Die Sowetan het Dinsdag berig dat Motlanthe graag die vier "rassistiese moordenaars" wou vrylaat, maar die presidensie het in reaksie gesê die berig was "misleidend vir die publiek en van alle waarheid ontbloot".
Die vier AWB-lede Ryan Allbut, Alexander George Whitehead, Arend Christian de Waal en Hans Jacob Wessels, het volgens die koerant 'n "onbeskaamde rassitiese aanval op swart mense in Kuruman in die Noord-Kaap in 1995 geloods".
Die vier is in 2006 tronk toe gestuur toe hulle skuldig bevind is op aanklagte van strafbare manslag, aanranding en die bedoeling om ernstig te beseer.
Volgens die Sowetan het hulle name op 'n lys verskyn van 120 mense wat Motlanthe verlede maand vir presidensiële kwytskelding sou oorweeg. Hy is egter verhoed deur 'n koalisie van betrokke gesinne van die slagoffers en ses burgerlike organisasies.
Die Sowetan beweer die presidensie wou nie die lys, wat Adriaan Vlok insluit, vrystel nie.