Dan Roodt, Author at praag.co.za

Afgedank na kredietkaartongerymdhede, nou DA-lid

Besigheid Teen Misdaad (BTM) se afgedankte baas het R37 000 van die organisasie se geld op inkopies geblaas.

BTM, ook in Engels bekend as Business Against Crime (BAC), is ‘n voertuig wat deur die land se sakegemeenskap geskep is om misdaad te beveg en hulle kry miljoene in skenkersfondse.

Die besturende direkteur van BTM in die Wes–Kaap het haar stilte verbreek nadat sy afgedank is vir ongemagtigde kredietkaartbesteding.

Dr Annelie Rabie moes in Junie uit die organisasie wat misdaad beveg, bedank, ongeveer dieselfde tyd as wat sy ‘n DA-raadslid in die dorpie van Prince Albert in die Groot Karoo geword het.

Rabie het hierdie week gesê was sy net “deurmekaar” met haar persoonlike en korporatiewe kredietkaarte, terwyl sy inkopies gedoen het.

Melvyn Josua, die huidige voorsitter, sê Rabie is afgedank nadat ‘n dissiplinêre verhoor haar skuldig bevind het op vyf aanklagte van ongemagtigde uitgawes op die organisasie se kredietkaart ter waarde van ongeveer R37 000.

Die organisasie en Rabie swyg oor die items wat aangekoop is. Josua het geweier om te sê of kriminele klagtes gelê sal word as “sekere prosesse afgehandel is”.

Rabie, egter, het daarop aangedring dat sy niks verkeerd gedoen het nie.

Josua het bevestig dat Rabie by die verhoor aangevoer het dat sy deurmekaar was tussen haar werks- en persoonlike kredietkaarte, maar hy het gesê dit is verwerp deur die voorsittende beampte. Hy het ook bevestig dat sy ‘n “deel” van die geld terugbetaal het, maar slegs na ‘n oudit deur die BTM.

Rabie het aanvanklik haar voorneme om te bedank uit die organisasie in Mei aangekondig. “Dit was my spesifieke voorneme om na Prins Albert te verskuif en in die politiek op die versoek van die gemeenskap betrokke te raak.”

Die organisasie het egter geweier om haar bedanking te aanvaar, omdat ‘n ondersoek rakende haar gedrag aan die gang was.

“‘n Onafhanklike verhoor is gehou in Junie 2011 by die kantore van [die prokureursfirma] Cliffe Dekker Hofmeyr. Sy is skuldig bevind op aanklagte van ongemagtigde uitgawes en haar dienste is beëindig op 17 Junie 2011..

“Ons standpunt oor misdaad maak dit duidelik dat ons optree wanneer of waar ook al onbehoorlikheid vermoed word.”

Rabie is verkies tot die DA-koukus in Prince Albert terwyl sy geskors was.

Dr Graham Wright, uitvoerende hoof van Besigheid teen Misdaad Suid-Afrika, het gesê die organisasie is bekommerd oor die negatiewe impak van die voorval.

VF verwelkom skorsings van ministers

Pres. Jacob Zuma se aankondiging dat hy die nasionale kommissaris van Polisie, Bheki Cele, geskors het hangende ‘n ondersoek en die afdanking van die minister van Openbare Werke, me Gwen Mahlangu-Nkabinde asook die van mnr. Sicelo Shiceka, minister van samewerkende regering, word deur die Vryheidsfront Plus verwelkom.

As een van die regspersone wat die klag teen die huur van geboue by die Openbare Beskermer gelê het, word vertroue in teenkorrupsie liggame versterk met Zuma se optrede.

As nasionale hoof van die Suid-Afrikaanse Polisiediens is dit in nasionale belang dat hierdie bewerings behoorlik ondersoek word om dit te bevestig of te weerlê. Die Polisiehoof kan nie misdaad effektief beveg met sulke aantygings teen hom nie.

Die publiek en lede van die SAPD kan ook nie vertroue hê in die nasionale kommissaris met sulke aantygings nie,” sê mnr. Pieter Groenewald (LP), hoofwoordvoerder van Polisie vir die Vryheidsfront Plus.

