Verkiesing 2014

verkiesing1deur Leon Lemmer

Daar is gepoog om blankes so entoesiasties oor die 2014-verkiesing te maak as wat daar geesdrif in die ou Suid-Afrika voor en op stemdag was. In die huidige grondwetlike bedeling is daar egter geen kans dat ‘n doeltreffende, beskaafde, nie-kommunistiese, Europeesgeöriënteerde regering aan die bewind kan kom nie. Deur te stem, is dit deesdae vir die blanke onmoontlik om werklik “‘n verskil te maak.” Weens ongekwalifiseerde algemene stemreg in ‘n eenheidstaat sal die blankes se stemme vorentoe al hoe meer onbeduidend word. Enige politieke party wat substansiële kiesersondersteuning verlang, sal na die pype van die swart meerderheid moet dans. Hierdie strategie is reeds baie duidelik by bv die DA waarneembaar.

Net partye wat grootliks aan swart mag toegewyd is, bepaal hoe ons in die nuwe Suid-Afrika regeer word. Dit is waarom ek baie simpatie het met blankes wat nie gemotiveer kan word om te gaan stem nie. Deur te stem, gee ‘n mens by implikasie ‘n mate van legitimiteit aan ‘n bose opset wat ongetwyfeld in sonde ontvang en gebore is. Die grondslag waarop die nuwe Suid-Afrika funksioneer, is foutief. Geen kieser wat gesonde Europese waardes aanhang, kan vir lief met ons veel geprese grondwet neem nie. Die ooglopende kwalitatiewe verskille tussen mense word in hierdie uiterste vorm van demokrasie heeltemal geïgnoreer. Waarmee ons sit, is ‘n demokrasie wat baie meer ekstreem is as dié van bv die VSA, daardie voorste propagandis vir demokrasie.

Hillary Clinton, die vorige Amerikaanse minister van buitelandse sake (2009-2013), het nie die VSA-grondwet nie maar dié van Suid-Afrika aanbeveel by daardie Arabiese Moslem-lande waarvan die politieke beheer onlangs na die “Arabiese Lente” verander het, bv Egipte (Danny Danon, Israel: The Will to Prevail, New York: Palgrave Macmillan, 2012, Amazon Kindle 105). Dit beteken dat die Kopte, die oorspronklike christelike inwoners van Egipte, wat 10% van die bevolking uitmaak, in dieselfde mate deur die meerderheid oordonder word as die blankes in Suid-Afrika. Dít is die opset wat vir ons in die naam van magsdeling geskep is. Dit is dus verstaanbaar dat Tertius Delport, toe hy besef dat magsdeling in werklikheid magsoorgawe is, vir FW de Klerk aan sy baadjielapelle gegryp en hom wou gedonder het (Hermann Giliomee, Die Laaste Afrikanerleiers, Kaapstad: Tafelberg, 2012, p 424).

Wat het hierdie einste De Klerk na die afgelope verkiesing gesê? Dat dit vir hom so mooi is dat woongebied- en skoolintegrasie so vreedsaam vorder en dat ons aan die grondwet moet vashou, want dan sal alles wel wees. Voorheen het hy egter eie woongebiede en skole aan die blankes belowe en volgens Leon Wessels het De Klerk dit lank ernstig oorweeg om in die parlement teen die grondwet te stem. Volgens eie erkenning bring De Klerk deesdae die helfte van sy tyd in die buiteland deur. Hy ontsnap dus aan die omstandighede wat hy help skep het, terwyl gewone, nie-welvarende blankes verplig word om elke dag haglike omstandighede in die nuwe Suid-Afrika te trotseer.

Die skrywer Karel Schoeman is in Trompsburg gebore en het na sy aftrede weer daar gaan woon. Hy vertel in sy outobiografiese aantekeninge, Die Laaste Afrikaanse Boek (2002), hoe swartes die plaaslike skool oorgeneem en die ruite stukkend gegooi het. Die blanke kinders van die dorp en omgewing, wat met reg hierdie skool as hulle erflating kan beskou, word nou deur hulle ouers elders in skole geplaas in ‘n poging om hulle in ‘n mate teen verswelging te verskans. Dit beteken dat al hierdie wit kinders die geleentheid ontsê word om uit hulle ouerhuise skool toe te gaan en in hulle ouerhuise groot te word. Dit is sekerlik ‘n onberekenbare verlies vir sowel die ouers as hulle kinders en heel moontlik ook vir die land omdat hierdie kinders in die meeste gevalle ‘n beter vorming sou gehad het as hulle ouers ‘n groter aandeel daarin kon hê.

In Die Burger verskyn daar gereeld foto’s van groepe skoolkinders wat in Die Burger-strandhuis in Muizenberg tuisgaan. Die algemene patroon is dat eens blanke skole deur nie-wit kinders verswelg is. Omtrent al waaraan ‘n mens ‘n eens wit skool op hierdie foto’s kan herken, is aan die onderwysers wat steeds wit is. ‘n Sprekende voorbeeld hiervan is die foto van “gr 6- en gr 7-leerders van die Hoërskool Grabouw” wat vandeesweek (13 deser, p 3) gepubliseer is. In die see van nie-wit gesigte is daar enkele wittes. My hart bloei vir hulle.

Waarom is hierdie wit kinders in hierdie onbenydenswaardige situasie, afgesien van die klaarblyklike rede dat van hulle eie mense hulle land weggegee het? Daar is redes soos die volgende: (1) Hulle ouers aanvaar dat daar in die openbare lewe deesdae gedwonge rasse-integrasie is en reken dat hulle kinders maar so gou moontlik hieraan gewoond moet raak. Sulke ouers verteenwoordig myns insiens ‘n klein minderheid, want die meeste blanke ouers sou verkies dat hulle kinders ‘n (oorwegend) blanke skool bywoon. (2) Die ouers stel nie genoeg belang in die heil van hulle kinders nie en is nie afdoende bewus van die situasie waarin hulle kinders hulle op skool bevind nie. (3) Die ouers kan gewoon nie bekostig om vir die vervoer en verblyf van hulle kinders te betaal as hulle elders sou skoolgaan nie. Hierdie laaste rede geld sekerlik in baie gevalle. Dit is waarom daardie enkele wit skoolkinders in ‘n see van nie-wit “maatjies” my so ontstel.

