Navolede ontmoet in Boekarest van 2 tot 4 April en sal versoeke van twee voormalige Sowjetrepublieke, Oekraïne en Georgië, oorweeg om by die organisasie aan te sluit.
Die Russe beskou dit as baie netelig vir die bestaande Europese veiligheidstruktuur. Hulle hou vol dat geen staat verteenwoordigers van ‘n militêre blok waaraan hy nie behoort nie naby sy grense mag toelaat nie.
Die ergste massamoord het plaasgevind toe ‘n woedende skare ‘n kerk afgebrand het waarin 100 vreesbevange statbewoners skuiling gesoek het. Dertig mense is in die voorval dood.
Agterdog het nog nie gewyk nie en duisende mense leef steeds as vlugtelinge. ‘n Massabevolkingsverskuiwing het plaasgevind soos wat Keniane van verskillende stamme poog om na die veiligheid van hul tradisionele stamgebiede terug te keer.
Gewone Keniane sê die magsdelingsooreenkoms het vrede vir die mense bo gebring, maar nie vir hulle nie. Kikoejoes leef in die vrees vir etniese weerwraak.
Indien Protestantse kerke wil aanhou om nie-Moslems te bedien, moet hulle oor ‘n permit beskik, sê kerklikes. ‘n Wet is in Februarie 2006 bekragtig waarvolgens Kerke toestemming van die regering se plaaslike verteenwoordigers moet vra om hul deure te kan oophou.
Geen amptelike rede is egter deur die owerhede verstrek nie. Hugh Johnson, ‘n prominente Protestantse geestelike leier is tans gewikkel in ‘n reeks hofsake nadat die Algerynse regering geweier het om sy verblyfpermit te hernu.
Nie alleen rysboere in Ekwador nie, maar ook Franse slaketers moet opdok. Veranderende weerpatrone, wêreldwye ekonomiese verskuiwings, laer voedselreserwes en groeiende verbruikersaanvraag in China en Indië is die grootste sondebokke.
Die aarde se armste bevolkings bly die hongerste. In Egipte is twee mense verlede week dood in skermutselinge oor brood en voedselopstande het uitgebreek in Burkina Faso en Kameroen.
In Italië het protes teen voedselpryse op verskeie plekke opgeklink, terwyl die prys van spaghetti in Haïti verdubbel het. Japan se stapeldis, miso, het die hoogte in geskiet.
Die betogers eis dat die IOK, Internasionale Olimpiese Komittee, druk op China toepas om menseregteskendings in Tibet te staak.
Nommer een en twee op die lys is hartsiektes en selfmoord. Alhoewel MIV-Vigs steeds rede tot kommer verteenwoordig, ontvang Vigsnavorsing $4,7 miljard aan fondse terwyl padveiligheid slegs $100 miljoen ontvang.
Kim Jong-Nam sê voorts hy sien baie positiewe veranderinge in die land sedert sy laaste besoek, 18 jaar gelede, pas nadat Namibië onafhanklikheid verkry het.
Die WGO, Wêreldgesondheidsorganisasie, skat dat byna ‘n kwartmiljoen mense tussen 2003 en 2006 in Irak omgekom het. Die VSA se militêre teenwoordigheid in Irak het Donderdag sy sesde jaar tegemoet gegaan.
Die koste van die oorlog word gestel op $400 miljard. Na vyf jaar het die geweld nog nie afgeneem nie en tienduisende Irakese burgerlikes is reeds gedood in voortslepende sektariese gevegte.
Werkloosheid is hoog en word geraam op tot 50%. Openbare dienste soos water en elektrisiteit is ook nog nie ten volle herstel nie. Jalal Talabani, Irak se president, het die opkoms van korrupsie en terrorisme veroordeel.
Dis nou vyf jaar gelede dat die oorlog in Irak uitgebreek het. Blix het ʼn meningsartikel in ʼn Londense koerant gepubliseer waarin hy te velde trek teen die Amerikaanse regering. Volgens Hans Blix is die oorlog “ʼn tragedie – vir Irak, vir die VSA, vir die VN, vir die waarheid en vir die mensdom self”.
