Gefladder in Beeld-hoenderhok na transformasie-toespraak

Hoofregter Mogoeng Mogoeng se toespraak by die jaarvergadering van die organisasie Advocates for Transformation (AFT) in Kaapstad, het gesorg vir ‘n gefladder in die Beeld-hoenderhok.

Dit blyk dat die koerant skielik vir die eerste keer ontdek het dat die ANC anti-wit transformasie as beleidsrigting aanvaar het, nadat die hoofregter ‘n beroep op AFT en organisasies soos die Black Lawyers Association (BLA) en die National Democratic Lawyers (Nadel) gedoen het om die transformasie-agente te wees.

Mogoeng het ‘n beroep op “ware progressiewe organisasies” gedoen om teen “organisasies en individue wat wit oorheersing van die regbank wil behou deur volgehoue aanvalle op die RDK” te veg.

“Ek is hier om julle en ander ware progressiewe organisasies uit te daag om alle pogings te beveg wat gemik is op wit manlike oorheersing van die regbank.

“Ontwikkelings dui daarop dat oorlog al verklaar is teen transformasie. Mense gryp na strooihalms om die RDK te diskrediteer. Hulle wil ‘n RDK hê waaraan hulle kan voorskryf.

“Julle mag nie toelaat dat dié stem die enigste stem in die openbare domein is nie.”

Hy het die AFT gemaan dat die RDK nie moet slaag in hul anti-transformasiepogings nie.

“Lede van die georganiseerde regsberoepe “moet die geveg lei vir transformasie van die regsberoepe en die regbank”, het Mogoeng gesê.

Beeld het Prof. Marinus Wiechers, regsgeleerde van Pretoria, genader vir kommentaar. Wiechers sê Mogoeng se toespraak grens aan “haatspraak”. Wierchers het egter geen kommentaar gelewer op Beeld en Naspers se eie volgehoue, rasgedrewe transformasiebeleid nie.

“Dit lyk na ‘n oproep om oorlog te verklaar. Snaaks genoeg sê hy niks oor gehalte wat belangriker is as transformasie nie. Hy sê ook niks oor die beswaarmakers teen die RDK se aanstellings se verklaarde beleide dat hulle teen die feit is dat gehalte die knie moet buig voor transformasie, tot nadeel van die regspraak en die mense van die land,” het Wiechers gesê.

Prof. Tom Coetzee, regskenner van Potchefstroom, is ook deur Beeld genader. Coetzee het sy groot onkunde bewys deur aan die die koerant te sê hy kan “amper nie glo dat ‘n hoofregter so ‘n uiters militante toespraak lewer nie”, terwyl die ANC al herhaaldelik aangedui het dat hulle anti-wit transformasie nastreef en dit luid van alle openbare platforms verkondig.

Kurt Darren: Breinskandering, ribbes af, bloeding op die longe

Die sanger Kurt Darren se broer, Darren van Heerden, het aan Huisgenoot gesê die sanger verduur baie pyn nadat hy in ‘n motorongeluk betrokke was. Die ongeluk het enkele kilometer van sy huis in Pretoria gebeur.

“Dit gaan goed met Kurt, maar hy het verskriklik pyn. Hy het vandag selfs meer pyn as gister,” het Darren gesê.

Kurt en twee vriende, Marnus Bisschoff en Nadia van Rensburg, was Sondagoggend in ‘n motorongeluk toe hulle met ‘n Toyota Fortuner in ‘n rivierbedding beland het. Kurt is per helikopter na die Milpark-hospitaal in Johannesburg geneem nadat daar aanvanklik vermoed is dat hy sy rug gebreek het.

Die gewilde sanger het agt ribbes gebreek en bloeding op sy longe opgedoen.

‘n Breinskandering sal op die sanger uitgevoer word nadat hy gekla het dat sy oë sukkel om te fokus.

Daar is aanduidings dat Darren waarskynlik ook ‘n hou teen die kop gekry, al is daar geen merk te sien nie.

“Kurt se oë trek skeef en ‘n neurochirurg het gevra dat breinskanderings gedoen word om die aard en tydsduur van die skade vas te stel.

Sy agent, Louis van Wyk het aangedui dat Darren se optredes vir ten minste ses weke afgestel sal moet word.

“Kurt het bloeding op sy longe. Hy gaan minstens ses weke buite aksie wees. Ons wag vir die mediese span om ons te adviseer oor hoe lank hy buite aksie sal wees.”

