‘n Katolieke biskop wat ‘n toesighoudende rol in seksuele aanrandingsake van sy biskopdom gehad het, word daarvan beskuldig dat hy kinderpornografie besit.
Biskop Raymond Lahey is in hegtenis geneem ná sy rekenaar toevallig op ‘n lughawe in Ottawa deurgegaan is.
Voor sy inhegtenisneming, het die biskop van sy amp bedank, skynbaar oor persoonlike redes.
Lahey het onlangs toesig gehou oor ‘n skikkingsaak van omtrent R98 miljoen van mense wat sedert die 1950’s, deur priesters gemolesteer is.
Plunderaars het vir alle praktiese doeleindes vrye teuels in die verwoesde strate van Amerikaans-Samoa se hoofstad.
Polisielede is te besig met reddingswerk om aandag te gee aan dié opportunistiese diewe.
Ten minste 27 mense is in Amerikaans-Samoa oorlede na ‘n massiewe aardbewing tsoenami’s veroorsaak het wat ganse dorpe in Amerikaans-Samoa, Samoa en Tonga verspoel het.
Altesaam, is daar al 118 mense op die eilande dood.
Talle mense word egter nog vermis en die dodetal sal na verwagtinge verder styg.
Meer as ‘n duisend mense is tans dakloos weens die ramp.
Pago Pago, hoofstad van Amerikaans-Samoa, is die ergste getref en talle grondvloer besighede is deur die watergolf beskadig.
Plunderaars maak gebruik van die chaos vir eie gewin.
Betty Ahsoon, woordvoerder vir sekuriteit, sê plunderaars is ‘n groot probleem, maar die polisie se eerste prioriteit is tans om mense te probeer help.
Op die stadium is dit belangrik om skoon drinkwater en elektrisiteit aan mense in die oostelik dele van die eiland te herstel.
Nie net in Suid-Afrika nie, maar ook in die buiteland is daar wyd protes aangeteken, toe dit aan die lig gekom het, dat Nestlé melk aankoop by mev Grace Mugabe, vrou van die Zimbabwiese diktator, Robert Mugabe.
Nestlé is een van die grootste en bekendste suiwelverwerkings-maatskappye ter wêreld. Hulle hoofkantoor is gesetel in Switserland. Dit is dan ook die rede waarom Nestlé nie gehoor gee aan die Europese Unie se boikot teen Zimbabwe nie, want Switserland is nie deel van die Europese Unie nie. Nestlé vervaardig wêreldwyd produkte wat strek vanaf babakos, ingedampte en poeiermelk tot koffie.
Die Mugabe-melkery is geleë op een van ses plase wat reeds in 2002 deur Grace Mugabe, by blanke Zimbabwiese boere gesteel is. Die plaas, wat die grootste melkverskaffer aan die Zimbabwe Dairy Board was, het aan die Foyle familie behoort. Mnr Foyle en sy gesin het intussen na Australië verhuis, omdat hulle vrees vir hulle lewe.
Die Zimbabwe Dairy Board kon ook nie meer kop bo water hou nie. Aan die begin van die jaar was daar nog sestien groot melkverskaffers in Zimbabwe. Nou is daar slegs agt oor, onder wie dan Grace Mugabe tel. Tien jaar gelede het Zimbabwe tweehonderd en veertig miljoen liter melk per jaar geproduseer. Tans is dit minder as dertig miljoen liter.
Sowat een miljoen liter melk per jaar word deur Nestlé van hierdie melkplaas gekoop. Dit verteenwoordig sowat tien tot twaalf persent van die totale melkaankope van Nestlé in Zimbabwe.
Volgens ’n woordvoerder van Nestlé Suid-Afrika, sal die hele suiwelbedryf in Zimbabwe in duie stort as hierdie Mugabe-melk nie aangekoop word nie. Dit sal die lewe van talle suiwelboere, hul werknemers, die verbruikers en talle ander in die waardeketting, beïnvloed.
