Volgens die Dow Jones Wilshire 5000, die mees omvattende aanduider van markaktiwiteit, is $1,2 triljoen se markwaarde Maandag in een dag uitgewis. Dit is byna twee keer soveel as ie veelbesproke hulppakket wat gister in die Amerikaanse Huis van Verteenwoordigers verwerp is.
Die sterkste politieke krag in Oostenryk is na afloop van dié naweek se algemene verkiesing beslis die regse partye. Terwyl die linkse media gal braak teen die "neo-fasciste" se oorwinning, het Jörg Haider se Beweging vir Oostenryk se Vryheid verdriedubbel na 11% steun en het die Vryheidsparty se Heinz-Christian Strache se steun na 18% opgeskiet. Hulle staan nou saam op 29%.
Een van die aanleidende oorsake was onenigheid oor die referendum wat Oostenryk se rol in die EU betref. Oostenryk is een van die mees uitgesproke anti-Europese Unie lande.
Strache se veldtog is gekenmerk deur 'n sterk anti-Moslemboodskap. Hy het die naweek deurentyd verwys na die "vroulike ninjas" wanneer hy van Moslemvroue gepraat het. Hy het Sondagaand verklaar dat hy die nuwe Kanselier sal wees. Alhoewel Strache en Haider geswore vyande is, is albei erg gekant teen EU deelname.
Die Hang Seng-indeks het binne die eerste 10 minute vandat die mark geopen het tot onder die 17 000-vlak gedaal maar het teen 11-uur in Hong Kong teruggespring tot 17 266 punte, 'n verlies van 3,43 persent of 641 punte teenoor Maandag se sluitingsvlak.
Die ineenstorting van aandeelpryse het oral in Asië voorgekom ná 'n skerp daling in Wallstraat in reaksie op die verwerping van die ekonomiese noodplan deur die Amerikaanse huis van verteenwoordigers.
Hong Kong se aandeelpryse daal sedert verlede Oktober tot die indeks 'n hoogtepunt van bykans 32 000 punte behaal het.
Beleggers is swaar getref deur verliese op Suid-Afrika se Aandelebeurs nadat die VSA se beloofde hulppakket gesloer het. Old Mutual was die ergste geraak met 'n verlies van 10% vanmiddag.
Markte het gereageer op die nuus van die regeringsingryping in Brittanje se Bradford & Bingley en België se Fortis wat deur die Belgiese, Nederlandse en Luxemburgse regerings met $16.3 miljard gered is. Duitsland se grootste eiendomsverbandhouer, Hypo, is ook in die moeilikheid.
Aandelemakelaars Barnard Jacobs Mellet het kliënte gewaarsku dat onstabiliteit kan voortduur. Daar word verwag dat die bank-,versekerings- en finansiële aandele nie goed sal vertoon in die huidige krisis nie.
Old Mutual se blootstelling aan Amerikaanse instellings soos AIG, Freddie Mac en Fannie Mae asook Lehman Brothers, het hulle vir skerp kritiek uitgesonder.
Die Amerikaanse owerheid het vanoggend bekend gemaak dat hulle betrokke was by 'n oorname van Wachovia se bankbedrywighede deur Citigroep. Hiervolgens kry die Amerikaanse regering 'n belang in Citi.
Enige verliese bo hierdie vlak sal deur die FDIC geabsorbeer word. Hulle kry ook 'n aandeel in Citigroep in ruil vir hul waarborg van die verliese wat deur Citi oorgeneem word.
Citigroep het $12 biljoen in voorkeuraandelekapitaal en opsies aan die FDIC toegeken, om te vergoed vir die risiko wat die FDIC dra.
Wachovia Corporation, met hul hoofkantoor in Charlotte, North Carolina, is die vierde grootste bank in die VSA, gebaseer op totale bates.
Daar word verwag dat 'n delegasie van die ANC die Vrystaatse permier, Beatrice Marshoff, gaan vra om te bedank. Die provinsie se segsman, Teboho Sikisi, het bevestig dat Marshoff se bedanking bespreek is gedurende 'n vergadering van die Provinsiale Uitvoerende Komitee.
"Die delegasie sal die besluit bespreek teen Maandagaand," het Sikisi bevestig.
Die Vrystaatse ANC het reeds gedurende die provinsiale konferensie besluit dat sy van haar pligte onthef moet word en dat die nuwe provinsiale leierskap sal besluit wanneer en hoe dit sal geskied.
Die Provinsiale Uitvoerende Komitee sal egter nie veel tyd aan die aangeleentheid spandeer nie en sal eerder die nuwe politieke verwikkelinge en die volle impak daarvan bespreek.
Sikisi het ook gesê dat die Komitee die gerugte van 'n nuwe party wat deur ongelukkige ANC lede gestig wil word, sal bespreek.
Die Vrystaatse ANC verwag nie 'n massabedankings as gevolg van Thabo Mbeki se bedanking nie.
15:45:18 Derduisende Zimbabwiërs staan in toue om geld te trek nadat die regering die perk op daaglikse onttrekkings verhoog het.
Die nuwe reëls wat van Maandag af geld, laat toe dat mense soveel as 20 000 Zim-dollar kan onttrek, die ekwivalent van 35 Amerikaanse dollar of 25 euro.
Die vorige perk van 1000 Zim-dollar was skaars genoeg om 'n koerant mee te kan koop.
Die perke, tesame met kostes wat steeds styg, het lang toue by die meeste banke tot gevolg gehad. Maar Maandag se toustanery was buitengewoon erg. Die toue was so lank dat sommige strate in Harare onbegaanbaar was vir motorverkeer.
President Robert Mugabe was veronderstel om laat gistermiddag terug te keer van 'n tiendaagse besoek aan die VSA.
