Nuus Archives - Page 943 of 1583

Martin Luther King was ‘skynheilig’, ‘aaklig’

Video-opnames van onderhoude met Jackie Kennedy kort ná oudpres. John F. Kennedy se sluipmoord toon ‘n ander sy van die ikoniese Amerikaanse presidentsvrou.

Die versameling onderhoude is deur die historikus Arthur Schlesinger in 1964, vier maande ná Kennedy in Dallas doodgeskiet is, gemaak.

Die video-opnames is Dinsdag in ‘n twee uur lange program op die ABC-netwerk uitgesaai en ook in boek-vorm met bykomende CD’s bekendgestel.

Haar baie onvleiende uitlatings oor Martin Luther King, die swart bevryder, het tonge los. Volgens bronne het King graag seksorgies gehou en mev. Kennedy is blykbaar deur Edgar J. Hoover van sy onbetaamlike gedrag ingelig. Kennedy noem hom in die video “skynheilig” en “aaklig”.

King het glo selfs die dag voor sy geskiedkundige “I have a dream”- toespraak, só ‘n orgie gereël.

Sy beskryf die Franse leier, Charles de Gaulle, as “moedswillig” en die Franse in die algemeen as “nie baie gaaf nie” en “selfsugtig”.

Sy verwys ook na Indira Gandhi, wat later premier van Indië sou word, as ‘n “bitter, opdringerige en aaklige vrou”.

Die versameling onderhoude is getiteld “Jacqueline Kennedy: Historic Conversations on Life with John F. Kennedy”.

Kennedy se liefde vir haar man is duidelik sigbaar in die meer as agt ure van onderhoude en ondanks haar openhartige aanmerkings oor ‘n verskeidenheid onderwerpe, noem sy nooit die president se vermeende ontrouheid aan haar nie.

Hy was “die mees onselfbewuste mens wat ek ooit gesien het,” het Kennedy, wat in daardie stadium 34 jaar oud was, gesê.

Sy vertel in die video-opnames hoe haar man, wat twaalf jaar ouer as sy was, hul dogter Caroline geleer het hoe om te swem en hoe hy in die bad, aan tafel en selfs terwyl hy aangetrek het, boeke gelees het.

‘n Beskeie Kennedy dring ook tydens die onderhoud daarop aan dat haar rol was om haar man te dien en nooit self in die politiek betrokke te raak nie.

“Ek kry al my menings van my man … Hoe kan ek enige politieke menings hê, jy weet? Syne sou altyd die beste wees,” sê sy.

Gordhan sê munisipaliteite moet ophou geld mors

Pravin Gordhan, minister van finansies, het Woensdag die tesourie se jongste munisipale oorsigverslag in die parlement bekendgestel. Hy het munisipaliteite berispe oor hul geldmorsery en gekla oor “militante” belastingbetalersunies wat dienstegeld weerhou.

Die verslag toon dat R27 miljard tussen die 2009 tot 2010 gespaar kon gewees het deur onnodige uitgawes te besnoei.

Jaarlikse meningsopnames het getoon dat die helfte van landsburgers geen vertroue meer in hul plaaslike regerings het om noodsaaklike dienste te lewer nie.

Meer as ‘n honderd diensleweringsoptogte is in 2010 gehou. Dit is die meeste sedert 2004. Daar is ook ‘n merkbare toename in die aantal “militante” belastingbetalerverenigings wat dienstegeld weerhou, het hy gesê.

Intussen het personeelaanwas tussen 2006 en 2009 met 4% toegeneem, maar munisipaliteite se salarisrekening in dieselfde tydperk het in sekere gevalle met 52% gestyg. Munisipale bestuurders by distriksrade se salarisse is “buitensporig hoog”, lui die verslag.

Die oorsigverslag dui aan waarop munisipaliteite sal moet besnoei. Duur motors en selfone, borgskappe, kos, weelderige kantore, asook buitelandse reise en konsultante word gelys as “oorbodig” en kan ‘n besparing van 15% aan uitgawes meebring.

“Los die uitspattighede en kry jul beplanning, begrotings, dienslewering en burokrasie reg,” het Gordhan Woensdag tydens ‘n parlementêre inligtingsessie gesê.

Meer mense het die afgelope drie boekjare toegang tot noodsaaklike dienste soos water, elektrisiteit en vullisverwydering verkry, maar die vertroue tussen belastingbetalers en plaaslike regering is glo die “grootste struikelblok”.

Die instandhoudingsagterstand in water-infrastruktuur alleen beloop R13 miljard. Paaie- en elektrisiteitsnetwerke se herstel is ook agter, het die minister gesê. Agterstallige munisipale skuld was teen Desember tot R62,3 miljard opgehoop. Dit verteenwoordig ‘n toename van 10% vergeleke met die vorige jaar.

