’n Reeks aardbewings het Donderdag landelike gebiede in die Amerikaanse deelstaat Kalifornië geskud.
Die grootste van dié aardbewings, wat 5.1 op die Richterskaal gemeet het, het omstreeks 03:00 sowat 29 km suidoos van die dorp Lone Pine getref.
Binne die volgende drie ure het ses kleiner skuddings, wat tussen 3.0 en 3.5 gemeet het, dieselfde area in die ooste van die provinsie getref.
Volgens Faith Felton, ’n polisiewoordvoerder, is geen skade of beserings aangemeld nie.
Allan Boesak gaan gedagvaar word omdat hy glo nie ’n R15 000 lening terugbetaal het nie.
Nizam Ismail, ’n sakeman in Worcester, sê hy het die geld in Februarie aan die voormalige menseregteaktivis geleen, het die Cape Argus Donderdag berig.
Ismail is was voorheen ’n lid van Cope, terwyl Boesak die party se LPP in die Wes-Kaap is.
Volgens Cope was die geld egter ’n donasie aan die party tydens die verkiesing.
Nestlè het aan AfriForum belowe om vanaf die vierde Oktober, glad nie meer melk by Grace Mugabe te koop nie, het Sullivan O’Carroll, besturende direkteur van Nestlè Suidelike Afrika gesê.
AfriForum het ‘n veldtog, www.nestlebloodmilk.com, geloods wat verbruikers aanmoedig om dié produk te boikot.
Aangesien Nestlè besluit het om op te hou besigheid doen met Mugabe, sal AfriForum egter nie die veldtog voortsit nie.
Kallie Kriel, hoof-uitvoerende beampte van AfriForum, het Nestlè se besluit verwelkom.
Hy is van mening dat dit te danke is aan duisende mense wat bereid was om hul misnoeë met Nestlè uit te spreek.
“Dit bewys dat gewone verbruikers die mag het om geregtelikheid te laat geskied,” het hy gesê.
Die ANC het gereël dat daar glo watertekorte in Mitchells Plain sou wees voor ’n minister se besoek aan die voorstad, het die Wes-Kaapse premier, Helen Zille, Donderdag gesê.
Die minister van koöperatiewe regering en tradisionele sake, Sicelo Shiceka, het die gebied Dinsdag besoek.
Die minister het glo tydens sy besoek klagtes van inwoners ontvang dat hul watertoevoer sonder waarskuwing afgesny is.
Shiceka het voorts gewaarsku dat die nasionale regering sou ingryp indien Kaapstad of die Wes-Kaap nie daarin slaag om basiese dienste aan die gemeenskap te lewer nie.
In ’n ope brief aan Shiceka het Zille gesê sy het Mitchells Plain Donderdagoggend besoek en dat sy “geen bewyse van die sogenaamde watertekort” kon vind nie.
Zille het gesê inwoners het haar verseker dat die 350 liter water wat daagliks aan hulle voorsien word genoeg is.
Volgens die Wes-Kaapse premier het inwoners haar ook vertel dat die plaaslike komitee van die ANC gesê het hulle moet hul watertoevoer voor Shiceka se besoek afskakel.
Sodoende sou dit lyk asof hulle nie water het nie wanneer hulle hul krane vir die minister oopdraai.
“Drie aparte huishoudings het die bewerings bevestig,” het Zille gesê.
Zille sê sy is gekant teen Kaapstad-munisipaliteit se beleid om mense se watertoevoer af te sny wanneer hulle nie daarvoor betaal nie.
President Jacob Zuma het Sandile Ngcobo as die nuwe hoofregter aangewys. Ngcobo vervang regter Pius Langa, wat later vandeesmaand aftree.
In Augustus vanjaar het Zuma groot ophef by opposisie partye veroorsaak toe hy vir regter Sandile Ngcobo as sy keuse vir die pos benoem het. Opposisie partye het gesê sy nominasie van Ngcobo was ongrondwetlik.
Volgens wet moet die president die opposisie partye nader voor hy ‘n hoofregter mag aanstel.