Die lede van die kommissie wat ondersoek moet doen na die wapenskandaal word ook verwelkom. Pres. Zuma tree reg op om regters aan te stel en versterk die geloofwaardigheid van die ondersoek.

Dat die ondersoek twee jaar kan duur skep die indruk dat ‘n behoorlike ondersoek gedoen sal word. Hierdie is ‘n geleentheid om die skandvlek van die wapenskandaal tot ‘n einde te bring en die skuldiges moet aan die pen ry, het Groenewald gesê.

VF-petisie was tolhekke se doodsteek

“Die Vryheidsfront Plus verwelkom die minister van vervoer, mnr. S’bu Ndebele, se besluit om die implementering van die Gauteng-tolhekprojek uit te stel. Volgens die minister gaan daar eers in Februarie 2012 ‘n besluit oor die tolgelde geneem word. “Die VF Plus is van mening dat die inhandiging van meer as 100 000 geouditeerde protes-handtekeninge by die Gauteng Wetgewer, soos ingesamel deur die party se aanlyn-protesaksie www.tolhekpetisie.org.za, ‘n wesenlike bydra gelewer het tot die besluit. Die besluit om die proses te halt kom naastenby ‘n week na die inhandiging van die handtekeninge” het adv Anton Alberts, VF Plus parlementêre woordvoerder oor vervoer, gesê.

“Daarbenewens moes die interparty-koalisie tussen die VF Plus, Cope, DA, ACDP en die OD in die Gautengse Wetgewer dit vir die minister en die ANC duidelik gemaak het dat mense oor ‘n wye front teen die tolheksisteem gekant is. Die VF Plus sal egter voortgaan om druk op die minister te plaas om die tolheksisteem heeltemal te skrap en die nodige fondse by wyse van die bestaande brandstofheffing te verhaal” het Alberts bygevoeg.

Intussen het die VF Plus sedert die her-loodsing van sy aanlyn-protesaksie binne ‘n week alreeds 5700 nuwe handtekeninge bygekry. Volgens adv. Anton Alberts is dit ‘n bewys dat die publiek se teenkanting teen die Gauteng-tolprojek steeds groei. “Die Vryheidsfront Plus het ook in ‘n massa e-pos aan die petisie-ondertekenaars gevra of hulle bereid sal wees om aan openbare protesaksie deel te neem. Om en by 10 000 mense het al positief geantwoord dat hulle so ‘n aksie sal steun,” het Alberts verder gesê. “Indien die regering sal voortgaan met die aktivering van die tolstelsel, gaan hulle wesenlike openbare teenstand kry tot so ‘n mate dat massa publieke ongehoorsaamheid ‘n moontlikheid is.”

Die VF Plus het ook sy tevredenheid uitgespreek teenoor die besluit van die regering om nog ‘n taakspan aan te stel om die Gauteng-tolprojek verder te ondersoek. “Dit is egter jammer dat die publiek geen verteenwoordiging op hierdie komitee het nie, maar dit is verblydend dat die adjunkminister van vervoer, mnr. Jeremy Cronin, erken het dat die tolstelsel nie sinvol is as metode om die land se nuwe paaie en instandhouding te finansier nie,” het Alberts bygevoeg.

Dit blyk nou dat die regering uiteindelik die belastingbetaler en padverbruiker se rasionele stem begin hoor. Die VF Plus sal egter saam met ander partye voortgaan om druk op die regering te plaas ten einde hierdie tolstelsel te stop.

‘DA nie kampvegter vir Afrikaners nie’

Die Gautengleier van die Vryheidsfront Plus en LPW, mnr Jaco Mulder is tydens die party se provinsiale reorganisasie die naweek in Meyerton, Midvaal onbestrede as VF Plus leier van die provinsie herkies. Adv Anton Alberts, LP en Dr Conrad Beyers, raadslid in die Tshwanemetro is as ondervoorsitters verkies.

