Drie mense is reeds dood aan 'n virale hemorragiese koors, maar die oorsaak daarvan is onbekend. Die Centre for Disease Control and Prevention in Atlanta, in die VSA, is besig om die virus te ontleed en werk saam met Suid-Afrikaanse navorsers om die oorsaak te probeer vasstel.
Pelser het bevestig dat die hospitaalwerker wat oorlede is nie van die virus omgekom het nie. Dié werker is aan 'n breinsiekte oorlede, het sy gesê. Die eerste slagoffer was 'n ses-en-dertigjarige vrou uit Zambië. Sy is eers vir bosluiskoors behandel.
Pelser sê die inkubasieperiode vir die siekte is tussen 72 uur en 21 dae. Dit word deur liggaamsvloeistowwe oorgedra en nie deur die lugweë nie. Simptome sluit hoë koors, spierpyne, diarree en 'n uitslag in.