Tydens die afgelope matriekeksamen het dit geblyk dat uitsluitlik seuns- of meisieskole die topmatrikulante lewer. Die Burger het toe navraag hieroor by skoolhoofde gedoen. Daar is toe gesê dat beter onderrig moontlik is omdat net seuns of net meisies in ‘n klas ‘n meer homogene groep daarstel en onderwysers dus beter aan hulle eiesoortige behoeftes kan voldoen. Ek het toe aan hierdie koerant geskryf en polities inkorrek beweer dat die etniese skeiding van klasse dan noodwendig tot die verdere verbetering van die uitslae sal lei. Dit is eintlik onnodig om by te voeg dat my skrywe nie gepubliseer is nie.

Wat my die moer in maak, is dat mense soos FW de Klerk, wat vir die huidige situasie verantwoordelik gehou kan word, uit sy luukse omstandighede vertel dat skoolintegrasie goed verloop. Dan is daar waaragtig mense, soos talle bevrydingsteoloë, wat skoolintegrasie “geregtigheid” noem, want hulle kyk eenogig uit ‘n nie-wit hoek. Dít terwyl wit kinders oneindige en onherstelbare skade ly. Ek begeer en gun vir my kinders en kleinkinders dieselfde kultureel-eie skoolopvoeding van hoë gehalte wat ek geniet het. Politici wat welvarend genoeg is om daagliks in groot mate hulle voortgesette apartheid en dié van hulle kinders en kleinkinders te koop, het soortgelyke omstandighede vir ons gewone wittes onmoontlik gemaak.

Nico Koopman is ‘n prominente bevrydingsteoloog en myns insiens ‘n nie-salige aktivis. Hy skryf oor die afgelope verkiesing: “Vandag mag geen party in die Suid-Afrikaanse politiek egter apartheid se waardes van verontmensliking, onreg en verdrukking najaag nie … ek wens dat veral partye in die ryke struggle-tradisie die waardes van die Grondwet sal verwesenlik” (Die Burger, 14 deser, p 9). Koopman sien klaarblyklik niks verkeerd in die barbaarse terrorisme en ander misdade van “die ryke struggle-tradisie” nie. Vir watter party moet ons volgens Koopman stem? Daardie party wat “die waardes van die lang stryd teen apartheid en kolonialisme … die beste beliggaam en bevorder.” Van ons word dus verwag om vir ‘n bevrydingsbeweging te stem. Dit maak nie saak hoe pateties hy as regering vaar nie. Koopman se kompas stuur hom konsekwent in die anti-blanke rigting.

Omdat meriete in die nuwe Suid-Afrika geminag word, word hoogs ondoeltreffende of onverantwoordelike indiwidue soms in verantwoordelike en daarby hoogs besoldigde poste aangetref. Ek kon nie glo dat diegene in beheer van die Oscar Pistorius-verhoor eers enkele dae voor die verkiesing agtergekom het dat die verkiesingsdag tot ‘n openbare vakansiedag verklaar is nie. As daardie regter, staatsaanklaer en verdedigingsadvokaat sulke algemene kennis nie het nie, in hoeveel ander opsigte skiet hulle kennis dalk nie ook tekort nie? So ‘n hofsaak is ‘n ernstige saak en hoort nie by uitstek as vermaak op bv ‘n eie televisiekanaal nie.

Nog ‘n sprekende voorbeeld van sodanige naïewe onkunde is Christo van der Rheede se brief in Rapport (11 deser). Hy beweer dat Rapport nie sy lesers mag ontmoedig om vir die ANC se stem nie, want die koerant het dan ‘n ANC-advertensie geplaas. ‘n Mens sou verwag dat Van der Rheede weet dat ‘n koerant nie noodwendig die produkte of dienste wat daarin geadverteer word, aanbeveel nie. Verder is dit ‘n wêreldwye verskynsel dat koerante gewoonlik ‘n bepaalde ideologiese, veral politieke, standpunt weerspieël. Wat Van der Rheede doen, is om in woord en daad die saak van die ANC te bevorder. Vandaar sy verwyt, gerig aan die blankes, oor die “wonde van die verlede.”

Van der Rheede maak ook, soos gebruiklik, voorbrand vir sy etniese groep deur van Rapport te verwag om teks deur “bruin intelligentsia” te plaas, waarvan hy, volgens eie oordeel, klaarblyklik een is. Soos die ATKV word die Afrikaanse Handelsinstituut (AHi) sedert 1994 in erge mate deur die transformasievirus geteister. Van der Rheede is deesdae die uitvoerende hoof van die AHi. Hy moet my maar verkwalik, maar elke keer as sy naam opduik, herinner dit my aan Laurence Peter se Peter Principle (1969): “People will tend to be promoted until they reach their level of incompetence.”

Die valse of tevergeefse entoesiasme by sommige blanke kiesers tydens die pas afgelope verkiesing het my laat dink aan blankes wat steeds elke jaar na bv die Strand gaan om vakansie te hou omdat dit ‘n familietradisie is wat sy oorsprong in die Suid-Afrika van weleer het. In die Strand is die see en die berge steeds daar en die lug is blou, want selfs die gehardste terroriste kon dit nie transformeer nie. Maar op die strand word die blankes verdring en voel hulle nie meer tuis of veilig nie. Baie van die winkels is deur inkommers uit bv Noord-Afrika en die Ooste oorgeneem. Bowenal het die Strand verval tot een van die vuilste en mees vervalle dorpe in die Kaapse Metropool. Voorheen het verkose raadslede en ‘n burgemeester, wat almal belang by die dorp het, hulle taak teen min, of geen vergoeding nie, vervul. Die stadsklerk was ‘n kundige persoon wat na verwerwing van die erkende formele kwalifikasie van die instituut van stadsklerke aangestel is.

