Dan Roodt, Author at praag.co.za

Weermag moet ingryp in geweld in KZN sê LUR

Die LUR vir Gemeenskapsveiligheid in KwaZulu-Natal, Willis Chunu, sê hy sal nie huiwer om te vra dat die weermag ontplooi word indien die gevegte in die Ngudwini-gebied naby Eshowe in die noorde van die provinsie voortduur nie.

Mchunu vergesel van die provinsiale polisiekommissaris Mmamonye Ngobeni, en tradisionele leiers van die gebied het vergader om die spanning te probeer ontlont wat tot die moord op vyf mense die naweek gelei het.

Minstens nog 17 mense is in die hospitaal nadat hulle in gevegte tussen twee dorpies gewond is. Mchunu sê altwee partye het hulle tot vrede verbind.

Александр Фильчаков

Skoolboeke in riviere, stortingsterreine

Die presidensiële taakspan wat die handboeksage in Limpopo ondersoek, het na bewering aanbeveel dat die direkteur-generaal van basiese onderwys, Bobby Soobrayan, afgedank word.

Soobrayan se aanstaande is glo betrokke by die maatskappy wat die tender vir die skoolboeke ontvang het.

Hy is geïmpliseer in potensiële botsings van belange en bewerings van korrupsie vroeër vanjaar nadat Lebone Litho Drukkers ‘n tender ter waarde van R243 miljoen ontvang het om 19.000 openbare skole van boeke te voorsien. Die Mail & Guardian het aan die lig gebring dat DG Soobrayan se voormalige verloofde se ma, Salama Hendricks, mede-stigter van Lebone Group Holdings is.

Die span het sy bevindinge ‘n week gelede aan president Jacob Zuma voorgelê.

Dit volg nadat twee bakkievragte vol boeke Maandag by ‘n stortingsterrein buite Phalaborwa opgespoor is, berig News24

‘n Polisiewoordvoerder, Ronel Otto, het gesê die boeke wat in Phalaborwa gevind is, is dalk onlangs gestort aangesien dit glad nie beskadig is nie. Dit is na ‘n polisiestasie geneem vir veilige bewaring.

Intussen het ‘n klerk in die provinsiale departement van onderwys, wat beskuldig word van die storting van honderde handboeke langs ‘n dam in Giyani, vlugtig in die Giyani-landdroshof Vrydag verskyn.

Tsakani Glen Kubayi (44), is nie gevra om te pleit op aanklagte van kwaadwillige beskadiging van eiendom in verband met ongeveer 700 handboeke nie. Dis gevind gestort langs ‘n dam in Giyani op 29 Junie en Julie 1. Die saak is uitgestel tot September 5 en sy borgtog van R2000 is verleng.

Александр Фильчаков

Bibberweer, sneeu tref SA

Inwoners van Vanderbijlpark is begroet met ‘n winter wonderland ná sneeu oor die gebied neergesif het.

Oor die algemeen sneeu dit in die gebied in die suide van Gauteng een keer in vyf of ses jaar. Dit lyk pragtig, soos Kersfees, sê inwoners.

Suid-Afrikaanse Weerdiens se weervoorspeller Jan Vermeulen het gesê daar is swaar wolke oor die Vereeniging Dinsdagoggend en ‘n kans op ligte sneeu oor die suide van Gauteng.

Daar was ook verslae van sneeu in Bethlehem en Clarens in die Vrystaat en ligte sneeu op Van Reenenspas.

‘n Kouefront wat oor die land beweeg het elders ook uiters koue weerstoestande oor groot dele tot gevolg.

Verskeie bergpasse en paaie in die Oos-Kaap is gisteraand ook weens swaar sneeu gesluit. Op die N9 is die Lootsberg-pas tussen Graaff Reinet en Middelburg gesluit asook die Wapadsbergpas tussen Cradock en Graaff Reinet en die Nico Malan-pas tussen Whittle Sea en Seymour.

Die R 61 tussen Cofimvaba en Queenstown is ook onbegaanbaar. Aan die Kwa Zulu-Natalse kusgebied het swaar reën gepaardgaande met hael voorgekom.

Binnelandse provinsies, insluitend Gauteng, gaan die volgende dag of twee baie koud kry.

Die kwik sal by sowat tien grade celcius sy maksimum bereik, terwyl minimum temperature oor groot dele van die land tot onder vriespunt gedaal het.