Mandela by sy volle bewussyn, verjaarsdagboodskappe stroom in

Mense wat oudpres. Nelson Mandela in die Harthospitaal besoek het, sê hy is aan ‘n asemhalingstoestel gekoppel met ‘n pyp in sy keel, berig Eyewitness News.

Volgens van sy besoekers is Mandela by sy volle bewussyn en reageer wanneer daar met hom gepraat word.

Makaziwe Mandela het by die hospitaal in Pretoria opgedaag, waar haar pa steeds in ‘n kritieke toestand is.

Sy het Maandag alleen by die hospitaal opgedaag en geen ander familie is gedurende dag die by die hospitaal gesien nie.

Bantu Holomisa, UDM-leier, het ‘n rukkie later by die hospitaal opgedaag.

Die Nelson Mandela-­sentrum van Herinnering het vroeër briewe en boodskappe van beterskap wat die afgelope paar weke buite ‘n muur by die hospitaal neergesit is, gaan haal.

“Ons neem die briewe en boodskappe van ondersteuning na die [Mandela]-familie en indien daar kontakbesonderhede is, sal die familie reageer,” het David Sithole, ‘n beampte van die sentrum, gesê.

Hy het gesê die familie is dankbaar vir diegene wat boodskappe vir Mandela gestuur het.

Die 94-jarige voormalige staatshoof, wat Maandag sy 31ste dag in die hospitaal deurgebring het, word vir ‘n herhalende longinfeksie behandel.

Intussen het die voormalige Amerikaanse president, Bil Clinton, die Dalai Lama, Aartsbiskop Desmond Tutu en die sakeman, Richard Branson ‘n spesiale boodskap aan Mandela gestuur vir sy verjaarsdag op 18 Julie.

Die leiers loof Madiba in die videoboodskap vir sy lewenslange toewyding aan ander.

Die leiers sê in die boodskap hulle is almal geraak deur Mandela se diensbaarheid.

Daar was volgens hulle nog nooit in die geskiedenis iemand wat so universeel erken word vir versoening as Nelson Mandela nie.

Verkiesingsdatum in Egipte aangekondig

Die tussentydse president van Egipte, Adly Mansour, het aangekondig dat parlementêre verkiesings vroeg aanstaande jaar gehou sal word.

Mansour het ‘n dekreet uitgevaardig waarvolgens ‘n paneel, wat die grondwet moet wysig, binne 15 dae gevorm moet word.

Die grondwetwysigings moet oor ‘n tydperk van vyf maande plaasvind. Die verkiesing word vir Februarie beplan, hoewel ‘n presiese datum nie bekendgemaak is nie. Voor die verkiesing kan plaasvind moet die Islamitiese grondwet van die uitgesette president Mohamed Morsi gewysig en in ‘n referendum bekragtig word.

Die aankondiging volg nadat 51 mense, waarvan die meeste ondersteuners van Morsi is, gister buite hul barakke doodgeskiet is.

Morsi is vermoedelik in die barakke in aanhouding.

Aardbewing by Badplaas rig nie veel skade aan nie

Die aardbewing van vier komma sewe op die Richterskaal wat gisteraand naby Badplaas in Mpumalanga voorgekom het, het angstigheid veroorsaak, maar geen beduidende skade aangerig nie.

Die dagblad Beeld berig die aardbewing is tot so ver as Komatipoort en dele van Swaziland gevoel.

Volgens die eienaar van die bekende Sudwala-grotte, Phillip Owen is die grotte nie beskadig nie.

Die episentrum van die aardbewing was reg langs die Vygeboomdam by Badplaas.

Volgens die Europees-Meditereense Seismologiese Sentrum in Frankryk het die aardbewing sowat vyf kilometer onder die aardoppervlak voorgekom.

Mandela is nie bewusteloos nie, medici weier om masjiene af te skakel

Oudpres. Nelson Mandela se medici het die gedagte om die lewensondersteuningsmasjiene af te skakel, verwerp. Hulle sou dit net oorweeg in die geval van massiewe orgaanversaking.

Denis Goldberg, ‘n anti-apartheidsaktivis wat Mandela al langer as 50 jaar ken, het gesê die kwessie om die lewensondersteuningsmasjiene af te skakel is bespreek, maar uiteindelik verwerp.

“Die dokters het aangedui dat hulle eers dié opsie sal oorweeg indien sy organe begin ingee,” het Goldberg Vrydag aan AFP gesê. “Aangesien dit nog nie gebeur het nie, gaan hulle hom stabiel hou totdat hy herstel.”

