Kategorie: Internasionale nuus

Die Amerikaanse president Barack Obama het vir kalmte gepleit nadat die buurtwag-vrywilliger George Zimmerman Saterdag onskuldig bevind is aan moord op ‘n ongewapende swart tiener in die VSA.

Betogings het oral in die VSA voorgekom na die uitspraak in die guns van ‘n bruin veiligheidswag wat daarvan beskuldig is dat hy ‘n swart tiener vermoor het.

Zimmerman het gesê hy vrees dat sy vryheid vir die res van sy lewe ingeperk sal wees, nadat hy vrygespreek is.

Volgens sy broer, Robert, sal George voortaan gereeld oor sy skouer moet kyk.

Sy prokureur het gewaarsku dat die moontlikheid van wraakaanvalle na die hofsaak kan voorkom en dat die ‘n nasionale rassedebat kan ontketen.

Volgens George Zimmerman het hy in selfverdediging opgetree toe hy Trayvon Martin doodgeskiet het.

Duisende mense is opgesweep deur die Obama-administrasie se anti-wit rasse-vooroordeel, en het die strate ingevaar om te betoog na die uitspraak.

Betogers in Oakland,  Kalifornië, het vensters gebreek, polisievoertuie beskadig, vullishouers omgekeer en brande in die middestad van Oakland gestig.

Een polisiemotor is met die woorde “Kill Pigz” versier en Amerikaanse vlae is aan die brand gesteek. “Dood aan Zimmerman” is oral op mure aangebring, ook by die Alameda County Court.

Swart sportsterre en Twitter-gebruikers het Zimmerman openlik met die dood gedreig. ‘n Joodse tiener het selfs grootskaalse massamoorde op wittes op Twitter voorgestel.

Vrese dat jurielede se identiteite in weerwraak ontbloot sal word, is ook geopper.

Die sangster Beyoncé het ‘n minuut van stilte afgekondig by haar konsert, om teen die uitspraak kapsie te maak.

Die 19-jarige Dzhokhar Tsarnaev, wat van die bomaanvalle by die Boston-marathon aangekla word, het onskuldig gepleit op al die aanklagte teen hom.

“Onskuldig”, het Tsarnaev geantwoord op elk van die 30 aanklagte wat Woensdag tydens sy eerste openbare hofverskyning sedert April uitgelees is.

In sewentien van die aanklagte kan die doodstraf opgelê word.

Die tiener, wat na bewering ernstig beseer is in sy poging om die polisie te ontwyk, se arm was steeds in gips en sy linkeroog was opgeswel toe hy Woensdag verskyn het.

Die hofsaal was stampvol emosionele slagoffers van die bomaanvalle op 15 April by die eindstreep van die Boston-marathon.

Sommiges het by die hof met krukke opgedaag en moes deur familielede ondersteun word.

Daar was ook ‘n klein groepie van Dzhokhar se ondersteuners buite die hof.

Dzhokhar en sy broer, Tamerlan, was na bewering verantwoordelik vir die bomontploffings waarin drie mense dood en meer as 260 beseer is.

Tamerlan is ná ‘n skietery met die polisie dood.

Die verhoor is tot 23 September uitgestel.

Die Amerikaanse fluitjieblaser Edward Snowden het Venezuela se aanbod van asie aanvaar, het ‘n Russiese parlementslid Dinsdag gesê.

“Soos verwag is, het Snowden [Venezuela se president Nicolas] Maduro se aanbod om asiel aanvaar,” het Alexei Pushkov, hoof van die parlement se komitee vir internasionale betrekkinge, op sy Twitter-profiel gesê.

Snowden, ‘n voormalige regeringskontrakteur vir die Amerikaanse National Security Agency (NSA) wat besonderhede oor ‘n intelligensie-program onthul het , het op 23 Junie in Moskou geland.

Hy woon volgens die jongste berigte steeds in die transitogebied van ‘n lughawe in Moskou.

Die Verenigde Nasies is huiwerig om die afsetting van die Egiptiese President, Mohamed Morsi as ‘n staatsgreep te beskryf.

