Kategorie: Nuus

Munisipaliteite in 4 provinsies skuld meer as miljard

Die munisipaliteite in net vier provinsies, Oos-Kaap, Vrystaat, Mpumalanga en Noordwes, skuld Eskom gesamentlik R1,1 miljard. Die totale uitstaande skulde van staatsdepartemente vir dienste aan dieselfde munisipaliteite beloop egter R1,2 miljard. Hierdie syfers is verskaf deur die minister van samewerkende regering en tradisionele Sake, mnr. Richard Baloyi, in antwoord op ‘n vraag van Pieter Groenewald, LP van die Vryheidsfront Plus in die parlement.

“Eskom dreig van hierdie munisipaliteite dat hulle die kragtoevoer gaan afsny weens nie-betaling van Eskom se rekening en destabiliseer daardeur die plaaslike ekonomie. Indien die staat egter sy verpligting nakom en sy diensterekening aan die munisipaliteite betaal, kan Eskom se rekening ten volle vereffen word. Die staat is die enigste aandeelhouer van Eskom en dit is ironies dat die staat eintlik homself dreig. Die staat is ‘n wanbetaler van dienstegelde en getroue betalers van dienstegelde subsidieer nou die staat as wanbetaler. Hulle betaal reeds belasting aan die staat en dit is niks anders as dubbele belasting nie,” sê mnr. Pieter Groenewald, die Vryheidsfront Plus se woordvoerder oor samewerkende regering en tradisionele sake.

Volgens die antwoord van die minister skuld Oos-Kaap R18,803 miljoen, Vrystaat R436,851 miljoen, Mpumalanga R463,588 miljoen en Noordwes R182,345 miljoen aan Eskom. Staatsdepartemente skuld munisipaliteite in Oos-Kaap R134,1 miljoen, Vrystaat R135,1 miljoen, Mpumalanga R551,9 miljoen en Noordwes R415,9 miljoen vir agterstallige dienstegelde.

“Die minister het in sy begrotingsdebat in die parlement vertel hoe ‘wonderlik’ dit gaan op plaaslike regeringsvlak. Hierdie syfers is bewys van die krisis in plaaslike regering en bewys dat Baloyi die publiek mislei. Ek sal beslis die minister vra wanneer die staatsdepartemente hulle skuld gaan betaal, aangesien dit onregverdig is teenoor die belastingbetalers wat getrou hulle diensterekeninge betaal,” sê Groenewald.

Saoedi-Arabië wil ondersteuners van Sirië deporteer

Saoedi-Arabië se gesant in Libanon het gesê die koninkryk gaan Libanese burgers deporteer wat die militante groep Hezbollah ondersteun.

Die koninkryk het die besluit geneem na die Hezbollah-groep se rol in die Siriese burgeroorlog.

Ali Awad Assiri, Saoedi-Arabië se amabassadeur in Libanon, het Woensdagaand gesê Saoedi-Arabië sal mense deporteer wat die groep finansieel ondersteun.

Hy het nie aangedui wanneer hierdie deportasies sal begin nie.

Saoedi-Arabië, self nie ‘n demokrasie nie, ondersteun glo groepe wat Bashar al-Assad, Sirië se president, as staatshoof wil verwyder.

Swart inwoners in Johannesburg oproerig oor dienste

Inwoners van die Alexandra township, noord van Johannesburg, versper Londonweg met brandende bande in ‘n betoging oor swak dienslewering.

‘n Polisiewoordvoerder, Kim Cloete sê daar was nog geen geweld aangemeld nie. Sy het motoriste gewaarsku om Londonweg te vermy tot die betogers uiteen gejaag is en die pad opgeruim is. Die polisie monitor die situasie.

Die situasie by die Dube-hostel in Soweto is steeds gespanne, alhoewel inwoners sê dat die kragtoevoer na die gebou herstel is.

Dit volg na gewelddadige protesoptrede Donderdagaand. Die polisie het traanrook gebruik om betogers uitmekaar te jaag.

Die inwoners beweer dat hulle vir meer as ‘n week sonder elektrisiteit was. Phathokwakhe Dladla, wat in die hostel bly, sê die situasie is nou kalm omdat die kragtoevoer herstel is.

Hy sê hulle is meer as twee jaar gelede ‘n wettige kragverbinding beloof.

