Zuma het op 'n voorligtingsessie aan swart sakemanne in Sandton gesê hulle (die ANC) het 'n probleem in Zimbabwe en hulle is bietjie bekommerd daaroor dat die Zimbabwiërs self blykbaar nie die probleem en die skade wat aan dit aan die land doen, insien nie.
Hy sê hulle hoop dat die Zimbabwiërs, in stede daarvan om te redekawel oor watter ministerie waarheen gaan, liewer besin oor hoe die land uit sy gemors gehelp kan word. Zuma sê Suid-Afrika en die ANC ondersteun die Zimbabwiërs.
Hy sê dit is belangrik om die werk wat voormalige president Thabo Mbeki vir Zimbabwe gedoen het, te erken. Mbeki het vir 'n lang tyd onder skoot gekom vir sy beleid van stille diplomasie.
Zuma sê Mbeki het die ingewikkelde en moeilike onderhandelinge hanteer en uiteindelik daarin geslaag om die partye bymekaar te bring… en daarmee 'n Afrika-oplossing teweeggebring.