Dan Roodt, Author at praag.co.za

Ras oorheers, ook by RDK

Ras oorheers weereens die onderhoude wat by die Regterlike Dienskommissie van drie kandidate vir die posisie van die regter-president van KwaZulu-Natal gehou word.

Een van die kandidate sê dat ‘n Indiër liefs nie die pos moet kry nie.

Regter Isaac Madondo het Woensdag aan die kommissarisse gesê dat hy nie dink dat ‘n Indiërkandidaat geskik sou wees om die posisie te vul nie.

Toe IVP-LP Koos van der Merwe hom vra of dit tyd is om ‘n Indiër as regter-president aan te stel, het Madondo sonder huiwering geantwoord: “Ek dink nie so nie want ons het nog steeds dinge om aan te spreek, wanbalanse, allerlei dinge wat meer insig verg, wat ‘n persoon wat nie swart is nie, nie binnekennis van dra nie.

“Ons is verdruk, maar nie op dieselfde manier nie,” het hy gesê, en byvoeg dat swart prokureurs nie dieselfde geleenthede as hulle Indiese eweknieë gehad het nie.

Indiërs verteenwoordig net 8% van die bevolking, terwyl 86% van die bevolking swart is, het Madondo gesê.

Madondo is in 2007 aangestel en het die steun van drie regters in sy afdeling.

Na Madondo se onderhoud, was dit dié van Regter Lusindiso Pakade, die adjunk-regter-president van die Oos-Kaap. Hy is daarna gevolg deur die waarnemende Regter-president van KwaZulu-Natal, Chiman Patel.

Patel het die steun van die 14 regters van die KwaZulu-Natal-afdeling.

Tydens Patel se onderhoud, het Dumisa Ntsebeza, ‘n lid van die RDK, opgemerk dat die Black Lawyers’ Association in Pietermaritzburg hul kommer uitgespreek het oor die moontlikheid dat Patel aangestel kan word.

“Daar is ‘n vrees dat, sodra jy regter-president word, daar minder geleenthede vir swartes sal wees om in te kom, want jou neiging sal wees om waarnemende regters van Indiese afkoms in te bring,” het Ntsebeza gesê.

In reaksie hierop het Patel ‘n brief van die lede van die Black Lawyers’ Association ter ondersteuning van sy kandidatuur gelees toe hy verlede jaar ook vir die pos aansoek gedoen het.

Patel het gesê die meeste van die waarnemende regters wat onlangs aangestel is, is swartes.

Hy het ‘n uiteensetting van die rasse-samestelling van die regbank gegee vandat hy in beheer is sedert April.

Meer as 67,7% van die regters was mans en 33,3% vroue, 29,2% is wit, 8,3% bruin, 29,2% Indiër en die meerderheid, ‘n derde, is swart.

Patel, ‘n voormalige dosent van die Universiteit van Natal, was Hoofregter Mogoeng Mogoeng se dosent.

Onderwyser wat leerlinge verkrag, voorlopig geskors

‘n Swart onderwyser is aangekla van verkragting en voorlopig geskors by ‘n hoërskool in KwaThema in Springs, het die departement van onderwys gesê.

Twee leerlinge van die Nkumbulo Hoërskool het aanklagte van verkragting en intimidasie teen die onderwyser ingedien, het Charles Phahlane, Gautengse onderwyswoordvoerder, gesê.

Die man wat in sy 40’s is, het Maandag in die hof verskyn en is Dinsdag op borgtog vrygelaat.

“Hy is voorlopig geskors hangende ‘n ondersoek.”

Die departement ondersoek die moontlikheid dat ander leerders ook mishandel is.

“Daar is nog bewerings van ander leerders en ons sal die saak verder ondersoek.”

Sielkundigdes is na die skool gestuur.

Polisielede vas vir verkragting

Twee polisiebeamptes, en nog ‘n verdagte is in hegtenis geneem vir verkragting in Nelspoort, het die polisie in die Wes-Kaap Woensdag gesê.

Die drie mans, tussen die ouderdomme van 23 en 33, is Dinsdag in hegtenis geneem, het kapt. Malcolm Pojie gesê.

Hulle het na bewering vier meisies tussen die ouderdomme van 14 en 18 mishandel en verkrag tussen Januarie verlede jaar en April vanjaar.

“Daar word beweer dat die beskuldigdes seksuele dade met die slagoffers uitgevoer het sonder hul toestemming.”