Die DA, Cope, IVP en OD wou Zuma se benoeming van regter Sandile Ngcobo as hoofregter ongedaan maak en het gesê hulle sal eerder vir regter Dikgang Moseneke in dié pos aanstel.
Zuma het ‘n brief aan die partyleiers gestuur in antwoord op kwellinge dat die proses nie grondwetlike voorskrifte gevolg het nie omdat daar glo nie behoorlike konsultasie plaasgevind het nie.
Hy het hulle die versekering gegee dat hy nog geen finale besluit geneem het nie en “natuurlik” alle menings oor Ngcobo as sy voorkeurkeuse in ag sal neem.
Die vier partye het egter onwrikbaar gebly.
Die ANC Jeugliga-leier Julius Malema het gedreig om “die gemeenskap te mobiliseer” teen Nedbank ná ‘n besluit om ‘n borgskap van Atletiek Suid-Afrika, ASA, te onttrek.
“Laat hulle onttrek. Ons sal hulle ontbllot vir wie hulle is. Ons sal die waarheid vertel oor hoekom hulle onttrek en ons sal SA mobiliseer om te weet wat Nedbank is,” het Malema aan joernaliste in Johannesburg gesê.
“Dit is wat ons stryd vandag definieer — mense wat weier om die transformasie te aanvaar, weier om leierskap van Afrikane te aanvaar.
“Hoekom onttrek mense nou in plaas van om méér geld in te sit?.
“Borg hulle vir Leonard Chuene of borg hulle Atletiek Suid-Afrika?
Hy het die Geelbladsye, ook ‘n atletiekborg, gewaarsku: “Geelbladsye – ons hou hierdie spasie baie goed dop,” het Malema gesê.
Nedbank het vandag borgskap van die jaarlikse Mathareeks gestaak.
Julius Malema, die leier van die ANC-jeugliga, het Donderdag sy ondersteuning vir Leonard Chuene, die president van atletiek Suid-Afrika, ASA, uitgespreek.
Hy het gevra dat borge soos Nedbank getrou bly aan die organisasie.
“Ons glo dat die pogings om hom as president te skors vir sy opregte pogings om Caster Semenya te beskerm opportunisties is en moet verwerp word,” het Malema aan die media in Johannesburg gesê.
Hy het gesê dat die jeugliga Chuene ontmoet het om die Semenya geslagstoetssaga te bespreek en dat Chuene gesê het dat hy sal bedank as dit is wat die land se leierskap wil hê.
Maar Malema het gesê dat die liga aan Chuene gesê het dat dit nie vir hom nodig sal wees om te bedank nie.
Malema het ook ‘n versoek op borge gedoen om getrou aan ASA te bly.
“Nedbank dreig dat hulle gaan onttrek…laat hulle onttrek,” het Malema gesê.
Hy het ook gevra hoekom nie een van die drie Suid-Afrikaanse medaljewenners van die Wêreld Atletiekkampioenskappe borgskappe aangebied is nie.
Die maatskappye ondersteun nie hierdie kinders van Afrika nie,” het hy bygevoeg.
Die Wêreldbank het gister aangekondig dat Zimbabwe ‘n skenking van VS$74 miljoen ontvang om sy landbousektor te laat herlewe.
“Die geld is 74 miljoen dollar, wat meer is as die 25 miljoen van verlede jaar,” het David Rohrbach, ‘n senior landbouekonoom by die Wêreldbank, aan verslaggewers tydens ‘n landboukonferensie in Harare gesê.
Die bank hoop dat die geld Zimbabwe se 700 000 “nuwe boere” wat nou die voorheen blanke plase beset, sal help, meen Rohrbach.
“Ons skakel regstreeks met nie-regeringsorganisasies. Ons volg op wat ander donateurs gedoen het om Zimbabwe te help. Ons is nog nie op ‘n stadium dat ons direk met die regering onderhandel nie, maar ons raadpleeg hulle,” het hy gesê.
Die aankondiging kom nadat ‘n nuwe verslag – wat vir die konferensie deur donateurs en die regering opgestel is – beweer het dat vergoeding aan omtrent drie persent van die 6 500 blanke plase betaal is wat onder Mugabe se grondroofprogram beset is.