Indien die VSA nie vir Saddam Hoessein afgesit het nie, sou hy bloot aangehou het om sy eie mense soos Fidel Castro of Moeammar Khaddafi te onderdruk, maar hy sou geen bedreiging vir wêreldvrede ingehou het nie.
Die wanhoop styg in Nederland oor die verskeidenheid daaglikse konflikte wat aan Islam verwant is. Onophoudelike debatte volg. Op 5 Desember het die parlement die Moslemsluier in die polisie verbied, ná jare van beleid wat min of meer verdraagsaam was na gelang van die bepaalde stad. Die munisipaliteit van Amsterdam het op sy beurt geëis dat maatskaplike werkers, selfs Moslems, elke vrou op straat met die hand moet groet. Die besluit is na vele onderonsies geneem: Job Cohen, die arbeiderburgemeester van Amsterdam het aanvanklik gevind dat dit nie “onontbeerlik” is om alle hande te skud nie. Toe het verskeie arbeiderverteenwoordigers in die Slotervaartbuurt – waar baie immigrante woon – in die weste van die stad hulself begin beywer vir respek teenoor “die norme van die gasheerland”.
En dan is daar Geert Wilders, die leier van populistiese Regs wat die verslegtende toestand meesterlik uitbuit. Selfs al word al die rusies nie deur dié politikus veroorsaak nie, belowe hy reeds vier maande lank ʼn film teen die Koran. Dié aankondiging het ʼn storm ontketen wat die wond van die moord op die filmmaker Theo van Gogh weer laat oopgaan het. Hy is op 2 November 2004 keelaf gesny deur ʼn jong Nederlands-Marokkaanse Moslem, drie maande ná die verspreiding van sy film, “Onderwerping”, wat die toestand van vroue onder Islam gekritiseer het. Sedertdien word Moslems in Nederland gesien as ʼn afsonderlike groep van 850 000 mense (5% van die Nederlandse bevolking). Die teenwoordigheid van 20 000 tot 30 000 radikales, volgens die geheime diens, word deur Geert Wilders aangedui as ʼn bedreiging weens die “Islamisering van die Nederlandse samelewing”.
Die boerkini, die nuwe tipe baaikostuum wat die hele liggaam van vroue bedek, verskaf ʼn aanduiding van die toename in fundamentalisme. Om die reaksie van die publiek te toets, het die TV-kanaal Netwerk ʼn joernalist uitgestuur om die waters van die land se swembaddens in ʼn boerkini te toets. Die ergste reaksie was van ʼn Moslem wat uitgevaar het teen “die toenemende invloed van ortodokse Islam in Nederland”. In totaal en tot op hede het ses munisipale swembaddens die Moslembaaikostuum verbied.
Die koninkryk van Nederland is duidelik vasgevang in ʼn dubbele konflik tussen godsdiensvryheid en meningsvryheid, enersyds, asook integrasie en verdraagsaamheid andersyds. In September het ʼn regeringsagentskap ʼn beroep op Nederlanders gedoen om “hulle by Islam aan te pas”. Die argument van die agentskap was die volgende: “Verdraagsaamheid is te min.” Die Islamkenner Hans Janssen van die universiteit van Utrecht meen inteendeel dat “Nederland te veel toegee aan die dreigemente wat deur die fundamentaliste rondgeslinger word”. Hy is gekant daarteen dat die regering aan Geert Wilders gevra het om nie sy film te vertoon nie, uit vrees vir weerwraak van Moslems. In ʼn ander toon, het die bank Fortis sy spaarbussie in die vorm van ʼn varkie wat aan elke kind uitgedeel is wat ʼn rekening open deur ʼn ensiklopedie vervang.
Op sy beurt het die Nederlandse Mediese Vereniging (KNMG) in Februarie besluit dat elke pasiënt voortaan mag vra of hy ʼn mans- of vrouedokter wil hê, maar besluit om nie rekening te hou met die godsdiens van die praktisyns nie. Dit was ʼn manier om te ontkom aan die debat teenoor die toenemende eise van Moslems wat die gesondheidstelsel betref. Uiteindelik, na drie jaar van oponthoud, is ʼn boupermit te Amsterdam uitgereik om ʼn groot moskee op te rig wat die hoogste gebou in die stad sal wees.
