Kategorie: Suider-Afrika

Die hooggeregshof in Zimbabwe het die verkoop van diamante afkomstig uit ’n gebied bekend vir menseregtevergrype goedgekeur, ’n stap wat teenstrydig is met die Kimberley-proses, het die staatsbeheerde media gister berig.

Die verkoop van 300 000 karaat diamante uit die oostelike Marange-velde is verlede jaar deur die internasionale reguleerder gestop nadat daar bevind is dat Zimbabwe nie aan die standaarde wat gestel is vir menseregte voldoen het nie.

Harare het aanvanklik die transaksie gestop in afwagting van toestemming deur die plaaslike owerhede en die Kimberley-proses, wat daargestel is om die verkoop van sogenaamde bloed-diamante te verhoed. Die inkomste uit dié transaksies word gebruik om rebelle-bewegings te finansier.

Die staatsbeheerde Herald het egter gister berig dat die hooggeregshof nou die verkoop van die diamante wat aan die Britse maatskappy African Consolidated Resources behoort, goedgekeur het.

Obert Mpofu, minister van myne, het Harare se vasbeslotenheid om die Kimberley-proses teen te staan weer beklemtoon, hoewel Zimbabwe deel is van die groep.

“Ons gaan voordeel trek uit ons diamante, of die Kimberley-proses dit nou goedkeur of nie,” het hy volgens die staatsbeheerde New Ziana-nuusagentskap gesê.

Mpofu het ook gesê die land se vyande manipuleer die proses om te keer dat Zimbabwe voordeel trek uit die diamantverkope.

Die Kimberley-proses het verlede jaar berig oor geweld deur Zimbabwe se weermag wat die diamantvelde beheer, insluitend dwangarbeid, marteling en die mishandeling van burgerlikes.

’n Ondersoekbeampte van die Kimberley-proses het die land in Maart besoek om vas te stel of daar voldoen word aan menseregtestandaarde op die Marange-diamantvelde, wat meer as 66 000 hektaar beslaan. Die ondersoeker het bevind dat daar wel pogings aangewend word om prosedures te verbeter, maar die planne word nie in werking gestel nie. Die organisasie het Zimbabwe tot in Junie gegee om die vergrype stop te sit.

’n Afrikaanse nuusbulletin kom dalk eersdaags op kykNET in ‘n poging om advertensie-inkomste te verhoog.  

Afrikaanse tydgleuwe op TV blyk uiters winsgewend vir SABC2, die openbare uitsaaier, te wees in teenstelling met ander tale en dié feit is waarskynlik wat kykNET sal oorreed om ‘n Afrikaanse nuusbulletin te oorweeg.

Die nuuskanaal eNews is tans besig om sy nuusdienste in ander tale benewens Engels beskikbaar te stel.

Bronwyn Keene-Young, eNews se groephoof, het aan Die Burger gesê hulle kyk na Junie vir ‘n begindatum.

“Ons soek nou na ’n platform om ’n Afrikaanse bulletin uit te saai en dié platform hoef nie noodwendig ons kanale (e.tv en eNews) te wees nie. Afrikaans vaar goed en Afrikaanssprekendes is ’n belangrike kykersgemeenskap.”

Keene-Young het egter gesê die platform vir die Afrikaanse nuusaanbieding is nog nie bevestig nie.

Die swart man wat gesorg het daarvoor dat ‘n eenjarige dogtertjie, Marzaan Kruger, om haar lewe veg in ‘n waakeenheid, is Chakhoma Machaba (28). Hy het verlede Donderdag, voor die voorval, sit en TV kyk in die huis van die Krugers in Robindale, Randburg, saam met die bediende Franscina Sekhu.

Sekhu het vir hom tee gemaak en hom in die sitkamer op die bank voor die TV getrakteer met die baba op haar skoot. Machaba, ‘n Mosambieker, was voorheen deel van ‘n span bouers wat by die Krugers gewerk het.

Toe Madelein Kruger, of juffrou Madelein soos die leerlinge by Randburg Hoërskool haar ken, tuis opdaag, het sy haar kind in ‘n bloedplas op die vloer aangetref.

Die bediende, wat liggies aangerand is, beweer sy maak nie hek vir enige persoon oop nie, maar dat Machaba ‘n vriend was. Dit is egter duidelik dat haar optrede teen die wil van haar werkgewer geskied het, aangesien sy Machaba gevra het om te loop voordat Kruger terugkom en hom daar aantref.

