Kategorie: Suider-Afrika
Suid-Afrikaanse nuus, d.w.s. sowel nuus uit Suid-Afrika én Suider-Afrika.
Te veel bruines, sê Manyi
Regeringswoordvoerder Jimmy Manyi het namens die Black Management Forum (BMF) gepraat toe hy gesê het daar is te veel bruin mense in die Wes-Kaap.
“Ek het net geartikuleer wat die regering se standpunt, is,” het Manyi Donderdagmiddag aan die Suid-Afrikaanse Persassosiasie gesê.
“Dit is die BMF se posisie Ek het geen gevoelens oor enige kwessie nie. Ek praat as BMF-voorsitter of as die regering se woordvoerder,” het hy gesê.
Manyi is verlede jaar as voorsitter van die BMF herkies.
“Dit het niks te doen met my persoonlik nie,” het hy gesê. “Ek het ‘n rol te speel as boodskapper, of ek vir die BMF of die regering optree. Dit het niks te doen met Jimmy Manyi nie. Hoekom is dit ‘n persoonlike kwessie?” het hy gevra.
Sy opmerkings kom enkele dae nadat die vakbond Solidariteit gekritiseer is omdat hulle daarop gewys het dat oor ‘n miljoen bruin mense hul werk kan verloor as wysigings aan die Wet op Diensbillikheid aanvaar word.
“Laat my net enkele opmerkings maak oor die laaste gesprek oor gekleurde mense,” het Manyi gesê tydens ‘n onderhoud met Freek Robinson op die TV-program Robinson Regstreeks.
Die onderhoud is op KykNet in Maart 2010 uitgesaai, terwyl Manyi nog steeds die direkteur-generaal van die departement van arbeid was.
“Ek dink dit is baie belangrik vir bruin mense in hierdie land om te verstaan dat Suid-Afrika aan hulle in totaliteit behoort, nie net die Wes-Kaap nie.
“So ‘n oor-konsentrasie van kleurlinge in die Wes-Kaap werk nie vir hulle nie.
“Hulle moet oor die res van die land versprei… so hulle moet dié oor-konsentrasie situasie stop omdat hulle in ooraanbod is waar hulle is. So jy moet soek in die land en sien waar jy die vraag kan tegemoetkom.
“Hierdie Wet op Gelyke Indiensneming (WGI) is ‘n baie goeie ding in hierdie land,” het hy gesê.
In die onderhoud, het Manyi ook gesê dat in die res van die land gekyk moet word om te sien waar daar ‘n vraag vir bruin werkers bestaan.
Donderdag, Manyi het gesê “die probleem” word deur die departement van arbeid aangespreek.
“As jy meer besonderhede wil hê, kan jy dit kry van die departement van arbeid,” het hy gesê.
Solidariteit het gesê: “Die wysiging maak voorsiening vir ‘n grootskaalse sosiogeneringsprogram waarvolgens die hele land ‘n presiese replika van die nasionale demografie moet wees.”
Volgens die koerant Beeld, het Manyi op 12 Mei gesê dat die Steel and Engineering Industries Federation of South Africa die enigste maatstaf vir billike indiensneming is.
“Die voorgestelde wysiging in die WGI is dus nie dubbelsinnig is,” sê Solidariteit.
“Trouens, die wysiging is ‘n duidelike weerspieëling van die effek van Manyi se ideologiese raamwerk van verteenwoordiging en is nie ‘n onbedoelde fout nie.”
Benewens die bruines sal meer as 300 000 Indiërs in KwaZulu-Natal ook geraak word.
“Wat ons gedoen het met die syfers was om te wys op die absurde gevolge van die ideologie van absolute verteenwoordiging.
“Die ideologie is nou vervat in ‘n voorgestelde wysiging aan wetgewing. Ons stel voor dat die voorgestelde verandering onmiddellik teruggetrek word,” sê die adjunk-uitvoerende hoof van Solidariteit.
Solidariteit het gesê die probleem met die wetsontwerp is nie alleen beperk tot die opheffing van die plaaslike demografiese profiel van die ekonomies aktiewe bevolking nie.
In terme van die huidige wetgewing, kan die huidige en toekomstige finansiële en ekonomiese faktore in ag geneem word om te bepaal of ‘n werkgewer voldoen het aan die WGI.