Die twee polisiebeamptes is by die Nelspoort-polisiekantoor in hegtenis geneem. Volgens Pojie sal meer inhegtenisnemings volg, aangesien nog mense vermoedelik betrokke was.

‘n Dissiplinêre ondersoek is geloods.

“Ons kan nie en sal nie toelaat dat ons lede betrokke word by misdade nie,” het lt. genl. Arno Lamoer, provinsiale polisiekommissaris, gesê.

Die drie mans sal Donderdag in die landdroshof op Beaufort-Wes verskyn op aanklagte wat met verkragting verband hou.

Getuienis oor ET-semen kom

Die plaaswerker Chris Mahlangu sal getuienis lewer oor hoe semen op Eugene Terre’Blanche se geslagsdele gekom het, het sy regsverteenwoordiger Woensdag in die rondgaande hof op Ventersdorp gesê.

“Die is nie die beskuldigde se weergawe dat hulle na Terre’Blanche se huis gegaan het met die bedoeling om hom te vermoor nie,” het Kgomotso Tlouane gesê.

“Hy sal getuienis lewer oor hoe semen op die oorledene se geslagsdele gekom het.”

Tlouane het gepraat tydens die getuienis van kapt. Jan Louw. Louw het getuig oor die misdaadtoneel en sy polisieverklaring.

Louw se verklaring het nie melding gemaak van semen wat op Terre’Blanche gevind is nie, maar hy het dit in die hof genoem.

Adv. Zola Majavu, wat vir die minderjarige optree, voer aan dat Louw die AWB-leier se familie wou beskerm.

“Die rede hoekom jy uitgelaat het dat semen op die penis gevind is, is omdat jy nie Terre’Blanche se familie wou verneder nie.”

Praag het reeds vroeër oor die aangeleentheid berig.

Die hof het vroeër gehoor dat die polisie Mahlangu weggewys het toe hy hulle genader het oor die manier waarop Terre’Blanche hom behandel nie.

Die verhoor duur voort.

Moordbeskuldigde vrees ET, vra glo polisiehulp

Chris Mahlangu, wat van die moord op Eugene Terre’Blanche beskuldig word, het die polisie voor die moord om hulp genader, het die rondgaande hooggeregshof op Ventersdorp Woensdag gehoor.

Mahlangu (28) is weggewys omdat nie een van die polisiebeamptes Terre’Blanche wou konfronteer nie.

“Hy het voor die voorval gesê hy het ‘n probleem met die oorledene. Hy het gesê hy is al voorheen deur die oorledene geslaan en dat Terre’Blanche hom gewurg en opgetel het,” het Kgomotso Tlouane, Mahlangu se regsverteenwoordiger, gesê.

“Hy [Mahlangu] het verder getuig dat hy probeer het om dit by die Ventersdorp-polisiekantoor aan te meld, maar dat polisiebeamptes nooit na hom geluister het nie.”

Mahlangu het gehoor hoe polisiebeamptes mekaar vra wie met Terre’Blanche gaan praat. Hy het die indruk gekry dat hulle bang was, omdat niemand die AWB-leier wou konfronteer nie.

Tlouane het gesê Mahlangu sal getuig dat hy een keer geslaan is. Die 28-jarige was “behoeftig, sonder geld en kos en hy was nie ‘n geleerde man nie”.

Die polisiebeamptes het nooit aan hom verduidelik wat sy opsies is nie. Mahlangu het nie ‘n ander keuse gehad as om na die plaas terug te gaan en geslaan te word nie, het die hof gehoor.

Mahlangu het egter nie sigbare merke gehad om vir die polisie te wys nie.

Terre’Blanche is op 3 April verlede jaar op sy plaas aan die buitewyke van Ventersdorp, na bewering tydens ‘n loondispuut, vermoor.

Albei beskuldigdes het onskuldig gepleit op aanklagte van moord, huisbraak en poging tot roof met verswarende omstandighede.

Mahlangu beweer hy het uit selfverdediging opgetree, terwyl die 16-jarige enige betrokkenheid in die moord ontken het.

Лобановский

Nuwe kuberaanval dreig

‘n Nuwe rekenaarvirus met “byna identiese dele van die kubersuperwapen Stuxnet is ontdek op rekenaarstelsels in Europa en daar word geglo dat ‘n nuwe Stuxnetaanval kan volg, het ‘n groot Amerikaanse kuberveiligheidsmaatskappy gesê.