Machaba se gewelddadige optrede was glo die gevolg van ‘n jaloerse bevlieging nadat Franscina hom vertel het van ‘n medelid van sy bouspan wat romanties in haar belanggestel het.

Machaba is steeds soek. Die polisie het gemaan dat hy buitengewoon gewelddadig is. Hy is glo bekend in Soweto en Alexandra.

Die Vryheidsfront Plus-jeug in die Vrystaat is geskok deur die syfers wat deur die Suid-Afrikaanse Instituut vir Rasseverhoudinge (SAIRV) oor onderwys in die Vrystaat bekend gemaak is.

Volgens die SAIRV was slegs 48% van Vrystaatse skoliere wat in 2007 in graad 10 was, in 2009 matrikulante, wat op ‘n 52% uitvalsyfer tussen graad 10 en graad 12 dui. Wat skokkend is, is die feit dat slegs 28% van die skoliere wat in 2007 in graad 10 was, in 2009 matriek geslaag het. “Dit is anders as die mooier prentjie wat deur amptelike matriekuitslae geskets word,” het Jan van Niekerk, Provinsiale Jeugleier van die VF Plus in die Vrystaat gesê. Statistieke wys verder dat slegs 8% van skoliere in die Vrystaat toegang tot toegeruste biblioteke het en slegs 7% het toegang tot toegeruste laboratoriums en rekenaarsentrums.

Die statistiek wat bekend gemaak is, word jaarliks deur die SAIRV aan politieke partye in die Provinsie beskikbaar gestel, maar die ANC in die provinsie was nie beskikbaar om dit te sien nie. Die feit dat die ANC nie beskikbaar is, of nie belangstel om dit te sien nie, is volgens van Niekerk ‘n groot bron van kommer aangesien die regering in hierdie geval nie die ware stand van die onderwyskrisis in die provinsie besef of wil besef nie.

Die VF Plus is ook besorg oor ‘n onlangse verslag van die SAIRV, wat aangedui het dat sowat 1 miljoen wit mense die land in die laaste tien jaar verlaat het. Die VF Plus is uiters bekommerd hieroor hoofsaaklik as gevolg van die uitwerking wat hierdie syfers in die afsienbare toekoms vir die land en die onderwys in besonder sal inhou. Die SAIRV het ook bekend gemaak dat die meeste emigrante, wit emigrante is en in die ouderdomsgroep van 20 to 40 jaar. Hierdie emigrante is geskoolde of hoogs-geskoolde mense wat ‘n belangrike bydrae tot die land se ekonomie, onderwys en belastingbasis kan maak.  Van Niekerk is van oordeel dat die probleem slegs opgelos kan word deur die afskaffing van regstellende aksie en die beveiliging van Suid-Afrika se landsburgers.

Die VF Plus-jeug in die Vrystaat gaan hierdie en ander statistiek aan die LUR vir onderwys in die Provinsie, mnr. Tate Makgoe, oorhandig om die situasie wat ‘n ernstige bedreiging vir Suid-Afrika inhou, onder sy aandag te bring.

Universiteite moet dit oorweeg om ‘n studie van ‘n Afrikataal behalwe Afrikaans verpligtend vir sekere kursusse te maak, het Blade Nzimande Minister van Hoër Onderwys, gister gesê.

Aan sommige universiteite, het Afrikataaldepartemente swakker oor die jare geword, en die bevordering daarvan moet ‘n “sentrale strategie” behels, het hy gesê in ‘n toespraak by die Kaapse Skiereiland se Universiteit van Tegnologie. 
  
“Ek wil graag voorstel dat die universiteite en professionele liggame soos dié wat onderwysers, dokters en prokureurs verteenwoordig, ‘n studie (dalk vir’ n jaar) van ‘n amptelike Afrikataal, anders as Engels en Afrikaans, verpligtend maak ten einde ‘n kwalifikasie te bekom,” het hy gesê. 
  
“Dit sou nie ‘n eerste vir hierdie land wees nie, dit is suksesvol in die verlede gebruik om Afrikaans onder nie-Afrikaanssprekendes te bevorder.
  
Dit sal voordelig wees vir alle studente, Afrikataaldepartemente help versterk, en die status van die Afrikatale verhoog .
  