Deesdae word die belastingbetalers van die Strand deur onbekende partygenomineerdes in die raad van die Kaapse Metropool in Kaapstad verteenwoordig. Hierdie politici se vergoeding en die belastinglas van die inwoners het eksponensieel toegeneem, terwyl dienslewering en infrastruktuurontwikkeling in dieselfde mate afgeneem het. ‘n Munisipale amptenaar se salarispakket kan R2.8 miljoen per jaar bedra (Die Burger, 16 deser, p 5). Die munisipaliteit se hoofbesteding is aan salarisse en die bystand van armlastiges. Soos in kommunistiese lande is die politieke mag op die vlak van plaaslike, provinsiale en nasionale regering dermate gesentraliseer dat hierdie instansies sowel ondoeltreffend as onpersoonlik geword het. Na die voorbeeld van die ANC se kommunistiese meesters is dit uitsluitlik die politieke party wat besluit oor wie die kandidate in verkiesings is. Die kiesers het hier geen werklike bedingingsmag nie. Vergelyk dit met die ou Suid-Afrika toe daar kiesafdelings was en ‘n kandidaat dikwels ‘n nominasiestryd in ‘n voorverkiesing moes wen voordat hy deur sy party as kandidaat in die verkiesing toegelaat is.

Die parlement, raad van provinsies, provinsiale wetgewers en die munisipale rade het toonbeelde van werkverskaffingsinstansies geword. In baie gevalle ontvang hoogs onverdienstelike politici hier buitensporige vergoeding en byvoordele. Daar is ook heeltemal te veel indiwidue wat uit hierdie trog vreet. Die Zuma-kabinet is baie groter as dié van bv die VSA. By Jacob Zuma is daar myns insiens geen sensitiwiteit te bespeur by die besteding van belastingbetalers se geld nie. Sy vier vroue en Nkandla simboliseer sy gebrek aan insig en selfdissipline en verhoog die druk op die belastingbetalers. Vir Zuma se herinhuldiging as staatshoof is R120 miljoen begroot (Die Burger, 16 deser, p 4).

Een van die ANC se skeppings is die sogenaamde Onafhanklike Verkiesingskommissie waarin hoofsaaklik ANC-kornuite dien. Honderde voltydse poste is geskep en gevul. Tydens verkiesings word derduisende verdere funksionarisse tydelik aangestel. In die tradisioneel blanke woonbuurt waarin ek woon, was daar nie net ‘n totale oorvoorsiening van beamptes in die stemlokaal nie, maar daar was voorspelbaar ook nie ‘n enkele blanke onder hulle nie. Dit is hoe demografiese verteenwoordiging in die praktyk toegepas word. In die ou Suid-Afrika het enkele amptenare in die Departement Binnelandse Sake verkiesings gereël. Dit was ‘n taak waaraan amptenare periodiek tyd bestee het. Die meeste van die tyd het hulle ander werk gedoen. Daar was toe ook nie sprake van ‘n leërskare buitelandse waarnemers wat teen groot koste dae lank hierheen kom, luuks vervoer en gehuisves word, en dan sertifiseer dat die verkiesing “vry en regverdig” was nie. Dit sou interessant wees om te weet met watter faktor (inflasie in ag genome) die koste per kieser of stemmer gestyg het. Heel moontlik is Suid-Afrika in hierdie opsig los voor die res van die wêreld.

Ek is in my siel oortuig dat verkiesings in die ou Suid-Afrika, wat die blanke stem betref, meer “vry en regverdig” as in die huidige opset was. Dat ‘n mens deesdae met ‘n beduidende getal oneerlike kiesers te make het, word gesimboliseer deur die inkmerk wat aangebring word op elke kieser wat wil stem; ‘n praktyk wat my teen die bors stuit omdat dit my menswaardigheid aantas, maar ook die wete tuisbring dat ons sekerlik nie meer deel van die Eerste Wêreld is nie. Deel van die nuwe vryheid wat ons sedert 1994 geniet, is dat ons almal soos vee gemerk word voordat ons mag stem. Dink net wat sou die reaksie gewees het as ‘n blanke bewind besluit het dat (nie-wit) kiesers eers gemerk moet word voordat hulle kan stem.

Dat die stemmery nie naasteby regverdig was nie, blyk uit die feit dat die African Independent Congress (AIC) verteenwoordiging in die parlement gaan hê; nie omdat so baie kiesers vir hom wou stem nie, maar omdat dit in ons jong demokrasie toelaatbaar is dat ongeletterde, oningeligte mense volle stemreg het. Die meeste AIC-stemme is glo te wyte aan die feit dat die kiesers hierdie party met die ANC verwar het. Maar sal enige van die uitgelese buitelandse verkiesingswaarnemers die elementêre integriteit hê om, na aanleiding van die AIC-fiasko, uit te wys dat die grondslag waarop die nuwe Suid-Afrika funksioneer foutief en gevaarlik (dus nie in landsbelang nie) is? Waarskynlik nie.

Jare lank was daar ‘n koerant met die leuse: “Lees Die Burger en gesels saam.” Deesdae kan hierdie koerantlesers weens eensydige, polities korrekte beriggewing dikwels nie meer saam gesels nie. Die enigste politieke party wat hom daarop toespits om die Afrikanersaak te dien, Front Nasionaal, is nooit voor of kort na die verkiesing in hierdie koerant genoem nie. Die lesers is dus ook glad nie ingelig oor waarvoor dié party hom beywer nie. Die VF+, wat beweer dat hy die heil van alle minderheidsgroepe op die hart dra, het wel dekking geniet. Ek het dikwels gewonder wat Bun Booyens sr (1916-2010), wat baie jare lank (1968-1981) Afrikaanse kultuurgeskiedenis aan die Universiteit Stellenbosch doseer het, van so ‘n nie- (indien nie anti-) Afrikanerkoerant sou dink. Hy sou geen troos of vrede gevind het in die wete dat sy kind, Bun Booyens jr, die huidige redakteur van Die Burger is nie. Die appel het in hierdie geval buitengewoon ver van die boom af geval.

Pas het Die Burger (16 deser, p 12) die eerste keer sy lesers bewus van die bestaan van Front Nasionaal gemaak. Leopold Scholtz skryf: “Dis allereers interessant dat ‘n uitgesproke rassistiese groepie soos die sogenaamde Front Nasionaal ‘n vernederende pak slae gekry het. Daardie soort HNP- of AWB-denke het selfs – dalk veral – by Afrikaners geen plek meer nie.” Let op die woordkeuse: “uitgesproke rassistiese groepie” en “sogenaamde”. Scholtz het uit die nuwe Suid-Afrika ontsnap en hom in Nederland gevestig. Hy het onlangs afgetree en is vir sy byverdienste van die goedertierendheid van sy vorige werkgewer, Media24, afhanklik. ‘n Mens kan dus verwag dat die teks wat hy lewer selfs meer as voorheen halsstarrig polities korrek sal wees.