Volgens Dladla gebruik ‘n groot deel van die hostel onwettige kragverbindings wat lei tot gereelde kragonderbrekings.

Regering verwerp Agang se onderwyskritiek

Die regering het die stigter van Agang, Mamphela Ramphele, se bewerings dat die jeug in die steek gelaat is weens wanbestuur in die onderwysstelsel, verwerp.

“Die verklaring wat deur… Ramphele gemaak is oor onderwys, soos in die media berig, is nie net ongegrond nie, maar van alle waarheid ontbloot, het die departement van basiese onderwys Donderdag gesê.

“Haar ongegronde uitlatings bewys net weer die totale gebrek aan begrip en gebrek aan waardering vir die onderwyssektor deur iemand wat na bewering vooraanstaande is in akademiese kringe.”

Ramphele het vroeër gesê politieke wil is nodig om probleme in die Suid-Afrikaanse onderwysdepartement op te los. Sy het gesê dié wil ontbreek by die regering.

Ramphele het gesê die regering het R230 miljard op onderwys spandeer, maar dat die land nie waarde vir die geld kry nie.

Sy het ook gesê die verskoning dat apartheid vir die probleme blameer moet word, is nie geldig nie.

“Twintig jaar is te lank vir enigiemand om te sê die nalatenskap van ‘n ander stelsel hou hom terug,” het Ramphele gesê.

Lewer bewys van ‘bedenklike’ Libiese bates, eis Gordhan

Mense wat bewyse van Libiese fondse en bates het wat onder “bedenklike omstandighede” na Suid-Afrika gebring is, moet dit aan Libiese owerhede of die Verenigde Nasies oorhandig, het Pravin Gordhan, minister van finansies, Donderdag gesê.

“Niemand wat hierdie bewerings gemaak het, het nog bewys gelewer van die oordrag van hierdie bates en fondse na Suid-Afrika nie,” het Gordhan in ‘n verklaring gesê.

Hy het gepraat oor mediaberigte dat Libiese bates en geld nog in Suid-Afrika is.

“Hierdie berigte verwar feite en bewerings, en hou dit alles as feite voor,” het hy gesê.

Gordhan het bevestig dat daar Libiese aandeelhouding in Suid-Afrikaanse entiteite is, en dat dit op kommersiële basis gedoen is.

Dit sluit in die Michelangelo Towers in Sandton, die Centurion Lake-hotel, die Commodore- en die Portswood-hotel in Kaapstad, en die Krugerpark-lodge in Mpumalanga.

Sunday Times het vroeër berig dat Libiese ondersoekbeamptes bewyse gevind het dat vier Suid-Afrikaanse banke en twee plaaslike sekerheidsmaatskappye meer as $1 miljard (ongeveer R10 miljard) in kontant, goud en diamante uit Libië bewaar.

Gordhan het Donderdag gesê ‘n groep wat na bewering die Libiese regering verteenwoordig, het hom in Mei genader. Hulle het ‘n lys met Libiese bates aan hom voorgelê.

“Hierdie lys was vaag en het nie enige besonderhede verskaf wat die onderskeie instansies kan help om hierdie bates op te spoor nie,” het hy gesê.

Stakers moet vasgevat word om kragkrisis te vermy

“Die ANC moet nou sy woord gestand doen en kragdadig optree teen stakende werkers by kragstasies om ‘n dreigende kragkrisis in Suid-Afrika af te weer,” sê mnr. Pieter Groenewald, die Vryheidsfront Plus se parlementêre leier.

Mnr. Groenewald het vandag met ledeverklarings in die parlement gesê daar word gereeld in die aand ‘n beroep op die mense van Suid-Afrika gedoen om minder krag te gebruik aangesien daar ‘n krisis is in die voorsiening van elektrisiteit.

Hy sê die huidige krisis is lank reeds voorsien en in 1998 was daar reeds duidelike planne voorgelê aan die destydse adjunk-president Thabo Mbeki, waarin gesê is daar moet vroegtydig beplan word om genoegsame krag vir die land se toekomstige behoeftes te voorsien.

“Thabo Mbeki het dit van die tafel afgevee en nou sit ons met die gevolge van ‘n swak besluit wat geneem is.

