Nuus Archives - Page 920 of 1583

Honderde beset kerkgrond

Honderde mense het grond beset wat aan die Verenigende Hervormde Kerk buite Mthatha in die Oos-Kaap behoort, het die SABC Dinsdag berig.

Kerkverteenwoordigers het gesê die grondbesetters het ‘n komitee gevorm, wat die 57 hektaar grond opgedeel en teen R7 000 per erf verkoop, het die uitsaaier berig.

Die kerk het reeds aansoek gedoen vir ‘n uitsettingsbevel, wat verlede Vrydag van krag gemaak is. Sommige mense het egter aangebly op die grond en teen Woensdag nog op die opgedeelde erwe gebou.

‘n Lid van die besetters se komitee, Jonas Ntsabile, het na 150 jaar gelede se geskiedenis verwys vir sy reg om die grond te beset.

Hy het die verkoop van die lappies grond betwis en gesê die gemeenskap vat terug wat jare gelede van hulle weggeneem is deur die NG Kerk en wit boere.

“Dit is met geweld afgeneem en gegryp deur sendelinge. Mense het die besluit geneem om terug te gaan en hul voorvaders se grond as begunstigdes te vat. Daar is geen verkoop van grond betrokke nie.”

– ‘n Ander groep mense het Maandag private grond in Hilton buite Pietermaritzburg beset en gesê dit behoort aan Julius Malema, leier van die ANC-Jeugliga.

Een van die leiers wat erwe verkoop het, het gesê hy kan dit doen omdat “die grond aan die Zoeloe-mense behoort”.

Die Hooggeregshof in Pietermaritzburg het die respondent, Philani Bha Ndlovu, of enigiemand wat namens hom optree, verbied om die eiendom te betree tot die kwessie op 21 November gefinaliseer kan word.

Zuma prys Mazibuko

Die verkiesing van Lindiwe Mazibuko as die DA se parlementêre leier voorspel goeie dinge vir Suid-Afrika, het pres. Jacob Zuma Dinsdag gesê.

“Ek dink dit voorspel goeie dinge vir Suid-Afrika,” het Zuma by ‘n sake-ontbyt in Kaapstad gesê.

“Ek dink dit is ‘n aanduiding dat ons demokrasie, sowel as die bemagtiging van vroue werk.”

Mazibuko is bo die hoogs ervare Athol Trollip tot die posisie verkies.

“Ek dink die feit dat jy ‘n ervare man wat ‘n teenstander was en deur ‘n jong dame geklop is, wys dat demokrasie in die land werk.”

“Dit gee ‘n geleentheid aan alle Suid-Afrikaners van alle ouderdomme om deel te neem.”

Zuma het gesê die Demokratiese Alliansie sal nie permanent beheer hê oor die Wes-Kaap nie.

“Mense in die Wes-Kaap het ‘n spesifieke voorkeur in terme van politiek. Dit is nie ‘n permanente kwessie nie”.

Фільчаков прокурор

Brand-na-dra

Brand-na-dra is die jongste modegier wat township-kinders besiel. Dit staan bekend as i’khothane en is besig om vlam te vat, by wyse van spreke, onder die swart jeug.

In hierdie dae en tye met werkloosheid wat genadeloos byt, loop sulke tienerbyeenkomste in lokasies dikwels op die brand van duur ontwerpersklere – en selfs geld – uit.

Dit gaan blykbaar daaroor om uit te staan in die skare en aan jou vriende te bewys dat jy so ryk is dat duur besittings niks beteken nie. Die gebrandery stop nie by klere of R50 note nie.

Soms behels i’khothane ook die vernietiging van “partytjiekos” soos KFC, waar die dansers die gesogte duur hoenderstukkies in die grond intrap terwyl honger swart maats tevergeefs toekyk.

Volgens een i’khothane-legende in Pimville het iemand een keer ‘n hele groot emmer KFC-hoender gekoop om dit daarna in die stof in te trap. Daarna het hy sy Carvelaskoene uitgetrek, hulle aan die brand gesteek en verklaar: “Hulle [die skoene] het klaar geëet het en nou is hulle vol!”