Die dag na die verkiesing is Ilse Bigalke se rubriek (p 14) en Adam Small se gedagtes (p 15) oor die verkiesing in Die Burger gepubliseer. In die geval van Bigalke kan ‘n mens altyd reken op onoorspronklike maar polities korrekte gemeenplasige kommentaar. Small het onlangs sy triomfantelike terugkeer tot die openbare lewe gemaak en is klaarblyklik versoek om oor sy waarneming van die verkiesing te skryf. Die “bruin stem” moet immers gehoor word. Let op hoe vlot lieg Small: “Toe ons, as bruin mense, in 1994 vir die eerste keer ons kruisies op daardie papiertjies kon en gaan trek het.” Wat in Bigalke en Small se teks opval, is dat hulle gunstig na sowel Abraham Lincoln as Nelson Mandela verwys. Lincoln en Mandela is vir my moreel verwerplik omdat hulle militante swartes misbruik het om hulle politieke doelstellings te bereik, maar in die huidige polities korrekte klimaat word hulle gedrag deur baie mense as bewonderenswaardig geag.

Parlementslede is almal welgestelde mense en hulle sit in die raadsale nie omdat hulle noodwendig uitnemend gekwalifiseerd is om in belang van die land te handel nie, maar omdat hulle deur hulle politieke party benoem is. Dit is nogtans rasioneel feitlik onbegryplik dat nie een van hulle die moed van sy/haar oortuiging het om te sê dat ‘n verkiesing in die middel van die week sotlik en glad nie in die landsbelang is nie. In die ou Suid-Afrika het kiesers ‘n kort tydjie afgeknyp om te gaan stem, maar die res van die dag gewerk. Sedert die begin van ons jong demokrasie word die betrokke verkiesingsdag tot ‘n openbare vakansiedag verklaar, wat elke keer die verlies van miljarde rande vir ons ekonomie meebring. ‘n Woensdag, dus in die middel van die werksweek, word vir hierdie doel uitgekies, wat terselfdertyd verseker dat die ekonomie maksimaal daaronder ly. Geeneen van daardie politieke partye het die moed om voor te stel dat die publiek eerder so ‘n vakansiedag moet ontbeer nie, want dit kan so ‘n party stemme kos. Vanjaar was dit die vierde agtereenvolgende week waarin daar nie vyf weeksdae gewerk is nie.

Wanneer voorgestel word dat die vergoeding van politici verder verhoog word, is daar absolute eenstemmigheid by hierdie mense. Kan hulle dan nie maar net so eendragtig wees oor die hou van verkiesings oor ‘n naweek nie? Dit is immers wat in oorsese lande gedoen word, bv dikwels op ‘n Sondag. In die ou Suid-Afrika was ‘n Sondag as verkiesingsdag heeltemal onaanvaarbaar. Maar waarom nie die verkiesing op ‘n Saterdag hou sodat die publiek dan op die Sondag na die verkiesinguitslae kan luister nie? So ‘n opset behoort ‘n minimale nadelige invloed op die ekonomie te hê.

Nog ‘n elementêre knoop wat deur politici deurgehak behoort te word, is om bv die versperring van paaie tot ekonomiese misdaad te verklaar en die skuldiges swaar te straf. Ek weet dat geweld die tradisionele operasionele optrede van bv die ANC was en dat hy gevolglik nie graag die misdadige uitlewing hiervan by sy volgelinge aan bande wil lê nie. Maar ‘n uitweg wat dikwels gekies word, is om te beweer dat sabotasie in die ou Suid-Afrika geoorloof was, maar dat so iets nie meer in ons jong demokrasie toelaatbaar is nie. Betogings tydens hofsake is vir my net so onaanvaarbaar, want dit kan neerkom op intimidasie van diegene wat uitspraak moet lewer. Toegegee, regters word deesdae met die oog op transformasie pleks van om regskundige redes aangestel. Vakbonde moes lankal op die Margaret Thatcher-manier vasgevat gewees het, ens. Plaaslik word dinge deesdae op die Afrika-manier gedoen. Ek is eintlik opreg dankbaar dat ek heeltemal uit pas daarmee is.

Anders as vorige kere, het ek vanjaar gaan stem. Die enigste rede waarom ek dit gedoen het, is omdat ek op die nasionale vlak my stem ten gunste van Front Nasionaal wou uitbring. Op die provinsiale vlak kon ek dit nie doen nie, maar my gewete is skoon. Ek het by my besluit gebly om nooit vir die ANC of die ANC Lite (die DA) te stem nie. Dat die uitslae toon dat ek een van ‘n gideonsbende van skaars 5 000 is, ontstel my nie. 5 000 uit ‘n totale bevolking van 50 miljoen kan berge versit. Dit is die kwaliteit van hierdie mense wat tel en daarby kan en gaan hulle meer word. In die herlewing van die Afrikanersaak speel Praag ‘n onontbeerlike rol.

Ons is by die laagtepunt, maar ons staan ook aan die begin van die Afrikanerherlewing. As Praag voortgaan om publikasieruimte aan my te gun, hoop ek om in die komende maande periodiek die aandag op ander minderheidsgroepe te vestig wat soos Afrikaners ook vryheid en onafhanklikheid begeer. Ek dink aan groepe soos (in alfabetiese volgorde) die Armeniërs, Baske, Berbers, Israeli’s, Kataloniërs, Koerde en Skotte. By elkeen van hierdie groepe kan Afrikaners leer wat om te doen of nie te doen nie ten einde ons heil te bevorder. Na sodanige bespreking kan ‘n mens ‘n lys opstel van wat enersyds op die innerlike of geestelike vlak en andersyds op die waarneembare of materiële vlak gedoen moet word om die Afrikanerherlewing te bewerkstellig. Deurlopend sal Praag en soortgelyke instansies ‘n deurslaggende rol te speel hê.

By voorbaat kan gesê word dat al die pasgenoemde groepe oorvloediglik bewys lewer van hoeveel tyd, moeite en stryd dit verg om bv selfbeskiking en onafhanklikheid te verwerf. Dit maak dit al hoe moeiliker om te begryp hoe ‘n klein getal klein mensies, oftewel kabouters, en daarby geestelik armoediges, hierdie land binne ‘n kort tydsbestek verkwansel het.

