City Press het Sondag berig dat regterpresident John Hlope na bewering twee regters van die Grondwethof gevra het om ten gunste van die ANC-president Jacob Zuma te bevind indien hulle 'n toekoms op die regbank wil hê.
Volgens die koerant het Hlopa aan die twee regters genoem dat hy die volgende hoofregter gaan wees.
Bess Nkabinde en Christopher Jafta is individueel in hul kantore genader.
Verskeie grondwethofregters het toe gedink, nadat die twee hulle op hul beurt genader het, dat Hlope se optrede 'n ernstige oortreding was wat na die Geregtelike dienskommissie verwys behoort te word.
Bill Henriksen by die McMurdo-navorsingstasie sê dat byna 16 500 kondome verlede maand voor die koms van die donker afgelewer is.
Dit sal gratis aan personeellede beskikbaar gemaak word ten einde die moontlike verleentheid te vermy dat hulle dit moet koop.
Gedurende die wintermaande beskik die basis oor slegs 'n kernpersoneel van 125.
Die eerste sonsopkoms sal weer op 20 Augustus plaasvind en die personeel sal in September tot 1 000 toeneem vir die somermaande.
Die universiteit van die Vrystaat gaan R4 miljoen aan 'n privaatmaatskappy betaal om dit te help om koshuise te integreer.
Die iGubu-leierskapsagentskap het 'n driejaarkontrak verkry om aanbevelings aan die universiteitsraad te maak.
Rudi Buys van iGubu het gesê dat sy organisasie samesprekings met studente gaan voer om uit te vind wat die konflik veroorsaak het.
Buys het gesê dat hulle gevind het dat studente wat gedurende vakansies huis toe gaan blootgestel word aan die ou taal van apartheid en rassisme.
Verlede week het die universiteit aangekondig dat Reitz op 20 Junie vanjaar gesluit sal word om die Diversiteitsinstituut te word.
Die prys van ru-olie het vanmore in die Verre Ooste effens laer gesak na die grootste styging ooit. Vrydagaand in New York het dit met 'n ongehoorde elf dollar per vat gestyg en die rekordprys van $139,12 behaal.
'n Swak dollar en kommentaar deur 'n Israeli minister oor 'n moontlike aanval op Iran, die wêreld se vierde grootste olieprodusent, het die koopkoors laat posvat.
Volgens die Amerikaanse beleggingsbank Morgan Stanley, kan ru-olie binne die volgende maand tot $150 per vat styg. Sedert die begin van die jaar die prys reeds met veertig persent toegeneem.
Die eiendomsmagnaat Sol Kerzner het so pas 'n dakwoonstel in Kaapstad aan 'n Londense sakeman vir R110 miljoen verkoop.
Volgens mnr. Ian Slot van die eiendomsmaatskappy Seeff, is dit beslis die hoogste prys wat nog ooit vir 'n Suid-Afrikaanse eiendom betaal is en beslis die hoogste vir 'n woonstel.
Die vorige rekord vir 'n dakwoonstel by die Waterfront in Kaapstad was R30 miljoen en die vorige rekord vir 'n huis was R106 miljoen vir die Goede Hoop historiese landgoed in Noordhoek, ook in die Kaap.
Die identiteit van die koper sal egter geheim bly.
Die verdedigingsekretaris van die VSA, Robert Gates, het ‘n aantal topoffisiere in die Amerikaanse lugmag afgedank nadat kernmissielontstekers per ongeluk na Taiwan verskeep is.
Gates het verklaar dat hy die bedankings van die Lugmagstafhoof generaal Michael Moseley en Lugmagsekretaris Michael Wynne aanvaar het.
Twee verleenthede oor die afgelope jaar het tot die afdankings aanleiding gegee. In die eerste geval is ‘n B-52-bomwerper per abuis met ses kernkopkruisermissiele bewapen en oor die VSA vervoer.
In die ander geval is vier elektriese onstekers vir ballistiese missielkoppe per ongeluk na Taiwan gestuur in plaas van helikopterbatterye.
Gates het gesê dat ‘n interne ondersoek ‘n afname in die Lugmag se kernmissiefokus en –prestasie bevind het.