I’khothane “gevegte” of uitdagings word gewoonlik by ‘n plaaslike park of in ‘n openbare ruimte gehou. Die nuus van die byeenkomste word versprei per riemtelegram en die spanne word deur honderde kinders en tieners toegejuig en bewonder as hulle aankom. Dit verleen kitsglanspersoonlikheidstatus aan die deelnemers.

Deelnemers spog dat as hulle by winkelsentrums opgemerk word, word sommiges selfs vir handtekeninge gevra.

Die i’khothane begin met jou skoene. Vir die seuns, sal niks minder as ‘n paar Carvelas deug nie. Dit is ‘n bekende handelsmerk in die townships en ‘n paar kos tussen R1 200 en R2 000. In die 1990’s is dié handelsmerk deur almal bewonder, en as jy ‘n paar besit het, was jy onmiddellik beskou as “middelklas”. Vandag moet jy egter bereid wees om hulle te vernietig in die openbaar om te wys hoe ryk jy is.

In Pimville se sone 6 sê een van die deelnemers: “Abuntu Baya kufatela mawudla isdwdwe [mense respekteer jou wanneer jy duur en mooi aantrek],”

Kinders by die byeenkomste raak dikwels hoenderkop van Hennessy cognac en Red Square vodka. Die musiek is oorverdowend. Waarnemers sê die byeenkomste kan heel maklik in geweld ontaard.

Baie van die swart seuns en meisies is nie so ryk soos wat hulle voorgee om te wees nie. Sommige van hierdie kinders woon in ‘n vierkamerhuisie en leef hul ouma se pensioengeld.

Bekendes soos Metro FM se platejoggie Sbu het al gewaarsku teen die gevare van i’khothane en hy is betrokke by programme in swart hoërskole om jong mense uit te daag oor hulle gebrek aan moraliteit. “Ek is regtig teleurgesteld met hierdie tendens,” sê hy. “Hulle [die kinders] mors hulle geleenthede deur te spog oor die rykdom wat hulle nie eens het nie.”

VSA staak UNESCO-befondsing

Amerika het sy finansiële bystand aan Unesco teruggetrek uit protes teen die lidmaatskap wat aan die Palestynse owerheid toegeken is.

‘n Woordvoerder van die departement van buitelandse sake, Victoria Nuland sê die 60 miljoen dollar wat dié maand oorbetaal moes word, sal nie meer toegeken word nie.

Vroeër het die Palestynse ambassadeur in Suid-Afrika, Ali Halimeh, sy land se lidmaatskap tot die VN se kulturele en wetenskaplike liggaam, Unesco, verwelkom.

‘n Groot meerderheid lede het tot die Palesynse toelating ingestem. Halimeh sê Unesco het nog altyd sy steun aan Palestina toegesê op onderwys, wetenskaplike en tegnologiese gebiede.

Hy sê dit is veral verblydend, omdat Israel geruime tyd al lid van Unesco is, terwyl Palestina jare lank die voorreg ontneem is.

Roodt kry hofbevel teen ‘Zoeloe-grondeienaars’

‘n Landboukundige van KwaZulu-Natal het ‘n hofbevel verkry teen ‘n swartman wat aanspraak maak op sy grond en dit glo stuk vir stuk verkoop.

Hy voer aan dat hy daarop geregtig is, omdat die grond aan die Zoeloes behoort.

Die eienaar van die stuk grond van 82 hektaar, Rusty Roodt, het ‘n dringende aansoek in die Pietermaritzburgse hooggeregshof ingedien.

Regter Ron McLaren het die aansoek toegestaan, wat Philani Bha Ndlovu, of enige iemand namens hom, verbied om die eiendom te betree voor die saak op die 21ste van die maand aangehoor is nie.

Roodt sê sowat 20 mense het die afgelope Vrydag kleims afgesteek, terwyl ‘n stootskraper Sondag gebruik is om die grond gelyk te maak.

Swart vlag van Al Kaida wapper oor Libië

Die swart vlag van al-Kaida wapper oor Libië nadat NAVO formeel sy militêre veldtog beëindig het.