62 thoughts on “Verkiesing 2014”

  1. Leon, dankie vir jou artikel. Daar is bykans nie een paragraaf waarop nie Amen gesê kan word nie. Tog wil ek op weer op my een ramkiekie met een snaar met my een snaar speel.

    Selfbeskikking in Suid Afrika is ‘n pypdroom. Ek bedoel ‘n politieke pypdroom. In die artikel oor Mampara Mpele het ek vanoggend gereageer op Leipold se aanmerkings. Ek het ook kommentare geplaas oor die gevoel van die swart mense. Hierdie is van die wat gelettered
    genoeg is om die internet te gebruik op EEN koerant die Sowetan se webwerf. Deur bloot die woord ‘white racist’ in te tik is daar 500 artikels gelys. Ek het een oor Orania geneem en daar was meer as 300 kommentare.

    Die algemene gevoel onder die swart kommentare was die van wantroue, ’n versugting na ons verdwyning, die vrees vir ‘n Afrikaner rebellie en die absolute nee vir Orania. Nou as ons prakties daaroor dink en kom ons sê ons kry ‘n stuk grond legitiem, hoe op aarde sal dit deur die swartbevolking aanvaar word? Sal enige wet plaaslik of internasionaal hulle passief daaroor kan maak sodat hulle dit kan aanvaar? Nee ek dink nie so nie. Ons het die bewyse dat die reg en die uitvoering van reg deur die owerhede klaaglik misluk.

    So, as ons dan so ‘n stuk grond kry sal die volgende moet gebeur. ‘n Versterkte stad met ‘n grag rondom hom gevul met 5000 krokodille en 5000 wagte op die mure sal gebou
    moet word. Daar sal ‘n aandklok reël wees om die wat buite die stad werk terug te laat kom vir beskerming. Die nyd en afguns sal nooit verander nie solank as wat hulle buite gehou word. Hoe ek ook al na so ‘n toekomvisie kyk kan ek net nie sien hoe hierdie honger, dom swartes ons die kans sal gun vir so ‘n volkstaat nie. Hulle het reeds bewys dat self die passiewe onbenullige Orania al klaar ‘n doring in die vlees is, wat van NOG so ‘n dorp of stuk land.

    Ek het ook al voorheen geskryf dat selfbeskikking nie juis vir die Afrikaner ‘n moontlikheid sal wees nie.

    1. Bloot as gevolg van die wêreld se persepsie van apartheid en dat die Afrikaner by naam daaraan gekoppel is. So enige strewe na selfbeskikking is gedoem van die begin af omdat die wêreld net sal sien as ‘n terugkeer na die gehate apartheid.

    2. Vir selfbeskikking is een van die voorwaardes dat die betrokke groep polities uitgesluit moet wees. Glad nie waar want al die Afrikaner neem lustig deel aan die demonkrasie
    van tiranniese massa oorheersing met ‘n glimlag op hulle gesigte en met ywerige
    doelgerigtheid.

    3. Die betrokke groep se taal moet onderdruk wees. Afrikaans sal tot ‘n mate behoue bly terwille van die bruines en sal mettertyd hulle eiendom word met AfriKaaps. Maar die bruines sal die minder Afrikaans teenstaan nie omdat hulle baie gemaklik in beide is.

    4. Die betrokke groep moet ook vanwee hulle godsdiens onder druk wees. En net daar dop ons die toets gruwelik. Kyk na die Christene en hulle sieninge van swart christene in hulle kerke. Die teologie het gesorg dat hulle as ons naaste en broers en susters gesien word. Solank as wat ons onsself christene noem is ons deel van die katolieke wereld. Katoliek beteken algemeen of universeel en solank as wat ons in die kerk belei;

    ….. Ek glo aan ‘n heilige, algemene Christelike kerk, die gemeenskap van die heiliges; of
    of soos die katolieke ook belei: We believe in one holy catholic and apostolic Church.

    Die kerke werk volluit vir eenheid onder die Pous, soek maar op die internet na Palmer ‘n exSuid Afrikaner en sien die gruele van openbaring, die H van Babilon wat oprys uit die hel.

    Dus, indien ons ons nie kan ontrek uit die wêreld, hergroepeer, herbenoem, want net die Boervolk het regtig nog enige aansien op papier in die wêreld, en ons mense terug
    kry nie, sien ek nie ‘n toekoms vir ons politieke verwagtinge nie. Dit is maar net my opinie en sal die gevolge daarvan dra.

    2. Leonor, jy huldig ‘n eerbare standpunt
      gegrond op nadenke. Onaangename gevolge daarvoor hoef jy nie te vrees
      nie. Aanvanklik het ek ook ‘n tuisland vir blankes as onprakties
      beskou. Vir my gaan dit uiteraard om ‘n tuisland vir nie-verloopte
      Afrikaners. Tuislande is presies wat ons aan die swartes gegun het.
      Jy wys tereg daarop dat swartes dit nie aan ons gun nie; selfs nie
      Orania nie. Swartes wil ten koste van blankes bly lewe, ekonomiese
      roofbou toepas, en blankes dwing om in die swart massa geassimileer
      te word. Ek, daarenteen, dink dat die Afrikaner net homself kan bly,
      sy identiteit kan behou, as hy wesenlik Europeër
      bly, sy kultuur en taal behou en nie verafrika nie. As
      Afrikaners kan ons onmoontlik deel van die nuwe Suid-Afrika se swart
      nasie word. Sodra aanvaar word dat Afrikaners anders is en anders wil
      wees en sal bly, is dit die begin van nasievorming en is daar
      noodwendig die onblusbare strewe na ‘n eie tuisland wat nie net
      geestelik moet wees nie maar verkieslik ‘n konkrete fisiese vorm moet
      aanneem.

      Na die roemlose magsoorgawe sal dit nou
      baie moeiliker wees om weer selfbeskikking te bekom, om van politieke
      onafhanklikheid nie te praat nie. Maar die Israeli’s het teen alle
      verwagting daarin geslaag om ‘n eie tuisland tot stand te bring, al
      moet hulle deurlopend veg om dit te behou. Ook by ander
      minderheidsgroepe kan ons kersopsteek, sodat ons kan koershou.