Volgens Gates is sy besluit om Wynne en Moseley te verwyder gegrond op die bevindings van ‘n ondersoek na die Taiwan-debakel deur admiraal Kirkland Donald.
Die Donald-verslag verteenwoordig geklassifiseerde inligting maar Gates het ‘n verbale opsomming verskaf.
Volgens die Duitse nuustrydskrif Der Spiegel veroorsaak ontwikkelingshulp dat Afrika sterf. As 'n mens kyk na die logika wat deur die
Wêreldvoedsel- en landbouorganisasie van die Verenigde Nasies (VN) gevolg word, is Kenia met sy 32 miljoen inwoners een groot hongersnoodgebied. In hierdie land word naamlik elke jaar meer voedselhulp uitgedeel as in suid-Soedan, waar 'n burgeroorlog woed
Die vraag kan egter gevra word of Kenia werklik so swaar kry. Indien dit wel die geval is, bly daar nie veel hoop oor vir Afrika om in sy eie voedselbehoeftes te voorsien nie. Kenia het naamlik die Viktoriameer, wat op sy beurt Oeganda en Tanzanië aan hulle Keniaanse bure verbind en wat die grootste meer op die vasteland is. Soos in Malawi kan mens wonder hoe dit dan moontlik is dat mense wat langs so 'n groot meer woon aan hongersnood kan ly?
Wat in die weste van Kenia in oorvloed geproduseer word, behoort in die noorde van die land verkoop word te word. Dit sal boere aanmoedig om meer te produseer. As hulle meer verdien, sal belastings styg. Die staat sal dan in staat wees om hierdie ekstra inkomste op die land se gebrekkige infrastruktuur te spandeer. Dit is in elk geval die ideaal.
Die werklikheid sien anders daar uit. Amos Kimunya, die Keniaanse minister van finansies, het onlangs aangekondig dat hy niks meer op infrastruktuur kan spandeer nie, anders sal hy nie die kabinet se salarisse kan bekostig nie. Die Keniaanse kabinet bestaan tans uit 95 lede, wat sowel ministers as adjunkte insluit. Elkeen verdien meer as VS$20 000 per maand.
Die toestand van die strate in die land is verskriklik. Die voedselhulp wat die Weste stuur, neem weke om hulle bestemmings te bereik. Intussen skryf die noodlenigingswerkers dramatiese verslae oor die haglike toestande en vra die Weste om selfs meer geld te skenk. Westerse burgers se beeld van Afrika word deur hierdie verslae en persberigte, wat daarop gebaseer is, gevorm. Sonder hulp van buite gaan die hele Afrika verhonger, is mense buite die vasteland geneig om te dink. Wanneer die hulp egter wel op die vasteland opdaag, ly die klein handelaars die meeste daaronder, want die pryse van broodnodige lewensmiddele daal. Ook die landbouers se produkte is skielik nie veel meer werd nie. Die maklikste is maar om te sorg dat jy ook van die buitelandse voedsel ontvang en dus is daar geen aansporing om te werk nie.
Westerse noodlenigingswerkers is geneig om die droë gebiede in Kenia op te soek. Normaalweg is daar min mense in woestynagtige streke woonagtig, maar dis juis hier, in die noordelike deel van Kenia, waar die werkers putte vir drinkwater grawe. Gou versamel hordes mense om hierdie waterbronne en hulle bring hulle veetroppe saam. Die vee (veral die bokke) vreet binne 'n ommesientjie die yl grassies op. Waar daar vroeër min mense verbygekom het, ontstaan stowwerige dorpies oornag. Meer en meer noodlenigingswerkers word dan benodig om die nuwe intrekkers van kos te voorsien. Die gebied word vinnig oorbevolk en niemand kan meer sonder voedselhulp klaarkom nie.
Oscar Wilde het eenmaal opgemerk dat filantropie die toevlug van ryk mense is wat daarop uit is om hul medemens vies te maak. Wanneer 'n mens na die situasie in Kenia kyk, kan jy nie help om saam te stem nie.