Die beskikbaarheid van gekwalifiseerde persone kan ook in ag geneem word.
Die nuwe wet het nie voorsiening vir hierdie faktore gemaak nie.
Solidariteit se “navorsing” is verwerp deur die beide die African National Congress (ANC) en die Kongres van Suid-Afrikaanse Vakverbonde (COSATU).
ANC Hoofsweep Mathole Motshekga het gesê dat die “sogenaamde navorsing” is ‘n “gevaarlike politieke spel” en dat dit ondenkbaar is dat die ANC sal poog om diegene te benadeel wat hy bevry het en probeer bemagtig.
Cosatu beskryf die vakbond se eise as “opruiend en onverantwoordelik”.
Rou riool besmet dorp se drinkwater
Jagersfontein staar ‘n ernstige krisis in die gesig nadat drinkwater in die dorp deur stinkende riool besoedel is.
Inwoners moet hul dors met duur, gebottelde water les.
In die lokasie Itumeleng, borrel rioolwater by mangate uit en sypel die grond binne om ondergrondse waterbronne wat die inwoners van drinkwater moet voorsien, te vervuil.
Wit inwoners kla dat die watergehalte, of gebrek daaraan, en rou riool wat oral aanwesig is, inwoners se gesondheid kan benadeel.
Die Kopanong-munisipaliteit ignoreer nou al skriftelike klagtes van wit inwoners oor die probleem vir 3 jaar lank. Swart inwoners, wat ook gebottelde water moet koop, bly gelate oor die vrot water.
Grensbeheer gaan glo opgeskerp word
‘n Bykomende miljard rand is hierdie jaar in die begroting opsygesit om beter grensbeheer toe te pas. R600 miljoen hiervan is in die volgende drie jaar beskikbaar gestel om meer soldate op die land se grense te ontplooi, en om grensbeheer-fasiliteite en -toerusting op te gradeer en te onderhou, het Pravin Gordhan gesê.
Lees verder.
Umalusi stel nog inligting oor matriekuitslae vry
Die VF Plus het kennis geneem van die verslag wat vandag vrygestel is tydens ‘n mediakonferensie by Umalusi se hoofkantoor. Die bekendstelling van die inligting kom nadat die VF Plus en Media24 aansoek gedoen het by Umalusi om alle relevante inligting te verskaf rakende die standaardisering van die 2010-matriekvakke in terme van die Wet op Bevordering van Toegang tot Inligting.
Volgens adv. Anton Alberts, VF Plus-parlementêre woordvoerder oor Basiese Onderwys, is daar ‘n presedent geskep deur die suksesvolle aansoek deur beide die VF Plus en Media24 waardeur Umalusi gedwing is om die inligting bekend te stel. “Umalusi het self tydens die mediakonferensie erken dat volgens hulle kennis is hulle die enigste standaardiseringsorganisasie wat sodanige inligting bekend maak aan die publiek. Dit is ‘n bewys van die deursigtigheid van Suid-Afrika se onderwysprosesse,” het Alberts bygevoeg.
Daar is verskeie aanpassings gemaak in sekere vakke en die VF Plus bestudeer nog die hele verslag ten einde te bepaal tot hoe ‘n mate die aanpassing by die onderskeie vakke aanleiding gegee het tot die hoër slaagsyfer van verlede jaar. Die vak waarin die hoogste aanpassing gemaak is, blyk Wiskunde te wees met ‘n opwaartse aanpassing weens die moeilikheidsgraad. Die VF Plus sal die impak van al hierdie aanpassings evalueer en aan die hand daarvan kyk waarom die slaagsyfer soveel hoër is as in 2009.
“Umalusi het wel hulle spyt uitgespreek omdat soveel spekulasie ontstaan het rondom die uiteindelike slaagpersentasie van 2010 en het verskeie kommentatore as roekeloos bestempel. Dit is egter hulle eie skuld aangesien daar nie genoeg inligting was om die anomalieë logies te verduidelik nie en dis nou eers moontlik nadat die inligting weens die aansoek van die VF Plus en Media24 geslaag het,” het Alberts gesê.
Die VF Plus is dit eens met Umalusi dat die departement van basiese onderwys nog baie werk het om te doen om die standaard van Suid-Afrikaanse skole en vakke te verhoog en dat dit ‘n absolute prioriteit moet wees vorentoe.
