Nuus Archives - Page 923 of 1583

Tsjegge vir spioenasie in Zambië vas

Drie Tsjeggiese toeriste kan met tot 30 jaar lange tronkstraf in Zambië gevonnis word as hulle skuldig bevind word aan spioenasie nadat hulle nabyfoto’s van militêre instellings in dié land geneem het, het die Tsjeggiese departement van buitelandse sake Maandag gesê.

Volgens die departement was die drie werknemers van A&A Expo, ‘n Nederlandse logistieke maatskappy, en het hulle ‘n vriend in Zambië besoek na ‘n sakebesoek aan Johannesburg, Suid-Afrika.

Die drie mense is op 12 Oktober in hegtenis geneem nadat hulle vier foto’s naby militêre geboue geneem het, volgens ‘n verklaring wat deur Tsjeggiese diplomate in Afrika aan die departement gestuur is.

Die drie toeriste is luidens die verklaring op borgtog vrygelaat.

Die foto’s is geneem van ‘n militêre vliegtuig wat ten toon gestel word by ‘n militêre basis, ‘n “geen toegang”-teken buite ‘n ander instelling en die ingang van die presidensiële paleis in Lusaka, die hoofstad.

Kennedy Sakeni, die Zambiese minister van binnelandse sake, het gesê die regering is gewillig om die saak met Tsjeggiese diplomate te bespreek.

Die Zambiese intelligensiediens is ook by die voorval betrokke, volgens die verklaring.

Infrastruktuurbesteding eerder as verbruik, sê Gordhan

Pravin Gordhan, minister van finansies, het met die bekendmaking van die mediumtermynbegrotingsraamwerk gesê die nasionale tesourie het ongeveer R13 miljard minder belastinginkomste ingevorder as wat in Februarie met die Begrotingsrede verklaar is.

Gordhan het voorts gesê dat besteding van verbruik na beleggings en infrastruktuur- en ekonomiese ontwikkeling sal moet verskuif. Die minister kon nie sê watter sektore daarby gaan baat nie. Die sektore waarop die staat wil fokus, sal glo in samewerking met die departement van handel en nywerheid uitgewerk word.

Volgens die nasionale tesourie sal dié betrokke sektore in volgende jaar se begroting bekend gemaak word.

Hy het ook R25 miljard oor die volgende ses jaar opsygesit om sukkelende sektore in die ekonomie te steun. Kontantreserwes en besparings sal vir sukkelektore aangewend word, het hy gesê. Staatsdepartemente is daarom versoek om onnodige verkwisting te staak.

“Persepsies dat die regering en sy amptenare ‘groot’ leef ondermyn vertroue. Vermorsing met openbare besteding moet uitgeskakel word.”

Gordhan het gesê dié aansporings sal nie met nuwe belastings gefinansier word nie.

Wysigings aan die wet op die bestuur van openbare finansies sal moontlik aangebring word om openbare amptenare glo “verantwoordbaar” te hou. Die ministerie het nie kommentaar gelewer op die bestaande wetgewing wat reeds voorsiening maak vir strawwe nie.

Daar sal vir die komende nasionale gesondheidsversekeringstelsel ook R500 miljoen opsy gesit word vir loodsprojekte in 10 distrikte, om openbare gesondheidsorg te verbeter. Die program sal oor 14 jaar strek om beter en bekostigbare gesondheidsorg te verseker.

Besnoeiings in staatsdepartemente sal aangewend word om ‘n beleidsreserwefonds op te bou. Die besnoeiings sal waarskynlik meer as R10 miljard beloop. Meer besonderhede sal glo in die 2012-begroting bekend gemaak word.

Voorstelle aan die kabinet oor hoe om die reserwefonds te bestee, sal deur die ministerskomitee oor die begroting gemaak word.

Pretoria weier Jeugliga-nagwaak

Die Tshwane-metropolisie het toestemming aan die ANC-Jeugliga om Vrydag ‘n nagwaak buite die Uniegebou in Pretoria te hou, geweier.