Die Afrikane het natuurlik skuld aan bogenoemde probleem, aangesien hulle dit nie regkry om hulp te weier nie. Dit is wensdenkery om te hoop dat 'n land soos die petrolryke Soedan sy BBP ooit gaan opstoot na dieselfde syfer as byvoorbeeld Mexico (50 maal hoër). Geen Afrikastaatshoof wat sy sout werd is, gaan dit sommer regkry om nee te sê vir buitelandse donasies wat hom in staat gaan stel om reusesokkerstadions op te rig, deftige motors aan te koop en na die buiteland te reis om VN-konferensies saam met ander staatshoofde by te woon nie. Gewoonlik word sulke konferensies gereël om die hongersnoodprobleem in Afrika aan te spreek.
Bitter min grond op die vasteland behoort aan individue, maar is eerder stamme of die staat s’n, wat nog minder aansporing bied vir Afrikane om te boer, voedsel te produseer en welvarend te word. In Namibië (waar Duitse belastinggeld gebruik word om grondhervorming te finansier) en ook in Suid-Afrika bestaan daar wel 'n kommersiële boerderysektor, maar vir hoe lank nog?
Dit is 'n mite dat Afrika tot hongersnood verdoem is. Die grootste deel van die vasteland is yl bevolk en die meeste lande beskik oor 'n klimaat wat bevorderlik is vir landbou. In die digbevolkte Europa werk 'n skamele 3% van die bevolking in die landbousektor en tog produseer hierdie boere groot oorskotte.
Hongersnood in Afrika is die skuld van gewetenlose heersers, wat hulle burgers uitbuit of sinlose oorloë voer. Die Weste behoort meer druk op en geloof in Afrika se vermoë om self reg te kom te plaas, en nie maar net die dosis medisyne elke keer te verhoog nie.
Keniane het gister fees gevier toe Barack Obama die Demokratiese benoemingsverkiesings gewen het. Sommige wil meer hulp aan Afrika hê en Obama word gesien as 'n seun van Kenia. Die genomineerde Amerikaner se Keniaanse familielede beskryf hom as die groot hoop vir Kenia en die Verenigde State.
Obama se stiefouma, Sarah Hussein Obama, sê dit sal goed wees as hy president van die Verenigde State word. Barack, sê sy, sal kan help om skole en hospitale in Kenia te bou, asook om weeskinders te help.
Barack Obama moet via 'n tolk met sy ouma praat aangesien sy nie Engels magtig is nie.
Suid-Afrikaners sal alles moontlik moet doen om sowel minder krag as petrol te verbruik, het 'n Sasol-beampte gister gesê.
Tydens 'n gesprek by die Wêreldekonomiese forum oor Afrika in Kaapstad, het Sasol se direkteur vir energie, Benny Mokaba, gesê dat die huidige vraag na elektrisiteit ook die vloeibarebrandstofmark kan beïnvloed.
Vloeibarebrandstofproduksie hang af van die stabiliteit van elektrisiteitsvoorsiening en die land maak toenemend van diesel gebruik om elektrisiteit op te wek. Dieselverbruik het verlede jaar met 12% gestyg. Vanjaar het dit met 6% toegeneem.
Die gebruik van kragopwekkers by sakeondernemings en huishoudings is ook besig om die vraag na diesel te verhoog. Suid-Afrika is nou 'n netto invoerder vir die eerste keer in 2007-08.
Omkoopgeld wat deur die polisie en weermag by padblokkades gevra word op die meeste van die Ivoorkus se paaie is besig om voedselpryse te laat styg.
Vervoerkontrakteurs word soms deur korrupte amptenare by soveel as 15 padblokkades gedwing om te betaal vir voeselvoorraad wat die plaas verlaat voordat dit die winkelrakke bereik.
Ten einde 'n opbrengs op hul produkte te verseker, moet boere die maksimum pryse vir hul produkte vra. Sekere markverkopers het hul pryse met 25 tot 60 persent verhoog.
'n Weermagbevelvoerder het gesê die owerheid lê 'n boete op as die voertuigdokumente nie 100 persent in orde is nie.
Daarom sal enige voertuig wat nie die regte registrasiedokumente het nie uiteindelik korrupsie voed.
Onluste het gedurende Maartmaand in die Ivoorkus uitgebreek toe duisende mense die strate ingevaar het om teen hoë voedselpryse beswaar te maak.