Ronald Plasterk, die minister van kultuur, onderwys en emansipasie, het gepoog om die atmosfeer te besweer deur aan die Moslems te vra om hul van die Koran “te distansieer. Indien mens alles letterlik sou opneem, is daar genoeg om jou mal te maak, vanuit ʼn moderne gesigspunt,” het hy verklaar. Sooreh Hera, ʼn kunstenares van Iranese oorsprong, het die minister terstond daarvan beskuldig dat hy “vryheid van spraak onderdruk”. Sy kritiseer hom weens sy gebrek aan steun nadat die munisipale museum van Den Haag geweier het om omstrede foto’s uit te stal. Dié beelde het homoseksuele Iranese paar getoon wat maskers dra in die vorm van die profeet Mohammed en sy skoonseun Ali. In Parys gaan die Pompidou-sentrum dit uitstal, maar in Nederland was niemand daartoe bereid nie. ʼn Enkele museum in Gouda het ʼn tentoonstelling belowe. Die direkteur daarvan het egter van mening verander, maar ontken dat hy onder druk geswig het.
Die veteraanpolitikus en Clinton-ondersteuner, Geraldine Ferraro, is so pas onthef van haar ereposisie in Hillary Rodham Clinton se presidentsveldtog as gevolg van beskuldigings van rassisme. Ferraro het onlangs tydens ʼn onderhoud gesê dat Barack Obama nie in die kragmeting om die presidentskap sou geslaag het indien hy nie swart was nie.
Onmiddellik na haar uitspraak is Ferraro deur die Obamakamp aangeval. Obama het gesê dat Ferraro se kommentaar “belaglik” is, en sy veldtogbeamptes het geëis dat Clinton haar bewerings verwerp.
Ferraro het agterna vir Clinton per brief laat weet dat sy nie langer op haar finansiële komitee as “Erevoorsitster van New York-leierskap” sal dien nie. Sy het geskryf dat die Obamaspan “my aanval om u seer te maak”.
Obama het by ʼn Chicago-nuuskonferensie gesê dat Ferraro se uitspraak “laakbaar is. Die gedagte dat dit vir my ʼn groot voordeel is om ʼn Afro-Amerikaner genaamd Barack Obama te wees en die presidentskap na te jaag is, na my mening, nie ʼn siening wat deur die breë publiek onderskryf word nie.”
In haar brief aan Clinton, waaroor CNN eerste berig het, sê Ferraro: “Beste Hillary, ek bedank vanuit u finansiële komitee sodat ek vir myself kan praat en u kan aanhou om vir uself te praat oor dit wat tydens dié veldtog saak maak. Die Obama-span is besig om my aan te val om u seer te maak. Ek sal dit nie toelaat nie. Dankie vir alles wat u gedoen het en aanhou doen om hierdie ʼn beter wêreld te maak vir my kinders en kleinkinders. U geniet my diepe bewondering en agting, Gerry.”
Clinton se woordvoerder, Howard Wolfson, het gesê dat Ferraro haar pos op eie inisiatief ontruim het.
Die woordewisseling tussen twee Demokratiese leiers – Obama, wat poog om die eerste swart president van Amerika te word, asook Ferraro, wat in 1984 die eerste vroulike visepresidentskandidaat vir ʼn hoofstroomparty was – het vir die tweede dag aangehou soos wat hulle op oggendnuusprogramme van TV-netwerke en kabeltelevisiekanale verskyn het.
Die omstredenheid het begin to die nasionale media kennis geneem het van opmerkings wat Ferraro verlede week teen die Daily Breeze-koerant in Torrance, Kalifornië, gemaak het: “Indien Obama ʼn blanke man was, sou hy nie in dié posisie gewees het nie. En as hy ʼn vrou was (van enige kleur) sou hy nie in dié posisie gewees het nie. Hy is bloot baie gelukkig om te wees wie hy is. En die hele land is vasgevang in die idee.”
Ferraro het gesê dat sy staan by haar bewering dat Obama se sukses in die Demokratiese veldtog “gedeeltelik” aan sy ras te wyte is.