Mulder het tydens hierdie geleentheid gesê dat die VF Plus ‘n belangrike rol het om te speel in die Suid-Afrikaanse politieke landskap as kampvegter vir selfbeskikking en die beskermer van minderheidsregte. Die party is ook gereed om in Gauteng sy rol as diensleweringswaghond te vervul en veral ook in die DA-beheerde raad van Midvaal waar die vergadering plaasgevind het.

Die inwoners van Midvaal is ‘n brose gemeenskap wat mislei word deur die DA-beheerde raad. Die raad is vir ‘n geruime tyd reeds in omstredenheid gehul na bewerings van grootskaalse korrupsie terwyl die DA Midvaal voorhou as ‘n voorbeeld van sukses en skoon administrasie.

Die DA is geen beskermer van die grondwetlike regte van Suid Afrikaners en die inwoners van Midvaal nie en die res van Suid-Afrika moet daarteen beskerm word. Die DA en ANC is twee teen-pole van dieselfde munt wat totaal uit voeling is met die werklikhede van Suid-Afrika en maak van partypolitiek ‘n karikatuur, het Mulder gesê.

Suid-Afrika benodig ‘n nuwe akkoord. Mulder het verder ‘n beroep op die vergadering gedoen om mense aan te moedig om ‘n party te steun wat hul belange kan dien en nie bloot op ‘n basis van “my vyand se vyand is my vriend” te stem nie.

Lede wat tot die VF Plus Dagbestuur in Gauteng verkies is, is as volg:

Kol Piet Uys, mnr Philip van Staden, Dr Dan Roodt, Corrie Pypers, mnr Franco de Lange, me Amanda de Lange, me Carien Nefdt, mnr Francois Cloete, mnr Sakkie du Plooy, mnr Christo Smith, Wiebe Schultz en me Linnette Badenhorst. Mnr Werner Human en mnr Helgard Cronje is as jeugverteenwoordigers op die dagbestuur aangewys.

Afgevaardigdes na die VF Plus Federale Raad sluit in:

Mnr Philip van Staden, mnr Franco de Lange, Dr Dan Roodt, me Karin Roodt, mnr Corrie Pypers, me Carien Nefdt, mnr Francois Cloete, mnr Sakkie du Plooy, Dr Conrad Beyers, me Amanda de Lange en mnr Jean Kriek (Jeugleier: Gauteng).

Moslemekstremiste gaan verkiesing in Tunisië wen

Hulle staan geduldig en stil in toue vir ure en wag om te stem. “Ons ly in die warm son,” sê een kieser, “Maar dit is ‘n pragtige soort lyding”. Op die vraag van die BBC-korrespondent Allan Little oor wie gaan wen, sê ‘n ander: “Ons gaan almal wen. Dit is ‘n vrye verkiesing. Dit beteken dat ons reeds gewen het”.

Vir die meeste is dit die eerste keer in hul lewens dat hulle gestem het in ‘n vrye verkiesing. Tunisiërs weet dat die wêreld se oë op hulle gerig is. Die Weste wil graag sien dat ‘n nuwe ontluikende demokrasie tot stand kom.

Sukses in Tunisië sal resoneer oor die Arabiese wêreld heen. Die vrolike optimisme is oral tasbaar.

Die konserwatiewe moslemgroep, die Ennahda party sal na verwagting die grootste enkele groep in die Grondwetlike Vergadering wees en as wenners uit die stryd tree.

Teenstanders het probeer om dié party as moslemekstremiste te brandmerk, maar die veldtog het skynbaar nie gewerk het nie. In die armer, meer godsdienstige konserwatiewe gebiede, het mans en vroue aparte toue gevorm om te stem.

In hierdie wyke, sal die godsdienstige party na verwagting baie goed vaar.

топкарго

Libië se NOR omarm Sjaria-wette

Moestafa Abdoel-Jalil, die voorsitter van die Nasionale Oorgangsraad en aangewese president, het reeds verklaar dat Libiese wette in die toekoms die Islamitiese kode, oftewel Sjaria, sal navolg.

Mnr Abdoel-Jalil het spesifiek die onmiddellike opheffing van ‘n verbod op poligamie wat kol. Gaddafi ingestel het, aangekondig.