Gordhan het gesê die fiskus verkeer onder druk weens die ekonomiese onsekerhede en nuwe raadslede moet van sulke “fieterjasies” afsien.

Александр Фильчаков

Boer oorleef plaasaanval, 3 dae lank opgesluit

‘n Bejaarde boer, Petrus Schrooder van die plaas Wolwekraal in die Richmond-omgewing, is Saterdag deur twee mans op sy plaas aangeval. Schrooder woon alleen op die plaas.

Hy is egter eers Dinsdagmiddag deur ‘n vriend gekry en dieselfde aand het speurders van De Aar die 68-jarige slagoffer se rewolwer in die bruin woonbuurt Waterdal opgespoor. Die polisie sê hulle verwag om binnekort nog arrestasies in verband met die voorval.

Schrooder het na die aanval besluit om homself in die plaashuis toe te sluit. Die plaas het nie ‘n telefoon nie, en die boer se selfoon is deur die aanvallers gebuit.Hy kon dus nie hulp ontbied nie.

Die beseerde boer se vriend het die polisie Dinsdagmiddag ontbied en hy is daarna behandel vir sy beserings. Sy bakkie is nie gesteel nie omdat die boosdoeners nie die plaashek oopgesluit kon kry nie.

Linkse Dene wat op regses spioeneer, vas

Tot ses persone kan ses jaar in die tronk in Denemarke in die gesig staar omdat hulle deelgeneem het aan onwettige koverte inligtingsinsameling en geweld teen lede van die regtervleuel.

Redox se openbarings in Augustus van die bestaan van ‘n geheime regse netwerk in dié land is gebaseer op inligting wat onwettig deur informante ingesamel is.

Lede van die linkse navorsingsorganisasie Redox word verdink daarvan dat hulle onwettig opgetree het in die insameling van inligting asook van aanranding.

Dit kom nadat ‘n ondersoek deur die plaaslike intelligensie-agentskap PET in samewerking met die polisie, wat 18 maande geduur het, bevestig het dat minstens een van AFA se lede -‘ n 25-jarige – ‘n belangrike figuur in Redox was vir die insameling van inligting oor die sogenaamde “ver-regses”.

Verskeie lede van die linkse groep Antifascist Aksie (Antifascistisk Aktion of AFA) word ook daarvan beskuldig dat hulle geweld gebruik het om die vergaderings en byeenkomste wat deur die regtervleuelgroepe gehou is, te ontwrig.

Polisie sê dat die ses mense wat aangekla word elk tot minstens ses jaar se tronkstraf in die gesig staar.

Terwyl Redox beweer hulle het geen bande met die AFA nie, is die 25-jarige na wat berig word ook ‘n lid van die groep wat beskuldig word van die gebruik van koverte spioenasie om aanvalle te beplan.

‘n Klopjag het ‘n uitgebreide databasis van inligting oor ‘n groot aantal individue blootgelê, insluitende hul geheime pinnommers, bankbesonderhede en opvoedingstatus, sowel as inligting oor hulle gesinne, families en hul aktiwiteite. Foto’s van regses is glo verkry deur koverte agtervolging.

Die inligting is gebruik om lede van regse organisasies swart te smeer, soos in die geval van Dan Jensen wat na bewering sy werk verloor het nadat inligting vrygestel en gepubliseer is deur die poniekoerant ekstra Bladet wat geopenbaar het dat hy aktief in die Deense Front (Dansk Front) is.

Minister vaar uit teen belastingbetalersvereniging

In ‘n duidelike vewysing na die Nasionale Belastingbetalersunie onder leiding van mnr. Jaap Kelder, het die minister van finansies, Pravin Gordhan, gesê dit is “geheel en al onaanvaarbaar” vir belastingbetalersgroepe om te weier om hul plaaslike belastings te betaal en hul geld in trustrekenings te plaas.

“Dit is geheel en al onaanvaarbare gedrag,” het Gordhan vandag aan die media gesê tydens die oorsig oor plaaslike regeringsbegrotings en -uitgawes.

“Dit is iets waaroor ons met die SAPRV (die SA plaaslikeregeringsvereniging) gesprek wil voer en duidelik die boodskap wil oordra dat indien ‘n mens in Suid-Afrika woon en n Suid-Afrikaanse burger is, gebruik jy munisipale dienste – en jy moet daarvoor betaal.”

“Gordhan het gesê die opkomende “neiging” wat deur beslatingbetalersgroepe getoon word was iets wat “baie sterk besprekings” vereis.

