‘n Malawiese motoris is in hegtenis geneem nadat hy glo ‘n verkeersbeampte gegryp en in sy motor se kattebak gestop het, het polisie in die Oos-Kaap gesê.
Volgens supt. Mzukisi Fatyela, was die beampte Sondag op diens in Mthatha toe die woedende man stilgehou het.
“Hy het eenvoudig net die beampte gegryp en in die kattebak toegesluit. Dis mos nie normaal nie. Die verdagte het ‘n verkeersbeampte ontvoer,” het Fatyela gesê.
Ooggetuies het die polisie ontbied en die Malawiër is later van die pad getrek en in hegtenis geneem.
Hy sal binnekort in Mthatha in die landdroshof verskyn op aanklagte van ontvoering en aanranding.