Dit is ‘n slag vir diegene wat gehoop het om te sien dat Libië se ekonomie verder integreer in die Westerse wêreld en die land se nuwe “vryheid” aangekondig het.

Hy het ook aangekondig dat daar in die toekoms bankregulasies oor die heffing van rente sal kom, in lyn met Sjaria. “Rente skep siekte en haat tussen mense,” het hy gesê.

Lande soos die Verenigde Arabiese Emirate, en ander Moslemlande, is die pioniers in die ontwikkeling van die Sjaria-bankwette wat nie rente vra nie, maar fooie hef.

In die eerste plek sal rente op lae-waarde lenings heeltemal opgehef word, het Abdoel-Jalil gesê.

Libië behou steeds die verbod op die verkoop van alkohol. Mnr Abdoel-Jalil se besluite is geneem sonder dat enige demokratiese proses dit voorafgegaan het.

Konserwatiewe Moslems het ‘n sterk rol in opposisie teenoor Gaddafi se heerskappy gespeel en tydens die opstand.

Dodelike aardbewing ruk Turkye

Staathoofde het hul meegevoel uitgespreek met Turkye ná ‘n verwoestende aardbewing die ooste van die land dié naweek getref het.

Volgens die Franse nuusagentskap, AFP is die amptelike dodetal reeds minstens 217, met honderde wat beseer is. Reddingspanne het deur die nag gewerk om oorlewendes te red wat onder die puin vasgekeer was.

Vroeg Maandagoggend het die Turkse minister van binnelandse sake, Idris Naim Sahin gesê die aardbewing van sewe-komma-twee op die Richterskaal het minstens 100 lewens in die stad, Van geëis en minstens 117 in die dorp, Ercis, ‘n honderd kilometer verder noord.

Cosatu prys DA oor tolbesluit

Die sekretaris-generaal van Cosatu, Zwelinzima Vavi, het vir Helen Zille geprys vir die DA se houding teenoor hoë tariewe.

Die ministerie van vervoer sê die optrede is daarop gemik om meer ruimte te skep vir oorlegpleging met gemeenskappe wat deur die konstruksie van tolpaaie geraak sal word.

Die konstruksie van tolpaaie op die N-een in Gauteng het grootskaalse ongelukkigheid tot gevolg gehad en teenstaanders daarvan het gedreig met stakings.

Vavi sê die organisasie het regstappe oorweeg teen die tolstelsel in Gauteng. Hy sê verder dit is bemoedigend om te sien dat die burgemeester van Kaapstad haar voet neersit oor die kostes.

Die Suid-Afrikaanse Nasionale Taxiraad stel vandag die eerste opleidingsakademie vir die taxi-bedryf op Welkom bekend.

Die opleidingsakademie is deel van SANTACO se poging om die taxi-bedryf te hervorm. SANTACO sê hy is daartoe verbind om die aantal ongelukke waarby taxi’s betrokke is te verminder, deur veiligheidsprogramme te implementeer.

Die organisasie wil ook kliëntediens verbeter en meer vroue as taxi-bestuurders oplei. Die minister van vervoer, S’bu Ndebele sal die bekendstelling bywoon.

Gaddafi se dood bedenklik

Daar bestaan ‘n hele aantal onbeantwoorde vrae rondom Navo se optrede tydens die aanval op Moeammar Gaddafi se konvooi, het die Russiese minister van buitelandse sake, Sergei Lavrov, gesê.

“Die manier waarop Gaddafi dood is laat ‘n klomp vrae onstaan,” het Lavrov gesê.

“Daar moet na Navo se aksies gekyk word in die lig van internasionale wetgewing.”

Volgens die minister het die konvooi waarin Gaddafi was geen bedreiging vir enige burgerlikes ingehou toe hulle deur Navo-stralers aangeval is nie.

“Daar was geen skakel tussen ‘n vliegspersone en teikens op die grond nie, insluitend hierdie konvooi,” het Lavrov gesê.

“Die spesifieke konvooi was nie besig om enigiemand aan te val nie en het dus geen bedreiging ingehou nie.”