Die VN Woordvoerder, Martin Nesirky sê dat die militêre ingryping onwenslik is en dat daar so gou moontlik na ‘n burgerlike regeringsvorm beweeg moet word, maar hy wil dit nie ‘n staatsgreep noem nie.

Suid-Afrika het vroeër ‘n besluit deur die Afrika-unie ondersteun om Egipte uit die organisasie te skors weens sy oortreding van die unie se wetgewing wat ‘n ongrondwetlike verandering van regering verbied.

Amerika het gesê hy sal voortgaan om hulp ten bedrae van $1,3 biljoen per jaar aan die Egiptiese weermag te verleen. 

Dié aankondiging kom ten spyte van die weermag se rol in die ontseteling van die demokratiese verkose president, Mohamed Morsi, en soldate se volgehoue geweld teen betogers.

Meer as 50 van Morsi se ondersteuners is Maandag in Kaïro dood toe soldate op hulle losgebrand het.

“Dit sal nie in die beste belang van Amerika wees om onmiddelik ons hulpprogram aan Egipte te verander nie,” het ‘n woordvoerder vir die Withuis, Jay Carney, Dinsdag gesê.

Kragtens wetgewing is die VSA verplig om alle hulp aan Egipte op te skort indien die demokraties verkose regering deur ‘n staatsgreep omvergewerp word.

Die tussentydse president van Egipte, Adly Mansour, het aangekondig dat parlementêre verkiesings vroeg aanstaande jaar gehou sal word.

Mansour het ‘n dekreet uitgevaardig waarvolgens ‘n paneel, wat die grondwet moet wysig, binne 15 dae gevorm moet word.

Die grondwetwysigings moet oor ‘n tydperk van vyf maande plaasvind. Die verkiesing word vir Februarie beplan, hoewel ‘n presiese datum nie bekendgemaak is nie. Voor die verkiesing kan plaasvind moet die Islamitiese grondwet van die uitgesette president Mohamed Morsi gewysig en in ‘n referendum bekragtig word.

Die aankondiging volg nadat 51 mense, waarvan die meeste ondersteuners van Morsi is, gister buite hul barakke doodgeskiet is.

Morsi is vermoedelik in die barakke in aanhouding.

Die hoofregter van die konsitusionele hof in Egipte, Adli Mansour word vandag as tussentydse leier van dié land ingesweer, nadat die eerste demokratiese-verkose president Mohammed Morsi gister deur die weermag uit die kussings gelig is.

Morsi se Moslem Broederskap- party meen dié stap was ‘n militêre staatsgreep.

Morsi en verskeie van sy assistente word deur militêre intelligensie in Kairo aangehou, terwyl 40 senior leiers van die Moslem Broederskap verbied is om die land te verlaat.

Die hoof van die weermag het gisteraand aangekondig dat Morsi se regering omver gewerp is en dat die grondwet opgeskort is. Die tussentydse regering sal in beheer van die land wees tot vervroegde verkiesings gehou word.

Die Moslem Broederskap in Egipte sê die afgesette president Mohammed Morsi word by ‘n militêre basis aangehou.

Die weermaghoof het tydens ‘n regstreekse televisieuitsending gesê ‘n tussentydse regering sal aangewys word wat die weg sal baan vir presidensiële en parlementêre verkiesings.

Intussen het die verskeie Westerse leiers kommer uitgespreek oor die ontsetting van Egipte se eerste demokraties-verkose president en die hoop uitgespreek dat Egipte se demokrasie spoedig herstel kan word.

Die Amerikaanse president, Barack Obama het in reaksie op die jongste verwikkelings gesê hy hoop die land kan gou terugkeer na ‘n verkose burgerlike regering.

Die EU het die bloedvergieting betreur wat met die onlangse betogings gepaard gegaan het.

Minstens 50 mense is in die geweld dood. Die Verenigde Nasies se sekretaris-generaal Ban Ki Moon het ook sy kommer uitgespreek oor die weermag se ingryping in die land.

‘n Chinese wet het Maandag in werking getree wat boetes of tronkstraf vir kinders inhou wat nie hul ouers besoek nie.