Stuxnet is ‘n hoogs gesofistikeerde rekenaarwurm wat verlede jaar ontdek is en stelsels op ‘n kernverrykingsaanleg in Iran vernietig het. Op die oomblik, het Amerikaanse amptenare gesê, beskik die wurm se ongekende kompleksiteit oor die potensiële vermoë om industriële stelsels fisies te saboteer, wat alles soos watersuiwering tot die elektrisiteitsnetwerk in die VSA en in baie lande regoor die wêreld kan verlam in ‘n nuwe fase van kuberoorlogvoering.

Verskeie kuber-sekuriteitsdeskundiges het gesê dit is waarskynlik ‘n staat wat dit geskep het en die VSA en Israel is op ‘n kortlys van moontlike skuldiges.

Die nuwe bedreiging, wat deur ‘n Europese navorsingslaboratorium ontdek is en die bynaam “Duqu” het, is nie ontwerp om industriële stelsels te teiken soos Stuxnet was nie, maar blykbaar slegs om inligting in te win oor moontlike teikens wat nuttig kan wees in ‘n toekomstige kuberaanval, sê Symantec.

Duqu is ontwerp om sleutelaktiwiteit aan te teken en ander stelselinligting te versamel by maatskappye in die industriële sfeer, sê Symantec.

Indien suksesvol, kan die inligting verkry uit die maatskappye deur Duqu gebruik word in ‘n toekomstige aanval op enige industriële beheerstelsel in die wêreld waar die maatskappye se produkte gebruik word – van ‘n kragstasie in Europa tot ‘n olieboor in die Golf van Mexiko .

“Op die oomblik is dit in die verkenningstadium, kan jy sê,” het Symantec se senior direkteur vir veiligheid, Gerry Egan, aan ABC News gesê. “Maar daar is ‘n duidelike aanduiding dat ‘n aanval beplan word.”

Duqu is ook nie ontwerp om op sy eie te versprei nie, sodat navorsers glo dat sy doelwitte die rekenaarstelsels wat dit reeds geïnfiltreer het, is, het Egan gesê.

Donen-verslag kan politieke opponente uitskakel

President Jacob Zuma het gister onderneem om die Donen-kommissie van ondersoek se vyf-jaar-oue verslag vry te stel.

Dit handel oor die Olie-vir-Voedsel-program in Irak, ‘n skuif wat sy teenstanders kan fnuik en sy kanse vir ‘n tweede termyn as ANC-president kan vergemaklik.

Dié stap het nou ‘n stokkie gesteek voor die planne van ondersteuners van die adjunkpresident, mnr Motlanthe se aanspraak op die ANC-presidentskap. Motlanthe word ook in die verslag genoem.

Onder diegene wat in die verslag genoem word is die ontslape sakeman Sandile Majali, minister Tokyo Sexwale, Motlanthe, en Sandile Nogxina, ‘n voormalige mynbou-direkteur-generaal.

Oud-president Thabo Mbeki het ‘n kommissie van ondersoek aangestel in 2006 oor die “beweerde onwettige aktiwiteite van sekere Suid-Afrikaanse maatskappye of individue wat verband hou met die Verenigde Nasies (VN) se Olie-vir-Voedsel-program in Irak”.

Mbeki is deur die VN-kommissie gevra om die ondersoek te onderneem om Suid-Afrika se naam in ere te herstel voordat ‘n Veiligheidsraadstoel aan die land aangebied is.

Adv Donen het gister gesê hy sal bly wees indien die aanbevelings ter harte geneem en geimplementeer word. “Die herhaling van ‘n soortgelyke skandaal in die toekoms sal só voorkom word.”

Mnr Zuma se onderneming om die verslag vry te stel teen nie later nie as 7 Desember nie, het gekom nadat die Cape Argus begin met ‘n dringende aansoek in die Kaapse Hooggeregshof vir die vrystelling van die verslag.

Bronne in die Presidensie het gesê mnr Zuma is deur sy regspan aangeraai om nie die aansoek teen te staan nie en die verslag openbaar te maak.

Mnr Zuma se voorgangers, Mbeki en Motlanthe het ook geweier om die verslag vry te stel toe opposisiepartye dit geëis het.

Motlanthe het betrokke geraak het in die skandaal as gevolg van sy onderhandelinge met die ANC-weldoener Majali, wat verlede jaar oorlede is.