Goue swemmer vier sy medalje

Die klub in Londen, Chinawhite, wat aan ‘n ryk Jordaniese sakeman Eyhab Jumean behoort, het Chad le Clos, die Suid-Afrikaanse swemmer wat ‘n goue medalje losgeswem het, getrakteer.

Die peperduur nagklub was ‘n paar jaar gelede finansieel in die knyp, omdat hulle bekendes graag onthaal wat nie daarvan hou om te betaal nie. Die Britse monarg se kleinseun, prins Harry, kuier graag by die klub. Dit is neffens Oxfordstraat, in die hartjie van Londen, geleë.

Le Clos is gesien in die geselskap van drie vroulike swemmers van die Australiese swemspan. Hy is deurgelaat deur die personeel by die deur sonder dat hy gewag het.

Die klub, met binneversiering op ‘n Chinese tema, is een van die duurstes in Londen, en lidmaatskap kos ongeveer R10 000 jaarliks. Die drankies is ook uitspattig duur.

Om mense te lok, laat die deurwagte gewoonlik ‘n lang tou mense buite wag, terwyl die klub binne leeg is, sodat dit moet lyk asof die plek bedrywig is. Swart besoekers kla gereeld dat hulle weggewys word. Dis net swart sokkerspelers of swart krieketsterre wat maklik toegang verkry, sê hulle.

Le Clos het Moët-sjampanje wat uit goue bottels bedien is, geniet.

Die Olimpiese legende Michael Phelps wat teen Le Clos verloor het, was nie deel van die geselligheid nie.

Phelps het dié week wenkbroue laat lig toe hy aan ‘n Amerikaanse sakekoerant vertel het swemmers sommer die swembad as ‘n toilet gebruik. “Ek dink almal piepie in die swembad,” het hy Maandag in ‘n video-onderhoud met die Wall Street Journal gesê.

“Dit is soort van ‘n normale ding vir swemmers. Jy weet, wanneer ons in die water is vir twee ure klim ons nie regtig uit om te, jy weet, te gaan piepie nie. Die chloor maak alles dood, so dis nie sleg nie.”

Phelps is die mees suksesvolle Olimpiese atleet van alle tye met 22 medaljes, insluitend 18 goues.

Hy het sy uittrede by die London Spele op 26-jarige ouderdom aangekondig.

Britse polisie bang om as rassiste gebrandmerk te word

Die Britse polisie is traag om misdade wat gepleeg word deur etniese minderhede te ondersoek, omdat hulle bang is hulle word as rassisties gebrandmerk.

‘n Verslag van die dinkskrum Civitas, sê druk van rasse-sensitiwiteit lê agter die aanvanklike versuim om behoorlik ondersoek in te stel na die bedrywighede van bendes in die noorde van Engeland.

Jon Gower Davies, ‘n voormalige akademikus, sê die versuim kom weens die feit dat die polisie al uitgekryt is as “institusioneel rassisties” deur onder meer die Macpherson-verslag.

Hierdie jaar is ‘n bende van Rochdale tronk toe gestuur omdat hulle tienermeisies met alkohol bedwelm het en hulle daarna verkrag het.

Almal behalwe een bendelid was uit ‘n Pakistani-agtergrond.

Die hof het gehoor dat tot 47 meisies deur die groep misbruik is en gedwing is om verskeie kere ‘n week seks te hê, maar twee jaar het verloop voor die polisie uiteindelik die bende gestop het. Hulle het aanvanklik niks gedoen toe ‘n 15-jarige meisie gesê het sy is verkrag nie, en eers 24 maande en nog ‘n reeks wit slagoffers later, het die polisie ingegryp.

‘n Voormalige Arbeiders-LP, Ann Cryer, het gesê die polisie se versuim om die saak behoorlik te ondersoek, was omdat hulle nie gebrandmerk wou word as rassiste nie.

‘n Voormalige Arbeidersraadslid, beskryf die gebrek aan ondersoek na seksuele misdade as ‘n geval van “omgekeerde” institusionele rassisme waarin die lot van die slagoffers, kwesbare wit meisies, nie ernstig opgeneem word nie.

Die verslag lui: “Toe die verhoor van ‘n aantal van die Pakistanse mans in Februarie 2012 uiteindelik voor die hof gekom het, het dit geblyk dat die bewerings van misbruik deur ‘n (wit) meisie net eenvoudig deur die polisie geïgnoreer is.”