Jeugliga kap myne

Die Suid-Afrikaanse Youth Council, die Jong Kommunistiese Liga, Sasco en Azapo het hulle stemme gevoeg by die van die minister van polisie, Nathi Mthethwa, en minister van hoër onderwys, Blade Nzimande, om die beplande optog van die ANC-Jeugliga te veroordeel.

Die Jong Kommunistiese Liga se nasionale sekretaris, Buti Manamela, het gesê sy organisasie sal “nie belangstel in georkestreerde bewegings om sekere politieke stellings te maak nie”, en Azapo het ‘n beroep op die swart jeug gedoen om weg te bly van die optog Donderdag en Vrydag en hul energie in hul matriekeksamen, wat vandag begin, te stort.

Insp. Edna Mamonyane, metropolisiewoordvoerder van Johannesburg, het gesê toestemming vir die jeugliga se optog is die naweek toegestaan, maar die optoggangers is toegang tot die snelweë verbied.

‘n Groot polisieteenwoordigheid word verwag by die optog om die skare onder bedwang te hou.

Malema het Sondagmiddag in die Bantu Bonke-township in die Vaaldriehoek gepraat.

Hy het dié naweek verskeie plekke in Gauteng besoek om steun te werf vir die jeugliga se optog wat in Johannesburg begin en by die Uniegebou in Pretoria eindig.

Vroeër het hy ‘n diens by die Ratanda Metodiste Kerk in Heidelberg bygewoon. Kerkleiers het hom gevra om nie die platform wat hulle vir hom gegee het vir sy politieke agenda te gebruik nie, omdat hulle “polities neutraal” wil bly.

Hy is egter deur die kerkleiers die hande opgelê tydens die diens.

‘n Klein opkoms in Meyerton en Sebokeng het Malema genoop om dié twee afsprake op sy toer af te stel het ‘n amptenaar gesê.

ANC-jeugliga woordvoerder Floyd Shivambu het nie reageer op versoeke vir kommentaar nie.

Malema se binnekring het gesê die jeugleier het vergaderings in Sebokeng asook Meyerton, ‘n vesting van die DA, afgestel.

Die Vryheidsfront het Saterdag ‘n groot reorgansasievergadering in Meyerton gehou te midde van gerugte dat die DA onder druk verkeer vanweë hulle besluit om ‘n swart parlementêre leier aan te wys in die persoon van Lindiwe Mazibuko.

By Bantoe-Bonke, het ‘n uitdagende Malema gesê die sowat 500 inwoners moet nie toelaat dat ‘n mynmaatskappy wat onlangs minerale in die omgewing ontdek het, hulle dwing om te verskuif nie.

“Ons het gehoor dat hulle wil hê dat julle van hier af gedwonge verskuif moet word, dat Anglo hierdie plek besit en dat daar ‘n alternatiewe plan moet wees, want daar is sekere minerale hier ontdek.

“Die minerale wat hulle ontdek het, moet ook julle minerale wees, en as daar mynbou hier gaan wees, moet die grond van jou gekoop word, moet jy nie verwyder word nie, want dit is jou grond.

“Jy sit op die rykdom, en daardie rykdom moet tot jou voordeel wees. So hierdie ding dat elke keer as hulle ‘n minerale hulpbron ontdek, dan skuif hulle mense, dit moet tot ‘n einde kom.

“Wanneer hulle minerale ontdek, moet hulle vra hoe hulle hier gaan myn tot julle voordeel en nie net sê jy gaan na ander huise geskuif word en selfs die huise wat hulle vir julle gee is nie behoorlike huise nie,” het hy gesê.

Malema het gesê die inwoners moet die optog gebruik om beter behuising, toegang tot basiese dienste, gratis onderwys en werk te eis.

Saterdag in Diepsloot het Malema Mthethwa en Nzimande, sonder om hulle by die naam te noem, uitgesonder vir kritiek. Hy het gesê die ministers gaan na hulle gemaklike huise terug as hulle klaar hulle voorbereide toesprake afgelees het en vergeet daarna wat hulle gesê het.