Is dit nie juis die doel wat die wêreld het, as sanksies teen ’n land ingestel word nie? Die gevolge van sanksies, hoe nadelig ook vir alle partye, is tog om regerings en kiesers tot ander insigte te dwing, nie waar nie? Dit is wat in die negentien sewentigs en veral die negentien tagtigs gegeld het toe almal op die sanksie-trein gespring het om die sogenaamde boosheid van apartheid ‘n nekslag toe te dien.
Die blanke Suid-Afrikaanse verbruiker besef nog nie watter groot rol sy koopkrag kan speel om verskaffers en instellings, voordelig vir die blanke verbruiker te beïnvloed nie. Geld praat hard, en dit het tyd geword dat blanke verbruikers in solidariteit moet begin optree.
Van wie se bankdienste maak u gebruik? By wie belê u, u nes-eier? Watter selfoonmaatskappy gebruik u? Watter kettingwinkelgroep ondersteun u? Wie gebruik u om u motor te laat hersien? Watter handelsmerk sjokolade koop u? Watter koerant lees u?
Ondersteun u Boer-vriendelike en volkseie organisasies en besighede, of word u deur aantreklike reklamefoefies mislei om besigheid te doen, sonder dat u weet waarvoor u swaarverdiende rande aangewend word? U geld het meer mag as wat u besef!
Wie se melk het u vanoggend in u koffie gegooi?
‘n Reuse-aardbewing van 7.9 op die Richterskaal naby die eiland Soematra, het in die stad Padang groot geboue verwoes en vernietigende brande veroorsaak, het geoloë gesê.
“’n Aantal hotelle is vernietig,” het Rahmat Triyono, die hoof van Indonesië se geofisika- en meteorologie-agentskap, gesê. Hy het ook bygevoeg dat sy agentskap nie verantwoordelik is vir die waarskuwing oor die tsoenami nie.
Die Stille Oseaan se tsoenamiwaarskuwing-sentrum in Hawaii het egter ‘n waarskuwing van ‘n moontlike tsoenami aan Indonesië, Maleisië, Indië en Thailand gestuur.
“Ons kon tot dusver geen kontak met Padang maak nie; alle kommunikasie is afgesny,” het Triyono gesê.
Die aardbewing het omstreeks 05:16 Woensdagoggend, sowat 53 kilometer noordwes van Padang en ongeveer 87 kilometer onder die aardkors plaasgevind, het die Amerikaanse Geologiese Opname gesê.
Die plaaslike televisienetwerk Metro TV het verslag gedoen oor verwoestende brande en skade in Padang, wat nagenoeg 900 000 inwoners het.
Vreesbevange inwoners het die strate glo ingehardloop toe die aardbewing plaasgevind het.
Geen sterftes of beserings is tot dusver aangemeld nie.
Geoloë het gesê Padang is die stad wat heel waarskynlik volgende getref sou word. Dit lê naby die botsende Indo-Australiese en Eurasiese tektoniese plate.
Indonesië is geleë binne die Stille Oseaan se sogenaamde Ring van Vuur, waar die wrywing van kontinentale plate vulkaniese aktiwiteit veroorsaak.
Die Afrikaanse burgerregte inisiatief, AfriForum, het ʼn internasionale veldtog begin om mense aan te moedig om alle Nestlé-produkte te boikot, sou Nestlé nie teen 7 Oktober 2009 ʼn besluit neem om die aankoop van melk van Grace Mugabe – vrou van Zimbabwiese diktator, Robert Mugabe – te staak nie.
AfriForum het reeds ʼn webblad, geskep, waar die boikotaksie bekendgestel word. Op die webblad is ook foto’s, video-insette en feite wat die brutaliteit waarmee die Mugabe-regime die mense van Zimbabwe onderdruk, uitwys.
ʼn Skakel is op die webblad geplaas waardeur die publiek wêreldwyd protesboodskappe aan Nestlé se hoofkantoor in Switserland en kantore in Suid-Afrika en Zimbabwe kan stuur. AfriForum het klaar skrywes aan dié kantore gestuur rakende die veldtog wat begin is.