Nzimande, wat gepraat het op ‘n spitsberaad oor transformasie in hoër onderwys, het gesê ‘n saak wat die sektor vir meer as ‘n dekade al kwel is die stygende gemiddelde ouderdom van akademici en die noodsaaklikheid om die akademiese professie in stand te hou. 
  
“Ten spyte van hierdie besorgdheid, ons het nie ‘n groot hoeveelheid vooruitgang gesien nie,” het hy gesê.
  
“Die gemiddelde ouderdom van die Suid-Afrikaanse akademici is oor 50 word nie jonger nie… “

Nzimande het gesê dat hy beoog om ‘n permanente belanghebbende raad vir hoër onderwys wat een of twee keer per jaar vergader, byeen te roep.

Iran se president Mahmoud Ahmadinejad het Donderdag die “sataniese druk” op Zimbabwe en sy eie land veroordeel. Hy het tydens ‘n besoek aan Harare gesê beide lande veg om hulle soewereiniteit in stand te hou.

“Iran en Zimbabwe is twee lande wat nog steeds poog om hulle soewereiniteit en vryheid te behou,” het Ahmadinejad tydens ‘n dinee met Zimbabwese president Robert Mugabe gesê. 

“Natuurlik het ons krag het die vyandigheid van ekspansionistiese lande ontlok,” het hy gesê. “Hier veroordeel ek alle druk, alle sataniese druk, druk op die regering en die mense van Zimbabwe.” 

“Ons glo die oorwinning is ons s’n en dat vernedering en nederlaag dié van ons vyande is,” het hy gesê. 

“Natuurlik het hulle versuim om hulle doelwitte en resultate te bereik. Hulle het gedink hulle kon die rigting van ons nasies vernader. Ons nasies het onbeweeglik bly staan. ” Beide Ahmadinejad en Mugabe is bekend vir hulle omstrede beleidstrigtings en anti-Westerse retoriek. 

 Ahmadinejad staar nuwe VN-sanksies oor Iran se kernprogram in die gesig, terwyl Mugabe daarvan beskuldig word dat hy nie ‘n magsdelingsooreenkoms ná die omstrede verkiesings verlede jaar eerbiedig nie. 

Mugabe steun Iran se kernprogram en staan by Ahmadinejad in opheffing van sanksies.

“Wees ook verseker, kameraad president, van Zimbabwe se deurlopende ondersteuning van Iran se regverdige saak oor die kernkwessie,” het Mugabe aan Ahmadinejad by die dinee in Harare gesê. 

“As gevolg van die beginselvaste posisies wat ons ingeneem het op beide nasionale en internasionale vlak, word Zimbabwe en Iran onregverdig afgekraak en gestraf deur Westerse moondhede,” het Mugabe gesê.

Ahmadinejad wat Donderdag vir handelsgesprekke met Mugabe in Zimbabwe aangekom het, se besoek is as ‘n “kolossale politieke skandaal” deur die Beweging vir Demokratiese Verandering (MDC), Mugabe se vennoot in ‘n weerspannige eenheidsregering, beskryf.

“Om die Iranese sterkman na  ‘n beleggingsforum te nooi, is soos om ‘n muskiet te nooi om malaria te genees,” het die party het in’ n verklaring gesê.

“Ahmadinejad se besoek is nie net ‘n belediging vir die mense van Zimbabwe nie, maar ‘n belediging vir die demokrasie en vir die verdrukte mense van Iran.”

Ahmadinejad se besoek is deel van ‘n Afrikatoer wat ook ‘n afspraak met die VN-Veiligheidsraadslid Uganda insluit. Uganda vul tans een van die roterende setels op die Veiligheidsraad.

In Zimbabwe het die Iranese leier ook verskillende handelsooreenkomste onderteken en ‘n reeks gesamentlike ondernemings tussen die twee lande se landbou-, vervaardiging-en mynbou-sektore geloods. 

Vrydag sal hy ‘n internasionale handelskou open in Zimbabwe se tweede grootste stad Bulawayo.

Zimbabwe geniet goeie verhoudinge met Iran, asook verskeie oos-Asiatiese lande nadat Mugabe ‘n “Kyk Oos” beleid ingestel het in reaksie op die isolasie deur die Weste ná omstrede grondhervormings en die betwiste 2002-verkiesing.