      Tereg wys jy daarop dat die christelike
      religie problematies is in die sin dat dit alle bekeerdes as
      “broeders en susters” ag (soos wat swartes om etniese
      oftewel rassistiese redes alle swartes broers en susters noem); dat
      alle bekeerdes eenders geag word in wat religieus as die belangrikste
      opsig beskou word. Afrikaners sal daarteen moet waak dat hierdie saak
      nie oordryf moet word nie; dat dit nie afbreuk moet doen aan die baie
      ander opsigte waarin daar fundamentele, onoorbrugbare
      kultuurverskille is nie.

      1. Dankie Leon vir jou repliek, waardeer dit. Ek stem saam dat ons sal moet kers op steek by die wat besig is om ‘n vorm van selfbestuur te kry. Tog wil ek noem dat Israel het onstaan, is gebou en word onderhou deur miljoene der miljoene dollars in buitelandse geld. Die Duitsers betaal nog steeds aan hulle “skuld’ en die Zioniste in die VSA maak seker dat die Israelies staande sal bly ten spyte van die druk van die Palestyne. Ons skatte is weggee en as ons nie hulp van binne kry deur ons eie mense wat geld het nie, sal ons aangewese wees op buitelandse hulp.

        Om aan te sluit by my eerste betoog en wat jy se; Ons sal onsself MOET herbou. Hierdie heropbou van ons volk sal met BAIE pyn gebeur want ons dierbare volk sal tot die besef moet kom dat ons heil, soos jy se, NIE sal kom met samewerking van die swart partye, groepe of die regering NIE. Elke stap wat ons sal neem, en elke persoon wat hom wil identifiseer met ons strewe, en elke organisasie wat hom wil beywer vir hierdie ideaal sal UITGEKRYT word as rassis of rassisties. Dit moet ons nou al weet. So, dan maak ons soos ‘n skilpad en herlaai of soos ‘n ystervark en skiet die penne.

        Om dit te vermag moet ons ons mense uit hierdie liberale slagyster te kry. Die eerste stap en die belangrikste stap is om die mense uit kerke te kry. Dit is die broeiplek van alle eenheids praatjies, christelik broers en susters, gelykheid voor God, vrede, vrede en sosiale verantwoordelikheid wat maar net beteken witskuld. Solank ons mense week na week hierdie goed hoor en na chrsitelike tv programme luister en die mooi christelike boekies lees sal die vryheidstrewe en strewe na eie ALTYD ondergeskik wees aan hulle opdrag as christene.

        Ek weet ek klink soos die duiwel maar die vrek weet, dit gaan my verstand te bowe hoe hierdie christene met hulle heiligheid kan staan en toekyk hoe ons mense verarm, verhonger en vermoor word nie maar nog steeds geld gee vir die arme swartes. En die enigste rede is dat hulle 1) nie die woord van God ken of verstaan nie 2) hulle die kerk en sy dogma aanbid en glo soos die Katolieke dat saligheid kan nie buite die kerk verkry word nie en 3) hulle doelbewus weer besig is met ‘n kruistog om die Boervolk en waarin hy glo te vernietig terwille van die dogma van die moederkerk en haar dogters.

        Weereens net ‘n opinie maar nog baie praat nodig.

        1. 2017 is het 500 jarig jubileum van de Reformatie en Wittenberg waar Luther z’n punten aan de kerkdeur timmerde staat voor deze gelegenheid al in de stijgers Leonor.

          Hoogtijd dat een kerk en geloof op basis van oorspronkelijke zuivere naastenliefde uit de huidige dwalende verloederende misere wordt getrokken of dat een bestaande kerk er naar terug kan deviëren.

          De moderne modieuze grotendeels door nepchristenen en omgekochte of angstige kerkvaders gedwongen opgedrongen acceptatie van naastenliefde van zo’n beetje alles wat anders is als onderdeel van ruimdenkendheid is voor vele integere welopgevoede ontwikkelde mensen een te klein jasje(baadje) wat niet en nooit zal passen.

          De huidige mondiaal heersende naastenliefde jaagt elk gezin, familie, dorp, stad, land en werelddeel UITELKAAR ten faveure van een stellteje ongelovige zelfvoldane, zelfgenoegzame, zelfingenomen, zelfzuchtige bedreigers en hun ongenaakbare elitaire bestaan.
          Gezinshereniging voor vreemdelingen is in Europa zo’n ingrediënt uit de koker van deze bedriegers terwijl bestaande gezinnen uiteen worden gejaagd.

        2. Leonora, jou mond kort sowaar jêm. Wat sal moet verander is die “rassis” denkwyse. Hulle hoef ons nie noodwendig as rassiste uit te kryt nie. Ons sal die respek wat hul eens vir ons gehad het moet terugkry. Wedersydse respek vir mekaar se taal en kultuur gaan ‘n vereiste wees.

          1. Dit is te laat Leana. Hulle onderdrukking van ons het olie op die vuur gegooi en nooit weer sal ons anders gesien word as rassiste nie. Ons sal nooit weer hulle respek terug kry behalwe as ons weer in beheer is. Wat ons mos weet nie gou gaan gebeur nie.

            Dan verder, ek wil nie hulle respek he nie. Ek wil niks van hulle he nie. Al wat ek van hulle verwag is om te weet dat ek nie soos hulle is nie, dat hulle my God Y moet vrees met ‘n geweldige vrees en dat ons volk altyd ‘n aanspraak sal he op hierdie land as ons eie. Gekoop in geloof en in bloed.

            Ek het geen respek vir hom of sy kultuur of sy godsdiens nie. Wil dit nie he of aanleer of eens oordink nie. Hy is kaf in die wind.

          2. Jy dwing VOORWAAR respek af !

            Sopas gelees dat daar NOG ‘n aanval was in die Wes-Kaap – die slagoffer, ‘n Blanke vrou (66) wat ‘n tuinwerker (NERF) gehuur het. Sy is ERNSTIG beseer, aanval uitgevoer met ‘n tuinvurk.

            ADDERGESLAG en die GROOTSTE LAFAARDS. Ek respek het vir ‘n swarte – NOOIT.

          3. komen de tuinwerkers nog wel toe aan de bloemen in de tuin Trip ?

            Er lijkt een hoos aan gewelddadigheid uit de ingehuurde omgeving te komen wat elke particuliere werkgever toch nu tot inkeer en heroverweging zal moeten brengen.
            Geen vreemden in uw huis. Daar zit niet zelden vroeg of laat een crimineel netwerk achter.