Die vlag is op die dak van die hof in Benghazi gehys waar die land se nuwe regeerders die Sjaria afgekondig het nadat hulle die eertydse leier, Moeammar Gaddafi gesodomiseer en vermoor het.

Die gebou word gesien as die setel van die rewolusie, wat deur rebellemagte tot hul voorlopige regeringshoofkwartier en mediasentrum verklaar is.

‘n Akademikus van Tripoli, Abdoel al-Raheem, is intussen verkies tot Libië se tussentydse eerste minister. Hy is voor die media aangewys deur die lede van die regerende nasionale oorgangsraad. Die voormalige tussentydse premier, Mahmoed Jibril, het – soos belowe – bedank nadat Libië deur rebellemagte met NAVO se hulp vir Gaddafi ontsetel het.

Die oorgangsraad het onderneem om ná agt maande verkiesings te hou vir ‘n nasionale vergadering. ‘n Nuwe grondwet sal daarna binne ‘n jaar opgestel word voordat parlementêre verkiesings gehou sal word.

Op die swart vlag bo-op die regeringshoofkwartier staan “Daar is geen ander god as Allah” met ‘n volmaan onderaan. Die vlag is neffens die Libiese nasionale vlag gehys.

Die nuwe Sjariawette wat aangekondig is, word deur kenners as ‘n ramp beskou. Sjariawette geld in Afghanistan onder die Taliban.

Dit beteken onder meer dat Libiese mans nou meer as een vrou sal kan neem. Poligamie was onder Gaddafi se heerskappy verbode.

Deur die afskaffing van die huwelikswet, verloor vroue die reg om die familiehuis as hulle skei te hou. “Dit is ‘n ramp vir Libiese vroue,” het een kommentator gesê.

NAVO het byna 5900 teikens sedert die bomaanvalle begin het in Libië sewe maande gelede, in puin gelê om “burgerlikes” te beskerm.

Oostenrykers slaags oor ‘seksistiese’ volkslied

Die woorde van Oostenryk se “seksistiese” volkslied moet verander word, sê linkse parlementariërs. Maar oor hierdie saak voel die sentrum presies soos die verregses, wat reeds die loopgrawe beman.

Oostenryk se volkslied is die perfekte viering van die Alpe, ‘n lied wat hulde bring aan die berge en strome, die “vetes” en “gevegte” van sy onstuimige verlede. Die melodie is glo deur Mozart gekomponeer.

Die enigste probleem, volgens ‘n groep vroulike Oostenrykse LP’s, is dat dit verskriklik seksisties is.

Vier-en-sestig jaar na die goedkeuring daarvan, het hulle voorgestel dat ‘n wetsontwerp, wat ondersteun word deur ‘n meerderheid van die LP’s, die lirieke verander om die 51,4% van Oostenrykers wat nie mans is nie, ook te erken.

Die lied se eerste vers, in 1947 geskryf deur Paula von Preradovic, lui dat Oostenryk “groot manne” opgelewer het. Die LP’s wil “en vroue” aan die einde byvoeg, en ignoreer diegene wat kla dat dit nie pas by die wysie nie.

Die derde strofe verwys na ‘n “koor van broers”. Dit, sê die beswaardes, moet verander word na ‘n “vreugdevolle koor”.

Nie almal is gelukkig nie. Carmen Gartelgruber, van die opposisie Vryheidsparty van Oostenryk, meen die idee is bespotlik. “Volgende ding wat iemand sal voorstel is dat die arend op Oostenryk se wapen ‘n grimeersakkie in plaas van ‘n sekel vashou,” het sy tydens ‘n parlementêre debat vroeër vanjaar gesê.

Stefan Petzner, ‘n LP van die regse Alliansie van die toekoms van Oostenryk (BZÖ), het tydens die Wetsontwerp se eerste lees voorgestel dat die lirieke net sowel verander kan word sodat die lied nie verwys na ‘n “land katedrale” nie, maar ‘n “land van dominatrixes”.