Die 80-jarige Goldberg is in 1964 saam met Mandela gevonnis vir hul stryd teen apartheid. Hy het Mandela Maandag in die hospitaal besoek.

‘n Hofdokument wat nege dae gelede namens Mandela se familie ingedien is, het aangedui dat die 94-jarige voormalige staatshoof “in sy asemhaling bygestaan word deur lewensondersteuningsmasjiene”.

“Mediese praktisyns het die Mandela-familie aangeraai om die lewensondersteuningsmasjiene af te skakel,” het die hofdokument gelui. “Die familie oorweeg hierdie opsie baie sterk om seker te maak dat sy lyding nie uitgerek word nie.”

Die dokument, wat opgestel is om ‘n hof te noodsaak om ‘n dringende uitspraak in ‘n familietwis oor die oorskot van Mandela se kinders te lewer, het ook aangedui dat Mandela “in ‘n permanente vegetatiewe toestand” is.

Die presidensie het intussen aangedui dat dit nie die geval is nie, maar weier om verdere besonderhede oor sy toestand te verskaf, omdat dit Mandela se privaatheid sal skaad.

President Jacob Zuma en familielede van Mandela het intussen aangedui dat sy toestand verbeter het.

“Hy is duidelik baie siek, maar hy is by sy volle positiewe en hy het probeer om sy mond en oë te beweeg toe ek met hom gepraat het,” het Goldberg vroeër verduidelik. “Hy is definitief nie bewusteloos nie, hy het geweet wie ek is.”

Mandela is op 8 Junie in die hospitaal opgeneem met ‘n herhalende longinfeksie.

Makaziwe Mandela lieg glo in hof

Die Sunday Times berig dat David Smith – ‘n advokaat wat die oudpresident se Amerikaanse dogter, Makaziwe, en 15 ander verdedig – valslik aan waarnemende regter Lusindiso Pakade gesê dat die familie aangeraai is om die siek staatsman se lewensondersteuningsmasjiene af te skakel, aangesien hy in ‘n “permanente vegetatiewe toestand” was.

Die koerant het sedertdien vasgestel dat daar nooit so ‘n mediese beëdigde verklaring opgestel is nie.

Die gejaagde hofbeslissing om drie van oudpres. Nelson Mandela se kinders op Qunu in die Oos-Kaap te herbegrawe, is glo op ‘n leuen gebaseer.

Waarnemende regter Pakade het geweier om sy beslissing met die Sunday Times te bespreek. Smith het nie die koerant se oproepe en boodskappe geantwoord nie. Makaziwe het aan die koerant gesê om haar nie weer te bel nie.

Die bewering dat die oudpresident se dokters in ‘n beëdigde verklaring sou getuig dat hy in ‘n permanente vegetatiewe toestand was, het die waarnemende regter genoop om Makaziwe se eis teen haar neef Mandla te bespoedig.

Prokureur Wesley Hayes, aangehaal deur Smith as die bron van die verslag oor Mandela se “haglike toestand”, het geweier om te sê wie die verslag dat die dokters die gesin aangeraai het om Mandela te laat sterf, verskaf het.

Dit blyk uit verskeie bronne, insluitend Mandla Mandela, sowel as mediese personeel verbonde aan die span wat die voormalige president in die MediClinic Hart-hospitaal in Pretoria behandel.

Die valse bewering dat Mandela se dokters sal getuig in ‘n beëdigde verklaring dat hy in ‘n permanente vegetatiewe toestand is, het Pakade genoop om Makaziwe se eis teen haar neef, Mandla, vir beheer oor die liggame van haar drie broers en susters te versnel.

Die Amerikaanse Makaziwe het reeds ingestem dat die Amerikaanse uitsaaier CNN die begrafnis eksklusief dek, glo in ruil vir ‘n groot som geld.

Die voorsitter van die Oos-Kaapse Balieraad, Gerald Bloem, het gesê Smith se gedrag sal ondersoek word as ‘n formele klag gelê word.

Hy het gesê dit is “ontstellend” en “vreemd” dat dringendheid ‘n kwessie was, op die basis van ‘n mediese verslag wat nie verstrek is nie.

Mandla Mandela se prokureurs sal blykbaar ‘n klag by die raad indien.

Die Sunday Times het probeer om oor ‘n paar dae kommentaar te kry van Makaziwe. Al wat sy wil sê is: “Ek wil nie kommentaar aan die Sunday Times gee nie en ek het gesê julle ouens moet ophou om my te bel.”