As deel van die veldtog beplan AfriForum verder om menseregtegroepe wêreldwyd te vra om ook druk op Nestlé te plaas.
Volgens Kallie Kriel, uitvoerende hoof van AfriForum, is die melk wat op Grace Mugabe se suiwelplaas geproduseer word, “bloedmelk”. Kriel wys daarop dat Mugabe en sy binnekring hulle rykdom bekom het deur die gewelddadige onderdrukking van duisende mense in Zimbabwe.
“Nestlé se aankoop van sowat 1-miljoen liter melk van dié plaas wat Grace Mugabe onder verdagte omstandighede “bekom” het, is ’n miskenning van die basiese menseregte van elke Zimbabwiër wie se bloed gevloei het, en steeds vloei aan die hand van Mugabe se brutale veiligheidsmagte en vigilante groepe,” het Kriel gesê.
Nestlé is volgens Kriel ʼn verskoning aan die mense van Zimbabwe verskuldig.
Guinee het Woensdag “subversiewe” byeenkomste verbied nadat twee dae van nasionale rou afgekondig is. Troepe het Maandag losgebrand op ‘n skare van opposisieondersteuners in ‘n stadion en 157 mense is in die regeringsoperasie gedood, sê menseregteaktiviste.
Die land se militêre diktator het gesê hy is jammer oor die geweld, maar volgens menseregteorganisasies is nog drie mense Dinsdag buite die hoofstad Konakry gedood, ‘n dag ná die skietery en gewondes van die skietvoorval is uit hospitale ontvoer.
Thierno Maadjou Sow, ‘n amptenaar van die Organisasie vir die Verdediging van Menseregte van Guinee sê die drie jong mense wat Dinsdag geskiet is, het bloot uit hulle huise uitgeloop toe soldate op hulle losbrand.
Hy sê ook soldate het gewondes na ‘n onbekende bestemming uit die Donkahospitaal asook verkragte vroue uit die Ratomakliniek, ontvoer.
Die juntaleier, kaptain Moussa Dadis Camara het die twee dae van rou oor televisiestasies aangekondig, asook die verbod op anti-regeringsvergaderings.
Camara het joernaliste, politieke en burgerlike leiers, Christelike sowel as Moslemgeestelikes gemaan om nie mense op te sweep nie.
Die VN, AU, EU, die VSA en Kanada het hulle skok uitgespreek oor die slagting wat Maandag plaasgevind het waar tienduisende mense saamgetrek was. Die saamtrek was gemik teen die leierskap van Camara wat in Desember verlede jaar aan bewind gekom het.
Jean Ping, voorsitter van die Kommissie van die Afrika-unie, het voorheen gesê die feit dat die junta-leier, Camara, aan die verkiesing wil deelneem, is kommerwekkend.
“Die vredes-en-sekerheidsraad van die AU het beaam dat druk op die militêre junta van Guinee uitgeoefen moet word om nie aan die verkiesing deel te neem nie.”
Die AU het Guinee na sy militêre aanvalle in Desember 2008 geskors.
Die verkiesing word in Maart volgende jaar gehou.
Camara het Dinsdag die gewondes in hospitale glo besoek en in ‘n onderhoud met die Franse radiostasie RFI gesê “dis jammer dat jong mense betaal word deur opposisieleiers om onrus te stook”.
Opposisielede het Camara daarvan beskuldig dat hy lyke versamel om weg te steek nadat 157 gedood en 1 253 mense gewond is in die voorval.
Die onrus gaan voort volgens inwoners met soldate wat kort-kort in die lug vuur en winkels wat geplunder word. Niemand waag dit op straat nie
Sydia Toure, ‘n vorige eerste minister en een van die gewondes, sê die regering wil die opposisie beslis elimineer.
Mamadi Kaba, hoof van nog ‘n menseregteorganisasie, sê die weermag verkrag vroue en dit het binne die stadion begin. Later is vroue by die barakke verkrag en in ander dele van Konakry en Dinsdag is nog berigte van verkragtings ontvang.