Console Tleane, woordvoerder van die Tshwane-metropolisie, het gesê dít is Dinsdag besluit by ‘n vergadering tussen die organiseerders van die optog, die metropolisie, die Suid-Afrikaanse polisiediens, Tshwane-nooddienste en die presidensie.

“Die presidensie het die versoek van die liga om Donderdagnag ‘n nagwaak by die Uniegebou te hou, verwerp en gesê die Uniegebou is ‘n nasionale sleutelpunt,” het Tleane in ‘n verklaring gesê.

Toestemming is wel gegee vir die ANCYL om Vrydagoggend ‘n optog na die Uniegebou te hou om ‘n griefskrif aan die presidensie te oorhandig.

Die ANCYL het aanvanklik beplan om sy “ekonomiese vryheid”-optog Donderdag van Johannesburg tot Pretoria te hou om die toestand van die armes te onderstreep, ‘n nagwaak te hou en die griefskrif Vrydagoggend te oorhandig.

Floyd Shivambu, ANCYL-woordvoerder, was nie Dinsdagaand beskikbaar vir kommentaar nie.

Motlanthe besoek Dene

Adjunkpresident Kgalema Motlanthe het begin met ‘n handelsbesoek aan Denemarke waar hy hoop om regstreekse buitelandse beleggings te lok.

Denemarke is ‘n netto-uitvoerder van voedsel en maak staat op ingevoerde grondstowwe vir die vervaardigingsektor.

Die land is ook ‘n moderne mark-ekonomie en as lid van die Europese Unie is hy ook grootliks afhanklik van buitelandse handel.

Die Dene is voorlopers in farmaseutiese produkte, skeepvaart en hernubare energie. Motlanthe sê dit is die kundigheid wat Suid-Afrika hoop om te bekom.

Gaddafi waarskynlik doodgefolter

Die leier van Libië se Nasionale Oorgangsraad (NOR) het te midde van groot druk deur die VSA en ander moondhede gelas dat ‘n ondersoek gedoen moet word na Moeammar Gaddafi se dood.

Die NOR het ‘n komitee geskep om Gaddafi se dood verlede Donderdag te ondersoek omdat daar nog geen duidelikheid is oor presies hoe hy dood is nie, het Moestafa Abdoel-Jalil tydens ‘n mediakonferensie in Benghazi gesê.

Gaddafi het nog gelewe toe hy deur die rewolusionêre NOR-rebelle gevange geneem is, maar latere video’s het getoon hoe NOR-rebelle oor sy lyk staan.

‘n Amateurvideo deur rebelle self geneem, wys egter beeldmatriaal waar die voormalige staatsman met ‘n stok of ander voorwerp gesodomiseer word. Die video is op GlobalPost te siene.

Human Rights Watch het hulle skok uitgespreek oor die rebelle se optrede. ‘n Vyftigtal Gaddafi-lojaliste is ‘n week gelede met hulle hande agter hul rûens vasgebind dood aangetref.

Dit is nie die eerste flagrante menseregoortreding wat die rebelle begaan nie. Vroeër is ‘n hooggeplaaste uit Gaddafi se regering wat gevange geneem is, ook sondermeer tereggestel.

Die NOR het die lyke van Gaddafi en sy seun, Moe’tassim, die naweek in ‘n glaskas vertoon sodat nuuskieriges daarna kan kyk.

Die liggame is intussen uit die vleismark in Misrata verskuif en sal na verwagting vandag tydens ‘n geheime seremonie in die woestyn begrawe word.

‘n Woordvoerder van die oorgangsraad, Ibrahim Beitalmal sê daar sal glo net vier mense teenwoordig wees by die seremonie, en almal sal ‘n eed aflê om nooit te onthul waar die graf is nie uit vrees vir vandalisme.