‘n Militêre bron, wat toesig oor Mandela se sorg hou, het gesê dit is “hoogs onwaarskynlik” dat die betrokke medici die beëdigde verklaring sou verskaf.

Hoewel haar naam op die aansoek vir dringendheid verskyn het, het Winnie Madikizela-Mandela glo nie die dringendheidsaansoek ondersteun nie.

“As dit is bewys word dat Madiba se gesondheidstoestand misbruik is om die regstelsel te mislei, dan is dit ‘n hartseer dag vir ons almal,” het Mandla gesê.

Mandla se prokureur, Hymie Zilwa, bevraagteken hoe die regter ‘n finale bevel kon uitgereik het sonder hulle teenwoordigheid.

“Daar was ook geen bevestigende beëdigde verklarings van die res van die aansoekers nie, wat basies sê dat Makaziwe gemagtig was om die res van die aansoekers te verteenwoordig,” sê Mandla se regsverteenwoordiger.

Mandela-familie gee eksklusiewe begrafnisregte aan CNN

Die Mandela-familie twis nou nog verder, dié keer oor die uitsaairegte vir Nelson se begrafnis wat aan CNN verkoop is. Die SAUK is droëbek en gebelg daaroor.

Mandla Mandela beskuldig die res van die familie daarvan dat hulle ook gelieg het oor Nelson Mandela se gesondheid terwyl hulle besig was om met die Amerikaanse uitsaaier CNN te onderhandel.

Volgens ‘n berig in vandag se Sunday Independent is ‘n “sensitiewe vergadering” aan die einde van verlede maand met die SAUK gehou. Tydens daardie vergadering het die Mandelas geëis dat CCN “voorkeurbehandeling” moet kry tydens ‘n eventuale begrafnis vir Nelson Mandela.

Die SAUK het gevoel dié eise was “onvanpas”. ‘n Amptenaar van die SAUK het gesê:

“Ons voel in die gesig gevat. Maar dit lyk asof daar min is wat ons hieraan kan doen aangesien die familie blykbaar hul eie planne het.”

‘n Tweede amptenaar van die SAUK het hom soos volg uitgelaat: “Dit was geen versoek nie. Hulle het dit geëis. Die CNN-ooreenkoms is klaar aangegaan.”

Dis egter nie duidelik wie van die Mandela-familie voordeel uit die CNN-ooreenkoms gaan trek en of enige betalings gemaak is nie.

Van hulle kant af wou CNN ook geen besonderhede bekendmaak nie en hul Johannesburgse verteenwoordiger, Kim Noorgaard, beweer dat sy nie op hoogte is nie. Bestuurders van CNN in Atlanta,VSA, kon nie deur die Sunday-Independent-verslaggewer bereik word nie.

Makaziwe Mandela was ontsteld om te verneem dat die nuus uitgelek het. Sy wou nie verder praat as die naam van die SAUK-amptenaar nie bekendgemaak word nie.

“Sê my dadelik wie dit was,” het sy geëis. “Dit was ‘n vetroulike vergadering en daar behoort nie daaroor gepraat te word nie.”

Indien Mandela te sterwe sou kom, sou die SAUK in elk geval die enigste uitsaaier wees wat ‘n intydse uitsaaidiens gaan aanbied. Daardie toevoer sal dan kosteloos aan die res van die wêreld beskikbaar gestel word, waaronder CNN.

Te veel kiesers en te min mense in Zim

“Die Zimbabwiese kiesersrol wat verlede maand uitgereik is, laat ernstige vrae ontstaan oor die moontlikheid of dié land se algemene verkiesing einde vandeesmaand enigsins vry en regverdig kan wees,” sê dr. Corné Mulder, die Vryheidsfront Plus se woordvoerder oor internasionale betrekkinge.

Volgens die kiesersrol is die aantal geregistreerde kiesers in Zimbabwe veel meer as die bevolking in 78 van sy 210 kiesafdelings, asook in alle bevolkingsgroepe van dertig jaar en ouer gemeet aan die laaste nasionale sensus wat in 2012 in dié land gedoen is.

Dit selfs nadat 300 000 afgestorwe persone van die kiesersrol verwyder is.

Volgens dr. Mulder het ‘n onafhanklike navorsingsverslag van die Research and Advocacy Unit (RAU) wat in die media gepubliseer is, hierdie skoksyfers aan die lig gebring. Die RAU is ‘n nie-regeringsorganisasie wat in Zimbabwe gesetel is.

