Die ANC-regering oorweeg dit om maatskaplike toelaes te verhoog in reaksie op hoë voedselpryse.
Die minister ly self aan 'n aanval van bronchitis en griep en het gedurende die mediakonferensie gehoes.
Die regering sê dat hy nie nog nie pryse wil reguleer nie.
Tshabalala-Msiman het ook 'n beroep op mense gedoen om hul eie groente te kweek.
Die heraanstelling van Snuki Zikalala by die SAUK kan meer interne konflik by die openbare uitsaaier beteken.
Sy skorsing is opgehef na onderhandelinge tussen Zikalala en die KVBA.
Zikalala het die SAUK by die KVBA aangekla nadat hy deur die uitvoerende bestuurder, Dali Mpofu, geskors is.
Mpofu het Zikalala daarvan beskuldig dat hy vertroulike inligting aan die media vrygestel het.
Zikalala geniet die ondersteuning van die SAUK-raad se voorsitter Khanyi Mkhonza en Mpofu is deur die SAUK-raad geskors slegs enkele ure ná Zikalala se skorsing.
Fanie Kriel van Monumentpark is deur twee polisiebeamptes aangerand nadat hy besittings by sy oorlede moeder se woonstel in Roodepoort gaan haal het.
'n Buurman het blykbaar die polisie gebel toe dié gesien het hoe hy die goedere in sy motor laai. 'n Manlike en vroulike polisiebeampte wou nie na sy verduideliking luister nie en het hom onmiddellik geboei en met 'n knuppel begin slaan.
Die polisievrou het hom herhaaldelik op die rug, kop, nek en skouers geslaan en traangas in sy gesig gespuit. Hy is in 'n sel gesmyt en eers drie-uur in die oggend vrygelaat.
Kriel is agterna in 'n hospitaal in Centurion opgeneem waar hy tans behandeling vir sy beserings ontvang.
Inspekteurs van die departement van minerale en energie het die Bombela-konsessiemaatskappy gelas om ondergrondse werk in Rosebank, Johannesburg te staak.
Gister het 'n twaalf-by-agtmeter gat in Oxfordweg verskyn.
Verkeer moes omlei word.
Ministerie-segsman, Bheki Khumalo, sê rotsingenieurs moet eers inspeksies uitvoer om seker te maak dat dit veilig is om in die omgewing te boor,.
Die sinkgat se verskyning word toegeskryf aan boordery wat deur Bombela uitgevoer is.
Werkers het skynbaar 'n hoofwaterleiding getref tydens 'n booroperasie.
Suid-Afrika se voorbereidings vir die 2010-sokkerwêreldbekertoernooi het weereens 'n haakplek opgedoen.
Een van die stadions in aanbou is weggelaat vir die 2009-konfederasiebekertoernooi.
Irvin Khoza, voorsitter van die plaaslike reëlingskomitee, sê dit is duidelik dat die Nelson Mandelabaaistadion in Port Elizabeth nie betyds gereed sal wees nie.
Die konfederasiebeker word as 'n belangrike toetslopie vir die wêreldbeker beskou wat in 2010 deur Suid-Afrika aangebied word.
Die een-komma-tweemiljardstadion is een van verskeie waarvan die konstruksie deur arbeidsonrus belemmer is.
Die Zimbabwiese regering het die ergste belediging gebruik in reaksie op berigte van verskerpte sanksies teen President Robert Mugabe en sy trawante.
Die adjunk-minister van inligting, Bright Matonga, sê die leiers van die G8-lande is rassiste wat dink wit mense het beter denkprosesse as die swart mense van Afrika.
Hy sê dit word deur hulle pogings om Mugabe en sy vertrouelinge te isoleer, gedemonstreer.
Die G8-lande en meeste lidlande van die Verenigde Nasies is ten gunste van 'n algehele reisverbod op Mugabe en sy binnekring.
Hulle wil ook die bates van Mugabe en sy kamerade bevries.
Die EU-teiken van 10 persent brandstof wat teen 2020 van biobrandstof afkomstig moet wees, is laat vaar.
Getuienis neem toe dat die teikens tot ontbossing en hoë voedselpryse bydra.
Navorsers sê dat dit die begin van 'n keerpunt vir Europa is sover dit biobrandstof betref.
Studies het getoon dat biobrandstowwe wat afhanklik is van koolrape, mielies en sojabone landbougrond in beslag neem en tot ontbossing van natuurlike woude bydra.
Dit word as erger as die ander faktore wat tot klimaatsverandering bydra, beskou.
Twee-en-sewentig veldskoolgangers is oor die naweek tot verskeie hospitale in die Ooskaap toegelaat omdat hulle óf ontwater was óf aan septiese wonde gely het.
Net nege van hulle is tot dusver ontslaan.
Die besnydenisdodesyfer in die Ooskaap het volgens die provinsiale gesondheidsdepartement reeds twintig bereik.
Die departement is besig om in samewerking met die polisie op onwettige veldskole toe te slaan en hulle te sluit.
'n 15-jarige het oor die naweek by 'n onwettige veldskool naby Lusikisiki in die Transkei gesterf.
Ongeregistreerde tradisionele chirurge en verpleegsters is ook in hegtenis geneem.
Inskrywings vir aanlynklasse in die VSA is 22 keer hoër as in 2000, volgens die Noord-Amerikaanse Raad vir Aanlynonderwys.
Tegnologie versprei nou in Amerikaanse klaskamers met aanlynkursusse, gebruiksvriendelike skootrekenaars en virtuele onderwysers.
Take kan in sommige gevalle nou elektronies op skoolwebwerwe ingedien word.
Klaswerk in sulke eksperimentele skole waar boeke byna uitgedien geraak het word gedoen in Google Docs, Apple se iMovie en met behulp van gespesialiseerde opvoedkundige programmatuur soos FASTT Math.
Deskundige vooruitskattings toon dat 50% van hoërskoolkursusse teen die jaar 2013 aanlyn sal geskied. Tans is dit omtrent 1%.
Die Franse regering beplan om die Amerikaanse owerheid van privaat data oor Europese burgers te voorsien om daardie land se veldtog teen terreur te steun.
'n Senior amptenaar in Brussel het gesê dat die Franse baie gretig is om die VSA van diens te wees.
Die onderhandelings vind tans tussen 'n hoëvlakkontakgroep van Europese en Amerikaanse amptenare plaas.
