‘n Onderwyser wat geskors is nadat hy na bewering ‘n naakfoto van homself aan ‘n 16-jarige leerling gestuur het, sal weer in November in die hof verskyn, het die polisie in Gauteng gesê.
“Hy sal weer op 6 November 2013 in die hof verskyn,” het ao. Moses Maphakela, polisiewoordvoerder, gesê.
Die onderwyser van die Hoërskool Hyde Park in Johannesburg is en in Augustus in hegtenis geneem en sal in die Alexandra-landdroshof verskyn.
Eyewitness News het vroeër berig die onderwyser het glo laat die aand op 30 Julie ‘n gesprek op die boodskapdiens WhatsApp met die leerling se ma gehad nadat sy hom onder die indruk gebring het dat hy met die seun self gesels.
Die onderwyser het na bewering seksuele foto’s na die seun se selfoon gestuur, asook seksuele voorstelle gemaak.
Volgens die ma het dit die skool langer as ‘n week geneem om die onderwyser te skors en sy het toe ‘n strafregtelike klag teen hom ingedien. Die skool het glo langer as ‘n week geneem om die onderwyser te skors.
Die seun en ma se name word weerhou om sy identiteit te beskerm. – Sapa