Salem Al-Mohandes, ‘n veiligheidswag by die vleismark, het bevestig dat die liggame gister uit die koelkas waar dit die afgelope vier dae aangehou is, verwyder is.

Cele ‘respekteer’ sy skorsing

Bheki Cele, nasionale polisiekommissaris, “respekteer” President Jacob Zuma se besluit om hom te skors, het sy kantoor Maandag gesê.

“Die nasionale kommissaris van polisie, genl. Bheki Cele, neem kennis van en respekteer die president se besluit. Hy is besonder vol vertroue dat hy die beskuldigings van die opkomende ondersoek geheel en al sal kan weerlê,” het sy woordvoerder, Nonkululeko Mbatha, in ‘n verklaring gesê.

Sy skorsing kom nadat die openbare beskermer, Thuli Madonsela, bevind het Cele se verkryging van twee huurkontrakte vir nuwe polisie-hoofkwartiere in Pretoria en Durban was onwettig en kom neer op wanadministrasie. Die huurkontrakte was ter waarde van R1,6 miljard.

Genl. Nhlanhla Mkhwanazi sal in Cele se pos waarneem.

Zuma se aankondiging het gekom ná weke van spekulasie oor Cele se toekoms, insluitende ‘n nuusberig dat hy moontlik ‘n diplomatieke pos in Kanada aangebied sou word.

Afgedank na kredietkaartongerymdhede, nou DA-lid

Besigheid Teen Misdaad (BTM) se afgedankte baas het R37 000 van die organisasie se geld op inkopies geblaas.

BTM, ook in Engels bekend as Business Against Crime (BAC), is ‘n voertuig wat deur die land se sakegemeenskap geskep is om misdaad te beveg en hulle kry miljoene in skenkersfondse.

Die besturende direkteur van BTM in die Wes–Kaap het haar stilte verbreek nadat sy afgedank is vir ongemagtigde kredietkaartbesteding.

Dr Annelie Rabie moes in Junie uit die organisasie wat misdaad beveg, bedank, ongeveer dieselfde tyd as wat sy ‘n DA-raadslid in die dorpie van Prince Albert in die Groot Karoo geword het.

Rabie het hierdie week gesê was sy net “deurmekaar” met haar persoonlike en korporatiewe kredietkaarte, terwyl sy inkopies gedoen het.

Melvyn Josua, die huidige voorsitter, sê Rabie is afgedank nadat ‘n dissiplinêre verhoor haar skuldig bevind het op vyf aanklagte van ongemagtigde uitgawes op die organisasie se kredietkaart ter waarde van ongeveer R37 000.

Die organisasie en Rabie swyg oor die items wat aangekoop is. Josua het geweier om te sê of kriminele klagtes gelê sal word as “sekere prosesse afgehandel is”.

Rabie, egter, het daarop aangedring dat sy niks verkeerd gedoen het nie.

Josua het bevestig dat Rabie by die verhoor aangevoer het dat sy deurmekaar was tussen haar werks- en persoonlike kredietkaarte, maar hy het gesê dit is verwerp deur die voorsittende beampte. Hy het ook bevestig dat sy ‘n “deel” van die geld terugbetaal het, maar slegs na ‘n oudit deur die BTM.

Rabie het aanvanklik haar voorneme om te bedank uit die organisasie in Mei aangekondig. “Dit was my spesifieke voorneme om na Prins Albert te verskuif en in die politiek op die versoek van die gemeenskap betrokke te raak.”

Die organisasie het egter geweier om haar bedanking te aanvaar, omdat ‘n ondersoek rakende haar gedrag aan die gang was.

“‘n Onafhanklike verhoor is gehou in Junie 2011 by die kantore van [die prokureursfirma] Cliffe Dekker Hofmeyr. Sy is skuldig bevind op aanklagte van ongemagtigde uitgawes en haar dienste is beëindig op 17 Junie 2011..

