis.

Thembinkosi Mapeyi en Thembile Ceba is twee jaar gelede in hegtenis geneem na ‘n geheime ondersoek deur die polisie.

Hulle het saamgesweer om die LUR vir plaaslike regering, Mlibo Qoboshiyane en die provinsiale sekretaris van die ANC, Oscar Mabuyane en andere om die lewe te bring.

Dit is nie bekend of die beplande moorde verband hou met die oortuigings van die omstrede koning Dalindyebo nie, maar gerugte wil hê dat hy daaragter sit.

Intussen het die werklike redes vir die omstrede AbaThembu-koning se besluit om by die DA aan te sluit, rugbaar geraak: Die besluit om die ANC te verlaat gaan oor geld.

Die Xhosakoning is glo geregtig op ‘n lang en duur lys van voordele van die Oos-Kaapse provinsiale regering. Maar dit is nie gelyk aan die voordele wat deur die AmaZulu-koning, koning Goodwill Zwelithini, ‘n boorling van President Jacob Zuma se tuisprovinsie, ontvang word nie.

Koning Dalindyebo verdien ‘n maandelikse salaris van meer as R80 000, het twee voertuie tot sy beskikking en ‘n staatspysenieringbegroting van meer as R96 000 per jaar. Maar dit is niks in vergelyking met die R35-miljoen in totaal wat die KwaZulu-Natalse regering bestee op Zwelithini se paleise, vroue en algemene instandhouding nie.

Dalindyebo se aanvalle teen president Zuma, en die regerende ANC het dus weinig met politiek te make.

Dokumente wat uit die Oos-Kaapse regering bekom is, toon dat die vergoeding van die konings bepaal word deur die president. Maar die bykomende voordele word bepaal deur elke provinsie.

Die Weermag ontken berigte dat Suid-Afrikaanse soldate betrokke was by gevegte teen die rebelle in die Demokratiese Republiek van die Kongo.

Volgens mediaberigte was soldate wat deel is van die VN-mag betrokke in skermuntselings naby die dorp Goma.

Intussen het dit egter aan die lig gekom dat die VN-mag nog nie aktief is in die gebied nie.

Die woordvoerder van die weermag, Siphiwe Dlamini sê die media moet ophou “bespiegel” oor wat in die ooste van die DRK gebeur en by die feite hou.

Hy sê die weermag het deurgaans gesê dat soldate nie in konflik met die rebellemagte in die DRK betrokke was nie.

‘n Voertuig in ‘n blouligkonvooi was betrokke in ‘n ongeluk in die Johannesburgse sakekern, na bewering nadat dit oor ‘n rooi verkeerslig Dinsdagmiddag gejaag het.

Getuies by die kruising van De Korte en Berthastrate in Braamfontein het gesê hulle het die swart BMW sien jaag deur ‘n rooi verkeerslig.

Die BMW is getref deur ‘n wit Toyota Corolla van die Departement van Arbeid.

Ooggetuies het gesê die BMW het daarna getol en teen ‘n verkeerslig gebots voordat dit in die middel van Berthastraat tot stilstand gekom het.

Die bestuurders van beide voertuie is na die hospitaal geneem. Hul toestand is nie bekend nie.

Petroljoggies van die vulstasie aan die oorkant het gesê dit is niks ongewoon om dié konvooie te sien jaag deur kruising van Berthastraat nie.

Die BMW het ook veroorsaak dat ‘n trollie vol papier vir herwinning getref is. Die trollie-eienaar was ongedeerd, maar het van die toneel gevlug.

Dit alles gebeur het net na 15:00. Ooggetuies het gesê daar was tussen vyf en 10 voertuie in die konvooi en dat hulle verby die ongelukstoneel gejaag het sonder om te stop.

Dit is blykbaar sekuriteitsprotokol vir konvooie om nie te stop by die toneel van ‘n ongeluk nie.

Die metropolisie-woordvoerder Wayne Minnaar, het die ongeluk bevestig, maar kon nie sê wie in die konvooi was nie.

“Die oorsaak sal ondersoek word,” het hy gesê.

Kort ná die ongeluk, was metropolisie en die SAPD egter op die toneel.

Toe ‘n fotograaf begin foto’s neem het van die BMW, is die nommerplaat dadelik verwyder.

Die mees berugte bloulig-ongeluk in Johannesburg is die van skoolseun Thomas Ferreira, wat ernstige kopbeserings opgedoen het toe ‘n BMW hom getref het nadat die motor ‘n rooi lig verontagsaam het.

Twee mense is onlangs in Pretoria en Durban oorlede aan varkgriep, sê die Instituut vir Oordraagbare Siektes (Nios).

Nios het ‘n beroep op Suid-Afrikaners gedoen om hulle teen die H1N1-griepvirus, wat as varkgriep bekendstaan, in te ent.