Petzner is geen vreemdeling as dit by omstredenheid kom nie. Die 30-jarige politikus het drie jaar gelede vir opspraak gesorg toe hy erken het dat hy die gay minnaar van die voormalige BZÖ leier, Jörg Haider, was. Haider het in 2008 in ‘n motorongeluk gesterf.

‘n Voorlopige besluit oor die lirieke word van die grondwetlike komitee in die Oostenrykse parlement op 22 November verwag. LP’s sal dan in Desember oor die veranderinge stem.

As dit slaag, sal die nuwe weergawe tydens alle amptelike geleenthede gesing word en in al die nuwe uitgawes van die skoolhandboeke verskyn.

Vroeër vanjaar het inwoners van Peru ‘n veldtog geloods om hul volkslied te verander, want dit was te “negatief”.

Фильчаков прокурор

Boeremagdokter red Tukkiemeisie

Dr. Lets Pretorius, aangeklaagde in die Boeremagsaak, was een van die dokters wat ure lank op die 22-jarige Tukkiemeisie wat deur ‘n swart aanvaller byna doodgesteek en verkrag is, geopereer het. Haar toestand is tans stabiel waar sy in die waakeenheid van die hospitaal verkeer.

Sy is verlede week 23 keer met ‘n mes gesteek, voordat sy wreed verkrag is. Sy is toevallig in ‘n erg verswakte toestand deur ‘n inwoner van dieselfde meenthuiskompleks ontdek by haar tuinhekkie na die aanval. Sy het haarself, byna sterwend, na buite gesleep.

Haar eie dapperheid, die flinke optrede van haar mede-inwoner en haar mediese span, het heel waarskynlik haar lewe gered.

Dr. Lets Pretorius, wat saam met dr. Stefan Rawlins, ‘n plastiese en rekonstruktiewe chirurg, en dr. Pieter Coertze, ‘n ortopediese chirurg, ‘n noodoperasie op haar uitgevoer het, sê sy is besonder dapper asook diep gelowig.

Dr. Pretorius het ‘n oproep aan alle mediese personeel en die gemeenskap in die breë gedoen om saam te staan teen hierdie soort barbaarse optrede

Die meisie ontvang tans antiretrovirale behandeling na die verkragting.

Twee polisielede is intussen aangekeer nadat die verdagte ontsnap het. Konst. Mphikeledi Alfred Mahlanga (39) en ao. Amos Chris Masilela (48) het Maandag in die Pretoria-Noordse streekhof verskyn op aanklagte van regsverydeling en hulpverlening tot ontvlugting.

Die verdagte is sonder hand- of voetboeie na die dr. George Mukhari-hospitaal in Ga-Rankuwa, noord van Pretoria, geneem omdat hy glo gekla het dat hy siekerig voel. Hy het daarna deur ‘n toiletvenster ontsnap.

Volgens Beeld het die twee polisielede foto’s met hul selfone van die joernaliste se motors en registrasienommers geneem, nadat hulle deur die koerant se fotograaf afgeneem is.

‘Ek wil wit wees’

Die swart kwaito-musikant Mshoza is vasbeslote om haar pigmentasie te bowe te kom. Sy is tans besig om haar vel te bleik en chirurgies haar voorkoms te verander.

Onverstoord deur neerhalende uitsprake en grappies op sosiale netwerk-webwerwe, sê Mshoza (ook bekend as Nomasonto Mnisi) sy het hard gewerk om die lewe wat sy nou lei, te kan bekostig.

“Ek verstaan nie hoekom mense nou ‘n probleem het dat ek met my geld doen wat ek wil nie. Dit is my lewe.

“Miskien moet hulle begin lewe in plaas daarvan om uit ‘n bak van negatiwiteit te eet al die tyd,” het sy gesê.

Volgens die sanger, wat reeds honderde duisende op rhinoplastie [vir haar neus], ‘n borsmaatvergroting en maagvetverwydering, spandeer het, is haar voorkoms waaraan sy miljoene bestee, net die begin van ‘n lang en ingewikkelde proses.