“Hierdie tipe nie-nakoming van die wet is glad nie aanvaarbaar nie.”

Hy het gesê baie van die geskille wat belastingbetalersgroepe met hul munisipaliteite het, kan op “die Suid-Afrikaanse manier” opgelos word.

“Ons sit om ‘n tafel, ons sê wat ons uitdagings is en ons vind praktiese oplossings daarvoor. Om spanning en antagonisme te skep, dra niks by nie.”

Gordhan het gesê dat die Tesourie met die SAPRV en “groter munisipaliteite” sal saamwerk om meer besliste skuldinvorderingsprosedures in te stel en skuld af te skryf wat “oninvorderbaar” is.

Hy het gesê dat in die lig van die fiskale beperkings wat deur die regering in die gesig gestaar word, moet politieke en administratiewe leiers meer doen om “onbehoorlike” aankooppraktyke te verminder, asook bedrog en korrupsie.

“Daar is sonder twyfel heelwat meer wat op dié gebied gedoen kan word,” het hy gesê.

Die Tesourie “sien uit” daarom met die ouditeur-generaal en die rekenmeester-generaal saam te werk om “strenger vereistes in te stel” en om beter samewerking van amptenare en politieke leiers te verkry ten einde te verseker dat belastingbetalers se geld nie sonder regverdiging “verkwis” word nie.

Munisipaliteite, het hy gesê, moet meer doen om te verseker dat hulle besluite neem om besteding van beter gehalte te bewerkstellig.

“Munisipaliteite moet daarop fokus om dienste te lewer, kapasiteit te bou, om ekonomiese infrastruktuur te bou, om die regte hoeveeheid kapitaal op infrastruktuur te bestee en om sowel infrastruktuur in stand te hou as om infrastruktuur te ontwikkel.”

Hulle moet ook “van uitspattighede vergeet” soos om ‘n “splinternuwe Mercedes of iets van die aard te koop”.

“Dit sal ‘n meer beduidende bedrae lewer om munisipaliteite in staat te stel om die Testourie in staat te stel om die spanninge en druk te hanteer van die baie onsekere ekonomiese omgewing waarin ons tans leef.”

AU vergader in SA oor Libië

Die Afrika-Unie (AU) se komitee oor Libië sal Woensdag in Suid-Afrika vergader, het die president se kantoor Dinsdag gesê.

Bongani Majola, ‘n woordvoerder, kon nie uitbrei oor wat bespreek gaan word nie.

Genl. Mohamed Ould Abdel Aziz, die president van Mauritanië, sal die vergadering lei. Behalwe vir Suid-Afrika sal leiers van Uganda, Mali en die Demokratiese Republiek van die Kongo ook die vergadering bywoon.

Die AU en Suid-Afrika het tot dusver geweier om die Nasionale Oorgangsraad (NOR) as die nuwe regmatige regering van Libië te erken.

Die AU het probeer om ‘n vredesooreenkoms tussen die NOR en Moeammar Gaddafi, die voormalige leier van Libië, se regering te bemiddel.

Die Suid-Afrikaanse kabinet het verlede week herbevestig dat hy steeds dink die AU se “padkaart” om die krisis in Libië op te los die beste opsie is.

President Jacob Zuma het intussen aan die Parlement gesê Suid-Afrika se betrekkinge met Botswana, gaan van krag tot krag. Botswana het reeds die NOR van Libië erken.

Zuma het gereageer op vrae van die leier van die ACDP, Kenneth Meshoe, oor onlangse opmerkings deur Malema oor ‘n bewindsverandering in Gaberone.

Лобановский Харьков

Eskombaas oorleef heli-ongeluk

Ses mense het ‘n noue ontkoming gehad toe ‘n helikopter in Morwaneng, 45 km buite Groblersdal, neergestort en aan die brand geslaan het, het paramedici Dinsdag gesê.

“Al ses insittendes kon daarin slaag om te ontsnap voor die helikopter aan die brand geslaan het,” het Jeff Wicks, woordvoerder van Netcare911, gesê.

Die mans is op die toneel behandel, maar wou nie hospitaal toe gaan nie.

Wicks het gesê geen skade is aan eiendom aangerig nie.

Brian Dames, uitvoerende hoof van Eskom, drie Eskom-bestuurders, Steve Lennon, Louis Maleka en Kerseri Pathe, en twee vlieëniers was in die helikopter ten tyde van die ongeluk.

Hilary Joffe, ‘n woordvoerder van Eskom, het gesê die Burgerlugvaartowerheid (BLO) ondersoek die voorval.