Die Netcare-groep het bevestig dat ‘n vroulike pasiënt positief vir die virus getoets het, maar Netcare sê die virus is nie die oorsaak van die pasiënt se dood nie.

Die vrou het volgens wat die SABC berig, aan ‘n ander toestand gely wat haar immuunstelsel aangetas het.

Die H1N1-virus het vir die eerste keer in 2009 kop uitgesteek.

Die openbare uitsaaier berig meer as 5 000 gevalle is in Suid-Afrika aangemeld. Die virus het die lewe van 40 mense in die land geëis.

Die borgtogaansoek van nege polisiebeamptes van die moord op die taxibestuurder Mido Macia beskuldig word, is Dinsdag in die Benoni-landdroshof uitgestel.

Die hof het gehoor dat alternatiewe adresse vir die beskuldigdes nog geverifieer moet word.

Die saak is tot 30 Julie uitgestel.

Macia is op 26 Februarie aan ‘n polisievoertuig vasgebind en in ‘n straat in Daveyton aan die Oos-Rand gesleep. Hy het ure later in polisieaanhouding gesterf.

Die beskuldigdes is Meshack Malele (46), Thamsanqa Ncema (35), Percy Mnisi (26), Bongumusa Mdluli (25), Sipho Ngobeni (30), Lungisa Ewababa (31), Bongani Kolisi (27), Linda Sololo (56) en Motome Walter Ramatlou (37).

Robert Mugabe het glo ‘n  beloning van $300,000 aangebied aan enigiemand met inligting oor ‘n anonieme blogger wat ‘n rits lekkasies oor beweerde Zimbabwiese moordkomplotte, korrupsie en planne met hierdie maand se verkiesing op die internet beskikbaar gestel het.

Die goed-ingeligte mol, wat homself “Baba Jukwa” noem, is binne in die binnekamers van die regime, en plaas reeds vier maande lank onthullings op Facebook.

Die bladsy is al meer as ‘n miljoen keer besoek en hy het meer as 239,000 volgelinge.

Pogings om die mol op te spoor het tot dusver misluk. Kenners meen hy/sy/hulle kan nie in Zimababwe wees nie, aangesien dit te gevaarlik is.

Die plasings beskuldig ministers van korrupsie en polisiehoofde van wreedheid, en hul private selfoonnommers word beskikbaar gestel.

Pogings deur senior Zanu-PF-party-amptenare om Facebook te oorreed om die bladsy te sluit, het misluk en Mugabe het na bewering ‘n beroep op China gedoen vir tegniese ondersteuning om die blogger en gebruikers te identifiseer.

Verlede maand het die mol gewaarsku dat ‘n sluipmoordkomplot teen ‘n voormalige minister beplan word wat van die lek van inligting verdink word.

Edward Chindori-Chininga is toe skielik in ‘n motorongeluk dood kort nadat hy in die openbaar Zimbabwe se omstrede diamantbedryf gekritiseer het.

“Ek het vir julle gesê sal daar lyke wees hierdie jaar. Die oorlog het begin,” het Baba Jukwa op sy muur geskryf na die politikus se dood.

Volgens berigte het die minister gesterf toe sy motor ‘n boom getref het. Geen ander voertuig was betrokke nie.

Teenstanders van Mugabe in die verlede het in soortgelyke onverklaarbare padongelukke omgekom.

Goudprodusente het ‘n verhoging van 4% vir arbeiders voorgestel. Werkgewers sê die verhogings is gegrond op die dalende goudprys sowel as produktiwiteit, en kostes wat die hoogte inskiet.

Arbeidskoste maak tans meer as die helfte van die algehele produksiekoste uit. AMCU eis verhogings van selfs 100%, na gelang van die senioriteit van die werknemers. NUM eis verhogings van 60% en Solidariteit eis 10%.

Ontleders meen die onderhandelinge, wat volgende week voortgesit word, is die moeilikste in die mynbedryf sedert 1994.

NUM het tyd tot Dinsdag om nog lede te werf en sy meerderheidstatus teen sy opposisie, AMCU by Lonmin se Marikanamyn te behou.

Vier-en-veertig mense is in Augustus verlede jaar tydens ‘n loonverwante staking op Marikana dood. In ander verwikkelinge is die NUM se aansoek om Lonmin te keer om die vakbond se erkenning terug te trek, in die Arbeidshof van die rol geskrap omdat dit nie dringend is nie.

NUM het aangevoer dat hy op onreëlmatighede in die oorgang van sy lede na AMCU afgekom het.

Intussen is loononderhandelinge by Eskom is na die Kommissie vir Versoening, Bemiddeling en Arbitrasie verwys nadat die kragverskaffer en vakbonde ‘n dooiepunt bereik het.

‘n Woordvoerder, Hilary Joffe, sê die maatskappy het ‘n dispuut verklaar omdat daar geen beweging van die vakbonde se kant af was nie. Die loononderhandelinge het in Mei begin.