          4. Dit is geensins onmoontlik nie.

            Weet jy, daar word deesdae soveel berigte geplaas waar mense wat tuinwerkers huur, aangeval word. Ek het simpatie met bejaardes, en ek kan verstaan as hulle kinders nie naby genoeg woon om hulle behulpsaam te wees met takies in en om die huis nie, MAAR – daar is WEL Blanke tuindienste beskikbaar, waar die Blanke mans SELF die werk doen, en nie swartes in diens het nie.

            Die risiko daaraan verbonde om veral ‘n vreemde te huur, is net doodeenvoudig te GROOT.

          5. misschien denken of hopen vele Boere Afrikaners politiek welgevallig te kunnen zijn door een tuinwerker van bedenkelijke origine en met duistere achtergrond in te huren en DURFT menigeen geen blanke meer aan te stellen Trip ?

            In een land waar de heer Tutu armoede als excuus voor gewelddadige misdaad aanvoert terwijl hij de moorden eruit voorkomend ontkent is dat inderdaad reuze gevaarlijk en sterk af te raden.

          6. Hans, as ek maar my hart hier kon uitstort !

            Jy weet, die verskoning dat hulle arm is, vandaar die misdaad, is die grootste leuen ooit, honger mense verkrag, martel en vermoor nie mense ten einde kos of klere te kry nie – die barbare doen dit omdat hulle wegkom met moord !

            Ek gee GEEN swarte ‘n sent nie, daardie jare is LANKAL verby. Ek het GEWERK vir my geld en steeds kom ek klaar met net die nodigste, ‘n dak oor my kop, ‘n betroubare motortjie, klere om my te beskerm teen wind en weer, iets om die honger te stil, wat meer kan ek vra, maar ek het dit nooit nodig gevind om te moor, al het ek ook maar gesukkel om soms kop bo water te hou. God voorsien aan die wat hulself ten minste probeer help.

          7. Trippie, Leonor DWING nie respek af nie, sy VERDIEN dit! Iemand wat respek AFDWING is ‘n RESPEKLOSE persoon!

          9. Leonor, ek moes net die krom lyn reguit trek. Ek het soveel respek vir jou, Leana en nog ‘n paar hier op die forums. Julle dwing dit nie af op my nie. Julle verdien dit!

          12. more,
            is dit dalk die onweerswolke wat jy van praat? Oeps.
            Ek gaan klim maar gou in die kas.
            Gesels later weer. Moet bank toe vir my ou beste helfte.

          14. (Enjoy!!!) as jy van die bank af kom! Welkom by Praag maat en hoop nie jy hardloop weg nie! Dit gaan soms baie goed hier dan praat almal saam maar as die maan vol is is die hel los!

          15. Dagsê, en dankie. Wat betref die waarskuwing, ek sal maar versigtig wees en gou weer in my kassie gaan klim. HA HA. MOOI WEEK.

          18. Kassie se deure is intussen afgehaal maat! Jy gaan nêrens heen nie! Hier sal jy nou ‘n Praager wees tot Kingdom come! Jy sal gou leer “sidestep” is die inding hier en as hulle begin diaree gorrel koes jy met die spoegslag!!

          20. Kyk JAVR , Jy het nou my dag gemaak. Ek sit hier en lag , dit is te lekker. lekker man, lekker.

          21. Stem 100% saam – het ook geskater! Daar is nog ‘n persoon net soos JAVR; sy is Javvies… Buiten hulle twee het hulle geen gelyke hier nie.

          22. Vertel hom, dis net jy wat nie “sidestep” nie Dolk! Jy is die EEN heer tussen ons klomp wat net soos ‘n skild tussen ons vroue en aanvallers is!. Altyd besig om mense respek vir vroue te leer!

          23. Enige opgevoede man met selfrespek en oortuiging sal dit doen Javvies – baie is net te bang hulle verloor aansien – en bly daarom stil?? Wie weet.

            Helaas, onthou ‘n mens eerder omdat jy in die bresse vir geboeliede mense getree het en daarom onpopulêr is, as om onthou te word as ‘n mislike en twisgierige mens – wat nie uit hul foute kan leer nie.

            Wat mense nie besef nie is; mens probeer nie “punte score” nie! – ek verpes net hierdie herhalende mislike gedrag – dit kry net nie end nie – op en af – af en op!

          24. Ja dit is nimmereindigend en uitputtend! Ongelukkig to old a cat to be f….ed around by kittens nê! hie hie!

          26. Kyk, ek weet nou nie of die maan al skyn nie , maar hier is nou n babelse verwarring. JAVR komplimenteer vir Riempies en sy bedank vir Javvies. nou verneem ek daar is twee, JAVR en Javvies. Ek dink ons los dit vir die volgende verkiesing. Die dinge sal hulleself uitsorteer. Dankie Dolk.

          27. Hallo Andy.

            Die ding is… Daar is slegs maar een mens hier soos Javvies…, en dit is JAVR. 😉

          30. Leonor.. Hoe meer ek na jou “Hie-hie” kyk, hoe meer lyk dit soos hooikoors! ;-))

          31. Willie, as jy ‘n Boer was, het jy die welbekende spreekwoord geken – en nie probeer het om ‘n niksvermoedende Boerin-vrou te verneder nie.

            Net jy alleen en Nugter weet waarom jy Trippie herhaaldelik probeer verkleineer. Gee jou “gas-duim” ook aan jou die groen lig daarvoor Willie?

          32. Shame Dolfie, die niksvermoedende Boerin-vrou is seker vrou genoeg om op eie bene te staan of is jy party se beskerm engel?
            Verneder?

            NS: Ek is bly my “gas-duim” irriteer jou. Live with It!

          33. Beskerm-engel? Nee, dis bloot doodgewone goeie maniere – enige man sal dit doen – ek het dit net eerste raakgelees. Wily, buffelagtige maniere teenoor ‘n vrou dwing geensins respek af nie – inteendeel, daar is geen waardigheid om gemeen teenoor ‘n vrou te wees nie.

            Jou “gas-duim” irriteer my geensins nie – al wat ek verseker weet is dat dit NIE die van ‘n onpartydige persoon kan wees nie – tensy die persoon gemeen is.

          34. Weereen shame Dolfie. Hou op yl. Die “gas-duim” lees my kommentare soos dit werklik is en nie met verdraaings soos jy dit wil sien nê.