Gemengde reaksie op begroting
Die Automobiel Assosiasie het die aankondiging in die begrotingsrede verwelkom dat miljarde rand bewillig is vir instandhouding van paaie en openbare vervoer. ‘n Woordvoerder, Gary Ronald sê R1,5 miljard sal aan die provinsies gaan vir padinstandhouding en ‘n verdere R2,5 miljard sal aan munisipaliteite gegee word vir openbare vervoerstelsels en infrastruktuur. Hy sê egter hy is teleurgesteld dat die voorgestelde toltariewe in Gauteng nie in die begrotingsrede genoem is nie.
Die minister van Finansies – Pravin Gordhan – het ook nuwe maatreëls aangekondig om bedrog met regeringstenders uit te skakel. Hy het in sy begrotingsrede gesê dat meer as 50 ondersoeke tot gevolg gehad het dat 65 mense in hegtenis geneem is. Hy sê die Inkomstediens is besig om toe te slaan op belasting en doeane-oortredings. Dit sluit ‘n nuwe metode in waarop sigarette gemerk word, terwyl onwettige klere en tekstiel-invoere ook vasgevat word.
Vroeë aanduidings is dat finansiële markte Suid-Afrika nie van staatskuld ontslae gaan raak nie, ná Gordhan ‘n groter as verwagte begrotingstekort voorspel het. Gordhan beraam ‘n begrotingstekort van 5,5% van die bruto binnelandse produk. Vóór die begrotingsrede het ekonome verwag dat die minister ‘n tekort van sowat 4,5% sal voorspel. Ekonome sê die markte is nie paniekerig nie weens die aanvaarbare vlakke van Suid-Afrika se skuld.
In reaksie op die begrotingsrede sê ‘n ekonoom van Investec, Brian Kantor Suid-Afrika moet op die private sektor steun om werk te skep. Hy sê die uitdagings wat die land in die gesig staar is dat die arbeidsmark te voorskriftelik in sy eise is. Kantor sê soveel soos Gordhan se toespraak op werkskepping gefokus het, sou dit verkieslik wees as daar aangedui is in watter sektore geleenthede geskep gaan word.
Krokodille vreet eienaar op
‘n Man is deur krokodille opgevreet toe hy by ‘n Rustenburgse krokodilplaas in ‘n dam geval het, het die polisie in Noordwes Woensdagaand bekend gemaak.
“Die eienaar van die krokodilplaas was glo besig om ‘n waterpyp reg te maak toe hy in die dam geval het,” het lt. kol. Sabata Mokgwabone, polisiewoordvoerder, gesê.
“Die slagoffer se werknemers was naby en het probeer om die krokodille met vleis weg te lok, maar dit was te laat,” het Mokgwabone bygevoeg.
Volgens Mokgwabone is dit nie duidelik hoeveel krokodille in die dam was toe die voorval gebeur het nie.
Oorwinning vir die padgebruiker
“Die Vryheidsfront Plus is tevrede met die aankondiging dat die tolhekstelsel tydelik opgeskort is totdat die tariewe-kwessie opgelos is. Hierdie stap is ‘n reuse oorwinning vir die padverbruiker asook vir die alreeds oorbelaste belastingbetaler,” het adv. Anton Alberts-parlementêre woordvoerder oor Vervoer vir die Vryheidsfront Plus gesê.
Dit blyk dat die besluit geneem is na ‘n ontmoeting tussen die Gautengse premier, Nomvula Mokonyane en die minister van vervoer, Sbu Ndebele.
“Die ANC is oneerlik en handhaaf dubbele standaarde. Die ANC-in-regering het presies geweet van die beplande tolheksisteem en kan nie nou kla dat die tariewe te hoog is nie. Die ANC se teenkanting teen die toltariewe het slegs gekom na hewige publieke protes teen die tariewe, daarom is die weerstand wat die premier van Gauteng, Nomvula Mokonyane, teen die tariewe bied bloot ‘n reaksie na aanleiding van die geweldige druk wat op haar regering toegepas word. Die druk moet nou verhoog word ten einde te sorg dat die uiteindelike tariewe by die VF Plus se voorgestelde 5c per kilometer uitkom,” het hy bygevoeg.