In die voorwoord van die verslag, skryf dr. David Green, direkteur van Civitas, Macpherson se “giftige” nalatenskap het daartoe gelei dat misdade deur etniese minderhede, insluitende die sogenaamde “eermisdade”, nie na behore ondersoek word nie.

Malema se vriend kry R12 miljoen

Die Limpopo-regering het ‘n R12 miljoen-kontrak toegeken aan ‘n kontrakteur wat in gebreke gebly het om twee sperdatums te haal, volgens ‘n berig Maandag.

Die begroting van R41m het gestyg tot R53m vir die Seshego residensiële projek, wat deur Steve Bosch se maatskappy Raesetja Property Developers opgerig word, en wat handel dryf as Sizani Build It, het The Star berig.

Bosch het reeds R43m van die waarde van sy kontrak ontvang.

Notule van ‘n vergadering wat gehou is in Mei tussen Sizani en die departement het ook aangedui dat die materiaal wat gebruik word vir die projek nie deur die SA Buro vir Standaarde goedgekeur is nie.

Independent Newspapers het voorheen berig dat Bosch die bou van ‘n aantal eenhede laat vaar het, terwyl sy maatskappy meer as R38m verdien het gedurende die 2010/2011 finansiële jaar.

Bosch en die departement het nie reageer versoeke vir kommentaar nie.

Bosch is na bewering ‘n weldoener van die geskorste ANC-Jeugligapresident, Julius Malema, en het glo bande met Limpopose premier Cassel Mathale.

Bosch het ook na bewering bande met Limpopo se LUR vir koöperatiewe regering Clifford Motsepe en Limpopo se ANC-sekretaris Sowjet Lekganyane.

Александр Фильчаков

Rassistiese basketbalspan by Spele gewaarsku

Litause basketbal amptenare is gewaarsku om rassistiese gedrag deur die land se ondersteuners by die Olimpiese Spele te beheer.

‘n Litause ondersteuner het Nazi-gebare en aapgeluide gemaak tydens ‘n wedstryd teen Nigerië Dinsdag. Hy het skuldig gepleit op ‘n aanklag van “rassistiese gedrag” en is beboet met $3 910 deur ‘n Londense hof. ‘n Prokureur vir die ondersteuner het gister gesê sy kliënt het geglo dat sulke gedrag aanvaarbaar is by sportgebeure tuis.

Die Internasionale Basketbal Federasie se sekretaris-generaal Patrick Baumann het daarop aangedring dat rassistiese gedrag sal nie geduld word nie. FIBA het aan Litaue se amptenare gesê sy ondersteuners moet hulleself “goed gedra” het hy bygevoeg.

“Ons is absoluut teen enige so iets gekant en ons het aan die Litause afvaardiging aangedui dat dit beter sou wees vir hulle as hulle met hul ondersteuners kommunikeer,” het hy gesê.

Litaue, wat die bronsmedalje by die 2010 Wêreldbeker-kampioenskap gewen het, speel teen die Amerikaners Saterdag. Hulle kan gestraf word in ander kompetisies as hulle ondersteuners verdere rassistiese uitlatings in Londen maak.

“As dit gebeur, gaan dit ander gevolge hê buite die Londen Spele,” het Baumann gesê. “Dit gaan oor respek vir hul teenstanders, dit gaan oor respek vir die Spele, die Olimpiese waardes, en dit is ‘n viering van vriendskap tussen mense van regoor die wêreld.”

Olimpiese organiseerders het gesê rassistiese ondersteuners sal uit hul sitplekke gegooi word.

Clive Derby-Lewis doen aansoek om mediese parool

Clive Derby-Lewis gaan om mediese parool aansoek doen omdat hy siek is, het sy vrou Gaye Derby-Lewis vandag aan Eyewitness News gesê.

Sy beplan om die aansoek in die volgende weke in te dien en hoop die poging sal slaag aangesien haar man aan kanker ly, asook gangreen in een been.

Dit is die eerste keer dat Derby-Lewis om mediese parool aansoek doen. Hy is verlede jaar normale parool geweier, hoewel die departement van korrektiewe dienste dit ondersteun het.

Derby-Lewis was ‘n parlementslid van die Konserwatiewe Party onder die vorige bedeling en is tot lewenslange tronkstraf gevonnis weens sy aandeel in die sluipmoord op die sekretaris-generaal van die SA Kommunisteparty tydens 1993, Chris Hani.