Volgens ‘n verslag van die Sunday Times in 2009, het die dokument aan die lig gebring dat Motlanthe “toegang tot die harde inligting oor Mnr Majali se oliehandel gehad het”.

Majali was ook in Suid-Afrika se Oilgate-skandaal in 2004 betrokke, toe hy beskuldig is van die kanalisering van geld van PetroSA na die ANC deur Imvume.

In wat blyk ‘n poging te wees om die politieke gevolge van sy besluit te bestuur, het Mac Maharaj, Zuma se woordvoerder, gesê die president is bewus van die moontlike misbruik van die inhoud van die verslag “.

Motlanthe het intussen aan vertrouelinge gesê sy toekoms sal bepaal word in Mangaung. Hy is bereid om enige posisie te aanvaar wat ANC-lede vir hom kies.

Die ANC-Jeugliga is aan die voorpunt van die veldtog om Motlanthe te kies. Sy veldtog het die ondersteuning ontvang in sommige provinsies soos Limpopo, Gauteng, die Noord-Kaap en die Noordwes.

Zuma het egter die ondersteuning van die grootste stemblokke in KwaZulu-Natal en Oos-Kaap.

Die Vryheidsfront het intussen die besluit van president Jacob Zuma om die Donen-verslag bekend te maak, verwelkom.

“Die VF Plus het deurlopend, sedert November 2006, toe adv. Michael Donen sy verslag oor sy ondersoek na die Irakse olie-vir-voedsel-skandaal aan die voormalige president, Thabo Mbeki, oorhandig het, die ANC-regering gevra om die verslag bekend te maak.

Dit is hoogtyd dat Suid-Afrika uitvind watter voordeel die ANC uit die skandaal bekom het,” het adv. Anton Alberts, die VF Plus se parlementêre woordvoerder oor Minerale gesê.

“In Oktober 2008 het die VF Plus in ‘n brief aan mnr. Kgalema Motlanthe, wat president Mbeki opgevolg het, versoek dat hy die Donen-verslag bekendmaak. Die party het in die brief aan die president daarop gewys dat president Mbeki vir 21 maande geweier het om die verslag en die bevindinge daarin bekend te maak. Mnr. Motlanthe kon uit hoofde van die feit dat hy president was die Donen-verslag bekendmaak. Dit sou hom die geleentheid gegee het om die lug te suiwer oor sy persoonlike aandeel in die olie-vir-voedsel-kontrakte wat die ANC met Irak gesluit het. Motlanthe het egter net soos sy voorganger, Mbeki, geweier om die verslag aan die publiek bekend te maak,” het adv. Alberts bygevoeg.

“Die feit dat president Zuma juis op hierdie tydstip bereid is om die Donen-verslag bekend te maak, nagenoeg 30 maande nadat hy die amp as president opgeneem het, laat die vraag ontstaan of hy die verslag nou bekend gaan maak omdat hy politieke wins daaruit kry. Dit is algemeen bekend dat politieke opponente in die ANC van president Zuma wat moontlike leierskap-aspirasies het, deur die verslag negatief geïmpliseer kan word gegewe hulle betrokkenheid by die onderhandeling en opstel van die olie-vir-voedsel-kontrakte. Die vraag kan daarom met reg gevra word of die Donen-verslag soos die kommissie van ondersoek na die wapentransaksie, deel van die interne stryd van die ANC geword het in aanloop van die Mangaung-kongres in 2012,” het Alberts gesê.

Korrupsie

Terwyl die polisiehoof, Bheki Cele en sy topbestuur in die parlement kleitrap om die polisie se geldsake te verduidelik, en die hoof van die vervolginsgesag op kort kennis nie voor ‘n parlementêre komitee verskyn om verantwoording te doen nie, meen die hoof van die Spesiale Ondersoekeenheid, Willie Hofmeyr dat sy eenheid 7 000 eerder as 700 personeellede nodig het om korrupsie in die land te ondersoek.

Hofmeyr meen die omvang beloop net in die staat se verkrygingsadministrasie jaarliks tussen R25 en R30 miljard. Dit is sowat 20 % van die betrokke begroting wat jaarliks in die stof byt.

Volgens ‘n onlangse berekening betaal Suid-Afrikaners gemiddeld 20 % per item meer as premie om die koste van korrupsie in die land te finansier.

Volgens die Wêreldbank beroof korrupsie ‘n land van sy toekoms. Korrupsie word ook as ‘n aanslag teen demokrasie beskou.

