Skrywer: Dan Roodt
DA onderskryf Vryheidsmanifes
“Ons onderskryf die Vryheidsmanifes [Freedom Charter] net soos die ANC,” het Zille tydens ‘n onderhoud hierdie week gesê.
“Baie van die bepalings van ons Grondwet, soos die reg op waardigheid en sosio-ekonomiese regte, is vervat in die Vryheidsmanifes. Ons glo ook dat Suid-Afrika behoort aan almal wat daarin woon..”
Zille verwerp die idee dat die DA in wese ‘n party is wat “wit politiek” bedryf.
Die Vryheidsmanifes stel dit duidelik dat die swart mens se grond van hom “gesteel” is want hulle “besit die geboortereg van grond”.
Voorts is die “wil van die mense” die belangrikste grondslag vir demokrasie volgens die manifes. In daardie opsig, verskil Zille dus nie van iemand soos die gewilde Julius Malema, ANC-jeugleier nie.
Demokratiese Alliansie-leier Hellen Zille en haar voorganger, Tony Leon, is skynbaar ligjare van mekaar verwyder wanneer dit kom by hoe Suid-Afrika die liberale demokrasie wat hulle nastreef, wil laat realiseer.
In 1999 het Leon met sy “Fight Back”-verkiesingsveldtog die DA gered van gewisse ondergang. Leon het aangevoer dat daar ‘n behoefte bestaan om die ANC se wurggreep te beveg. Duisende Afrikaanse kiesers het daarna ingekoop in die DA-veldtog.
Zille het haar veldtog vir die komende munisipale verkiesings van stapel gestuur op die historiese Walter Sisulu-plein in Kliptown, Soweto.
Die DA se swart Johannesburgse burgemeesterskandidaat, Mmusi Maimane, is ‘n gegradueerde van dié party se leierskapsontwikkelingprogram, het Zille uitgewys.
Staak minerale-uitvoere en vat grond: Malema
Die regering moet ophou om rou grondstowwe uit te voer sodat die totstandkoming van industrieë om dit plaaslik te verwerk, aangemoedig kan word, het Julius Malema, ANC-Jeugligaleier, Donderdag in Pretoria gesê.
“Met groter staatsbeheer en -deelname en die eienaarskap van minerale hulpbronne, sal ons nasionale begroting die kapasiteit hê om vergroot te word en sodoende om te sien na die maatskaplike verantwoordelikhede van die staat,” het Malema aan die Nasionale Persklub gesê gedurende ‘n praatjie oor die liga se program van aksie vir ekonomiese vryheid.
Hy het gesê die probleem is dat minerale onverwerk uitgevoer word en dan as vervaardigde produkte ingevoer word.
“Ons dink ons moet hierdie kwessie aanspreek, ons moet Suid-Afrika laat voordeel trek uit sy hulpbronne.”
Malema het gesê die ANC se nasionale algemene raad het groter konsensus bereik oor die liga se voorstel om beheer oor die land se myne in die hande van die staat te plaas. ‘n Span is besig om die beste model van nasionalisering te ondersoek wat nie die ekonomie op ‘n ramp sal laat afstuur nie.
“Vergeet maar die dinge wat mense in die openbaar kwytraak. Toe ons na die algemene raad gegaan het, het hulle volgehou nasionalisering is nie op die agenda nie, terwyl dit wel was. Nadat die voorstelle aanvaar is, het hulle steeds gesê daar is geen praatjies oor nasionalisering nie.”
Nog ‘n item op die liga se program is grondondersoeke. Die liga wil hê alle grond, buiten woongebiede, moet aan die staat behoort. Hierdie onteiening sonder vergoeding moet gedoen word met die inagneming van wette en wetgewing.
“Toe hulle ons land oorgeneem het, dié wat dit vandag besit, het hulle nie vir enigiemand vergoed nie. Daarom sal dit verkeerd wees om te eis dat hulle iets van ons kry.
“Ons het nie genoeg geld om hierdie grond te koop nie, en as ons die bietjie geld wat ons het hiervoor gebruik, loop ons die risiko om te faal in baie belangrike diensleweringkwessies soos gehalte onderwys, behuising, sanitasie, krag en water.
“Ons probeer hierdie probleem, wat vir ons deur die koloniseerders geskep is, aanspreek, en daarom kan ons nie omgepraat word nie, omdat ons baie sterk hieroor voel en die krisis wat deur koloniseerders geskep is, moet omkeer.”