‘n Dogter van ‘n Chinese bejaarde vrou is beveel om haar ma  ten minste een keer elke twee maande te besoek. Dit was die eerste vervolging onder die nuwe wet die bejaardes te beskerm.

Die wet is uitgevaardig te midde van stygende kommer dat China se vinnige ontwikkeling sy tradisionele uitgebreide families onder druk plaas weens ‘n toenemende aantal “leë nes” huise.

Verslae oor bejaardes wat verwaarloos of mishandel word deur hulle kinders het die land geskok.

‘n Egpaar van Wuxi, in die oostelike provinsie Jiangsu, het ingestem om te sorg vir die bejaarde vrou, maar het haar nog nie besoek nie, want sy woon by seun.

Die hof in Beitang-distrik het besluit dat die egpaar die moeder móét besoek, ten minste een keer elke twee maande, en op ten minste twee van China se nasionale vakansiedae.

Dit het ook gesê die egpaar kan vergoeding betaal as hulle haar nie besoek nie.

Die wet op die beskerming van die regte en belange van die Bejaarde sê dat familielede hul familie ouer as 60 “dikwels” moet besoek, maar gee nie ‘n presiese definisie van die term nie.

Kenners het kommer uitgespreek dat die nuwe wet moeilik sal wees om af te dwing en China se webgebruikers spot daarmee as ‘n “belediging vir die volk”.

Die wet is in Desember gewysig na gereelde verslae van bejaarde ouers wat deur hul kinders verwaarloos word. Dit sê kinders van ouers ouer as 60 moet toesien dat daar daagliks aan hulle finansiële en geestelike behoeftes voldoen word.

Alhoewel respek vir die bejaardes diep ingeburger is in die Chinese gemeenskap, het drie dekades van markhervorming China se tradisionele uitgebreide familie onder druk geplaas, en daar is min bekostigbare alternatiewe, soos aftree-oorde.

Meer as 14% van China se bevolking, of 194 miljoen is ouer as 60, volgens die jongste syfers.

Die VN beraam dat, teen 2050, sal 30% van die Chinese 60 of ouer wees. Die wêreldwye gemiddeld is 20%.

‘n Groep ongeïdentifiseerde mans het Woensdagoggend 16 mense in Kaïro doodgemaak en sowat 200 beseer in ‘n aanval op ‘n saamtrek ter ondersteuning van die Egiptiese president, Mohamed Morsi,” het amptenare van die gesondheidsministerie gesê.

Die aanval het plaasgevind te midde van Morsi se weiering om gehoor te gee aan die eise van duisende betogers dat hy as leier van die land bedank.

Morsi weier ook om gehoor te gee aan ‘n ultimatum deur die weermag, wat hom 48 uur tyd gee om die onrus in sy land op te los, en sê hy beskou dit as ‘n poging van die weermag om ‘n staatsgreep uit te voer.

Michelle Obama:se onlangse besoek aan die gevangenis op Robbeneiland moes ‘n blywende indruk gelaat het. Sy het pas haar eie lewe in die Withuis beskryf as soos om in ‘n tronk te woon.

Die Amerikaanse Eerste Dame, Michelle Obama het Dinsdag die lewe in die Withuis as soos om in ‘n “baie mooi gevangenis” te leef, beskryf.

Obama se kommentaar het gekom tydens haar gesprek met die voormalige Eerste Dame Laura Bush by die Afrikaanse Eerste Damespberiaad n Tanzanië tydens ‘n onderhoud met die joernalis Cokie Roberts.

Roberts het opgemerk dat Martha Washington, die eerste Eerste Dame, die lewe in die rol as soortgelyk aan ‘n staatsgevangene beskryf het.

Obama het gesê sy is lief vir haar werk en het gevind dat dit bevrydend in sommige opsigte is, maar beperk in ander.

“Daar is ‘n paar gevangenispelemente daaraan het sy geskerts. “Maar dit is ‘n baie mooi tronk.”

Voormalige Eerste  Dame Laura Bush het die gehoor daaraan herinner dat Obama ‘n sjef tot  haar beskikking het.

“Mens kan nie kla nie,”  het Michelle Obama toegegee. “Maar daar is beslis elemente wat beperkend is.”