“Die minister van Openbare Ondernemings, Malusi Gigaba, het in April besoek gebring by Medupe (kragstasie), en het gesê hy wil dit duidelik stel dat streng opgetree sal word teen enige verdere vertragings wat spesifiek enige stakings insluit en dat die koppe sal rol.

“Tans is daar weer stakings by Medupe, en ook by Kusile, want hulle sal ook nie kan hou by die skedule nie. Die vraag is, gaan die minister optree, en gaan die koppe rol, anders gaan Suid-Afrika weer met ‘n groot kragkrisis sit.”

Debat oor swart grond moet protektorate Botswana, Lesotho en Swaziland insluit – Pieter Mulder

Om ‘n sinvolle debat oor grond in Suid-Afrika te voer, en veral oor ‘n onderwerp soos die 1913-Wet op Naturellegrond wat vandag in die parlement bespreek is, moet alle feite belig word en nie net die wat sekere agendas pas nie. Dit kan ook net sin en betekenis hê indien toekomslesse daaruit geneem word.

Dr. Pieter Mulder, leier van die Vryheidsfront Plus, het vandag met die debat oor die 1913-wet gesê dit is sy twee voorbehoude wanneer oor die geskiedenis gepraat word.

Hy sê die kernbeswaar teen die 1913-wet is dat dit die grond tussen wit en swart verdeel het en slegs 13% grond aan swart mense gegee het. Dit is ‘geldige kritiek’ oor onregverdighede van die verlede. Maar dit is gegrond op vandag se feite en nie op die feite van 1913 nie.

Al die kaarte van 1913 dui die Unie van Suid-Afrika aan as deel van British South Africa. British South Africa het in 1913 bestaan uit Suid-Afrika en die drie destydse protektorate, vandag Botswana, Lesotho en Swaziland.

In 1913 was daar geen sprake dat hierdie protektorate eendag onafhanklike state sou word nie. Botswana is tot in 1965 nog uit Mahikeng in Suid-Afrika bestuur. Daar is algemeen aanvaar dat die protektorate op die lang termyn by die Unie van Suid-Afrika ingelyf sou word.

Daarom het die Suid-Afrika-Wet van 1909, wat deur die Britse Parlement goedgekeur is, voorsiening gemaak dat die drie gebiede later by die Unie geïnkorporeer kon word.

In die denke van baie is die oppervlak van hierdie gebiede by die 1913 grond getel. Dan kry ‘n mens ‘n 40% – 60% grondverdeling en selfs 50-50 afhangende van hoe dit bereken word. Tot na die 1936-wet was daar nog pogings om hierdie protektorate by Suid-Afrika in te lyf.

“Ek sien dit nie as my verantwoordelikheid om 1913 te probeer verdedig nie. Wat ek wel glo is dat dit net billik is dat ons in ons kritiek al die argumente en die denke van 1913 probeer verstaan,” sê dr. Mulder.

Oor die redes waarom die inlywing nie geslaag het nie, sê hy dit moet in gedagte gehou word dat daar ook ander denke oor die inlywing was.

Die hoofmanne van hierdie protektorate het heftig by die Britte in Londen beswaar gemaak teen inlywing. Uiteindelik het hulle geslaag en in 1966 en -68 het hierdie gebiede onafhanklik geword wat die huidige stel nuwe feite geskep het.

Volgens dr. Mulder is dit nie verkeerd om debatte oor die geskiedenis te hou nie. Maar so ‘n debat is net sinvol indien daar iets uit geleer word vir die toekoms.

“Die verlede kan nie deur baie praat verander of verbeter word nie. Daarom glo die VF Plus nie in ‘n beter verlede nie, maar in ‘n beter toekoms. Hier is min gesê in die debat oor wat ons uit die verlede leer en hoe ons grondhervorming in 2013 kan laat slaag sonder om hongersnood te veroorsaak.

“Niks is gesê oor hoe ons kos aan 52 miljoen Suid-Afrikaanse burgers gaan verskaf waarvan 70% binnekort in die stede gaan woon terwyl ons net 13% goeie landbougrond het nie. Min is gesê oor hoe ons die duisende hektaar kommunale grond beter kan benut.

“Dit is sake vir die toekoms en die debat wat ons nou moet voer as ons Suid-Afrika ‘n beter plek vir almal wil maak,” sê dr. Mulder.