Korrupsie teiken dikwels die mees blootgesteldes en die armes. Pas is ‘n werknemer van die Statistiekdiens in hegtenis geneem omdat hy glo omkoopgeld van mense geëis het om as sensuswerkers aangestel te word. Ander gevalle kom gereeld aan die lig oor hoe mense genadeloos werkloses uitbuit wat desperaat op soek is na werk, of ou mense uit hul beleggings-neseiers swendel.

In Suid-Afrika is die omstrede wapenskandaal waarskynlik die vlagskip van die korrupsiepersepsie – nie net oor wat gebeur het nie, maar hoe tot dusver probeer is om dit toe te smeer.

Dit is egter nie al nie. Die persepsie dat korrupsie aanvaarbaar is en selfs beloon word, word byvoorbeeld versterk deur die wyse waarop kaders wat uitgevang word bloot elders ontplooi word. Hieronder tel ‘n oud-munisipale bestuurder wat, terwyl hy tereg staan op aanklagte van onder meer korrupsie, bedrog en rampokkery, as administrateur aangestel is om ‘n munisipaliteit in ‘n ander provinsie te probeer regruk.

Selfs ‘n LUR bly in sy pos en sy amp in die ANC aan terwyl hy vir korrupsie verhoor word. Selfs die hoof van die Minister se ontplooiingspan het ‘n rits ongunstige OG-verslae in onder meer Bronkhorstspruit en Plettenbergbaai agter die blad.

Die bedenklike aanspreek van korrupsie hou onder andere twee gevare in: Daar kan ‘n deurlopende aanslag vanuit politieke geledere teen die integriteit en onafhanklikheid van die regbank wees, en die vryheid van die media kan onder voortdurende druk wees. Ongelukkig is hierdie simptome ook aanwesig.

Zuma gooi wal teen Tibettaanse beskuldigings

President Jacob Zuma het sy regering se buitelandse beleid verdedig en gesê dit word onafhanklik en in nasionale belang geformuleer.

Hy sê buitelandse beleidsbesluite neem in ag wat tot voordeel vir Suid-Afrikaners is, en huishoudelike prioriteite sal bevorder.

Die Zuma-administrasie is die afgelope paar weke wyd en skerp gekritiseer omdat die Dalai Lama nie ‘n visum ontvang het om die land te besoek nie.

Sommige waarnemers het sover gegaan om te sê dat China die land se buitelandse beleid bepaal.

Die regering is weer eens oor die Dalai Lama visumdebakel gekritiseer. Die Tibettaanse geestelike leier se verteenwoordiger in die land, Sonam Tenzing, het president Jacob Zuma en die Minister van Internasionale Verhoudinge en Samewerking, Maite Nkoana-Mashabane, daarvan beskuldig dat hulle nie vooraf standpunt ingeneem en ‘n besluit geneem het nie.

Tenzing het die Kaapse Persklub toegespreek.

Александр Фильчаков

Johannesburg gaan vervalste lisensies ondersoek

Die minister van vervoer, Sbu Ndebele, het Dinsdag ‘n ondersoek geloods na vervalste leerders- en bestuurderslisensies in Johannesburg.

“Bedrog en korrupsie sal nie by enige toetssentrum geduld word nie,” het hy in ‘n verklaring gesê.

“…Ons sal niks onaangeroer laat met sulke kwessies nie. Dié wat omkoopgeld aanvaar en dié wat dit aanbied sal met die volle mag van die gereg te doen kry.”

‘n Berig in The Star Dinsdag het onthul dat vervalste lisensies by vier van Johannesburg se vyf toetssentrums vir tussen R800 en R4 500 verkoop word.

Dit word hoofsaaklik gereël deur motorwagte en bestuurskole wat saam met eksaminatore van die sentrums werk, het die koerant berig.

Die nasionale departement van vervoer het gesê verskeie beamptes en lede van die publiek is reeds in hegtenis geneem in verband met motor- en bestuurderslisensies in die afgelope jaar.

‘n Provinsiale woordvoerder van die departement, het gesê sommige regeringsbeamptes is ook betrokke by die reël van hierdie lisensies.

“Ons gaan beslis op ‘n onkonvensionele manier moet optree,” het sy gesê.

Sommige toetssentrums kan dalk selfs gesluit word.

“Mense vind gedurig nuwe maniere om die stelsel te klop.

“Dit is ongetwyfeld ‘n probleem vir die departement. Ek gaan dit nie ontken nie.”