Pleidooi aan die Boere-Afrikaner

Dit is die vraag wat ons moet beantwoord. Iemand waarvoor ek baie respek het, het eendag vir my gesê om die oplossings van vandag se probleme te vind, moet ons na die verlede kyk. Ons voorsate het na die suidpunt van Afrika gekom om die Katolieke vervolging vry te spring. Hulle het vir geloofsvryheid gekom. Die gevolge van die Groot Trek is so relevant vandag soos toe. Vryheid was die kernslagspreuk. Dít is wat ons saamgesnoer het as 'n volk bestaande uit 'n klomp verskillende nasies, dít is wat ons een gemaak het. Dit is die gom wat ons by Vegkop, Bloedrivier en Majuba geplak het en is seker die mooiste woord in Afrikaans: VRYHEID.

Wat was die wenresep? Getrouheid aan ons Skepper en getrouheid aan mekaar en ons vryheidsideaal; dít is wat ons laat wen het.

Hierna het ons vyand sy taktiek verander en Mammon onder ons ingestuur. Van ons mense het geswig en verpand hulle siele; in die proses word ons volk van binne gewen. Die 3-jarige oorlog, Rebellie van 1914 en die verset tydens die Tweede Wêreldoorlog was alles pogings van ons volk om sy vryheid te herwin. Daardie verset was suksesvol en tot vandag toe word ons daarvoor gehaat. Ná onafhanklikheid was daar 'n vlietende oomblik van lig vir ons as volk maar met die dood van dr. Verwoerd was ons op 'n afdraandepad wat sy topspoed met die oorgawe van 1994 bereik het.

Kan ons oorleef? Ons mag nie eens in sulke terme dink nie; ons móét oorleef. Hoe gaan ons dit regkry? Ons moet terugkeer na die kernbeginsels wat ons voorsate 'n volk gemaak het. Nommer een: ons moet terugkeer na ons Skepper wat ons gemaak het en wat ons hier gewil het en Hom elke oomblik volg. In die tweede instansie moet ons weer getrou aan mekaar wees en nommer drie moet ons strewe na ons vryheidsideaal. Want alleenlik deur vry te wees, kan ons onsself wees.

Dit begin by my en jou, om verby al ons verskille te kyk en na Paulus se woorde te luister wat sê ons moenie struikelblokke vir mekaar wees nie. Wees getrou aan die verlede, dan is die toekoms verseker.