ANC wil grondhervorming versnel, maar ignoreer plaasmoorde

Die ANC wil grondhervorming versnel maar weier om die rasse-element in plaasmoorde te erken.

Die Direkteur-Generaal van die Departement van Landelike Ontwikkeling en Grondhervoming, Mdu Shabane, sê die grootste struikelblok in die regstel van historiese ongeregtighede is die stadige proses van grondhervorming.

Shabane sê dit is beslis nie net die regering se skuld nie, maar daar is korrupte amptenare wat met die proses gepeuter het.

Die destydse wet op Naturellegrond van 1913 het die swart bevolking glo van grondeienaarskap uitgesluit. Die herdenking van die wetgewing lok sterk emosies uit oor die grondhervormingsprogram, wat die regering in 1994 ingestel het om historiese ongeregtighede reg te stel.

Intussen het die kantoor van die Nasionale Polisiekommissaris skerp gereageer op wat hy genoem het die burgerregtegroep Afriforum se siening van misdaad in ‘n rassekonteks.

Afriforum het gister ‘n konferensie in Pretoria gehou.

Die organisasie wil hê die Minister van Polisie, Nathi Mthethwa, moet die huidige misdaadvoorkomingsstrategie met betrekking tot plaasaanvalle verander.

Die nasionale polisiewoordvoerder, Zweli Mnisi sê hulle strategie maak voorsiening vir landelike en plaasgebiede en een van die aspekte is die ontplooiing van hulpbronne en om te verseker dat meer polisielede in die gebiede ontplooi word.

Mnisi sê plase kan nie van die landelike gebiede geskei word nie.

Nuwe rekord vir sterk vrou

Met alle mag het Madelyn Prinsloo van Pretoria bewys dat sy moontlik die heel sterkste vrou in Suid-Afrika mag wees.

Prinsloo het verlede Saterdag by die Grey Owl-winkelsentrum in Centurion gepoog om ‘n dubbel-as Mercedes Benz voorhakkertrok oor ‘n afstand van 20m te sleep asook ‘n 150kg buiteband 30 keer om te dop.

“Ons het aanvanklik die trok item op sy gestoot omdat die oppervlak baie glad was. Sy het daarna die buiteband omgedop, maar later besluit om ander skoene aan te trek en weer die trok aan te pak. Sy het uitstekende tyd gemaak,” het sterkman Chris Batts, die organiseerder van die dag en uitvoerende direkteur van Sport Against Crime, gesê.

Prinsloo het die trok oor ‘n afstand van 30 meter binne een minuut en 30 sekondes gesleep.

Sy het ook moontlik ‘n wêreldrekord opgestel as die eerste vrou wat ‘n 150kg buiteband 30 keer binne twee minute en 30 sekondes omgedop het.

Batts het gesê dat hy haar naam, besonderhede, foto’s, beeldmateriaal asook die nodige verklarings na Recordsetters in New York, Amerika, gaan stuur vir erkenning as ‘n wêreldrekordhouer.

“Recordsetters doen die nodige navorsing om te bepaal of hierdie item al voorheen teen ‘n beter tyd gedoen is en of al die inligting korrek ingedien is en juis is om dit as ‘n wêreldrekord te erken. Indien wel, sal ons met ‘n nuwe vroue wêreldrekord vanuit Riviera kan spog,” het ‘n trotse Batts gesê.

Vyf vas vir openbare geweld in Kaapstad

Vyf mense is tydens ‘n betoging in Wallacedene, Kraaifontein, Kaapstad in hegtenis geneem vir openbare geweld, het die polisie in die Wes-Kaap Donderdag gesê.

“Gister [Woensdag] is ons in kennis gestel dat inwoners in die gebied betoog oor behuisingsprobleme. As deel van die betoging het hulle bande gebrand,” het kol. Thembinkosi Kinana gesê.

Die polisie het ingegryp en vyf mense is in hegtenis geneem.

“Gisteraand het ons uitgevind ‘n Chinese winkel is aan die brand gesteek, maar ons het regdeur die nag die gebied gemonitor,” het Kinana gesê.

Hy het gesê die situasie het teen Donderdagoggend kalmer geraak.

“Ons handhaaf ‘n sterk polisieteenwoordigheid in die gebied.”