Jong wit vrou deur taxi gesleep

Die toestand van die jong wit vrou wat Dinsdagoggend in Johannesburg deur ‘n taxi omgestamp en sowat 700m ver gesleep is, is kritiek. Sy verkeer onder swaar verdowing en sal binnekort geopereer word.

‘n Bloedstreep was op die pad te sien.

Kim McCusker (25), ‘n advokaat, en haar verloofde het ondersoek ingestel nadat ‘n taxi teen hul bakkie gebots het.

McCusker het voor die taxi gestaan, terwyl haar verloofde met die taxibestuurder gepraat het. Die bestuurder het volgens ooggetuies op ‘n dreigende wyse vorentoe beweeg en die jong vrou opsetlik omgestamp.

McCusker het toe haar balans verloor en geval, waarna die bestuurder weggery het. Sy was onder die taxi vasgekeer en is meters ver in Lonehill Boulevard in die noorde van Johannesburg gesleep.

Sy het erge beserings opgedoen en haar familie is van plan om ‘n saak van poging tot moord by die polisie aanhangig te maak.

Фильчаков прокурор

Sowetan se seksfoto’s veroordeel

Die publikasie van prominente foto’s van twee beamptes wat seks gehad het terwyl hulle aan diens was deur die Sowetan, was nie in die openbare belang nie, het die Persombudsman beslis.

“Dit was nie nodig om terug te val op die prominente en eksplisiete publikasie van die foto’s om die boodskap oor te dra nie… daar was geen ‘openbare belang’ daarin om dit te doen nie,” het Johan Retief, adjunk-persombudsman, beslis.

Hy het die koerant beveel om op beide die voorblad en tweede blad ‘n verskoning te plaas.

“‘n Visuele voorstelling van seksuele gedrag mag nie gepubliseer word nie, tensy ‘n legitieme argument van openbare belang anders bewys.”

Die koerant se adjunk-nuusredakteur, Khangale Makhado, het Dinsdag gesê prokureurs word gekonsulteer, maar dit is nog nie seker of hulle appél sal aanteken nie.

“Dit is nog oop, die prokureurs sal ons adviseer.”

Die omstrede foto’s, wat op 15 Augustus op die voorblad en tweede bladsy gepubliseer is, het gewys hoe ‘n beampte van korrektiewe dienste en ‘n vroulike polisiebeampte seks in ‘n hospitaal gehad het terwyl hulle aan diens was. Retief het gesê die storie self was wel in die openbare belang, aangesien die betrokke persone deur belastingbetalers betaal word.

Die koerant het op verskeie maniere die perskode oortree – onder meer deur nie sensitiwiteit te toon aan die koerant se lesers, die paartjie se gesin en kinders en kinders in die algemeen nie.

Kort ná die artikels gepubliseer is, het die koerant se publiek-redakteur, Joe Latakgomo, ‘n rubriek geskryf waarin hy erken het die koerant het verskeie klagtes ontvang.

Retief het gesê die verskoning aan die lesers, die paartjie se gesin en kinders en kinders in die algemeen moet op die voorblad bó die vou gepubliseer word.

Die Sowetan moet ook op die tweede blad sê dat ses lesers by die Persombudsman gekla het. Die kern van die klagtes moet ook omskryf word.

Nadat die artikel gepubliseer is, is die vroulike beampte afgedank. Die man is geskors en sal dissiplinêr verhoor word.

Dit gaan sukkel-sukkel met die Mandela’s

Winnie Madikizela-Mandela is in ‘n Johannesburgse hospitaal opgeneem vir ‘n roetine-ondersoek, het Eyewitness News Dinsdag berig.

Die Nelson Mandelastigting het intussen ook gerugte ontken wat mbv die sosiale netwerk Twitter versprei het, en kommer wek oor die oudpresident se gesondheid.

Die stigting sê dit gaan goed met Mandela. Sy persoonlike assistent, Zelda la Grange, sê daar is geen rede tot kommer nie. ‘n Woordvoerder van die Presidensie, Mac Maharaj, sê hy is ook nie bewus van enige nuus oor Mandela se ongesteldheid nie.

Sy voormalige eggenoot, die 74-jarige Madikizela-Mandela het glo ‘n enkelbesering opgedoen en word by die Brenthurst-kliniek in Johannesburg behandel.

Veronica Holliday, ‘n woordvoerder van die kliniek, het gesê sy kan nie oor Madikizela-Mandela se toestand kommentaar lewer nie, maar het bevestig dat die omstrede figuur in die kliniek opgeneem is.

Dit is nie bekend wanneer Madikizela-Mandela ontslaan gaan word nie.