Die magsdelingsooreenkoms wat deur Mugabe en die opposisie, die MDC, geteken is, het intussen gedurende Mugabe se afwesigheid tot stilstand gekom.
15:25:56 Die premier van die Gautengprovinsie, Sam Shilowa, het vandag bedank.
"Ek bedank vanweë my oortuigings dat terwyl die ANC die reg het om enige van sy ontplooide kaders te herroep, die besluit op feite gebaseer te wees en om billik en regverdig te wees.
Ek het ook nie gevoel dat ek in staat sou wees om met oortuiging in die openbaar die NUK se besluit oor Thabo Mbeki te verklaar of te verdedig nie."
Hy het ontken dat hy "gedruk" is om te bedank maar het gesê dit het uit beginsel geskied.
"Dit is 'n bekende feit dat ek sterk sienings het oor die manier waarop sy afdanking gebeur het en anders voor te gee sou oneerlik wees," het Shilowa gesê, met verwysing na die ANC-NUK se besluit om Mbeki vanuit sy amp te verwyder.
"Ek erken en respekteer die ANC se reg om enige van sy ontplooide kaders te herroep. Ek is egter van mening daar geen samehangende rede daarvoor bestaan nie."
Shilowa het gerugte ontken dat hy 'n party wil begin of deel van 'n nuwe politieke party sou wees. Volgens sy woordvoerder, Simon Zwane, is en bly hy 'n lid van die ANC, en het hy dit al meer as een keer bevestig.
Dié stelling volg nadat die ANC-provinsialeleierskap hom klaarblyklik oor die vingers getik hetn adat hy regter Chris Nicholson se uitspraak en die stappe om Mbeki as president uit te skuif gekritiseer het.
Die koerant The Star het Maandag berig dat Shilowa deur die ANC gemuilband is, waarna segsman Zwane gesê het dat hy dit wel gelees het, maar nie weet waarvan hulle praat nie.
Die nuut verkose adjunk-president, Baleka Mbete het gesê dat ontevrede ANC lede wat 'n nuwe beweging wil begin hulle tyd mors.
Shilowa het verlede week in 'n onderhoud met die Mail and Guardian gesê dat Nicholson se uitspraak nie gebaseer was op die wet nie. Hy het verder genoem dat Nicholson goed gesê het wat op geen feite gebaseer was nie. Shilowa is van mening dat Nicholson geen bewyse gehad het of getoets het nie.
Shilowa het ook gesê dat hy hoop dat die ANC-leierskap die feite en opinies sal kan skei as hulle die saak verder bespreek. Hy dink persoonlik nie dat die uitspraak enige grondige redes gegee het waarom Mbeki moes loop nie.
Intussen het die Demokratiese Alliansie Maandag gesê dat die onderlinge twis die regering van Gauteng nadelig beïnvloed. Die Gautengse DA-leier, Jack Bloom, sê hy het 'n brief geskryf aan Shilowa om tussenbeide te tree in die bitter twis tussen die LUR van Openbare Werke, Ignatius Jacobs en Sibusiso Buthelezi, ook van die departement.
Die uitval tussen die twee mans het sy grondslag in die toekenning van 'n kontrak van R692 miljoen wat Buthelezi aan Ilima Projects toegeken het om die Jabulani-hospitaal in Soweto te voltooi. Die kontrak is later gekanselleer nadat daar gevind is dat Ilima Projects 'n vals belasting-klaringsertifikaat ingedien het, het Bloom gesê.
Dit is die tweede keer dat hy vir Shilowa geskryf het oor die aangeleentheid, het Bloom bygevoeg. Hy is bekommerd dat Shilowa nie in staat is om op belangrike sake soos dié te reageer nie, aangesien sy posisie as premier in gevaar is vanweë interne ANC-vyande. Die regering van Gauteng lei skade as gevolg van die ANC se interne struwelinge, het Bloom bygevoeg.
Omar Bakri Mohammed se ekstremistiese preke het vroeër veroorsaak dat hy uit Brittanje teruggestuur is na Libanon. Hy staan alom bekendstaan as die "Haatimam" omdat hy Moslemvroue onder andere wil verplig om hulleself heeltemal te bedek. Maar die vuurspuwende Imam het nietemin vir sy dogter se borsvergrotingsoperasie betaal.
Dit het die geestelike nie verhoed om 5 000 euro uit sy sak te haal om haar loopbaan aan te help nie. Die 27-jarige Joessra, wat onder die verhoognaam Jasmin optree, het aan die Britse Sun-koerant vertel dat sy haar vader oorreed het om te betaal deur aan hom te sê sy sal meer soos "'n moeder" voel met groter onderklere.
Heinz-Christian Strache, 39, leier van die Oostenrykse Vryheidsparty, meen hulle is die eienaars van Oostenryk en hulle sal besluit wie toegelaat word tot die land en wie nie. Wat sy teenstanders skok, is egter dat sy volgelinge openlik Nazi-simbole by sy vergaderings vertoon. Die dra van Nazi-kentekens en die Nazi-saluut is onwettig in Oostenryk.
Die anti-immgrasie tema is só gewild in Oostenryk dat ander partye noodgedwonge moes aanpas om nie hulle kiesers te verloor nie. Selfs die foto's wat deur opponente van Strache aangegryp is om hom swart te smeer omdat hy die Nazi-saluut gee, het hom net meer gewild by kiesers gemaak. Die regse politikus het die foto's afgelag en en gesê hy het bloot sy hand gelig om biere in 'n kroeg te bestel.
Oostenryk het in 1999 sanksies van die EU in die gesig gestaar nadat die Vryheidsparty in 'n koalisieregering gedien het.