“Die VF Plus se aanlynpetisie teen die tolhektariewe het reeds 110 000 handtekeninge. Net twee weke gelede was die petisie op 50 000. Die tempo waarteen die petisie groei, is ”n aanduiding van die publiek se sterk teenkanting teen die regering se eensydige optrede met die tolhekstelsel,” is die mening van adv. Alberts.
Die VF Plus moedig steeds mense aan om die petisie te teken, want hoe meer steun ons kry hoe meer druk kan ons op die regering plaas ten einde te sorg dat die uiteindelike tarief billik is. Die VF Plus ondersoek tans ook moontlike regsaksie teen die regering om die hele tolhekstelsel onwettig te verklaar.
Wys Bheki en Gwen die deur
“Die Polisie kommissaris, genl. Bheki Cele en die minister van Openbare Werke, me. Gwen Mahlangu-Nkabinde, moet dadelik afgedank word. Dit is duidelik uit die verslag van die Openbare Beskermer dat die tenderprosedures nie korrek gevolg is nie, dat verskeie wetgewing oortree is en dat daar nie ‘n noodsaaklikheid bestaan vir die huur van die Sanlam Middestad-gebou vir R500 miljoen oor tien jaar nie.
Dit wil voorkom asof Cele in die voetspore van sy voorganger, Jackie Selebi, wil volg,” sê mnr. Pieter Groenewald wat die klag by die Openbare Beskermer ingedien het en hoofwoordvoerder van Polisie vir die Vryheidsfront Plus.
“As pres. Zuma ernstig is oor sy uitlatings dat korrupsie uitgeroei sal word, moet hy beide die kommissaris en minister afdank, want hy stel beide aan. Indien hy dit nie doen nie maak hy ‘n klug van skoon administrasie en bevorder korrupsie.
Veral die optrede van die minister van Openbare Werke om voort te gaan met die sluit van die huurkontrak, ten spyte van ‘n interne komitee en senior advokaat se advies om nie voort te gaan nie, skep die indruk van korrupsie.
Meer vrae ontstaan nou oor die afdanking van die vorige minister, Geoff Doidge, wat die proses gestop het in afwagting van die verslag van die Openbare Beskermer.
Die Vryheidsfront Plus sal na behoorlike bestudering van die verslag besluit of strafregtelike klagtes ingedien sal word,” sê Groenewald.
ANC wil ‘Skiet-die-boer’ behoue sien
Die ANC sal aansoek om verlof doen sodat die party kan toetree tot die haatspraaksaak teen die president van die ANC-Jeugliga, Julius Malema.
Gwede Mantashe, sekretaris-generaal van die ANC, het Maandag gesê dié aansoek sal Dinsdag in die Hooggeregshof in Johannesburg aangehoor word.
“Ja, ons tree tussenbeide, omdat liedere van bevryding nie ‘n Malema-kwessie is nie,” het Mantashe gesê.
“Die liedere is die hart van waarvoor ons [die ANC]gestaan het en waarvoor ons baklei het. Dit sal wees om ons erfenis te onteer. Ons kan nie maak of dit ‘n Malema-kwessie is nie – die liedere is ouer as hy.”
Afriforum het Maandag gesê hulle is verras deur die ANC se besluit om aansoek te doen om verlof om tussenbeide te tree.
“Dit is skokkend dat die ANC dieselfde week waarin hoëprofiel-plaasmoorde wyd woede ontlok het, kies om hul stukke ter ondersteuning van dié haat-liedjie in te dien,” het die organisasie se prokureur, Willie Spies, in ‘n verklaring gesê.
Volgens Spies het Mantashe in sy beëdigde verklaring aangevoer die omstrede liedjie “Dubula iBhunu” (Skiet die boer) is ‘n “ANC-lied” wat deel uitmaak van die “geskiedenis van die bevryding van Suid-Afrika van Apartheid”.
Mense is gefrustreerd met die ANC-regering se onvermoë om gewelddadige misdaad, en veral plaasmoorde, aan te spreek, het Spies gesê.
Die ANC het hierop geantwoord met ‘n pleit om “haat-liedjies” uit die struggle-era as deel van hul erfenis en eiendom te beskerm.
“Met haat-liedjies as ‘erfenis’ is dit geen verrassing dat die ANC se enigste nalatenskap anargie, wanadministrasie, korrupsie en geweld is nie,” het Spies gesê.
Die saak hou verband met Malema se herhaaldelike gebruik van die term “Skiet die boer”.