Hy het ‘n vuurwapen aan Janusz Walus verskaf, wat dieselfde termyn tronkstraf uitdien.

Albei het aanvanklik die doodstraf ontvang. DIt is na lewenslange tronkstraf verander toe die doodstraf afgeskaf is.

Derby-Lewis is 76 jaar oud.

Daar is tans ‘n petisie vir Derby-Lewis se vrylating aan die gang.

topcargo отзывы

‘7 minute van angs’ vir Mars-verkenningstuig

Die Mars-verkenningstuig met die meeste hoë tegnologie aan boord het so pas op die rooi planeet geland.

NASA sê dit het Sondagaand ‘n sein van die Curiosity-verkenningstuig ontvang ná ‘n hellevaart deur die Mars-atmosfee wat as “sewe minute van angs” beskryf is.

Die verkenningstuig is die grootte van ‘n kleinerige motor, dus moes ingenieurs ‘n nuwe manier bedink om dit te laat neerdaal. Vir die eerste keer is kabels gebruik om die tuig binne ‘n reusekrate te laat afsak.

Teen $2,5 miljard, is dit die mees ambisieuse en duurste Mars-sending ooit. Vir die volgende twee jaar sal die verkenningstuig in rotse inboor en grond opskep. DIt sal die ‘n ondersoek doen om vas te stel of die planeet se omgewing lewe in die vorm van mikroskopiese organismes kon ondersteun.

Die Curiosity-verkenningstuig het vroeg Maandag ‘n vreesaanjaende landing oorleef met ‘n tegniek wat nog nooit tevore probeer is nie toe dit na die oppervlak van die Rooi Planeet soos ‘n spinnekop aan ‘n draad laat sak is, het die Amerikaanse ruimte-agentskap gesê.

Данильченко

Hillary Clinton in Suid-Afrika om Mandela te ontmoet

Die Amerikaanse minister van buitelandse sake Hillary Clinton het Suid-Afrika aangedoen om die anti-apartheidsheld Nelson Mandela vandag te sien, die het die Amerikaanse statedepartment gesê, ure ná haar aankoms op die laaste been van haar Afrika-toer.

Die middagete met die 94-jarige voormalige president sal in Qunu plaasvind, ‘n dorp in die suidooste van die land, in die voormalige Transkei.

Clinton, wat skoolmeisies en Afrika se tweede vrouepresident tydens ‘n eerste besoek aan Malawi Sondag ontmoet het, het agterna na Suid-Afrika gevlieg. Sy sal tot Donderdagoggend in Johannesburg, Pretoria en Kaapstad wees.

Terwyl sy in Suid-Afrika is, word verwag dat Clinton senior regeringsamptenare, asook senior verteenwoordigers van die Suid-Afrikaanse private sektor sal ontmoet.

Vroeër het die Amerikaanse departement van buitelandse sake aangekondig dat hy met die Amerikaanse kamer van koophandel saamwerk om ‘n sake-afvaardiging van ongeveer 10 senior VS-bestuurslui te lei wat die drie stede op Clinton se besoek sal aandoen.

“Suid-Afrika is die grootste mark in Afrika vir Amerikaanse goedere, en die Verenigde State van Amerika is ‘n belangrike uitvoermark en ‘n bron van direkte buitelandse belegging vir Suid-Afrika,” het die departement gesê.

Lede van die sake-afvaardiging sluit blykbaar senior bestuurders van Black & Veatch, Boeing, Chevron, EMD / Caterpillar, FedEx Express, GE, Symbion, Trimble, Wal-Mart en Zanbato in.

‘n Handelsending sluit intussen die hoofde van die Overseas Private Investment Corporation, die Uitvoer-invoerbank van die Verenigde State van Amerika, die Amerikaanse handels- en ontwikkelingsagentskap, asook Robert Hormats, visestaatsekretaris vir ekonomiese groei, energie en die omgewing, en Francisco Sanchez, visehandelsekretaris vir internasionale handel, in.

“Die sending beklemtoon ons verbintenis tot beleggingsgeleenthede in Afrika suid van die Sahara, veral in infrastruktuur, het die Amerikaanse departement van buitelandse sake gesê.

Ná besoeke aan Nigerië en Benin, sal Clinton ‘n reis na Turkye onderneem waar sy Saterdag aan ‘n gesprek oor die konflik in Sirië sal deelneem.