Joffe sê Eskomwerknemers word verteenwoordig deur Solidariteit, die NUM en NUMSA. Sy het die vakbonde gewaarsku dat Eskom as ‘n noodsaaklike diens beskou word wat beteken dat werkers nie mag staak nie.

Die maatskappy bied ‘n verhoging van 5,6% aan sy werkers, maar hulle eis tot 20 persent meer.

TLU SA is nie bereid om betrokke te raak by enige projek om geld te kanaliseer na familie van pres. Jacob Zuma nie.

Dit is die reaksie van mnr. Louis Meintjes, TLU SA se president, nadat dit aan die lig gekom het dat pres. Zuma se neef waarskynlik die grootste voordeel kan trek uit die Masimbambisane Rural Development Initiative.

“TLU SA was teenwoordig toe pres. Zuma die nuwe jaar se projekte aangekondig het en waar hy gevra het dat georganiseerde landbou daarby betrokke moet raak. Daar is toe inderdaad aangekondig dat ongeveer R900 miljoen staatsgeld daarin gepomp gaan word,” sê mnr. Meintjes. Daar word beoog om 1 miljoen hektaar grond onder voedselproduksie te plaas, maar daar is geen aanduiding gegee van hoe die geld bestee gaan word nie.

Daar kan ook nie behoorlik rekenskap gegee word oor die geld wat die afgelope jaar bestee is nie. Sulke projekte behoort gemeet te word aan die oppervlakte wat bewerk is, hoeveel hektaar geplant is, wat was die koste gemeet aan kommersiële landbou standaarde, die opbrengs, wat die wins was. En of die produk kompeterend is in ‘n vrye mark ekonomie. Hierdie antwoorde is nie gegee nie.

Daar is ook’n groot vraag oor die aanwending van die fondse. Hoeveel van die geld is werklik gespandeer op die grond waar die boer dit nodig het?

Volgens die program wat verskaf is, was hulle reeds agter met die implementering en gaan hulle in alle waarskynlikheid te laat wees vir die somer aanplanting.

Maar met die Staat se ruim bydrae is daar wel dadelik ‘n familielid van die President beskikbaar om die projek te bestuur. Wat sy kennis van landbou is, is tot dusver ook onseker.

“Hierdie is ‘n tweede Nkandla,” sê mnr. Meintjes. “Alhoewel TLU SA hom verbind tot voedselsekerheid in die land, doen hy dit vanuit die perspektief dat die kommersiële landbouer volhoubaar op sy grond gehou moet word as prioriteit. Tweedens moet die staat sy eie grond beskikbaar stel aan nuwe projekte en toesien dat hierdie projekte op volhoubare ekonomiese beginsels bestuur word, en nie deur moontlike nepotisme nie.”

Die voormalige geneesheer-generaal Niel Knobel getuig na verwagting vandag wanneer die saak oor etiese wangedrag teen die kardioloog en chemiese kenner dokter Wouter Basson hervat word.

Basson word van onetiese gedrag aangekla en dat hy betrokke was in die grootskaalse vervaardiging en verskaffing van mandrax, kokaïen en traangas aan die Unita-leier in Angola, Jonas Savimbi.

Basson word ook daarvan aangekla dat hy middels verskaf het wat in ontvoerings gebruik is, sowel as sianied-kapsules wat agente gebruik het om selfmoord te pleeg.

In 2002 is Basson in die hooggeregshof in Pretoria vrygespreek op 67 aanklagte, ná ‘n uitgerekte strafregtelike saak.

Tydens ‘n verhoor in 2008 deur die Raad op Gesondheidsberoepe is Basson aangekla van oortredings wat spruit uit sy tyd as sogenaamde “chemiese oorlogkenner.”

Agt mense is Saterdag vir openbare geweld in hegtenis geneem in Ocean View naby Vishoek in die Wes-Kaap nadat ‘n beweerde dwelmbaas se huis beskadig is.

‘n Woordvoerder vir die polisie, Tembinkosi Kinana, het gesê inwoners het die huis met klippe bestook, die dak beskadig en ‘n motor wat voor die huis gestaan het stukkend geslaan.

“Die polisie is ontbied om die situasie onder beheer te bring en om die gesin wat ten tyde van die voorval in die huis was te ontruim.”

Volgens Kinana is polisievoertuie ook beskadig.

Kinana het gesê die beskadiging van die huis was ‘n wraakaanval nadat ‘n 32-jarige man Saterdagoggend geskiet is deur ‘n ongeïdentifiseerde verdagte.

‘n Saak van poging tot moord word ondersoek en niemand is nog in hegtenis geneem in verband met die voorval nie.

Die agt mense wat vir openbare geweld in hegtenis geneem is sal na verwagting binnekort in die Simonstad-landdroshof verskyn.