Obama het egter gesê dat indien iemand in sy span sou suggereer dat Hillary Clinton “is waar sy is slegs omdat sy ʼn vrou is” sou hy aanstoot neem.
Clinton het gesê dat sy verskil van Ferraro se opmerkings. In ʼn onderhoud met Associated Press het sy gesê: “Dis jammer dat enige van ons ondersteuners – aan albei kante, omdat ons al twee hierdie ervaring het – dinge sê wat na die persoonlike oorhel.”
Ferraro is die jongste in ʼn reeks surrogaatkandidate wie se kommentaar albei presidensiële veldtogte onstel het. Verlede week het Obama se raadgewer Samantha Power bedank nadat sy Clinton as ʼn “monster” getipeer het.
Ferraro, wat Walter Mondale se visepresidentskandidaat was, het Woensdag gesê dat haar opmerkings nie rassisties was nie en buite konteks aangehaal is.
“Ek het gepraat oor die historiese kandidature en ek het begin deur te sê dat indien mens teruggaan na 1984 en na my historiese kandidatuur waarna ek voorheen verwys het, indien my naam in 1984 Gerard Ferraro was pleks van Geraldine Ferraro, sou ek nooit as visepresidentskandidaat gekies gewees het nie,” het Ferraro op ABC se “Good Morning America” gesê. “Dit het niks met my kwalifikasie te doen gehad nie.”
Ferraro het gesê dat sy ʼn veertigjaarlange geskiedenis van opposisie teen diskriminasie van allerlei tipes het, ras inkluis, en dat sy woedend was oor die aanmerkings van David Axelrod, Obama se hoofmediastrateeg, want hy ken haar en haar rekord.
“David Axelrod, sy veldtogbestuurder, het verkies om dit as ʼn rassistiese uitspraak in te klee want telkens as enigiemand wat blank is kommentaar oor ras lewer – hy het dit met Bill Clinton gedoen en daarin geslaag; hy het dit met Ed Rendell (goewerneur van Pensilwanië en ʼn Clinton-ondersteuner) gedoen en minder geslaag; en hy gaan beslis nie slaag teen my nie,” het Ferraro aan CBS se “Early Show” gesê. “Hy moes my gebel het… Hy weet ek is geen rassis nie.”
Israeli-magte sit hulle veldtog teen sogenaamde militêre teikens in die Gaza-strook voort.
Meer as 130 mense is reeds dood sedert die aanvang van die Israeli’s se offensief as teenvoeter vir vuurpylaanvalle.
Die miltere offensief het daartoe gelei dat die Palestynse regering hom aan die vredesonderhandelings onttrek het.
Die Amerikaanse minister van buitelandse sake, Condoleeza Rice, is in die Midde-Ooste maar sy sukkel om die samesprekings weer op koers te kry.
Columbus, Ohio – Hillary Rodham Clinton het uiteindelik oorwinning gesmaak. Die Demokratiese kandidaat in die benoemingstryd het gisteraand beweer dat sy Obama in Ohio verslaan het deur te sê: “Ons is goed op dreef en ons gaan tot aan die einde vasbyt.”
Confetti het op haar neergereën toe sy tydens die Ohio-vergadering die verhoog bestyg het. Sy het die skare vertel dat haar prestasie ʼn oorwinning vir almal verteenwoordig wat “teen die planke was maar verseg het om uitgeslaan te word”.
Sy en Barack Obama was steeds in ʼn naby stryd gewikkel om die staat Texas in die nominasiestryd te buit en haar beweerde oorwinning in Ohio moes steeds bevestig word. Vroeër het Clinto Obama se reeks oorwinnings verbreek toe sy Rhode Island verower het, nadat Obama as wenner in Vermont verklaar is.
Ten spyte van die ommeswaai in haar geluk, staar ʼn opdraande stryd steeds vir Clinton in die gesig om Obama se voorsprong in afgevaardigdes uit te wis.
Die Palestynse owerheid het vredesonderhandelings met Israel opgeskort na Israel se offensief in die Gaza-strook waarin meer as 100 Palestyne dood is.