Wanneer die staat eienaarskap oor die grond het, het Malema gesê, sal dié wat dit wil gebruik vir lisensies moet aansoek doen.
Huurkontrakte sal nie langer as 30 jaar kan duur nie en aansoekers sal moet verduidelik hoe hulle dit tot voordeel van hul mense sal gebruik.
Die regering sal dié wat die grond vir landbou wil gebruik, voorsien van die hulpbronne om te verseker dat dit produktief bly.
Hy het die stadige pas waarteen grond aan swartmense “teruggegee” word gekritiseer en gesê slegs vyf persent word elke 20 jaar oorgeplaas.
“In 100 jaar sou ons 20 persent oorgeplaas het. Ek is nie bereid om deel van daardie mislukking te wees nie. Daarom het ons hierdie radikale program van aksie en die nood vir politieke wil en leierskap in die ANC.”
Malema het die regering se tenderstelsel bevraagteken en gesê dit het die land in ‘n “politieke krisis” gedompel.
“Die staat maak te veel staat op die tenderstelsel en dit het tot ‘n politieke krisis gelei.”
Swak werksgeleenthede word voorsien deur “korrupte maatskappye, van wie sommige saam met die politieke leierskap werk”.
Busse aan die brand gesteek
Pendelaars wat kwaad is oor die gebrek aan openbare vervoer, het Donderdag twee busse in Rustenburg aan die brand gesteek, het die polisie in Noordwes gesê.
Volgens kapt. Adele Myburgh was pendelaars ongelukkig omdat daar nie genoeg busse was om hulle huis toe te neem nie.
“Twee busse het heeltemal afgebrand en een is met klippe bestook.
“Die situasie bly gespanne. Die polisie monitor nog die situasie.”
Lebogang Pule, ‘n pendelaar, het gesê die laaste bus na haar tuisdorp, Manamela, het om 13:00 vertrek.
“Ek het ‘n maandelikse kaartjie vir R600 gekoop en ‘n skolierkaartjie vir R280. Nou kan ek nie huis toe gaan nie, want daar is nie busse nie.
“Ons baklei nie met die busmaatskappy nie. Al wat ons wil hê, is om met respek behandel te word.
“Ek weet nie waar ek vanaand gaan slaap nie,” het sy gesê en bygevoeg dat sy geen alternatiewe vervoer het nie.
Butler Matlapeng, woordvoerder van die Rustenburg-munisipaliteit, het gesê beslag is op 49 busse van die Bojanala-busdiens gelê omdat hulle permitte verval het.
Niemand is nog in hegtenis geneem nie.
Polisiegeweld groei onrusbarend
Die aantal mense wat jaarliks deur die polisie doodgeskiet word, het bykans verdubbel sedert Susan Shabangu in 2006 polisielede aangemoedig het om te skiet om te dood.
Gareth Newham, hoof van die misdaad-en-justisie-program by die Instituut vir Sekerheidstudie, het gister dié onrusbarende inligting bekend gemaak na aanleiding van onlangse voorvalle van polisiehardhandigheid.
Lees verder.
DA, ANC wil Afrikanergeskiedenis vernietig
Die geheimsinnige verwydering van ‘n borsbeeld van dr H F Verwoerd voor die biblioteek van Meyerton deur die DA, gedurende die nag van 4 Mei 2011, laat ‘n wrang smaak.
Dit, veral gesien dat die borsbeeld reeds sedert 1970 daar staan en ook daar bly staan het toe die ANC die Midvaalraad van 1995 tot 2000 beheer het en ook die afgelope tyd daar bly staan het toe die DA beheer van die Midvaalraad geneem het.
Nooit gedurende hierdie tydperk, maar veral die afgelope 17 jaar wat die ANC regeer, was daar enige bohaai oor die borsbeeld gemaak nie. Die feit dat dit nou skielik kort voor die 2011 munisipale verkiesings soos ‘n warmpatat tussen die ANC en die DA hanteer word, bevestig maar net weer die kleinlike politieke opportunisme en skynheiligheid waarmee beide partye besig is ten einde ‘n paar stemme te werf.
Die ironie van beide partye se modus operandi’s is dat die pot die ketel nie eintlik kan verwyt nie en dat die hele aangeleentheid soos ‘n tweesnydende swaard op beide partye se stemwerwery kan inwerk. Dit geld veral die DA wat hom op die blanke, maar meer op die Afikanerstem in die gebied, toespits.