“Ons standpunt oor misdaad maak dit duidelik dat ons optree wanneer of waar ook al onbehoorlikheid vermoed word.”

Rabie is verkies tot die DA-koukus in Prince Albert terwyl sy geskors was.

Dr Graham Wright, uitvoerende hoof van Besigheid teen Misdaad Suid-Afrika, het gesê die organisasie is bekommerd oor die negatiewe impak van die voorval.

VF verwelkom skorsings van ministers

Pres. Jacob Zuma se aankondiging dat hy die nasionale kommissaris van Polisie, Bheki Cele, geskors het hangende ‘n ondersoek en die afdanking van die minister van Openbare Werke, me Gwen Mahlangu-Nkabinde asook die van mnr. Sicelo Shiceka, minister van samewerkende regering, word deur die Vryheidsfront Plus verwelkom.

As een van die regspersone wat die klag teen die huur van geboue by die Openbare Beskermer gelê het, word vertroue in teenkorrupsie liggame versterk met Zuma se optrede.

As nasionale hoof van die Suid-Afrikaanse Polisiediens is dit in nasionale belang dat hierdie bewerings behoorlik ondersoek word om dit te bevestig of te weerlê. Die Polisiehoof kan nie misdaad effektief beveg met sulke aantygings teen hom nie.

Die publiek en lede van die SAPD kan ook nie vertroue hê in die nasionale kommissaris met sulke aantygings nie,” sê mnr. Pieter Groenewald (LP), hoofwoordvoerder van Polisie vir die Vryheidsfront Plus.

Die lede van die kommissie wat ondersoek moet doen na die wapenskandaal word ook verwelkom. Pres. Zuma tree reg op om regters aan te stel en versterk die geloofwaardigheid van die ondersoek.

Dat die ondersoek twee jaar kan duur skep die indruk dat ‘n behoorlike ondersoek gedoen sal word. Hierdie is ‘n geleentheid om die skandvlek van die wapenskandaal tot ‘n einde te bring en die skuldiges moet aan die pen ry, het Groenewald gesê.

VF-petisie was tolhekke se doodsteek

“Die Vryheidsfront Plus verwelkom die minister van vervoer, mnr. S’bu Ndebele, se besluit om die implementering van die Gauteng-tolhekprojek uit te stel. Volgens die minister gaan daar eers in Februarie 2012 ‘n besluit oor die tolgelde geneem word. “Die VF Plus is van mening dat die inhandiging van meer as 100 000 geouditeerde protes-handtekeninge by die Gauteng Wetgewer, soos ingesamel deur die party se aanlyn-protesaksie www.tolhekpetisie.org.za, ‘n wesenlike bydra gelewer het tot die besluit. Die besluit om die proses te halt kom naastenby ‘n week na die inhandiging van die handtekeninge” het adv Anton Alberts, VF Plus parlementêre woordvoerder oor vervoer, gesê.

“Daarbenewens moes die interparty-koalisie tussen die VF Plus, Cope, DA, ACDP en die OD in die Gautengse Wetgewer dit vir die minister en die ANC duidelik gemaak het dat mense oor ‘n wye front teen die tolheksisteem gekant is. Die VF Plus sal egter voortgaan om druk op die minister te plaas om die tolheksisteem heeltemal te skrap en die nodige fondse by wyse van die bestaande brandstofheffing te verhaal” het Alberts bygevoeg.

Intussen het die VF Plus sedert die her-loodsing van sy aanlyn-protesaksie binne ‘n week alreeds 5700 nuwe handtekeninge bygekry. Volgens adv. Anton Alberts is dit ‘n bewys dat die publiek se teenkanting teen die Gauteng-tolprojek steeds groei. “Die Vryheidsfront Plus het ook in ‘n massa e-pos aan die petisie-ondertekenaars gevra of hulle bereid sal wees om aan openbare protesaksie deel te neem. Om en by 10 000 mense het al positief geantwoord dat hulle so ‘n aksie sal steun,” het Alberts verder gesê. “Indien die regering sal voortgaan met die aktivering van die tolstelsel, gaan hulle wesenlike openbare teenstand kry tot so ‘n mate dat massa publieke ongehoorsaamheid ‘n moontlikheid is.”