Opposisieaktivis Mouctar Diallo het aan RFI gesê soldate verkrag openlik vroue en druk geweerlope in hulle privaatdele op in die openbaar.
Hulle skiet wild en wakker en oral val mense, het hy gesê.
‘n Rooikruisbron sê militêre bevelvoerders het die lyke van die slagoffers na die Alpha Yaya Diallo militêre kamp afgevoer sodat hulle nie na lykshuise gaan nie. Die kamp is die hoofkwartier van die junta.
Ooggetuies sê die weermag is in volle sterkte in die hoofstad ontplooi en nog geweld is aan die orde van die dag.
Die byeenkoms in die stadion was ‘n poging deur die opposisie om die juntaleier te verhoed om in die komende opnames in Januarie as kandidaat gestel te word.
Camara het ure na die dood van Lasana Conte, die vorige leier, die land in ‘n bloedlose staatsgreep oorgeneem.
‘n Boer van Bangladesj wat meer as 80 000 knaagdiere in ‘n enkele maand doodgemaak het, het Woensdag ‘n kleurtelevisiestel as prys ontvang toe hy as die land se kampioenrottevanger vir 2009 gekroon is, het amptenare verklaar.
Mokhairoel Islam het in Februarie 83 450 rotte van die gras afgemaak, meer as dubbel die aantal van verlede jaar se wenner, het die departement van landbou se direkteur, Abdoel Hannan aan AFP gesê.
Die jaarlikse kompetisie is in dié arm land deur die owerheid geloods in ‘n poging om die verlies aan oeste wat deur rotte opgevreet word, te verhoed.
“Islam het die dooie rotsterte by die distrikslandboukantoor ingehandig,” het Hannan gesê.
“Gedurende die spesiale veldtog, het ons boere en skoolkinders 6,5 miljoen rotte doodgemak, wat agt persent van die koringoes gered het.”
Islam, wat valle, gif, elektriese drade en verdrinking gebruik het om sy prooi te vang, sou later vandag sy TV van die landbouminister tydens ‘n seremonie in Dhaka ontvang.
Die regering beraam dat tot 10 persent van Bangladesj se oeste – meesal rys, koring en aartappels – jaarliks deur miljoene rotte verorber word.
Verlede jaar het ‘n inval deur rotte in die suidoostelike Tsjittagongheuwelstreek oeste uitgewis en hongersnood in afgeleë statte veroorsaak.
Die VN se Wêreldvoedselprogram het vier maande lank voedselhulp aan 120 000 mense verskaf ná die rotteplaag stamlede gedwing het om van wilde wortels te leef.
Die reuse-aardbewing wat groot verwoesting in die Samoaanse eilande in die Stille Oseaan gesaai het, het veroorsaak dat klein tsoenami-golwe Woensdag die kuslyn van Japan, wat duisende kilometers weg is, tref.
Tsoenami-golwe van sowat 10cm het gebreek op die eilande suid van Tokio, sowel as op die noordkus van die hoofeiland Honsjoe, het die meteorologiese agentskap gesê.
Die agentskap het vroeër gewaarsku dat tsoenami-golwe van tot 50cm Japan se kuslyn kan bereik.
Ses ure nadat die waarskuwing uitgereik is, is daar gesê dat die gevaar verby is.
Die 8.0 grootte aardbewing wat Samoa en Amerikaans-Samoa getref het, het ontaard in ‘n reusetsoenami waarin sowat 53 mense dood is en dorpe verwoes is.
Japan is een van die wêreld se lande wat mees geneig is om deur aardbewings getref te word en het ‘n gespesialiseerde tsoenami-waarskuwingstelsel ontwikkel.
Die Verenigde Nasies het die warmbloedige tangodans van Argentinië en Uruguay as deel van die wêreld se “ontasbare kulturele erfenis” verklaar, het diplomate van UNESCO Woensdag gesê.