Iets wat beide partye uit die hantering van die aangeleentheid kan leer is dat die verwydering van ‘n borsbeeld/standbeeld soos dié van dr H F Verwoerd tydens ‘n vorige bedeling, nie sy aandeel in die verloop van die geskiedenis van ‘n land en volk kan verwyder of uitwis nie. Dit bly staan tot in die verre toekoms.
En dit geld nie net vir die geskiedenis van die Afrikanervolk nie, maar ook vir dié van die sg nuwe-SA-nasie!
Aksie by die Withuis
CIA erken dat Obama en volgelinge nie hele aanval gevolg het nie
Leon Panetta, direkteur van die CIA, het erken dat daar ‘n 25-minute stilte tydens die aanval op Bin Laden se blyplek was waartydens die lewendige uitsending van die kameras wat op die helms van die Amerikaanse spesiale magte gemonteer was, afgesny is.
‘n Foto wat vrygestel is deur die Withuis wys die president en sy volgelinge in die situasie kamer wat gebeure soos dit ontvou, volg. In werklikheid is hulle het min kennis van wat daar gebeur het gelaat.
In ‘n onderhoud met PBS, het Panetta gesê:. “Ek kan jou vertel daar was ‘n tydperk van byna 20 of 25 minute waar ons regtig nie presies geweet het wat aangaan nie. En daar was ‘n paar baie gespanne oomblikke soos wat ons gewag het vir meer inligting.”
“Ons het nie’ n direkte vloei van inligting oor die werklike verloop van die operasie gehad nie.”
Die President het net geweet die sending was suksesvol nadat die spesmagsoldate se bevelvoerder die woord “Geronimo” op die radio gebruik het, ‘n kodewoord om te rapporteer dat hulle Osama doodgemaak het.
Geen teken van Osama nie
Foto’s wat sowat ‘n uur na die Amerikaanse aanval op Osama bin Laden se tuiste in Abbottabad in Pakistan geneem is, toon drie dooie mense wat in poele van bloed lê, maar geen wapens nie. Nie een van die dooie mans is Osama nie.
Die foto’s, geneem deur ‘n Pakistani sekuriteitsbeampte, toon twee manne geklee in tradisionele gewade en een in ‘n t-hemp, met bloed wat uit hulle ore, neuse en monde stroom.
Die amptenaar, wat anoniem wou bly, het die foto’s aan Reuters verkoop. Dié nuusagentskap sê hulle meen die foto’s is eg.
Amerikaanse president Barack Obama het intussen besluit om nie foto’s van Bin Laden liggaam te laat vrystel nie, want dit kan volgens hom geweld aanhits en gebruik word as ‘n al-Kaida propaganda-instrument.
“Ek dink vanweë die grafiese aard van hierdie foto’s, kan dit ‘n nasionale veiligheidsrisiko skep,” het Obama gesê op die bekende CBS-program “60 Minutes.”
Reuters is vol vertroue oor die egtheid van die aangekoop beelde, want in die foto’s verskyn ‘n verwoeste helikopter wat ooreenstem met besonderhede van die foto’s wat Maandag uitgereik is.
Die foto’s is ook geneem in volgorde en is almal dieselfde grootte in pixels, wat aandui dat hulle nie mee gepeuter is nie. Die tyd en datum van die foto’s soos aangeteken in die digitale lêer se metadata stem ooreen met daglig en -stand in die gebied.
Een foto wys ‘n rekenaarkabel en wat lyk soos ‘n kind se plastiek groen-en-oranje waterpistool wat onder die regterskouer van een van die dooie mans lê. ‘n Groot plas bloed verskynonder sy kop.
Withuis sal nie foto’s van Bin Laden se lyk vrystel nie
President Barack Obama het amptelik besluit dat geen foto van die lyk van Osama bin Laden vrygestel sal word nie.
Jay Carney, woordvoerder van die Wit Huis, aan Woensdag aan die media gesê: “Die president het die besluit geneem om geen foto’s van die afgestorwe Osama bin Laden uit te reik nie.”
“Ons stuur nie dié soort goed uit as trofeë nie,” het Obama gesê. Hy het ook gesê dit sal nie wenslik wees om foto’s van Amerikaanse lyke uitgereik te sien nie.
In 2009 egter het Obama se administrasie besluit om ‘n 18-jaar oue verbod op die foto’s van afgestorwe Amerikaanse soldate op te hef. Die jongste uitlatings kom as ‘n 180-grade wending van vorige stellings deur die president.
Nog een van die redes wat aangevoer word is dat die vrystelling van só ‘n foto die veiligheid van Amerikaanse soldate in die buiteland kan bedreig.