Die VF Plus het ook sy tevredenheid uitgespreek teenoor die besluit van die regering om nog ‘n taakspan aan te stel om die Gauteng-tolprojek verder te ondersoek. “Dit is egter jammer dat die publiek geen verteenwoordiging op hierdie komitee het nie, maar dit is verblydend dat die adjunkminister van vervoer, mnr. Jeremy Cronin, erken het dat die tolstelsel nie sinvol is as metode om die land se nuwe paaie en instandhouding te finansier nie,” het Alberts bygevoeg.

Dit blyk nou dat die regering uiteindelik die belastingbetaler en padverbruiker se rasionele stem begin hoor. Die VF Plus sal egter saam met ander partye voortgaan om druk op die regering te plaas ten einde hierdie tolstelsel te stop.

‘DA nie kampvegter vir Afrikaners nie’

Die Gautengleier van die Vryheidsfront Plus en LPW, mnr Jaco Mulder is tydens die party se provinsiale reorganisasie die naweek in Meyerton, Midvaal onbestrede as VF Plus leier van die provinsie herkies. Adv Anton Alberts, LP en Dr Conrad Beyers, raadslid in die Tshwanemetro is as ondervoorsitters verkies.

Mulder het tydens hierdie geleentheid gesê dat die VF Plus ‘n belangrike rol het om te speel in die Suid-Afrikaanse politieke landskap as kampvegter vir selfbeskikking en die beskermer van minderheidsregte. Die party is ook gereed om in Gauteng sy rol as diensleweringswaghond te vervul en veral ook in die DA-beheerde raad van Midvaal waar die vergadering plaasgevind het.

Die inwoners van Midvaal is ‘n brose gemeenskap wat mislei word deur die DA-beheerde raad. Die raad is vir ‘n geruime tyd reeds in omstredenheid gehul na bewerings van grootskaalse korrupsie terwyl die DA Midvaal voorhou as ‘n voorbeeld van sukses en skoon administrasie.

Die DA is geen beskermer van die grondwetlike regte van Suid Afrikaners en die inwoners van Midvaal nie en die res van Suid-Afrika moet daarteen beskerm word. Die DA en ANC is twee teen-pole van dieselfde munt wat totaal uit voeling is met die werklikhede van Suid-Afrika en maak van partypolitiek ‘n karikatuur, het Mulder gesê.

Suid-Afrika benodig ‘n nuwe akkoord. Mulder het verder ‘n beroep op die vergadering gedoen om mense aan te moedig om ‘n party te steun wat hul belange kan dien en nie bloot op ‘n basis van “my vyand se vyand is my vriend” te stem nie.

Lede wat tot die VF Plus Dagbestuur in Gauteng verkies is, is as volg:

Kol Piet Uys, mnr Philip van Staden, Dr Dan Roodt, Corrie Pypers, mnr Franco de Lange, me Amanda de Lange, me Carien Nefdt, mnr Francois Cloete, mnr Sakkie du Plooy, mnr Christo Smith, Wiebe Schultz en me Linnette Badenhorst. Mnr Werner Human en mnr Helgard Cronje is as jeugverteenwoordigers op die dagbestuur aangewys.

Afgevaardigdes na die VF Plus Federale Raad sluit in:

Mnr Philip van Staden, mnr Franco de Lange, Dr Dan Roodt, me Karin Roodt, mnr Corrie Pypers, me Carien Nefdt, mnr Francois Cloete, mnr Sakkie du Plooy, Dr Conrad Beyers, me Amanda de Lange en mnr Jean Kriek (Jeugleier: Gauteng).