Die VN se kulturele organisasie is besig met ‘n vergadering van 400 kenners in Abu Dhabi waar hulle gaan besluit oor ‘n lys van wêreldkuns en tradisies wat veilig bewaar moet word vir die mensdom.
Tango is ‘n tradisie van musiek en dans wat in werkersklas danssale in die Buenos Aires en Montevideo ontwikkel is.
Dit is regoor die wêreld bekend as ‘n simbool van sensuele romanse.
Die klag van rassisme teen die Franse minister van binnelandse sake, Brice Hortefeux, het ‘n lang aanloop en is maar die puntjie van die politieke intrige-ysberg waarmee Frankryk gereeld te kampe het.
Kennelik is die nuwe smeerveldtogtaktiek om enige mededinger met die rassismekwas by te kom. Voorheen was hoë amptenare se privaatheid heilig en enige joernalis wat dit gewaag het om dit te skend, het sosiale verwerping, en selfs die dood, in die gesig gestaar.
Francois Mitterand het nooit in die Elyséespaleis gewoon nie, maar saam met sy skelmpie in ‘n huis wat geheim gehou is. Die eerste joernalis wat gewaag het om iets daaroor te laat val, is aangerand en vir dood gelaat deur die eertydse president se sterk manne.
Toe Sarkozy se tweede vrou, Cécelia, probeer het om ‘n klag by die polisie te lê nadat hy haar geslaan het, het die polisie eenvoudig geweier en niks het ooit daarvan gekom nie.
Jacques Chirac het ‘n lang lys korrupsieklagtes wat blykbaar een of ander tyd te berde gebring gaan word en ‘n eertydse minister in sy kabinet gaan eersdaags deur Sarkozy vervolg word nadat hy glo korrupsiebewyse teen Sarkozy vervals het.
Sarkozy het intussen sy naam gevoeg by die ondersteuners van die filmregisseur, Roman Polanski, wat in Switserland aangehou word omdat hy in die VSA van kinderverkragting aangekla is.
Wat Hortefeux betref, was hy nie lank gelede nie die aanklaer en nie die aangeklaagde nie.
Hy het naamlik vir Paul Girot de Langlade, prefek en die koördineerder van ‘n politieke vredesproses op die eiland Reunion, vroeër hierdie jaar geskors nadat hy glo ‘n rassitiese aanmerking teenoor personeel by die Orly-lughawe gemaak het.
Girot de Langlade het tydens die gebeure aan ‘n Franse dagblad gesê hy is “die slagoffer van ‘n politieke spel”. Volgens Girot de Langlade is die “ondersoek na ‘n kleinigheid georkestreer deur Brice Hortefeux, wat sy anti-rassistiese beeld wil poets”.
Girot de Langlade sê die gedrag en optrede wat aan hom toegedig word, het niks met hom te make nie.
‘n Klag van “openbare beledigings van ‘n rassistiese soort” is in die Paryse voorstad Creteil aanhangig gemaak teen die prefek. Volgens ‘n regsamptenaar gemoeid met die saak, is Girot de Langlade deur veiligheidspersoneel by die lughawe gestop en gevra om sy sakke leeg te maak toe ‘n metaalverklikker afgegaan het by Orly-lughawe, buite Parys op 31 Julie.
“Jy sal dink ons is in Afrika. In elk geval, daar is net swartes hier,” het Girot de Langlade glo na bewering gesê.
Hy self sê hy het sy humeur verloor. “Selfs die lugwaardin van Air France was geskok deur die optrede van die veiligheidsagent en het in die naam van haar maatskappy verskoning aangeteken,” het hy bygevoeg.
Girot de Langlade sê hy het die veiligheidsagente gevra om gou te maak en dit is al.
Reunion was sedert die begin van hierdie jaar een van die drie Franse oorsese gebiede waar rassespanning heers. Onrus en stakings teister die eiland.
Of die kinderagtige geskel in Parys die donkerder Franse elders in die wêreld wat kla dat hulle ekonomies uitgesluit word, gaan tevrede stel, is te betwyfel.
