Die cholera-uitbraak wat in Desember verlede jaar begin het, is onder beheer, het die departement van gesondheid Dinsdag gesê.
"Die hoeveelheid choleragevalle wat sover vermoed en bevestig is, blyk grootliks beperk te wees tot twee van die land se nege provinsies," het woordvoerder Fidel Hadebe gesê.
Limpopo het steeds die meeste gevalle van cholera, gevolg deur Gauteng.
Hadebe het die voorkoms van cholera in ander provinsies as "geïsoleerd" beskryf en het gesê owerhede doen toetse om die ware situasie rondom pasiënte vas te stel.
Hy het mense gewaarsku om in die komende maande versigtig te wees en het lede van die publiek aangemoedig om basiese higiëne toe te pas, soos om hande te was nadat die toilet besoek is en om vrugte en groente te was.