          35. Dolfie, as ek jou kommentaar lees wat nie die moeite werd is en ‘n klomp leuens bevat, kom ek agter dat jou “gas-duim” se oordeelsvermoë mhur toe is.

          36. Ek stem 100% saam met jou laaste sin Trippie! Ons was deur Kaapstad toe die naweek – het ‘n paar uur terug – met die Here se genade tuis gekom…

            Wat ek gesien en ervaar het was ‘n bevestiging… Die barbare is verseker nie…, my Naaste nie!

          37. Goeie more Dolk ! Ek hoop julle het die naweek terdee geniet en saam met jou dankbaar julle is veilig tuis.

            Ek wens jou toe ‘n baie geseende dag.

          38. Baie dankie Trippie – aan jou ook en elkeen by Praag ook.

            (Was maar deur vir vlugtige besigheid en by ons seun en vriende in Stellenbosch gekuier.)

          39. Dis altyd lekker om terug te wees op eie bodem nê Dolk! Dis mooi daar maar dis nie “bly daar mooi” vir my nie. Verkies my Transvaal! Baie bly om te sien ou Trips is terug by ons!

          40. Hallo Javvies, Kaapstad se buitewyk-plato’ (lokasies) lyk soos ashope! Ek kan dit nie anders beskryf as groteske teelplase – waar Boos haar fetusse by die tienduisende baar en soos skarrellende swart rotte aborteer nie…

            Sulke lokasies ontstaan nie net vanself nie – daar word bitter hard beplan en gewerk om sulke drog-stede te skep…

          41. Wat ‘n raak beskrywing! Ek is vrekbang vir vlieg en ek belowe jou die tye wat ek in die Kaap kom hardloop ek amper na die blik met vlerke om te klim vir die huis! Ek sal NOOIT daar kan bly nie!

          43. He he, altyd ‘n probleem as ons in die rys staan om uit te klim dan dring die lugwaardin aan dat ek eers die gatspiere moet verslap om die sitplek terug te kry! HAAT vlieg! Teen die tyd wat ek op hom is is ek so gedrug dat ek dink daar is ‘n hele rugbyspan Javvies aan boord en hulle “cheer” my aan!

          45. Dis waarvan ek hou! Ek hoef nie prentjies te teken nie! Jy het so goeie verbeelding dat jy dit kan “sien” gebeur! hehe

          46. More Maat!!! Ons is bly om jou terug te hê! Met Rieme wat trek en jy wat afwesig was was dit maar stil hier. Ek was self besig maar darem nou weer tydjies beskikbaar.As jy siek was hoop ek jy is beter, as jy weg was hoop ek jy het genoeg gerus want dit lyk of jy dit gaan nodig hê!

          47. Lekker om jou weer hier te sien – ek trek vandag my laaste paaiement en more kom die grootgoed – dan gaan ek slaap vir n paar dae 😉

          48. So die einde is in sig nê! Toe het jy nie eens die “verlede volk” nodig nie maar dit self gedoen en reg gedoen! Gewoonlik as hulle dit doen doen jy alles in elk geval weer oor! Dis menslik om met so berg voor te wens jy het hulle gehad maar as jy eers oor die berg is voel jy so verlig dat jy hulle NIE HET NIE! Trots op jou en moenie gaan slaat nie! Ons het jou nodig!

          49. Dankie Jawwies – gou opgespring en deurgespring en nou gaan ek wegspring – sien julle as alles goed gaan so tussen 3 en 4 vanmiddag weer. 😉

          50. JAVR
            Ag jinne Javvies, dankie vir jou mooi boodskappie. Waardeer opreg en ek weet dit kom uit jou hart.
            RIEMPIES
            Sterkte met hierdie laaste paaiement(e) – ek hoop jou verblyf in die nuwe huis gaan sommer baie aangenaam wees en vol vreugde, liefde, en geluk – Belangrikste natuurlik, goeie gesondheid.

          51. Dankie Trippie so n bietjie bemoediging is tans vir my meer werd as korale.

  2. Dankie mnr Lemmer, vir nog ‘n skerpsinnige ontleding. Dankie ook vir die interessante reaksies daarop. Eerstens, die oorgawe van 1994, mnr Lemmer, waarvan u ook melding maak: Hierdie is sekerlik die waterskeiding gebeurtenis in die geskiedenis van die Afrikaner, want dit is ‘n gebeurtenis waartoe hy vrywilliglik ingestem het. Self glo ek nie ons kan ooit daarvan herstel nie en dit was natuurlik die bedoeling. Die Afrikaner moes sy eie doodsvonnis as ‘n volk self onderteken en homself sodoende tot ewige onderhorigheid verdoem. Verdoem, nie deur ons vyande nie, nie deur FW De Klerk nie, nie deur Roelf Meyer en Leon Wessels en Pik Botha nie, maar deur onself. Hierdie is iets unieks in die geskiedenis van die mensdom. Ek weet van geen ander volk wat homself willens en wetens met ‘n pennestreep afgeteken het nie. Geen wonder die Afrikaner verag homself nie. Die enigste manier waarop die Afrikaner ooit weer kan opstaan, sal wees om as ‘n volk te belei: “Ons was in 1994 met waansin geslaan. Ons vra aan ons nageslag, vergewe ons, ons sal alles menslik moontlik doen om vir hierdie waansinnige en veragtelike daad te vergoed.” Daarsonder: Ikabod.

  3. Ek kan nou nog nie glo dat die land so maklik verkwansel is nie. Wat is nou eintlik vir die blanke beding? Vir die blanke om weer oor sy eie sake te besluit en om weer vry te wees wag daar n lang en uitmergelende stryd. As ek kyk na die apatiese houding van blankes oor die algemeen ,dan wil ek amper mismoedig word. Die vraag is ,waar begin ons en dit is en was nog altyd my wens dat blankes moet eers verenig. Dit is n voorvereiste. Om die toekoms verdeeld binne te gaan as n volk is n resep vir rampspoed. Om te hamer op wat gebeur het in 1994 sal ons nerens bring nie. As dit nou nog nie by mense ingesink het dat die ANC sal met niks tevrede wees behalwe die totale verarming en uitwissing van die blankes nie ,dan sal dit sake vir ons vorentoe net moeiliker maak. Ons hier aan die Suidpunt van Afrika is na meer as 300 jaar net so inheems soos die swartman. Dit het tyd geword om ons deel op te eis.

Maak 'n opvolg-bydrae