Volgens die studie het “grondhervorming” die grondgebied waarop geboer word drasties verklein met 50 000 hektaar en besproeiingsgebiede het ook met meer as nege persent afgeneem tot 139 500 hektaar.
Mugabe het in 2000 sy “grondhervorming” geloods, met ten minste 4 000 blanke boere wat gewelddadig van hul eiendomme afgesit is. Hy het die program geregverdig deur te beweer dat dit bedoel was om “ongelykhede uit die koloniale tydvak reg te stel”.
Swart boere wat op die grond hervestig is, het min regeringsondersteuning ontvang, terwyl banke onwillig is om lenings aan hulle te gee sonder wetlike waarborge oor die eienaarskap van die grond.
Die produksie van sowel voedsel as kontantgewasse soos tabak het ineengestort en sodoende miljoene mense van internasionale voedselhulp afhanklik gelaat.
Die sekretaris van landbou, Ngoni Masoka, het aan die media gesê dat Zimbabwe vanjaar ‘n skerp styging in oeste verwag.
“Vanjaar is die voorbereidings veel meer gevorderd, vergeleke met verlede jaar,” het hy gesê. “Selfs wat befondsing betref, is ons vanjaar beter voorberei.”
Mugabe het in Februarie by sy vorige mededinger Morgan Tsvangirai aangesluit om ‘n eenheidsregering te vorm ten einde Zimbabwe ná jare van ekonomiese agteruitgang te stabiliseer, asook die geldkrane vanuit die Weste weer oop te kry.
Betogings in Standerton het Donderdag uitgebreek by die Sakhilelokasie toe inwoners die paaie met klippe en ander voorwerpe versper het, het Mpumalanga polisie gesê.
“Honderde inwoners het die R23 met klippe en bande en ander voorwerpe versper en motoriste verhoed om die pad te gebruik,” het kaptein Leonard Hlathi gesê.
Ontstoke inwoners het vroeg Donderdagoggend begin betoog.
“Hoewel daar nog geen gewelddadige voorvalle was nie, is die situasie gespanne. Daar is ‘n groot polisieteenwoordigheid in die gebied.”
Volgens Hlathi het polisie die versperrings uit die pad verwyder, maar betogers het dit weer gaan oprig.
Die betogings is aangevuur deur ‘n ondersoek wat bevind het dat verskeie amptenare van die Lekwa-munisipaliteit en raadslede hulle skuldig gemaak het aan bedrog, wanbestuur en korrupsie.
Die gemeenskap gaan vanaf Sondag onder gewelddadige betogings gebuk, toe die huis van ‘n munisipale amptenaar met ‘n petrolbom aangeval is.
Die polisie het die toestand daarna aan die media as “vreedsaam” beskryf.
Nuwe betogings het Dinsdagaand uitgebreek en ‘n munisipale administrasiegebou en ‘n gemeenskapsentrum is aan die brand gesteek.
Debora Patta het bedank as nuushoof van e.tv. volgens Radio 702. Sy is in 2005 aangestel as hoofnuusredakteur by die televisiestasie, en is sedert die begin van e.tv in 1998 by die uitsaaier.
Patta het aan die Universiteit van Kaapstad studeer en haar ondersoekende joernalistiek in die Kaapse plakkerskampe het haar ‘n werk by 702 besorg.
Sy is die tweede hoëprofiel-joernalis by dié uitsaaier wat glo nie meer die nuuswerklading kan volhou nie.
Redi Direko het in Mei ook weens ’n groot werklading bedank.
Afrikaners sal Patta onthou vir haar partydige en onprofessionele hantering van kwessies wat Afrikaners raak.
Sy sal egter aanbly as die aanbieder en die uitvoerende vervaardiger van haar weeklikse, veelbekroonde program 3rd Degree.
Patta het, benewens ander toekennings, in Julie 2009 Vodacom se Vroue-in-media-toekenning gewen.
Van haar bekendste onderhoude was met Nelson Mandela, huidige president Jacob Zuma en geskorsde metropolisiehoof Robert McBride
Sy sal voortgaan met haar rol as raadgewer in die nuuskantoor.