“Ek sien tans drie velspesialiste. Hulle het die eerste fase voltooi. Ek lyk nie regtig op die oomblik bleek nie. Maar ja, wanneer alles voltooi is, sal ek lyk soos ‘n wit persoon. Van kop tot tone. Ek kan ook die rhinoplastie oordoen om my nuwe vel te pas. Maar dit beteken nie dat ek popmusiek sal begin sing of anders optree nie.

“Ek sal nog steeds dieselfde persoon bly wat my ondersteuners ken.”

Die sanger, algemeen bekend vir haar liedjie Kortez, het gesê sy weet nie wanneer die hele proses voltooi gaan wees nie.

Die ma van twee het aan die lig gebring dat die redes agter haar besluit om haar velkleur te verander vir haar ‘n teer onderwerp is.

Gevra of sy ontevrede is met die manier waarop sy gebore is, het ‘n selfversekerde Mshoza egter geantwoord: “Ek het nie ‘n probleem met die manier waarop God my geskape het nie. Om die waarheid te sê is ek lief vir Hom. Ek bid die hele tyd.

“Ek doen maar net waarvan ek hou. Dieselfde mense wat kritiek oor my uitspreek, het vals hare, naels en wimpers.

“Ek het baie oproepe ontvang van mense wat sê hulle wil graag dieselfde ding doen.” Haar man en kinders hou ook van die gedagte, sê sy.

Intussen het ‘n paar Twitter-gebruikers so ver gegaan as om te sê dat Mshoza wit massas wil werf vir die Demokratiese Alliansie.

Palestyne kry volle lidmaatskap van UNESCO

Palestina het Maandag ‘n volle lid van die VN se kulturele en opvoedkundige agentskap geword, ‘n hoogs verdelende skuif wat die Verenigde State en ander teenstanders meen hernude Midde-Oosterse vredespogings kan benadeel.

Amerikaanse wetgewers het gedreig om die sowat $80 miljoen te weerhou in jaarlikse befondsing aan UNESCO indien hulle Palestynse lidmaatskap goedkeur. Die Verenigde State dra ongeveer 22% van UNESCO se befondsing by.

Groot blydskap heers by UNESCO nadat afgevaardigdes die lidmaatskap in ‘n stemming van 107-14, met 52 wat buite stemming gebly het, aanvaar het.

“Lank lewe Palestina!” het een afgevaardigde, in Frans, by die buitengewoon gespanne en dramatiese vergadering van UNESCO se Algemene Konferensie, geskree.

Terwyl die stemming ‘n groot simboliese betekenis dra, bly die kwessie van die grense van ‘n uiteindelike Palestynse staat, sekuriteitsprobleme en ander geskille steeds onopgelos.

Palestynse amptenare wil volle lidmaatskap van die Verenigde Nasies verkry, maar die poging is steeds onder hersiening en die VSA het gesê hulle sal dit veto tensy daar ‘n vredesooreenkoms met Israel bereik word. Die Palestyne het dus afsonderlik vir lidmaatskap by die Parys-gebaseerde UNESCO en ander VN-liggame aansoek gedoen.

Maandag se stem is beslissend. Die lidmaatskap neem formeel in aanvang wanneer Palestina UNESCO se stigtingshandves onderteken.

Die Amerikaanse ambassadeur vir UNESCO, David Killion, het gesê Maandag se stem “kompliseer” Amerikaanse pogings om die agentskap te ondersteun. Die Verenigde State het teen die maatreël gestem.

Israel se ambassadeur te UNESCO, Nimrod Barkan, het die stemming ‘n tragedie genoem.

“UNESCO handel in die wetenskap, nie wetenskapfiksie nie,” het hy gesê. “Hulle het UNESCO gedwing om standpunt oor ‘n politieke onderwerp in te neem, buite sy bevoegdheid.”

“Hulle het ‘n drastiese besnoeiing van bydraes tot die organisasie afgedwing,” het hy gesê.

Amerikaanse buitelandse minister Hillary Rodham Clinton het verlede week die beraadslaging van UNESCO as “onverklaarbaar” beskryf en gesê die bespreking van Palestynse lidmaatskap in internasionale organisasies kan nie onderhandeling met Israel vervang as ‘n vinnige roete na Palestynse onafhanklikheid nie.