Daarvolgens het Zimbabwe, met sy totale bevolking van 12,754 miljoen (2012-sensus) meer as 116 000 kiesers van honderd jaar en ouer op die kiesersrol in vergelyking met Suid-Afrika (met meer as 50 miljoen inwoners) se getal van 255 000 inwoners bo die ouderdom van 85.

Die grootste onreëlmatighede kom voor in die ouderdomsgroepe 80+ waar daar 219% meer mense op die kiesersrol is as wat sensus-statistiek aandui, en in die 40 – 44-groep waar daar 162% meer mense op die kiesersrol is.

Waarnemers meen dat die kiesersrol met tot soveel as 1,2 miljoen name gelaai is. Volgens dr. Mulder maak dit die deur oop vir grootskeepse bedrog en stemknoeiery wat bedenkinge laat ontstaan of die verkiesing vry en regverdig kan wees.

“Die VF Plus wil hom om hierdie redes opnuut uitspreek teen die lening van meer as R900 miljoen van die Suid-Afrikaanse regering aan Zimbabwe vir die verkiesing.

“Daar is steeds geen voorwaardes aan die lening gekoppel nie en ons eis dat die regering sê wat die motivering, terugbetalingsvoorwaardes en waarborge is wat aan die lening gekoppel is,” sê dr. Mulder.

Mulder het egter nie aangedui hoeveel Zimbawiërs hulself tans in Suid-Afrika bevind en of dit ingereken is in die opname nie.

Minister onbewus dat Aarto gekraak is

Die minister van vervoer, mnr. Ben Martins, het ‘n skok-erkenning aan die Vryheidsfront Plus gedoen dat hy tot nou toe nie bewus was daarvan dat die webwerf van Aarto (die Wet op die Administratiewe Beregting van Verkeersoortredings), reeds in Aprilmaand vanjaar gekraak is nie.

Die erkenning het gevolg op geskrewe vrae van adv. Anton Alberts, die VF Plus se parlementêre woordvoerder oor vervoer, oor die aangeleentheid waaroor wyd in die media berig is.

Die minister het ook die vraag ontduik oor presies hoeveel die oprigting van die webwerf gekos het, deur slegs te antwoord dat die totale koste van die Aarto-projek, wat die ontwikkeling van die webwerf insluit, R1,949,229-00 beloop het.

Hy het wel bevestig dat die inhoud-bestuursplatform Joomla! wat gratis van die internet afgelaai kan word, gebruik is om die webwerf te skep. Joomla! is soortgelyk aan WordPress.

Volgens adv. Alberts is dit onaanvaarbaar dat die minister nie van die ernstige voorval bewus kon gewees het nie, veral aangesien dit ‘n hoë-profiel webwerf is en die media wyd daaroor berig het.

“Dit is duidelik dat voldoende veiligheidsmaatreëls nie in plek was om die webwerf te beveilig nie. Enige stelsel is net so veilig as die praktyke wat gevolg word om dit te beskerm, en in hierdie geval was dit duidelik nie voldoende nie,” sê adv. Alberts.

Op die vraag of die oprigting van die webwerf deur die tenderproses gedoen is, wanneer dit gedoen is, wie die suksesvolle bieër was asook die waarde van die tender, is geantwoord dat dit wel per tender gedoen is.

Die tender is in April en Mei 2007 uitgereik vir die inwerkingstelling van Aarto, wat die ontwikkeling van die webwerf ingesluit het. Die tender is toegeken aan die maatskappy Magna FS.

Die antwoord lui voorts dat Joomla! gebruik is as ‘n ‘tydelike maatreël’ aangesien die Padverkeersbestuursorganisasie (RTMC) nie in daardie stadium die rekenaar-infrastruktuur gehad het om die Aarto-webwerf te huisves nie.

Die maatskappy HETZNER in Kaapstad is as bediener gebruik aangesien dit belangrik was om ‘n oop platform te gebruik wat enige IT-infrastruktuur kon akkommodeer.

Op die vraag oor of die minister ingelig is oor die voorval en of veiligheidsmaatreëls getref gaan word om te verseker dat dit nie weer gebeur nie en wat dit behels, is geantwoord dat die plan was om veranderings en verbeterings aan die webwerf aan te bring sodra die RTMC sy eie infrastruktuur hiervoor ontwikkel het.

Die veranderings sou gedoen word om versoenbaar te wees met die platforms van die RTMC se IT-stelsels, sy infrastruktuur en programme.